Amarkɩ 5 - Farefare Ninkaré

Kʋlkã'arsɩ n dolɩ bʋraaga, tɩ Azezi dige ba
( Amatie 8:28-34 , Aluki 8:26-39 )

¹ La Azezi la a karẽnbiisi la dooge paagɛ la mõgrɛ la doone Geraza dõma tẽŋa pʋam.

² Tɩ Azezi ze'ele õorŋɔ la pʋam sige. Tɩ bʋraa tɩ kʋlkã'arga dolɩ ẽ darɛ ze'ele yɔɔrʋm sẽnna tʋ'ʋsra ẽ.

³ Bʋraa la daan kẽ'erɩ la yɔɔrɔ la tẽŋasʋka. Tɩ ba daan ka le tãna wʋn ba ẽ na bãnsɩ.

⁴ Se'ere n soe la, ba daan ẽn ba la a nãma la a nu'usi la bãnsɩ, tɩ a ẽn kɔ ba basɛ. Tɩ nẽra nẽra daan ka tãna wʋn yãŋɛ ẽ.

⁵ Wʋntɛɛŋa la yʋ'ʋŋɔ a ẽn ɛɛra la yɔɔrʋm, la tãnsɩ tẽŋasʋka kaasra tagursi, dee wẽ'era a mẽŋa la kuga pɔgna.

⁶ Tɩ a yẽ Azezi zãazãarɛ, zoe sẽŋɛ ka ka dũma tẽŋa a nẽŋam,

⁷ dee tɔgɛ ke'enke'em yetɩ: «Azezi, Nawẽnnɛ n gãnnɩ wuu Dayʋa, bẽm n boe mam na fõn tẽŋasʋka? Mam sosrɩ fʋ mɛ Nawẽnnɛ ĩyã, da nãmsɛ ma.»

⁸ Azezi dẽŋɛ yele kʋlkã'arga la mɛ yetɩ a yese dee basɛ ẽ. Bɛla n soe tɩ kʋlkã'arga la yele bɛla.

⁹ Tɩ Azezi soke ẽ yetɩ: «Fõn yʋ'ʋrɛ?» Tɩ a lerge yetɩ: «Mam yʋ'ʋrɛ de la Atʋsa, se'ere n soe la, tõma zo'oge mɛ.»

¹⁰ Tɩ a belem Azezi yetɩ, a da dige bãma tɩ ba yese tẽŋa la pʋam.

¹¹ La kurkurdõma zozo'e n daan boe tãŋa zuo ɔbra.

¹² Tɩ kʋlkã'arsɩ la belem Azezi yetɩ: «Bɔ tɩ nõorɛ tɩ tɩ sẽŋɛ ka kẽ kurkurdõma la.»

¹³ Tɩ a sakɛ ban yele se'em na. Tɩ kʋlkã'arsɩ la basɛ bʋraa la dee sẽŋɛ ka kẽ kurkurdõma la. Tɩ ba wuu zoe sige ka lui mõgrɛ pʋam ki. Ba kãllɛ daan de wʋ tʋsayi.

¹⁴ Tɩ sɛba n daan gu'uri kurkurdõma la zoe sẽŋɛ tẽŋa pʋam, la kẽnkɛrsɩ la wuu ka yele sɛla n ẽŋɛ la. Tɩ ba sẽŋɛ tɩ ba ka bɩsɛ lan ẽŋɛ se'em.

¹⁵ La ban paagɛ Azezi zẽ'am na, ba yẽ bʋraa la tɩ kʋlkã'arsɩ la daan dolɩ ẽ na n zĩ mĩ, yɛ futo, tɩ a yɛm bɔna sõŋa sõŋa. Tɩ dabeem kẽ ba.

¹⁶ Tɩ sɛba n yẽ lan ẽŋɛ se'em na, tɔgɛ pa'alɛ ba bõn-sɛka n ẽŋɛ bʋraa la, la bõn-sɛka n ẽŋɛ kurkurdõma la.

¹⁷ Tɩ ba belem Azezi yetɩ a fõrgɛ bãma tẽŋa.

¹⁸ Tɩ Azezi daan kẽ'era õorŋɔ la pʋam, tɩ bʋraa la tɩ kʋlkã'arsɩ daan dolɩ ẽ na belem Azezi yetɩ, a basɛ tɩ a dɔla ẽ.

¹⁹ Tɩ Azezi ka sakɛ, dee yele ẽ yetɩ: «Kule ya yire ka yele fʋ yir-dõma Zuudãana n zoe fʋ ninbãalga se'em, la ẽn ẽŋɛ sɛla wuu bɔ fʋ la.»

²⁰ Tɩ bʋraa la sẽŋɛ Dekapɔlɩ so'olʋm ka mõola Azezi n ẽŋɛ bõn-sɛba wuu bɔ ẽŋa. Tɩ la daan di'ige ba wuu.

Azayirusi pɔyʋa, la pɔka n kalʋm Azezi fuugo yelle
( Amatie 9:18-26 , Aluki 8:40-56 )

²¹ Azezi daan lebe dooge la mõgrɛ la doone ke bɔba la õorŋɔ la, daan bɔna mõgrɛ la nõorʋm, tɩ nẽr-kʋʋŋɔ zozo'e lagsɛ a zẽ'am.

²² Tɩ Zifdõma wẽndeego nẽŋadõma nẽra ayɩla yʋ'ʋrɛ n de Azayirusi wa'am mĩ wa yẽ Azezi, ka dũma tẽŋa a nẽŋam,

²³ belem ẽ na a sũure wuu yetɩ: «Mam pɔyʋa n bẽ'erɩ deege la a ki, wa'am wa dɩkɛ fʋ nu'usi paglɛ a zuo tɩ a põsɛ da ki.»

²⁴ Tɩ Azezi dɔla ẽ wɛ'ɛsa, tɩ nẽr-kʋʋŋɔ dɔla ẽ mikra ẽ.

²⁵ La pɔka n daan boe nẽrba la tẽŋasʋka luta sɩkẽŋa yʋʋma pia la ayi, tɩ la ka gɔ'ɔra.

²⁶ A daan nãmsɛ mɛ zozo'e tɩbdõma zẽ'am, dɩkɛ ẽn tarɩ sɛla wuu sã'am, dee tɩ la ka sõna, la malɩn gãnna la bɛla.

²⁷ Tɩ pɔka la daan wõm Azezi yelle, wa'am wa fɩrgɛ nẽr-kʋʋŋɔ la tẽŋasʋka paagɛ Azezi poorʋm kalʋm a fuugo.

²⁸ A daan yele a pʋtẽ'erʋm yetɩ: «Mam sãn kalʋm a fuugo mã'a, mam wʋn yẽ ĩmã'asʋm.»

²⁹ La ẽn kalʋm fuugo la, a zɩɩm na n yesrɩ la ze'ele mɛ ka le yɛsra, tɩ a bãŋɛ a ĩyã pʋam tɩ ẽŋa yẽ ĩmã'asʋm.

³⁰ La bilam mẽŋa tɩ Azezi bãŋɛ tɩ pãŋa n yese ẽŋa pʋam ẽŋɛ sɛla, tɩ a gelge soke nẽr-kʋʋŋɔ la yetɩ: «Ãn kalʋm mam fuugo?»

³¹ Tɩ a karẽnbiisi la lerge ẽ yetɩ: «Fõn yẽ la nẽr-kʋʋŋɔ n mikri fõn wãna, dee sɔkra tɩ ãn kalʋm fõn.»

³² Tɩ Azezi bɩsɛ kaagɛ tɩ a bãŋɛ nẽr-sɛka n ẽŋɛ bɛla.

³³ Tɩ dabeem tara pɔka la, tɩ a gõgra. La ẽn bãŋɛ sɛla n ẽŋɛ ẽ na, a wa'am mɛ wa ka dũma tẽŋa Azezi nẽŋam tɔgɛ ẽ a sɩra wuu.

³⁴ Tɩ Azezi yele ẽ yetɩ: «M bia, fõn bɔ mam sɩra la n botɩ fʋ yẽ ĩmã'asʋm. Sẽŋɛ la sũ-mã'asʋm, fʋ bã'a la basɛ ya.»

³⁵ La Azezi n ken bɔna mĩ tɔgra la, tɩ nẽrba ze'ele Zifdõma wẽndeego nẽŋadãana la yire wa'am wa yele ẽ yetɩ: «Fʋ pɔyʋa la ki mɛ. Da le nãmsɛ karẽnsãama.»

³⁶ Tɩ Azezi wõm ban yele se'em na, dee yele Zifdõma wẽndeego nẽŋadãana la yetɩ: «Da zoe dabeem, wen bɔ mam sɩra.»

³⁷ La Azezi daan ka basɛ tɩ nẽra nẽra kɔlgɛ ẽ, sãn dagna Apɩyɛɛrɩ, la Azakɩ, la a yɩbga Azã mã'a.

³⁸ La ban sẽŋɛ ka paagɛ Zifdõma wẽndeego nẽŋadãana yire la, tɩ Azezi yẽ nẽr-kʋʋŋɔ n voolɩ, kaasra dee fabla zozo'e.

³⁹ Tɩ a kẽ yire la yele ba yetɩ: «Bẽm tɩ ya vɔɔla dee kɛlla? Bia la ka ki, a gĩsri mɛ.»

⁴⁰ Tɩ ba la'ara ẽ. Tɩ a botɩ nẽrba la wuu yese yẽŋa, dee doose bia la sɔ, la a ma, la a karẽnbiisi batã la kẽ bia la n boe zẽ'a na,

⁴¹ gʋrɛ a nu'ugo dee yele ẽ yetɩ: «Talita kumi.» A võorɛ de la: «Pugla, mam yetɩ fʋ tɩ fʋ isge.»

⁴² Tɩ pugla la daan darɛ isge sẽnna. Tɩ la di'ige nẽrba la, tɩ ba zɛ yɛrɩ. Pugla la daan tarɩ la yʋʋma pia la ayi.

⁴³ Tɩ Azezi daan kã'an ba yetɩ, ba da kãn botɩ nẽra nẽra bãŋɛ bõn-ẽŋa. Dee yetɩ, ba bɔ pugla la dia tɩ a di.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan