Amarkɩ 10 - Farefare NinkaréPɔka lebsgo yelle ( Amatie 19:1-12 , Aluki 16:18 ) 1 La Azezi daan ze'ele zẽ'e-ẽŋa sẽŋɛ la Zude so'olʋm, Zʋrdẽ doone ke bɔba. Tɩ nẽrba zozo'e le lagsɛ a zẽ'am, tɩ a zãsna ba wʋ ẽŋa n ẽn ɩta se'em na. 2 Tɩ Farisi dõma basɛba wa'am tɩ ba di a yɛm bɩsɛ, soke ẽ yetɩ: «Bʋraa tarɩ nõorɛ tɩ a lebse a pɔga mɛ bɩɩ?» 3 Tɩ a lebe soke ba yetɩ: «Amoyisi yʋʋn bɔ ya nõorɛ yetɩ bẽm?» 4 Tɩ ba lerge yetɩ: «Amoyisi yʋʋn sakɛ tɩ tɩ gʋlsɛ la pɔgdire lebsgo gõŋɔ, dee tarɩ ẽ ka lebse.» 5 Tɩ Azezi yele ba yetɩ: «La de la ya sũure n kɛ tɩ ya ka sakɛ pa'algɔ la ĩyã tɩ Amoyisi yʋʋn gʋlsɛ nõor-ẽŋa bɔ ya. 6 La halɩ dũnia pĩ'iluŋo, Nawẽnnɛ n yʋʋn nãam nẽrsaalba la, a nãam la bʋraa la pɔka. 7 Bɛla ĩyã tɩ bʋraa wʋn basɛ a sɔ, la a ma, dee lagɩm na a pɔga. 8 La ba ka le dɛna bayi, ba lebge la ayɩla. 9 Bɛla, sɛla tɩ Nawẽnnɛ lagɩm na taaba, nẽrsaala da welge ba.» 10 La Azezi la a karẽnbiisi la kẽ la deem, tɩ ba le soke ẽ yelle ẽŋa võorɛ. 11 Tɩ a yele ba yetɩ: «Bʋraa sãn lebse a pɔga dee di pɔka ayẽma, a ẽŋɛ la be'em wʋ nẽra n gã'arɩ la a tadãana pɔga. 12 La pɔka mẽ sãn basɛ a sɩra dee ele bʋraa ayẽma, a mẽ ẽŋɛ la be'em wʋ a gã'arɛ la bʋraa n dagɩ a sɩra.» Azezi kã kã'a-sõma bɔ kɔma ( Amatie 19:13-15 , Aluki 18:15-17 ) 13 Tɩ nẽrba zozo'e tarɩ kɔm-pɩgsɩ wa'am Azezi zẽ'am tɩ a dɩkɛ a nu'usi paglɛ ba zuto. Tɩ a karẽnbiisi la zɛbɛ nẽrba la. 14 La Azezi n yẽ bɛla la, la ka ẽŋɛ a sũure yẽlʋm, tɩ a yele ba yetɩ: «Basɛ-ya kɔm-pɩgsɩ la tɩ ba wa'am mam zẽ'am, da gu'ura-ya ba, se'ere n soe la, Nawẽnnɛ so'olʋm de la nẽr-sɛba n ãn wʋ kɔma wã bõnɔ. 15 Mam yetɩ ya la sɩra, tɩ nẽr-sɛka n ka sakɛ tɩ Nawẽnnɛ sɔna ẽ wʋ bia la, a kãn kẽ Nawẽnnɛ so'olʋm pʋam.» 16 A yele bɛla, dee to'ose kɔma la mɛ, dɩkɛ a nu'usi paglɛ ba zuto kã kã'a-sõma bɔ ba. Bõntarsa yelle ( Amatie 19:16-30 , Aluki 18:18-30 ) 17 Azezi daan basɛ bilam dee le dɩkɛ la sore sẽnna. Tɩ bʋraa zoe wa'am a zẽ'am, wa ka dũma a nẽŋam soke ẽ yetɩ: «Karẽnsãama, fõn de la nẽr-sõŋɔ, mam wʋn ẽŋɛ la wãne yẽ vɔm n ka ba'asrɩ?» 18 Tɩ Azezi yele ẽ yetɩ: «Bẽm tɩ fõn wi'ira mam tɩ nẽr-sõŋɔ? Nẽra ka boe n ãn sõŋa sãn dagna Nawẽnnɛ mã'a. 19 Fõn mi Nawẽnnɛ n bɔ nõorɛ tɩ ba ɩta se'em: ‹Da kʋ nẽra, da gã'arɛ la fʋ tadãana pɔga, da zũ, da tɔgɛ põmpɔrŋɔ kaseto, da wẽgɛ nẽra, nanna fʋ sɔ, la fʋ ma.› » 20 Tɩ bʋraa la lerge ẽ yetɩ: «Karẽnsãama, halɩ mam bõnbɩ'ɩlʋm tɩ mam põn sakra bõn-bãma wuu.» 21 Tɩ Azezi bɩsɛ ẽ nõŋɛ ẽ, dee yele ẽ yetɩ: «Sɛla ayɩla n deege dɛna fʋ ẽŋɛ: Sẽŋɛ ka koose fõn tarɩ sɛla la wuu dɩkɛ ligri la bɔ nasdõma, tɩ fʋ wʋn yẽ bõntarsõm Nawẽnnɛ yire, dee wa'am wa dɔla mam.» 22 La ẽn wõm wãna la, tɩ a nẽŋa zũŋe tɩ a fõrgɛ la sũ-sã'aŋɔ, se'ere n soe la, a tarɩ la bõntarsõm zo'oge. 23 Tɩ Azezi bɩsɛ a karẽnbiisi la kaagɛ, dee yele ba yetɩ: «La tɔ mɛ bɔ bõntatba tɩ ba kẽ Nawẽnnɛ so'olʋm pʋam.» 24 Tɩ a yetɔga la di'ige a karẽnbiisi la. Tɩ Azezi le yele ba yetɩ: «M kɔma, la tɔ mɛ tɩ nẽra kẽ Nawẽnnɛ so'olʋm pʋam. 25 La de la nãana tɩ yʋgnɛ doose fupĩim yoko pʋam yese, gãnna bõntarsa n wʋn kẽ Nawẽnnɛ so'olʋm pʋam.» 26 Tɩ la di'ige ba halɩ zozo'e, tɩ ba sɔkra taaba yetɩ: «La sãn dɛna bɛla, ãne n wʋn tã'agɛ yẽ fãarɛ?» 27 Tɩ Azezi bɩsra ba dee yetɩ: «Nẽrsaala ka tã wʋn ẽŋɛ bõn-ẽna, la Nawẽnnɛ tã wʋn ẽŋɛ mɛ. Se'ere n soe la, Nawẽnnɛ tã sɛla woo ɩta mɛ.» 28 Tɩ Apɩyɛɛrɩ yele ẽ yetɩ: «Tõma basɛ sɛla woo mɛ dee dɔla fõn.» 29 Tɩ Azezi yele yetɩ: «Mam yetɩ ya la sɩra, tɩ nẽr-sɛka n basɛ a yire, bɩɩ a kẽendõma, la a yɩbsɩ, bɩɩ a ma, bɩɩ a sɔ, bɩɩ a kɔma, bɩɩ a vatɔ mam ĩyã, la Nawẽnnɛ kõ-yẽlga la ĩyã, 30 dũnia wã zuo a wʋn to'oge yiɛ, la kẽendõma, la yɩbsɩ, la madõma, la kɔma, la vatɔ nõor-kɔbga, la a wʋn yẽ nãmsgɔ. La wakatɛ n sẽm, a wʋn yẽ vɔm n ka ba'asrɩ. 31 La nẽŋam dõma zozo'e wʋn lebge poorʋm dõma, tɩ poorʋm dõma lebge nẽŋam dõma.» Azezi le tɔgɛ a kũm, la a vo'ore yelle ( Amatie 20:17-19 , Aluki 18:31-34 ) 32 Ba daan boe la sore wɛ'ɛsa Zerizalɛm, tɩ Azezi bɔna ba nẽŋa. Tɩ a karẽnbiisi la palẽŋa ẽgra, dee tɩ dabeem tara nẽr-sɛba n daan dolɩ ba la. Tɩ Azezi le tarɩ a karẽnbiisi pia la ayi la sẽŋɛ ka tɔgra pa'ala ba bõn-sɛba n wʋn wa ẽŋɛ ẽŋa, 33 yetɩ: «Ya yẽ ya, tɩ we'esɩ la Zerizalɛm, bilam tɩ ba wʋn dɩkɛ Nẽrsaala Dayʋa la ka ẽŋɛ Nawẽnnɛ kãabgɔ kẽma nẽŋadõma, la lɔɔ karẽnsãandõma nu'usum. Tɩ ba wʋn tɔgɛ a yelle kʋ yetɩ a masɛ la kũm, dɩkɛ ẽ ẽŋɛ bu-zãŋsɩ nu'usum, 34 tɩ ba la ẽ, dee tʋbsɛ nõtõorʋm mĩ ẽ, wẽ ẽ na ka'asa dee kʋ ẽ. La a wʋn vo'oge dabsa atã daarɛ.» Azakɩ la Azã sosgo ( Amatie 20:20-28 ) 35 Tɩ Azebede kɔma Azakɩ la Azã sẽŋɛ lɛm Azezi yele ẽ yetɩ: «Karẽnsãama, tõma boorɩ la tõma n wʋn sose fõn bõn-sɛka la, fʋ ẽŋɛ bɔ tɔ.» 36 Tɩ a soke ba yetɩ: «Yãma boorɩ tɩ m ẽŋɛ la bẽm bɔ ya?» 37 Tɩ ba lerge ẽ yetɩ: «Fʋ sãn wa dita fʋ na'am na, botɩ tõma nẽra ayɩla zĩ'ire fʋ zʋʋgɔ, tɩ ayɩla zĩ'ire fʋ gɔbga.» 38 Tɩ Azezi lerge ba yetɩ: «Ya ka mi yãma n sosrɩ sɛla. Ya wʋn tã'agɛ nãmsɛ nãmsgɔ sɛka tɩ mam nãmsrɩ wã, bɩɩ ya wʋn tã'agɛ nãmsɛ wʋ mam n sakɛ tɩ m nãmsɛ se'em na halɩ ka ki?» 39 Tɩ ba yele ẽ yetɩ: «Tɩ wʋn tã'agɛ ẽŋɛ bɛla.» Tɩ Azezi lebe yele ba yetɩ: «Asɩra, ya wʋn nãmsɛ nãmsgɔ sɛka tɩ mam nãmsrɩ wã halɩ ka ki. 40 La, la dagɩ mam n wʋn looge sɛka n wʋn zĩ'ire mam zʋʋgɔ bɩɩ mam gɔbga. Nawẽnnɛ mãasʋm zẽ'e-bãma tɩ a bɔ la nẽr-sɛba tɩ a yetɩ a bɔ la.» 41 La karẽnbiisi pia la n wõm bɛla la, ba sũure n isge la Azakɩ la Azã. 42 Tɩ Azezi wi ba wuu, yele ba yetɩ: «Ya mi tɩ dũnia wã na'adõma soe ba nẽrba la pãŋa, dee tɩ kɛ'ɛndõma pẽrgra nẽrba tɩ ba ɩta bãma n boorɩ se'em. 43 La yãma pʋam, la kãn dɛna bɛla. Nẽr-sɛka n boe ya pʋam bɔɔra tɩ a lebge nẽr-keko, la masɛ mɛ tɩ a dɛna ya tõntõnna. 44 La nẽr-sɛka n boorɩ tɩ a dɛna nẽŋadãana ya pʋam, la masɛ mɛ tɩ a dɛna ya wuu yamŋa. 45 Se'ere n soe la, Nẽrsaala Dayʋa la ka wa'am tɩ nẽrba tõm bɔ ẽ, a wa'am tɩ a tõm mɛ bɔ, dee dɩkɛ a vɔm bɔ tɩ nẽrba zozo'e yẽ fãarɛ.» Azezi botɩ Abartime nini yẽta ( Amatie 20:29-34 , Aluki 18:35-43 ) 46 Azezi la a karẽnbiisi la daan sẽŋɛ ka paagɛ dɔla la Zeriko tẽŋa pʋam tɔlla, la ban daan ze'ele tẽŋa la pʋam yɛsra la, nẽr-kʋʋŋɔ n dolɩ ba. Tɩ fʋa zẽa sore nõorʋm sɔsra, a yʋ'ʋrɛ de la Abartime, a de la Atime dayʋa. 47 La ẽn wõm tɩ ba tɔgrɩ tɩ la de la Azezi n ze'ele Nazarɛtɩ la, tɩ a tĩi tɔgra yetɩ: «Azezi, Adavidi yɩɩŋa, zoe m ninbãalga.» 48 Tɩ nẽrba zozo'e tãsɛ ẽ yetɩ: «Go'oge fʋ yetɔga la.» Tɩ a malɩn tĩi tɔgɛ yetɩ: «Adavidi yɩɩŋa, zoe m ninbãalga.» 49 Tɩ Azezi ze'ele dee yetɩ: «Wi-ya ẽ tɩ a wa'am.» Tɩ ba wi ẽ yele ẽ yetɩ: «Keŋe fʋ sũure, isge tɩ a wi'iri fo.» 50 Tɩ a lobe a fugɔbga basɛ, dee vaa isge sẽŋɛ Azezi zẽ'am. 51 Tɩ Azezi soke ẽ yetɩ: «Fõn boorɩ tɩ m ẽŋɛ la bẽm bɔ fɔ?» Tɩ a yetɩ: «M Zuudãana, mam boorɩ tɩ m le yẽta mɛ.» 52 Tɩ Azezi yele ẽ yetɩ: «Sẽŋɛ, fõn bɔ mam sɩra la ĩyã tɩ fʋ yẽ laafɛ.» Tɩ fʋa la yẽta bilam mẽŋa, dɔla Azezi sore la zuo. |
© 2008, 2010, Wycliffe Bible Translators, Inc. All rights reserved.
Wycliffe Bible Translators, Inc.