Bìoball air-loidhne

Amarkɩ 1 - Farefare Ninkaré

Azã n mõolɩ Nawẽnnɛ yetɔga la yelle
( Amatie 3:1-12 , Aluki 3:1-18 , Azã 1:19-28 )

¹ Nawẽnnɛ Dayʋa Azezi-krisi kõ-yẽlga n pɔsɛ se'em n wãna:

² La ẽŋɛ wʋ Nawẽnnɛ nõtɔ'ɔsa A'ezayi n yʋʋn põn gʋlsɛ se'em, tɩ Nawẽnnɛ yetɩ: «Bɩsɛ, mam wʋn tõm m tõntõnna tɩ a dẽŋɛ fʋ nẽŋa ka malgɛ sore bɔ fɔ.

³ La de la sɛka n mõolɩ weem tɔgra ke'enke'em yetɩ: ‹Malgɛ-ya sore sõŋa gu'ura Zuudãana. Malgɛ-ya sɔa la tɩ ba tɔ tẽntẽesɩ bɔ ẽ.› »

⁴ Bɛla tɩ Azã daan bɔna weem misra nẽrba ko'om pʋam, dee mõola yetɩ: «Teege-ya yɛm basɛ tõon-be'ero, dee botɩ ba mise ya ko'om pʋam, tɩ Nawẽnnɛ basɛ ya tõon-be'ero taalɛ.»

⁵ Tɩ nẽrba zozo'e ze'ele Zude so'olʋm wuu, la Zerizalɛm wuu sẽnna Azã zẽ'am tɔgra ba tõon-be'ero pa'ala ẽ. Tɩ Azã misra ba kʋlaa yʋ'ʋrɛ n de Zʋrdẽ pʋam.

⁶ Azã daan yɛ la fuugo n de yʋgma kõbrɔ, dee dɩkɛ sagãnnɛ lʋ a sɩa. A daan diti la seero la saniiro.

⁷ A daan mõolɩ yetɩ: «Nẽra n boe mam poorʋm sẽna, ẽŋa tarɩ pãŋa gãnna mam mɛ. Mam ka masɛ tɩ m dõbrɛ a nẽŋam pirge a tagra.

⁸ Mam misri ya la ko'om pʋam, la ẽŋa wʋn mise ya la Nawẽnnɛ Sɩa.»

Azezi ko'om misga, la Asũtãana n makɛ ẽ bɩsɛ
( Amatie 3:13—4:11 , Aluki 3:21-22 ; 4:1-13 )

⁹ Wakat-ẽŋa Azezi ze'ele la Nazarɛtɩ n boe Galile so'olʋm wa'am Azã zẽ'am, tɩ a mise ẽ Zʋrdẽ ko'om na pʋam.

¹⁰ Tɩ Azezi ze'ele ko'om na pʋam dɔɔra, yẽ tɩ saazuum darɛ yo'oge, tɩ Nawẽnnɛ Sɩa ãna wʋ na'adawenne na sige a zuo,

¹¹ tɩ kõa ze'ele Nawẽnnɛ yire yetɩ: «Fõn de la mam Dayʋa tɩ mam nõŋɛ la m sũure wuu, fʋ paagɛ la mam yɛm.»

¹² Bilam mẽŋa tɩ Nawẽnnɛ Sɩa botɩ Azezi sẽŋɛ weem.

¹³ A daan boe weem na dabsa pinaasɩ, tɩ Asũtãana wa'am wa makɛ ẽ bɩsɛ. A daan boe la we-dũnsi lɛ, tɩ Nawẽnnɛ malɛkadõma sõŋra ẽ.

Azezi wi nẽrba banaasɩ tɩ ba dɔla ẽ
( Amatie 4:12-22 , Aluki 4:14-15 ; 5:1-11 )

¹⁴ Ba daan yõkɛ Azã yʋ la yʋ'a deego pʋam. Bɛla poorʋm tɩ Azezi sẽŋɛ Galile ka mõola Nawẽnnɛ kõ-yẽlga yetɩ:

¹⁵ «Wakatɛ paagɛ mɛ, Nawẽnnɛ so'olʋm lɛm mɛ. Teege-ya yɛm basɛ tõon-be'ero dee sakɛ kõ-yẽlga la.»

¹⁶ Azezi daan dolɩ la Galile mõgrɛ la nõorʋm, yẽ Asimõ la a yɩbga A'ãndre n boe mĩ lɔbra yʋka mõgrɛ la pʋam, ba daan de la zũn-yõgrɩba.

¹⁷ Tɩ a yele ba yetɩ: «Dɔla-ya mam, tɩ mam wʋn botɩ ya ɛɛra nẽrba tɩ ba dɔla mam wʋ yãma n yõgrɩ zũma se'em na.»

¹⁸ Tɩ ba basɛ ba yʋgsɩ la bilam mẽŋa, dee dɔla ẽ.

¹⁹ Tɩ a sẽŋɛ fẽe yẽ Azebede dayɔɔsɩ Azakɩ la a yɩbga Azã n boe õorŋɔ pʋam malgra ba yʋgsɩ.

²⁰ Tɩ a darɛ wi ba, tɩ ba basɛ ba sɔ Azebede la a tõntõnɩba õorŋɔ la pʋam, dee dɔla ẽ.

Kʋlkã'arga n tarɩ bʋraa tɩ Azezi botɩ a yese
( Aluki 4:31-37 )

²¹ Tɩ Azezi la a karẽnbiisi sẽŋɛ Kapɛrnaʋm. Tɩ Zifdõma vo'osgo daarɛ paagɛ, tɩ Azezi kẽ ba wẽndeem zãsna nẽrba.

²² La zãsŋɔ la di'ige nẽrba la mɛ, se'ere n soe la, a zãsŋɔ la daan tarɩ la pãŋa, la ka ãn wʋ lɔɔ karẽnsãandõma n zãsnɩ se'em na.

²³ Tɩ bʋraa daan bɔna wẽndeem na tɩ kʋlkã'arga tara ẽ, tɩ bʋraa la kaasɛ yetɩ:

²⁴ «Azezi n de Nazarɛtɩ nẽra, fõn bẽm yelle n boe la tõma? Fõn wa'am tɩ fʋ sã'am na tõma? Mam mi fõn de sɛka. Fõn de la pʋpeelem dãana n ze'ele Nawẽnnɛ zẽ'am.»

²⁵ Tɩ Azezi tãsɛ kʋlkã'arga la yetɩ: «Go'oge, yese dee basɛ ẽ.»

²⁶ Tɩ kʋlkã'arga la bigse bʋraa la tɩ a gõgra, dee kaasɛ tagurga yese dee basɛ ẽ.

²⁷ Tɩ ba wuu zɛ yɛrɩ, sɔkra taaba yetɩ: «Wãna de la bẽm? La de la zãsŋɔ paalga n tarɩ pãŋa. A tɔgrɩ la kʋlkã'arsɩ, tɩ ba sakra a nõorɛ.»

²⁸ Tɩ Azezi yʋ'ʋrɛ darɛ saagɛ Galile so'olʋm zẽ'a woo.

Azezi botɩ bã'adõma yẽ ĩmã'asʋm
( Amatie 8:14-17 , Aluki 4:38-41 )

²⁹ Tɩ Azezi la a nẽrba daan yese Zifdõma wẽndeem na, tɩ Azakɩ la Azã doose ba, tɩ ba sẽŋɛ ka kẽ Asimõ la A'ãndre dõma yire.

³⁰ Tɩ Asimõ dɛɛm-pɔka ĩyã ba tʋlgɛ, tɩ a gã. Tɩ Azezi paagɛ, tɩ ba darɛ tɔgɛ pɔka la yelle bɔ ẽ.

³¹ Tɩ Azezi sẽŋɛ lɛm ẽ, gʋrɛ a nu'ugo botɩ a isge. Tɩ bã'a la basɛ ẽ, tɩ a ẽŋɛ ba sãanɔ.

³² Tɩ wẽnnɛ wa lui sobe, tɩ ba tarɩ bã'adõma wuu, la sɛba tɩ kʋlkã'arsɩ tarɩ ba wa'am Azezi zẽ'am.

³³ Tɩ tẽŋa la nẽrba wuu lagsɛ taaba yire la zanõrʋm.

³⁴ Tɩ Azezi botɩ nẽrba zozo'e tɩ bã'asɩ to'oto'ore tarɩ ba yẽ ĩmã'asʋm, dee dige kʋlkã'arsɩ zozo'e, tɩ ba yese. La a ka sakɛ tɩ kʋlkã'arsɩ la tɔgɛ, se'ere n soe la, ba põn mina ẽ mɛ.

Azezi mõolɛ Nawẽnnɛ kõ-yẽlga Galile
( Aluki 4:42-44 )

³⁵ Azezi daan isge la bulika yʋ'ʋŋɔ yʋ'ʋŋɔ yese tẽŋa la pʋam sẽŋɛ zẽ'a tɩ nẽrba ka boe, tɩ a ka pʋ'ʋsɛ.

³⁶ Tɩ Asimõ la nẽr-sɛba n daan boe la ẽ na yese ɛɛra ẽ.

³⁷ La ba daan yẽ ẽ mɛ, yele ẽ yetɩ: «Nẽrba wuu eerɩ fʋ mɛ.»

³⁸ Tɩ Azezi lerge ba yetɩ: «Basɛ-ya tɩ tɩ sẽŋɛ tẽn-sɛba n lɛm na tɩ m ka mõolɛ kõ-yẽlga la bilam mẽ, tɩ la de la bɛla ĩyã tɩ mam wa'am.»

³⁹ Tɩ a kaagɛ Galile so'olʋm wuu mõolɛ kõ-yẽlga la Zifdõma wẽndeto pʋam, dee dige kʋlkã'arsɩ tɩ ba yese dee basɛ nẽrba.

Azezi botɩ kõnkonne yẽ ĩmã'asʋm
( Amatie 8:1-4 , Aluki 5:12-16 )

⁴⁰ Bʋraa ayɩla n de kõnkonne n wa'am Azezi zẽ'am wa ka dũma tẽŋa a nẽŋam sose ẽ yetɩ: «Fʋ sãn bɔɔra, fʋ tã wʋn basɛ tɩ m yẽ ĩmã'asʋm mɛ le ãna sõŋa.»

⁴¹ Tɩ a ninbãalga yõkɛ Azezi, tɩ a tẽegɛ a nu'ugo kalʋm ẽ yetɩ: «Mam bɔɔra, yẽ ĩmã'asʋm le ãna sõŋa.»

⁴² Tɩ bã'a la basɛ ẽ bilam mẽŋa, tɩ a le ãna sõŋa.

⁴³ Tɩ Azezi yele ẽ yetɩ a fõrgɛ, dee kã'an ẽ yetɩ:

⁴⁴ «Da kãn yele nẽra nẽra, la sẽŋɛ Nawẽnnɛ kãabgɔ kẽema zẽ'am ka pa'alɛ ẽ fɔ mẽŋa tɩ a bɩsɛ, dee bɔ ẽ bõn-sɛba tɩ Amoyisi yʋʋn gʋlsɛ yetɩ ba bɔ la, tɩ la pa'alɛ ba tɩ fʋ sɩrɩ yẽ ĩmã'asʋm.»

⁴⁵ La bʋraa la fõrgɛ mɛ ka dɩkɛ yelle la mõolɛ pa'alɛ la ẽŋɛ se'em. Bɛla tɩ Azezi daan ka le tãna wʋn kẽ tẽŋa pʋam, sãn dagna tɩ a li'ise mɛ kẽ. A daan boe la zẽ'e-sɛba tɩ nẽrba ka boe mĩ na, tɩ nẽrba daan zɛ'ɛta zẽ'a woo sẽnna a zẽ'am.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan