Bìoball air-loidhne

Amarkɩ 9 - Farefare Ninkaré

¹ La a le yele ba yetɩ: «Mam yetɩ ya la sɩra, tɩ yãma nẽr-sɛba n boe kalam wã, basɛba kãn ki, sãn dagna tɩ ba wa yẽ la Nawẽnnɛ so'olʋm n sẽm na pãŋa.»

Azezi nẽŋa teere
( Amatie 17:1-13 , Aluki 9:28-36 )

² Tɩ dabsa ayoobɩ daan tole, tɩ Azezi botɩ Apɩyɛɛrɩ, la Azakɩ, la Azã mã'a doose ẽ tɩ ba sẽŋɛ kẽnkɛrŋa ka zom tãn-kãtɛ zuo. Tɩ a nẽŋa teege ba nẽŋam.

³ Tɩ a futo pelge yɩlɩ yɩlɩ yẽgra halɩ, tɩ nẽra ka bɔna dũnia wã zuo tãna wʋn peege tɩ ba pelge bɛla.

⁴ Tɩ A'eli, la Amoyisi puke ba zẽ'am tɔgra la Azezi.

⁵ Tɩ Apɩyɛɛrɩ yele Azezi yetɩ: «Karẽnsãama, tõma n boe kalam wã, la ãn sõŋa mɛ. Basɛ tɩ tɩ tĩ põnsɩ batã, bɔ fõn ayɩla, bɔ Amoyisi ayɩla, bɔ A'eli ayɩla.»

⁶ A daan ka mi ẽŋa n tɔgɛ se'em, se'ere n soe la, dabeem n daan kẽ ba.

⁷ Tɩ sawatɛ wa'am wa lile ba la a mã'asʋm. Tɩ kõa ze'ele sawatɛ la pʋam yetɩ: «Ẽna de la mam Dayʋa tɩ mam nõŋɛ. Selse-ya a yetɔga.»

⁸ Bilam mẽŋa tɩ ba bɩsɛ kaagɛ ka le yẽ nẽra, sãn dagna Azezi mã'a n boe ba zẽ'am.

⁹ Tɩ ba ze'ele tãŋa la zuo sigra, tɩ Azezi kã'an ba yetɩ: «Da tɔgɛ-ya pa'alɛ nẽra nẽra yãma n yẽ sɛla la, sãn dagna tɩ Nẽrsaala Dayʋa la wa ki mɛ, dee vo'oge.»

¹⁰ Tɩ ba to'oge ẽn yele se'em na, dee sɔkra taaba yetɩ: «Kũm vo'ore võorɛ de la bẽm?»

¹¹ Tɩ ba soke Azezi yetɩ: «Bẽm tɩ lɔɔ karẽnsãandõma yetɩ, dẽnɩ tɩ A'eli dẽŋɛ wa'am, tɩ Krisi yãŋa wa'am poorʋm?»

¹² Tɩ a lerge ba yetɩ: «Asɩra, A'eli n wʋn dẽŋɛ wa'am wa malgɛ sɛla woo. La bẽm tɩ la gʋlsɛ Nẽrsaala Dayʋa la yelle yetɩ, a wʋn nãmsɛ mɛ zozo'e dee yẽ pɔ'ɔrɛ?

¹³ La mam yetɩ ya mɛ tɩ A'eli põn wa'am mɛ, tɩ nẽrba ẽŋɛ ẽ ban boorɩ se'em, wʋ lan gʋlsɛ a yelle Nawẽnnɛ gõŋɔ pʋam se'em na.»

Kʋlkã'arga n dolɩ bia, tɩ Azezi dige ẽ tɩ a yese
( Amatie 17:14-21 , Aluki 9:37-43 )

¹⁴ Ban lebe ka lɛm karẽnbiisi basɛba la zẽ'am na, ba yẽ la nẽr-kʋʋŋɔ zozo'e n kaagɛ ba, tɩ lɔɔ karẽnsãandõma basɛba wẽ'era nõkɛ'ɛma la ba.

¹⁵ La nẽrba la n daan yẽ Azezi la, la di'ige ba mɛ, tɩ ba zoe ka pʋ'ʋsɛ ẽ.

¹⁶ Tɩ Azezi soke ba yetɩ: «Bẽm yelle tɩ yãma wẽ'era nõke'ene la ba?»

¹⁷ Tɩ nẽra ayɩla ze'ele nẽr-kʋʋŋɔ la tẽŋasʋka yele yetɩ: «Karẽnsãama, mam tarɩ la m dayʋa wa'am fõn zẽ'am, kʋlkã'arga n dolɩ ẽ botɩ a dɛna muko.

¹⁸ La kʋlkã'arga la sãn ẽn girge ẽ, a lʋbrɩ ẽ mɛ tɩ nõtõn-fulunfuka yɛsra, tɩ a ɔbra yẽna dee gorŋe. Bɛla tɩ mam tarɩ ẽ wa'am wa sose fʋ karẽnbiisi la yetɩ ba dige kʋlkã'arga la tɩ a yese, tɩ ba ka yãŋɛ.»

¹⁹ Tɩ Azezi yele ba yetɩ: «Zamãan-ẽna nẽrba, ya ka bɔ'ɔrɩ mam sɩra, mam wʋn bɔna la yãma mã'agɛ m mẽŋa halɩ ka paagɛ la wakat-kãna? Tarɩ-ya bia la wa'am.»

²⁰ Tɩ ba tarɩ ẽ wa'am a zẽ'am. La kʋlkã'arga la n yẽ Azezi la, bilam mẽŋa a dãan bia la mɛ, tɩ a lui tẽŋa bilna, tɩ nõtõn-fulunfuka yɛsra a nõorʋm.

²¹ Tɩ Azezi soke bia la sɔ yetɩ: «Wakat-kãna tɩ bõn-ẽna ẽŋɛ ẽ?» Tɩ a lerge yetɩ: «A bõnbɩ'ɩlʋm.

²² La kʋlkã'arga la ẽn lʋbɛ ẽ na bugum, bɩɩ ko'om pʋam, bɔɔra tɩ a kʋ ẽ. Fʋ sãn tãna wʋn ẽŋɛ sɛla, zoe tɩ ninbãalga sõŋɛ tɔ.»

²³ Tɩ Azezi lerge ẽ yetɩ: «Bẽm tɩ fʋ yetɩ, fõn sãn tãna? Nẽr-sɛka woo n bɔ Nawẽnnɛ sɩra, a tã wʋn ẽŋɛ sɛla woo bɔ ẽ mɛ.»

²⁴ Bilam mẽŋa tɩ bia la sɔ tɔgɛ ke'enke'em yetɩ: «Mam bɔ sɩra, la sõŋɛ mam tɩ m bɔ sɩra pa'asɛ.»

²⁵ La Azezi daan yẽ tɩ nẽr-kʋʋŋɔ n zotɩ sẽna a zẽ'am, tɩ a tãsɛ kʋlkã'arga la yetɩ: «Kʋlkã'arga n botɩ nẽra dɛna muko la waŋa, mam yetɩ fʋ yese dee basɛ ẽ, da le doose ẽ.»

²⁶ Tɩ kʋlkã'arga la kaasɛ tagurga, dee bigse bia la ke'enke'em, dee yese. Tɩ bia la ãna wʋ kũm na. Tɩ nẽrba zozo'e yetɩ a ki mɛ.

²⁷ Tɩ Azezi gʋrɛ a nu'ugo zẽkɛ ẽ, tɩ a isge ze'ele saazuo.

²⁸ La Azezi daan kẽ la deem, ẽŋa la a karẽnbiisi la mã'a, tɩ ba soke ẽ yetɩ: «Bẽm tɩ tõma ka tã'agɛ dige kʋlkã'ar-ẽna?»

²⁹ Tɩ a lerge ba yetɩ: «Sãn dagna pʋ'ʋsgɔ, sɛla sɛla ka boe n tã wʋn dige kʋlkã'ar-ẽna buuri.»

Azezi le tɔgɛ a kũm, la a vo'ore yelle
( Amatie 17:22-23 , Aluki 9:43-45 )

³⁰ La ba daan yese bilam doose la Galile tẽŋa tole. La Azezi daan ka boorɩ tɩ nẽra bãŋɛ ẽŋa n boe zẽ'a.

³¹ A daan zãsʋm a karẽnbiisi la yetɩ: «Ba wʋn dɩkɛ Nẽrsaala Dayʋa la ẽŋɛ la nẽrba nu'usum, tɩ ba kʋ ẽ. La ba sãn kʋ ẽ, dabsa atã daarɛ a wʋn vo'oge mɛ.»

³² Tɩ ba daan ka bãŋɛ yetɔga la võorɛ, dee zɔta ka soke ẽ.

Ãne n wʋn dɛna nẽr-kãtɛ?
( Amatie 18:1-9 , Aluki 9:46-50 ; 17:1-2 )

³³ Tɩ ba sẽŋɛ ka paagɛ Kapɛrnaʋm kẽ deem. Tɩ Azezi soke a karẽnbiisi la yetɩ: «Bẽm yelle tɩ yãma wẽ'erɩ nɩ nõke'ene sore zuo la?»

³⁴ Tɩ ba sĩna, se'ere n soe la, ba wẽ'erɩ la nõke'ene la taaba bɔɔra tɩ ba bãŋɛ sɛka n de nẽr-kãtɛ gãnna.

³⁵ Tɩ Azezi zĩ'ire, wi a karẽnbiisi pia la ayi la yele ba yetɩ: «Nẽra sãn bɔɔra tɩ a dɛna nẽŋadãana, dẽnɩ tɩ a dɛna poorʋm dãana, la nẽrba wuu tõntõnna.»

³⁶ Azezi yele bɛla dee tarɩ la bi-pɩka wa ze'ele ba tẽŋasʋka, dɩkɛ a nu'usi kɔkɛ bia la, dee yele ba yetɩ:

³⁷ «Nẽra sãn to'oge bi-pɩka ẽna tadãana mam yʋ'ʋrɛ ĩyã, a to'oge la mam mẽŋa, la nẽra sãn to'oge mam mẽŋa, la dagɩ mam tɩ a to'oge, a to'oge la sɛka n tõm mam na.»

³⁸ Tɩ Azã yele ẽ yetɩ: «Karẽnsãama, tõma daan yẽ la bʋraa n tarɩ fõn yʋ'ʋrɛ digra kʋlkã'arsɩ, la ẽŋa n ka po dɛna tõma nẽra la ĩyã tɩ tõma gu ẽ.»

³⁹ Tɩ Azezi yele ba yetɩ: «Da gu-ya ẽ, se'ere n soe la, nẽra ka boe wʋn tõm tõon-yãlma la mam yʋ'ʋrɛ, dee tɩ la ẽŋɛ fẽe tɩ a le tã'agɛ tɔgɛ mam be'em.

⁴⁰ Nẽr-sɛka n ka sisri tõma, a de la tõma nẽra.

⁴¹ Mam yetɩ ya la asɩra, tɩ nẽra sãn bɔ ya ko'om tɩ ya yũ, yãma n de mam n de Krisi nẽrba la ĩyã, ẽŋa dãana kãn koŋe a yɔɔrɔ.

⁴² La nẽra sãn botɩ kɔm-pɩgsɩ bãna wã n bɔ mam sɩra la ayɩla basɛ Nawẽnnɛ sore, sɩbgrɛ sɛka tɩ a wʋn yẽ la, ba sãn dɩkɛ nẽerɛ kug-kãtɛ lʋ yulse a yugla lobe ẽ basɛ ko-kãtɛ pʋam n sõɩ.

⁴³ La fʋ nu'ugo sãn yetɩ a botɩ fʋ basɛ Nawẽnnɛ sore, fʋ wike ẽ basɛ, se'ere n soe la, fʋ sãn tara nu'u-yẽŋɔ dee kẽ Nawẽnnɛ yire vɔa, n sõɩ fõn wʋn tara nu'usi bayi dee kẽ bug-tẽŋa, [

⁴⁴ zẽ'e-ẽŋa tɩ zũnzũa boe mĩ dita nẽrba ĩyã ka kiira, dee tɩ bugum na ka kĩŋra.]

⁴⁵ La fʋ nã'arɛ sãn yetɩ a botɩ fʋ basɛ Nawẽnnɛ sore, fʋ wike ẽ basɛ, se'ere n soe la, fʋ sãn tara nã'a-yẽŋɔ dee kẽ Nawẽnnɛ yire vɔa, n sõɩ fõn wʋn tara nãma bayi dee tɩ ba dɩkɛ fʋ lobe basɛ bug-tẽŋa, [

⁴⁶ zẽ'e-ẽŋa tɩ zũnzũa boe mĩ dita nẽrba ĩyã ka kiira, dee tɩ bugum na ka kĩŋra.]

⁴⁷ La fʋ nifo sãn yetɩ a botɩ fʋ basɛ Nawẽnnɛ sore, fʋ kɩrgɛ ẽ basɛ, se'ere n soe la, fʋ sãn tara nin-yẽŋɔ dee kẽ Nawẽnnɛ so'olʋm, n sõɩ fõn wʋn tara nini bayi dee tɩ ba lobe fʋ basɛ bug-tẽŋa,

⁴⁸ zẽ'e-ẽŋa tɩ zũnzũa boe mĩ dita nẽrba ĩyã ka kiira, dee tɩ bugum na ka kĩŋra.

⁴⁹ Ba wʋn dɩkɛ la bugum makɛ nẽrba wuu wʋ ban dɩkɛ yaarʋm yugse sɛla.

⁵⁰ Yaarʋm ãn sõŋa mɛ, la yaarʋm sãn sabgɛ, ba wʋn ẽŋɛ la wãne botɩ a le ãna yẽlʋm? Ãna-ya wʋ yaarʋm n tarɩ yẽlʋm se'em na, dee tara sũ-mã'asʋm la taaba.»

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan