Bìoball air-loidhne

Amarkɩ 14 - Farefare Ninkaré

Zifdõma nẽŋadõma eerɩ sore tɩ ba kʋ Azezi
( Amatie 26:1-5 , Aluki 22:1-2 , Azã 11:45-53 )

¹ La daan deege la dabsa ayi tɩ Zɔɔg-basɛ kibsa tɩ ba obrɩ borborɩ n ka tarɩ dãbɩllɛ dabsa paagɛ. Tɩ kãabgɔ kẽma nẽŋadõma, la lɔɔ karẽnsãandõma ɛɛra sore tɩ ba sʋgɛ yõkɛ Azezi kʋ.

² Tɩ ba yele taaba yetɩ: «Tɩ da kãn ẽŋɛ-ya bɛla kibsa wã pʋam, tɩ nẽrba la wʋn gire mɛ.»

Pɔka n ka'agɛ kaam ẽŋɛ Azezi zuo
( Amatie 26:6-13 , Azã 12:1-8 )

³ Azezi daan boe la Betani, Asimõ n wa dɛna kõnkonne yire, tɩ ba daan bɔna mĩ dita. Tɩ pɔka tarɩ albatrɩ dugla n pɩrɛ la tɩdarɛ ka-sõma ligri n zo'oge tɩ ba wi'iri tɩ naarɩ, wa'am wa vuke dugla la, ka'agɛ kaam na ẽŋɛ Azezi zuugo.

⁴ Tɩ nẽrba basɛba n boe bilam na sũure sã'am, tɩ ba yele taaba yetɩ: «Bẽm tɩ pɔka la sã'am ka-sõma la wãna?

⁵ Ba tã nɩ wʋn koose ba gãŋɛ lig-kõba kɔbstã mɛ, dɩkɛ ligri la bɔ nasdõma.» Tɩ ba zɛrgɛ pɔka la.

⁶ Tɩ Azezi yele ba yetɩ: «Basɛ-ya pɔka la bãalam, bẽm tɩ ya tɔgra ẽ tɩ a sũure sã'am? Ẽn ẽŋɛ sɛla bɔ mam na de la tõon-sõŋɔ.

⁷ Nasdõma boe la ya lɛ mɛ wakatɛ wuu, ya tã wʋn ẽŋɛ ba sõŋa mɛ yan boorɩ wakat-sɛka, la mam kãn bɔna la ya lɛ wakatɛ wuu.

⁸ Ẽŋa n tarɩ sɛla la, tɩ a ẽŋɛ. Ẽn ka'agɛ ka-sõma la ẽŋɛ mam ĩyã la, a dẽŋɛ ẽŋɛ la ban wʋn ẽŋɛ mam se'em mam laarɛ daarɛ.

⁹ Mam yetɩ ya la asɩra, tɩ dũnia wã zẽ'e-sɛka wuu tɩ ba wʋn wa mõolɛ Nawẽnnɛ kõ-yẽlga la, ba mẽ wʋn tɔgɛ pɔka wã n ẽŋɛ mam se'em wã, tɩ ba tẽra a yelle.»

Azudaasɩ eerɩ sore tɩ a pa'alɛ tɩ ba yõkɛ Azezi
( Amatie 26:14-16 , Aluki 22:3-6 )

¹⁰ Tɩ Azudaasɩ Iskariyo n de Azezi karẽnbiisi pia la ayi la nẽra ayɩla sẽŋɛ kãabgɔ kẽma nẽŋadõma zẽ'am, ka yele ba tɩ ẽŋa wʋn pa'alɛ tɩ ba yõkɛ Azezi.

¹¹ La ban daan wõm ẽn yele se'em na, tɩ ba sũure ẽŋɛ yẽlʋm, tɩ ba yetɩ bãma wʋn bɔ ẽ ligri. Tɩ Azudaasɩ yãŋa ɛɛra so-sɛka tɩ a wʋn pa'alɛ tɩ ba yãŋɛ yõkɛ ẽ na.

Azezi diti Zɔɔg-basɛ kibsa la a karẽnbiisi
( Amatie 26:17-30 , Aluki 22:7-23 , Azã 13:21-30 , 1 Korẽntɩ 11:23-25 )

¹² Borborɩ n ka tarɩ dãbɩllɛ kibsa la pɔspɔsɩ daarɛ tɩ ba kʋʋrɩ pebilsi dita Zɔɔg-basɛ kibsa la n daan paagɛ. Tɩ Azezi karẽnbiisi la soke ẽ yetɩ: «Fõn boorɩ tɩ tɩ sẽŋɛ la bɛ ka mãasʋm Zɔɔg-basɛ kibsa la tɩ fʋ di?»

¹³ Tɩ Azezi tõm a karẽnbiisi bayi yele ba yetɩ: «Sẽŋɛ-ya tẽŋa la pʋam, tɩ ya wʋn tʋ'ʋsɛ bʋraaga n tʋ yoore la ko'om, ya doose ẽ

¹⁴ sẽŋɛ yi-sɛka tɩ a wʋn kẽ la, ka yele yidãana la yetɩ: ‹Karẽnsãama la yetɩ, deego boe la bɛ, tɩ ẽŋa la a karẽnbiisi wʋn di Zɔɔg-basɛ kibsa la?›

¹⁵ A wʋn pa'alɛ ya de-kãtɛ n boe ayẽma zuo, tɩ sɛla woo mãasʋm bɔna mĩ. Bilam tɩ ya wʋn mãasʋm tɩ tɩ di kibsa la.»

¹⁶ Tɩ a karẽnbiisi la yese sẽŋɛ tẽŋa la pʋam ka yẽ sɛla woo wʋ Azezi n yele ba se'em na. Tɩ ba mãasʋm Zɔɔg-basɛ kibsa la bilam.

¹⁷ Tɩ wẽnnɛ daan mã'agɛ, tɩ Azezi la a karẽnbiisi pia la ayi la wa'am,

¹⁸ wa zẽa dita, tɩ Azezi yele ba yetɩ: «Mam yetɩ ya la asɩra, tɩ ya nẽra ayɩla n diti la mam kalam n wʋn pa'alɛ tɩ ba yõkɛ mam.»

¹⁹ Tɩ la daan sã'am ba sũure. Tɩ ba sɔkra ẽ ayɩla ayɩla yetɩ: «La de la mam?»

²⁰ Tɩ a lerge ba yetɩ: «La de la ya nẽrba pia la ayi la nẽr-sɛka n wʋn yɛglɛ la mam tũm a nu'ugo laaga pʋam na.

²¹ Nẽrsaala Dayʋa la wʋn ki wʋ lan põn gʋlsɛ a yelle Nawẽnnɛ gõŋɔ pʋam se'em na. La sɛka n yetɩ a pa'alɛ tɩ ba yõkɛ Nẽrsaala Dayʋa la wʋn yẽ toogo. Nẽr-ẽŋa ma sãn ka dɔgɛ nɩ ẽ n sõɩ.»

²² La ban daan diti la, tɩ Azezi dɩkɛ borborɩ pʋ'ʋsɛ Nawẽnnɛ, dee fiise bɔ a karẽnbiisi la yetɩ: «To'oge-ya di, ẽna wã de la mam ĩyã.»

²³ Dee dɩkɛ bõn-yũula pʋ'ʋsɛ Nawẽnnɛ, dee bɔ ba, tɩ ba wuu yũ.

²⁴ Dee yele ba yetɩ: «Bãna wã de la mam zɩɩm n wʋn yese saagɛ nẽrba zozo'e ĩyã, pa'alɛ tɩ Nawẽnnɛ bĩŋe nõorɛ la ba.

²⁵ Mam yetɩ ya la asɩra, tɩ mam kãn le yũ viinye biɛ bõn-yũula wã, halɩ tɩ la ka paagɛ daar-sɛka tɩ mam wʋn le yũ ba Nawẽnnɛ so'olʋm pʋam.»

²⁶ Tɩ ba yõom yõoma pẽgɛ Nawẽnnɛ, dee yese wɛ'ɛsa Oliivi tãŋam.

Azezi yetɩ Apɩyɛɛrɩ wʋn sɩ'ɩsɛ ẽŋa
( Amatie 26:31-35 , Aluki 22:31-34 , Azã 13:36-38 )

²⁷ Tɩ Azezi yele a karẽnbiisi la yetɩ: «Yãma wuu wʋn lebe la poorʋm dee basɛ mam, se'ere n soe la, la gʋlsɛ Nawẽnnɛ gõŋɔ pʋam yetɩ: ‹Mam wʋn kʋ dũnsĩina dee tɩ piisi la wɩrgɛ.› »

²⁸ La Azezi le yele ba yetɩ: «La mam sãn wa vo'oge, mam wʋn dẽŋɛ ya sẽŋɛ Galile.»

²⁹ Tɩ Apɩyɛɛrɩ yele ẽ yetɩ: «Baa ba wuu sãn lebe poorʋm dee basɛ fõn, mam kãn basɛ fõn.»

³⁰ Tɩ Azezi yele ẽ yetɩ: «Mam yetɩ fʋ la sɩra, tɩ zĩna, yʋ'ʋŋɔ ẽna wã, lan dẽŋɛ nõ-rɔɔgɔ n wʋn kaasɛ nõorɛ ayi, fʋ wʋn sɩ'ɩsɛ nõorɛ atã tɩ fõn ka mi mam.»

³¹ Tɩ Apɩyɛɛrɩ le tɔgɛ ke'enke'em yetɩ: «Baa la sãn dɛna tɩ mam lagɩm na fõn ki, mam kãn malɩn sɩ'ɩsɛ fõn.» Tɩ karẽnbiisi la wuu lagɩm yele bɛla.

Azezi pʋ'ʋsɛ Nawẽnnɛ Getsemane
( Amatie 26:36-46 , Aluki 22:39-46 )

³² Tɩ ba paagɛ zẽ'e-sɛka yʋ'ʋrɛ n de Getsemane la. Tɩ Azezi yele a karẽnbiisi la yetɩ: «Zĩ'ire-ya kalam dee tɩ m sẽŋɛ ka pʋ'ʋsɛ Nawẽnnɛ.»

³³ La a tarɩ la Apɩyɛɛrɩ, la Azakɩ, la Azã sẽŋɛ. Tɩ a sũure sã'am zozo'e, tɩ la dãan ẽ.

³⁴ Tɩ a yele ba yetɩ: «Sũ-sã'aŋɔ n tarɩ mam zozo'e tɩ mam ãna wʋ m yetɩ m ki mɛ na. Weege-ya kalam gu'ura, da gĩse-ya.»

³⁵ La a sẽŋɛ la nẽŋa fẽe, ka võglɛ tẽŋa pʋ'ʋsɛ Nawẽnnɛ yetɩ, la sãn tãna, toogo la fõrgɛ dee basɛ ẽ.

³⁶ Dee yetɩ: «M Sɔ, fõn tã sɛla woo ɩta, basɛ tɩ nãmsgɔ ẽna fõrgɛ dee basɛ ma. La, la da kãn dɛna mam n boorɩ se'em, la dɛna fõn boorɩ se'em.»

³⁷ La a leme a karẽnbiisi batã la zẽ'am wa yẽ tɩ ba gĩsri mɛ, tɩ a soke Apɩyɛɛrɩ yetɩ: «Asimõ, fõn gĩsri mɛ? Fõn ka tã wʋn gu karf-ayɩla ka gĩse?»

³⁸ Dee yele ba yetɩ: «Basɛ-ya gẽem dee pʋ'ʋsɛ Nawẽnnɛ tɩ yelle da paagɛ ya tɩ ya lui. Ya sɩa la boorɩ mɛ, la ya ĩyã ka tara pãŋa.»

³⁹ La a daan le lebe ka pʋ'ʋsɛ Nawẽnnɛ wʋ ẽn pʋ'ʋsɛ se'em na.

⁴⁰ Dee le leme wa yẽ tɩ ba gĩsri mɛ, se'ere n soe la, gẽem n ba tarɩ ba. Tɩ ba ka mina ban wʋn yele ẽ se'em.

⁴¹ A daan le sẽŋɛ mɛ, dee leme wa'am nõorɛ atã pʋam wa soke ba yetɩ: «Ya ken vɔ'ɔsra mɛ dee gĩsra? La ẽŋɛ ba'asɛ mɛ, wakatɛ paagɛ mɛ tɩ ba wʋn dɩkɛ Nẽrsaala Dayʋa la ẽŋɛ tõon-be'ero dõma nu'usum.

⁴² Isge-ya tɩ sẽŋɛ, tɩ sɛka n wʋn pa'alɛ tɩ ba yõkɛ mam na n wãna sẽm.»

Ba yõkɛ Azezi
( Amatie 26:47-56 , Aluki 22:47-53 , Azã 18:3-12 )

⁴³ Azezi n daan ken tɔgra la, tɩ Azudaasɩ n de a karẽnbiisi pia la ayi la nẽra ayɩla, doose la nẽr-kʋʋŋɔ sẽŋɛ paam. La nẽr-kʋʋŋɔ la daan tarɩ la sʋkɔbrɔ, la dɔa dɔla ẽ. La de la kãabgɔ kẽma nẽŋadõma, la lɔɔ karẽnsãandõma, la tẽŋa la kẽma n tõm ba.

⁴⁴ La Azudaasɩ n wʋn pa'alɛ tɩ ba yõkɛ ẽ na, põn tɔgɛ mɛ pa'alɛ ba yetɩ: «Sɛka tɩ mam wʋn kɔkɛ ẽ na, ẽŋa n bɛla, yõkɛ-ya ẽ, tarɩ ẽ sõŋa fõrgɛ.»

⁴⁵ La Azudaasɩ n paam na, a sẽŋɛ lɛm na Azezi, yele ẽ yetɩ: «Karẽnsãama.» Dee kɔkɛ ẽ.

⁴⁶ Tɩ nẽrba la paagɛ yõkɛ ẽ.

⁴⁷ Tɩ nẽr-sɛba n daan boe mĩ na nẽra ayɩla fooge a sʋkɔbgɔ sɛ kãabgɔ kẽma nẽŋadãana tõntõnna tʋbrɛ fiige.

⁴⁸ Tɩ Azezi soke ba yetɩ: «Yãma tarɩ la sʋkɔbrɔ, la dɔa sẽna tɩ ya yõkɛ mam wʋ mam de la fãara la?

⁴⁹ Mam daan boe la yãma lɛ Wẽnde-kãtʋm na daarɛ woo zãsna nẽrba, tɩ ya ka yõkɛ mam. La, la de la tɩ bõn-sɛka n gʋlsɛ Nawẽnnɛ gõŋɔ pʋam na ẽŋɛ.»

⁵⁰ Tɩ a karẽnbiisi la wuu zoe dee basɛ ẽ.

⁵¹ La budib-polle ayɩla n daan lobe fugɔbga mã'a dɔla Azezi. Tɩ ba daan zɛ ẽ tɩ ba yõkɛ,

⁵² tɩ a basɛ a fugɔbga la dee zoe beele fõrgɛ.

Ba tarɩ Azezi sẽŋɛ Zifdõma sarɩyaditba zẽ'am
( Amatie 26:57-68 , Aluki 22:54-55 , 63-71 , Azã 18:13-14 , 19-24 )

⁵³ Ba daan tarɩ Azezi sẽŋɛ la kãabgɔ kẽma nẽŋadãana la yire, bilam tɩ kãabgɔ kẽma nẽŋadõma, la tẽŋa la kẽma, la lɔɔ karẽnsãandõma la wuu tigse.

⁵⁴ Tɩ Apɩyɛɛrɩ daan bɔna poorʋm zãazãarɛ dɔla, ka paagɛ kẽ kãabgɔ kẽma nẽŋadãana la yire zẽnzakam, zẽa la tõntõnɩba ɔɔsra bugum.

⁵⁵ La kãabgɔ kẽma nẽŋadõma, la sarɩyaditba la wuu daan eerɩ la yelle tɩ ba dõrɛ Azezi botɩ ba kʋ ẽ, la ba ka yẽ.

⁵⁶ Tɩ nẽrba zozo'e daan parɩm bɔ Azezi, la ba yetɔga la ka doose taaba.

⁵⁷ Tɩ nẽrba basɛba daan isge parɩm bɔ ẽ yetɩ:

⁵⁸ «Tõma wõm tɩ a yetɩ: ‹Mam wʋn wõrgɛ Wẽnde-kãtɛ la tɩ nẽrsaalba mẽ la, dee le mẽ ayẽma dabsa atã pʋam n dagɩ nẽrsaalba mẽa.› »

⁵⁹ Baa bõn-ẽŋa pʋam ba yetɔga la ka doose taaba.

⁶⁰ Tɩ kãabgɔ kẽma nẽŋadãana la isge ze'ele ba wuu nẽŋam soke Azezi yetɩ: «Ban tɔgɛ fõn se'em na, fõn kãn lerge se'ere?»

⁶¹ Tɩ Azezi daan sĩna ka lerge se'ere. Tɩ kãabgɔ kẽma nẽŋadãana la le soke ẽ yetɩ: «Fõn de la Krisi, Nawẽnnɛ tɩ tõma pẽgrɩ la Dayʋa la?»

⁶² Tɩ Azezi lerge yetɩ: «Ẽe, mam de la ẽŋa. La ya wʋn yẽ Nẽrsaala Dayʋa la tɩ a zĩ Nawẽnnɛ n de pãŋa dãana la zʋʋgɔ bɔba, ya wʋn yẽ tɩ a boe sawara pʋam sẽna.»

⁶³ Tɩ kãabgɔ kẽma nẽŋadãana la ãasʋm a mẽŋa futo, dee yetɩ: «Tɩ le ɛɛra la bẽm kaset-dõma?

⁶⁴ Ya wõm ẽn sã'am Nawẽnnɛ yʋ'ʋrɛ. Yãma tẽ'esɛ la wãne?» Tɩ ba wuu yetɩ: «A masɛ la kũm.»

⁶⁵ Tɩ ba nẽrba basɛba daan sẽŋɛ tʋbsra nõtõorʋm ɩta Azezi, dɩkɛ tãnnɛ pĩ a nini, mũm kũnkũra wẽ ẽ, dee yɛta ẽ tɩ: «Bãŋɛ pa'alɛ tɔ nẽr-sɛka n wẽ fɔ?» Tɩ gu'urba la to'oge ẽ, wẽ a pɛgsɩ.

Apɩyɛɛrɩ sɩ'ɩsɛ tɩ ẽŋa ka mi Azezi
( Amatie 26:69-75 , Aluki 22:56-62 , Azã 18:15-18 , 25-27 )

⁶⁶ La Apɩyɛɛrɩ daan ken bɔna la zẽnzakam na, tɩ kãabgɔ kẽma nẽŋadãana tõntõn-pɔka wa'am mĩ,

⁶⁷ wa yẽ Apɩyɛɛrɩ n ɔɔsrɩ bugum na, tɩ a bɩsra ẽ, dee yetɩ: «Fõn mẽ daan po bɔna la Nazarɛtɩ bʋraa Azezi lɛ.»

⁶⁸ Tɩ Apɩyɛɛrɩ sɩ'ɩsɛ yetɩ: «Mam ka mi, mam ka bãŋɛ fõn yele se'em na võorɛ.» Apɩyɛɛrɩ yele bɛla dee yese ka zɛ la zanõrʋm, tɩ nõ-rɔɔgɔ kaasɛ.

⁶⁹ Tɩ tõntõn-pɔka la le yẽ ẽ, yele sɛba n boe mĩ na yetɩ: «Bʋra-ẽna de la Azezi nẽra ayɩla.»

⁷⁰ Tɩ Apɩyɛɛrɩ le sɩ'ɩsɛ. Tɩ la ẽŋɛ fẽe, tɩ nẽr-sɛba n ze mĩ na le yele Apɩyɛɛrɩ yetɩ: «Asɩra, fõn de la ba nẽra ayɩla. Fõn de la Galile nẽra.»

⁷¹ Tɩ Apɩyɛɛrɩ pɔɩ Nawẽnnɛ yetɩ: «Mam ka mi bʋra-sɛka tɩ ya tɔgrɩ a yelle wã.»

⁷² Bilam mẽŋa tɩ nõ-rɔɔgɔ le kaasɛ nõorɛ ayi pʋam. Tɩ Apɩyɛɛrɩ tẽegɛ Azezi n daan yele ẽ yetɩ: «Lan dẽŋɛ nõ-rɔɔgɔ n wʋn kaasɛ nõorɛ ayi, fʋ wʋn sɩ'ɩsɛ nõorɛ atã tɩ fõn ka mi mam» na. Tɩ a sũure sã'am, tɩ a kɛlla.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan