Bìoball air-loidhne

Amarkɩ 4 - Farefare Ninkaré

Kaara n lobge a bõnbuuri makrɛ
( Amatie 13:1-9 , Aluki 8:4-8 )

¹ Azezi le bɔna la mõgrɛ la nõorʋm zãsna nẽrba. Tɩ nẽr-kʋʋŋɔ zozo'e lagsɛ a zẽ'am. Bɛla tɩ a kẽ õorŋɔ la n boe mõgrɛ la pʋam na zĩ'ire, dee tɩ nẽr-kʋʋŋɔ la wuu bɔna mõgrɛ la nõorʋm.

² Tɩ a makɛ magsa zãsʋm ba yɛla zozo'e. A zãsŋɔ la pʋam a yele ba yetɩ:

³ «Selse-ya, kaara n daan yese tɩ a lobge a bõnbuuri.

⁴ La ẽn sẽŋɛ ka lɔbgra bõnbuuri la, basɛba lui la sore zuo, tɩ niinto wa'am wa di ba.

⁵ Tɩ basɛba lui zẽ'a n de tãmpĩisi tɩ tẽntõnnɔ ka zo'oge mĩ. Tẽntõnnɔ n ka zo'oge mĩ na ĩyã, tɩ ba bule tɔtɔ yese,

⁶ tɩ wʋntɛɛŋa yẽkɛ wẽ ba tɩ ba ki, ba yẽga n ka kẽ tẽŋa la ĩyã.

⁷ Tɩ bõnbuuri basɛba lui gõ'osɩ zẽ'a. Tɩ gõ'osɩ la yese fʋrɛ ba, tɩ ba ka wɔm biɛ.

⁸ Tɩ bõnbuuri basɛba lui zẽ'e-sõŋɔ pʋam bule yese, bɩ wɔm biɛ. Basɛba wɔm na biɛ pitã-tã, tɩ basɛba wɔm pisyoob-yoobɩ, tɩ basɛba wɔm kɔbga kɔbga.»

⁹ A yele bɛla dee yetɩ: «Sɛka n wõm yetɔga wã, a selse sõŋa sõŋa.»

Azezi pa'alɛ magsa võorɛ
( Amatie 13:10-23 , Aluki 8:9-15 )

¹⁰ La Azezi yese la kẽnkɛrŋa tɩ sɛba n kaagɛ ẽ na, la a karẽnbiisi pia la ayi la soke ẽ magsa la võorɛ.

¹¹ Tɩ a yele ba yetɩ: «Nawẽnnɛ botɩ yãma bãŋɛ a so'olʋm yelle n sʋgɛ la mɛ. La sɛba n ka boe tõma pʋam na, yɛla wuu de la magsa bɔ ba.

¹² ‹Bɛla tɩ ba wʋn bɩsɛ yẽ dee kãn bãŋɛ. Ba wʋn wõm dee kãn bãŋɛ a võorɛ. Sãn dagɩ nɩ bɛla, ba wʋn leme wa'am Nawẽnnɛ zẽ'am, tɩ a basɛ ba tõon-be'ero taalɛ.› »

¹³ La Azezi le yele ba yetɩ: «Yãma sãn ka bãŋɛ makrɛ ẽna wã võorɛ, yãma wʋn ẽŋɛ la wãne bãŋɛ magsa la wuu võorɛ?

¹⁴ Bõnbuuri la tɩ kaara la lobge la, de la Nawẽnnɛ yetɔga.

¹⁵ Sore la zuo tɩ bõnbuuri sɛba lui la, ãn wʋ nẽr-sɛba n wõm yetɔga la, tɩ Asũtãana wa'am tɔtɔ wa yese yetɔga la ba sũure pʋam.

¹⁶ La tãmpĩa la zuo tɩ bõnbuuri sɛba lui la, ãn wʋ nẽr-sɛba n wõm yetɔga la dee sakɛ to'oge ba tɔtɔ la sũ-yẽlga.

¹⁷ La yetɔga la n ka kẽ ba sũure pʋam na ĩyã, ba sakɛ la wakatɛ fẽe, la toogo bɩɩ nãmsgɔ sãn paagɛ ba yetɔga la ĩyã, ba basrɩ mɛ tɔtɔ.

¹⁸ La gõ'osɩ la zẽ'a tɩ bõnbuuri sɛba lui la, ãn wʋ nẽr-sɛba n wõm yetɔga la,

¹⁹ tɩ ba yɛm yɔɔra la dũnia wã yɛla, tɩ bõntarsõm yɛla pã'asra ba, tɩ yɛla basɛba yɛmleego tara ba, botɩ yetɔga la ka tãna wʋn wɔm biɛ ba sũure pʋam.

²⁰ La zẽ'e-sõŋɔ la tɩ bõnbuuri sɛba lui la, ãn wʋ nẽr-sɛba n wõnnɩ kõ-yẽlga la sakra, wɔm biɛ. Tɩ basɛba wɔm pitã-tã, tɩ basɛba pisyoob-yoobɩ, tɩ basɛba kɔbga kɔbga.»

Fɩtla makrɛ
( Aluki 8:16-18 )

²¹ Azezi le yele ba yetɩ: «Ba yõ'orɩ fɩtla dɩkɛ pɩ'ɩgɔ vuge ẽ, bɩɩ ba dɩkɛ ẽ ze'ele gɔrgɔ tilum? Ayɛɩ, ba wʋn dɩkɛ ẽ zoole la sɛla zuo.

²² Bɛla, bõn-sɛka n sʋgɛ, dẽnɩ tɩ a puke. La bõn-sɛka wuu n lile wʋn lilge.

²³ Nẽr-sɛka n wõm yetɔga wã, a selse sõŋa sõŋa.»

²⁴ A le yele ba yetɩ: «Mõrgɛ-ya wõm yãma n selsrɩ se'em na võorɛ. Bõn-sɛka tɩ ya dɩkɛ makɛ bɔ nẽrba la, Nawẽnnɛ wʋn makɛ la bɛla lebse ya, le makɛ pa'asɛ.

²⁵ Se'ere n soe la, sɛka n tarɩ, a wʋn bɔ ẽ pa'asɛ. La sɛka n ka tarɩ, bõn-sɛka tɩ a tarɩ la, a wʋn to'oge ẽ.»

Bõnbuuri bɩa makrɛ

²⁶ Azezi le yele ba yetɩ: «Nawẽnnɛ so'olʋm ãn wʋ nẽra n bʋrɛ a bõnbuuri va'am pʋam.

²⁷ A sãn gĩsra mɛ bɩɩ a sãn piga mɛ, wʋntɛɛŋa la yʋ'ʋŋɔ, bõnbuuri la bulli mɛ yɛsra bɩta, tɩ a ka mina lan ɩtɩ se'em.

²⁸ Tẽntõnnɔ n botɩ bõnbuuri la yɛsra ba mẽŋa, dẽŋɛ puse võorɔ, yãŋa yõgɛ pʋa, wɔm biɛ, tɩ ba bɩ.

²⁹ La biɛ la sãn bɩ, kaara la sɛ'ɛrɩ ba mɛ, se'ere n soe la, bõnkɔɔla lagsgɔ paagɛ mɛ.»

Sɔ'ɔrɔ biire makrɛ
( Amatie 13:31-34 , Aluki 13:18-19 )

³⁰ Azezi le yele ba yetɩ: «Tɩ wʋn dɩkɛ la bẽm makɛ la Nawẽnnɛ so'olʋm, bɩɩ tɩ wʋn yetɩ a wõn na bẽm?

³¹ A ãn wʋ sɔ'ɔrɔ biire n ãn pɩka pɩka gãnna bõnbuuri wuu n boe dũnia zuo.

³² La ba sãn bʋrɛ ẽ, a bɩtɩ mɛ puse wil-kãra gãnna zẽvõorɔ buuri wuu. Tɩ niinto tãna wʋn tɛ ba tʋgrɔ a zuo a mã'asʋm pʋam.»

³³ Azezi daan dɩkɛ la magsa zozo'e n ãn wʋ bãna tɔgɛ bɔ ba, masɛ wʋ ban wʋn tã'agɛ wõm se'em na.

³⁴ A ka tɔgɛ bɔ ba tɩ la sãn dagna magsa. La a sãn yese la a karẽnbiisi la mã'a kẽnkɛrŋa, tɩ a pa'alɩ ba yɛla la wuu võorɛ.

Azezi botɩ kʋsebgo yõkɛ
( Amatie 8:23-27 , Aluki 8:22-25 )

³⁵ Daar-ẽŋa mẽŋa zaanõorɛ, tɩ Azezi yele a karẽnbiisi la yetɩ: «Tɩ dooge-ya mõgrɛ la ke bɔba.»

³⁶ Tɩ a karẽnbiisi la basɛ nẽr-kʋʋŋɔ la, dee sẽŋɛ ka kẽ õorŋɔ la tɩ Azezi boe mĩ na pʋam, dɩkɛ ẽ tɩ ba wɛ'ɛsa. La õornɔ basɛba n daan mẽ boe ba zẽ'am.

³⁷ Tɩ kʋseb-kãtɛ wa vugra ke'enke'em, tɩ ko-mĩ'isi wẽ'era kẽ'era õorŋɔ la pʋam deege la ba pɩrɛ ẽ.

³⁸ La Azezi gã la õorŋɔ la poorʋm kʋkɛ dafeere gĩsra. Tɩ a karẽnbiisi la nẽegɛ ẽ, soke ẽ yetɩ: «Karẽnsãama, tõma n yetɩ ki wã, la ka pakɛ fõn?»

³⁹ Tɩ a isge tãsɛ kʋsebgo la, dee yele ko-mĩ'isi la yetɩ: «Go'oge-ya, ãna-ya sĩm.» Tɩ kʋsebgo, la ko-mĩ'isi la go'oge ãna sĩm.

⁴⁰ Tɩ a soke ba yetɩ: «Bẽm tɩ ya zɔta dabeem bɛla? Bẽm tɩ ya ka bɔ Nawẽnnɛ sɩra?»

⁴¹ Tɩ dabeem ba kẽ ba. Tɩ ba sɔkra taaba yetɩ: «Ãne n de ẽna tɩ kʋsebgo la ko'om sakra a nõorɛ?»

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan