Bìoball air-loidhne

Aluki 8 - Farefare Ninkaré

Pɔgsɩ n dolɩ Azezi

¹ Bɛla poorʋm, Azezi sẽŋɛ la tẽn-kãra, la tẽn-pɩgsɩ pʋam ka mõola Nawẽnnɛ so'olʋm kõ-yẽlga. Tɩ a karẽnbiisi pia la ayi la dɔla ẽ.

² La pɔgsɩ basɛba n mẽ daan dolɩ ẽ. La kʋlkã'arsɩ, la bã'asɩ n daan nãmsrɩ pɔg-bãma, tɩ Azezi botɩ ba yẽ ĩmã'asʋm. Pɔgsɩ la ayɩla yʋ'ʋrɛ de la Amaari n yese Magdala, ẽŋa tɩ kʋlkã'arsɩ bayopɔɩ daan yese dee basɛ ẽ na.

³ La ayẽma yʋ'ʋrɛ de la Azanɩ. Ẽŋa de la Asuza n bɩsrɩ naba A'erɔdɩ yire yelle la pɔga. La ayɩla yʋ'ʋrɛ de la Asuzanɩ. Pɔg-bãna, la pɔgsɩ zozo'e n tarɩ ba mẽŋa lɔgrɔ sõŋra Azezi la a karẽnbiisi la.

Nẽra n yese tɩ a lobge a bõnbuuri makrɛ
( Amatie 13:1-23 , Amarkɩ 4:1-20 )

⁴ La nẽrba n ze'ele tẽnsɩ to'oto'ore sẽnna Azezi zẽ'am. Nẽrba la n daan lagsɛ zo'oge pãɩ la, tɩ Azezi makɛ makrɛ bɔ ba yetɩ:

⁵ «Kaara n daan yese tɩ a lobge a bõnbuuri. Ẽŋa n boe mĩ lɔbgra la, tɩ bõnbuuri la basɛba lui sore zuo tɩ nẽrba nẽ ba, dee tɩ niinto mẽ wa'am wa di ba.

⁶ Tɩ basɛba lui tãmpĩa zuo bule, la mã'asrɛ n ka boe mĩ na ĩyã tɩ ba zẽkɛ ki.

⁷ Tɩ bõnbuuri basɛba lui gõ'osɩ zẽ'a, tɩ bãma la gõ'osɩ la wuu lagɩm yese, tɩ gõ'osɩ la fʋrɛ ba.

⁸ Tɩ basɛba lui zẽ'e-sõŋɔ zẽ'a yese, wɔm biɛ zo'oge paagɛ kɔbga kɔbga.» Azezi n tɔgɛ bɛla la, dee yetɩ: «Sɛka n wõm yetɔga wã, a selse sõŋa sõŋa.»

⁹ Tɩ a karẽnbiisi la soke ẽ makrɛ la võorɛ.

¹⁰ Tɩ a lerge ba yetɩ: «Nawẽnnɛ botɩ yãma bãŋɛ a so'olʋm yelle n sʋgɛ la mɛ, la sɛba n ka boe tõma pʋam na, mam makrɩ la magsa bɔ'ɔra ba. ‹Bɛla tɩ ba wʋn bɩsra, dee ka yẽta, ba wʋn wõnna, dee ka bãŋra ba võorɛ.›

¹¹ Makrɛ la võorɛ n wãna: Bõnbuuri la de la Nawẽnnɛ yetɔga.

¹² Sore la zuo tɩ bõnbuuri sɛba lui la, ãn wʋ nẽr-sɛba n wõm yetɔga la, tɩ Asũtãana wa'am wa yese yetɔga la ba sũure pʋam, botɩ ba kãn sakɛ yẽ fãarɛ.

¹³ La tãmpĩa la zuo tɩ bõnbuuri sɛba lui la, ãn wʋ nẽr-sɛba n wõm yetɔga la, dee sakɛ la sũ-yẽlga, la yetɔga la ka kẽ ba sũure pʋam sõŋa. Ba sakɛ la wakatɛ fẽe, tɩ yelle sãn paagɛ ba, tɩ ba basɛ.

¹⁴ La gõ'osɩ la zẽ'a tɩ bõnbuuri sɛba lui la, ãn wʋ nẽr-sɛba n wõm Nawẽnnɛ yetɔga, tɩ ba yɛm yɔɔra la ba vɔm yelle, tɩ bõntarsõm la dũnia yẽlʋm yɛmleego botɩ ba ka tãna wʋn bɩ Nawẽnnɛ sore la pʋam.

¹⁵ La zẽ'e-sõŋɔ la tɩ bõnbuuri sɛba lui la, ãn wʋ nẽr-sɛba n wõm yetɔga la, dee sakra dɩkra yetɔga la ɩta ba sũure pʋam sõŋa sõŋa, mõrgɛ zɛ kãŋkãŋɛ Nawẽnnɛ sore la pʋam wʋ bõnbuuri la n wɔm biɛ se'em na.»

Mõrgɛ-ya bãŋɛ yãma n selsrɩ se'em na võorɛ
( Amarkɩ 4:21-25 )

¹⁶ Azezi le yetɩ: «Nẽra ka yõ'orɩ fɩtla dɩkɛ lɔkɔ vuge ẽ, bɩɩ dɩkɛ ẽ sʋgɛ gɔrgɔ tilum. A wʋn dɩkɛ ẽ zoole la sɛla zuo, tɩ a nẽegɛ peelem tɩ sɛba n kẽ'erɩ la yẽta.

¹⁷ Bõn-sɛka woo n lile la wʋn lilge mɛ, la bõn-sɛka woo n sʋgɛ wʋn wa puke mɛ tɩ nẽrba bãŋɛ.

¹⁸ Mõrgɛ-ya bãŋɛ yãma n selsrɩ se'em na võorɛ. Se'ere n soe la, nẽr-sɛka n tarɩ sɛla, ba wʋn bɔ ẽ pa'asɛ, la nẽr-sɛka n ka tarɩ sɛla, bõn-sɛba fẽe tɩ a tẽ'esɛ tɩ a tara la, ba wʋn to'oge ba.»

Azezi ma, la a yɩbsɩ
( Amatie 12:46-50 , Amarkɩ 3:31-35 )

¹⁹ Azezi ma, la a yɩbsɩ n daan wa'am tɩ ba yẽ ẽ. La nẽrba zo'oge mɛ tɩ ba ka tã'agɛ paagɛ a zẽ'am.

²⁰ Tɩ ba yele Azezi yetɩ: «Fʋ ma, la fʋ yɩbsɩ n boe yẽŋa bɔɔra tɩ ba yẽ fɔ.»

²¹ Tɩ a lerge ba yetɩ: «Nẽr-sɛba wuu n wõnnɩ Nawẽnnɛ yetɔga, dee sakɛ ɩta lan yele se'em na, n de mam ma, la mam yɩbsɩ.»

Azezi botɩ kʋsebgo yõkɛ
( Amatie 8:23-27 , Amarkɩ 4:35-41 )

²² Daarɛ ayɩla tɩ Azezi la a karẽnbiisi kẽ õorŋɔ, tɩ a yele ba yetɩ: «Basɛ-ya tɩ dooge ya mõgrɛ la ke bɔba doone.» Tɩ ba mõnna õorŋɔ la wɛ'ɛsa.

²³ La ban mõnnɩ wɛ'ɛsa la, tɩ gẽem yõkɛ Azezi, tɩ a gĩse. Tɩ kʋseb-kãtɛ isge ko'om na zuo vugra, tɩ ko'om kẽ'era õorŋɔ la pʋam, tɩ la lebge pakrɛ bɔ ba.

²⁴ Tɩ ba paagɛ nẽegɛ Azezi, yele ẽ yetɩ: «Karẽnsãama, karẽnsãama, tõma yetɩ tɩ ki mɛ.» Tɩ a isge tãsɛ kʋsebgo, la ko-mĩ'isi tɩ ba ãna sĩm. Tɩ kʋsebgo la ko-mĩ'isi la yõkɛ, tɩ la ãna sĩm.

²⁵ Tɩ a soke a karẽnbiisi la yetɩ: «Bẽm tɩ ya ka bɔ mam sɩra?» Tɩ dabeem kẽ ba. Tɩ ba palẽŋa ẽkɛ, tɩ ba sɔkra taaba yetɩ: «Ãne n de ẽna tã'agɛ tãsra kʋsebgo la ko'om, tɩ ba sakra a nõorɛ?»

Kʋlkã'arsɩ n dolɩ bʋraaga, tɩ Azezi dige ba
( Amatie 8:28-34 , Amarkɩ 5:1-20 )

²⁶ La ba paagɛ la Geraza dõma tẽŋa. Mõgrɛ la boe la tẽn-ẽŋa la Galile tẽŋasʋka.

²⁷ Tɩ Azezi ze'ele õorŋɔ pʋam sige. Tɩ tẽŋa la bʋraa ayɩla tɩ kʋlkã'arsɩ dolɩ ẽ sẽnna tʋ'ʋsra ẽ. A ka yɛɛrɩ fuugo, halɩ tɩ la yuuge, la a ka kẽ'erɩ yire, a boe la zẽ'e-sɛba tɩ yɔɔrɔ boe mĩ na.

^28-29 Nõor-faa tɩ kʋlkã'arga la ẽn girge ẽ. Tɩ ba gu'ura ẽ, dee ba a nãma, la a nu'usi wuu la bãnsɩ. Tɩ a kɔ'ɔra bãnsɩ la. La kʋlkã'arga la ẽn tarɩ ẽ sẽŋɛ la mõom. La bʋraaga la n yẽ Azezi la, a kaasɛ mɛ ka dũma tẽŋa a nẽŋam, tĩi tɔgra yetɩ: «Azezi, Nawẽnnɛ n gãnnɩ wuu Dayʋa, bẽm boe mam la fõn tẽŋasʋka? M sosrɩ fʋ mɛ tɩ fʋ da nãmsɛ mam.» Azezi dẽŋɛ yele kʋlkã'arga la mɛ tɩ a yese dee basɛ bʋraa la, bɛla n soe tɩ kʋlkã'arga la yele bɛla.

³⁰ Tɩ Azezi soke ẽ yetɩ: «Fõn yʋ'ʋrɛ?» Tɩ a lerge yetɩ: «Mam yʋ'ʋrɛ de la Atʋsa.» Se'ere n soe tɩ a yele bɛla la, kʋlkã'arsɩ la n dolɩ ẽ na zo'oge mɛ.

³¹ Tɩ kʋlkã'arsɩ la sose Azezi yetɩ, a da botɩ ba sẽŋɛ bug-tẽŋa bog-ko'ogo la pʋam.

³² La kurkurdõma n daan zo'oge bɔna tãŋa zuo ɔbra yɔnnɔ. Tɩ kʋlkã'arsɩ la belem Azezi yetɩ, a bɔ ba nõorɛ tɩ ba kẽ kurkurdõma la. Tɩ Azezi sakɛ ban yele se'em na.

³³ Tɩ kʋlkã'arsɩ la basɛ bʋraa la, dee sẽŋɛ ka kẽ kurkurdõma la. Tɩ ba wuu zoe sige ka lui mõgrɛ pʋam ki.

³⁴ La sɛba n gu'uri kurkurdõma la n yẽ bõn-sɛka n ẽŋɛ la, ba zoe sẽŋɛ la tẽŋa pʋam, la kẽnkɛrsɩ wuu ka yele sɛla n ẽŋɛ la.

³⁵ Tɩ nẽrba sẽŋɛ tɩ ba ka bɩsɛ lan ẽŋɛ se'em na. La ban paagɛ Azezi zẽ'am na, ba yẽ bʋraa la tɩ kʋlkã'arsɩ la yese dee basɛ ẽ na, tɩ a yɛ la futo zẽa Azezi nẽŋam, dee tarɩ yɛm sõŋa sõŋa. Tɩ dabeem kẽ ba.

³⁶ Tɩ sɛba n yẽ bõn-sɛka n ẽŋɛ la, yele ba lan ẽŋɛ se'em tɩ kʋlkã'arsɩ la yese dee basɛ bʋraa la.

³⁷ Tɩ Geraza tẽŋa nẽrba la wuu belem Azezi yetɩ, a fõrgɛ dee basɛ ba tẽŋa, se'ere n soe la, dabeem n ba kẽ ba. Tɩ Azezi kẽ'era õorŋɔ la tɩ a fõrgɛ.

³⁸ Tɩ bʋraa la tɩ kʋlkã'arsɩ la yese dee basɛ ẽ na, sose Azezi tɩ a basɛ tɩ a doose ẽ. Tɩ Azezi zagsɛ, dee yele ẽ yetɩ:

³⁹ «Lebe kule ya yire, ka pa'alɛ bõn-sɛba wuu tɩ Nawẽnnɛ ẽŋɛ bɔ fʋ la.» Tɩ a doose tẽŋa la wuu pʋam, mõola pa'ala Azezi n ẽŋɛ bõn-sɛba wuu bɔ ẽ na.

Azayirusi pɔyʋa, la pɔka n kalʋm Azezi fuugo yelle
( Amatie 9:18-26 , Amarkɩ 5:21-43 )

⁴⁰ Azezi daan lebe dooge la mõgrɛ la ke bɔba. La nẽr-kʋʋŋɔ n põn lagsɛ bilam zɛ gu'ura ẽ. Azezi n daan paagɛ mĩ na, ba to'oge ẽ mɛ sõŋa sõŋa.

⁴¹ La bʋraa ayɩla n boe mĩ tɩ a yʋ'ʋrɛ dɛna Azayirusi, a de la Zifdõma wẽndeego nẽŋadãana, wa'am wa ka dũma tẽŋa Azezi nẽŋam sose ẽ yetɩ: «Wa'am mam yire,

⁴² tɩ mam pɔyʋa n tarɩ yʋʋma pia la ayi n dee la a ki.» Bʋraa la bia de la ẽŋa ayɩla mã'a. Tɩ Azezi dɔla ẽ wɛ'ɛsa, tɩ nẽr-kʋʋŋɔ la mikra ẽ.

⁴³ La pɔka n daan boe mĩ luta sɩkẽŋa yʋʋma pia la ayi tɩ la ka gɔ'ɔra. Tɩ a daan dɩkɛ ẽn tarɩ sɛla la wuu sã'am tɩbdõma zẽ'am, la baa ayɩla ka yãŋɛ botɩ a yẽ ĩmã'asʋm.

⁴⁴ Tɩ a paagɛ Azezi poorʋm, kalʋm Azezi fuugo nõorɛ. La bilam mẽŋa tɩ a zɩɩm na ze'ele ka le yɛsra.

⁴⁵ Tɩ Azezi soke yetɩ: «Ãne n kalʋm mam?» Tɩ nẽra woo sɩ'ɩsɛ. Tɩ Apɩyɛɛrɩ yetɩ: «Zuudãana, nẽrba wã wuu n lagɩm gilge fõn mikra se'em wã tɩ fõn sɔkra?»

⁴⁶ Tɩ Azezi yetɩ: «Nẽra n kalʋm mam, se'ere n soe la, mam bãŋɛ mɛ tɩ pãŋa n yese mam zẽ'am.»

⁴⁷ La pɔka la n bãŋɛ tɩ a kãn yãŋɛ sʋgɛ la Azezi la, tɩ a gõgra wa'am wa ka dũma tẽŋa Azezi nẽŋam, yele ẽ nẽrba la wuu nẽŋam se'ere n soe tɩ ẽŋa kalʋm ẽ, la ẽŋa n yẽ ĩmã'asʋm bilam mẽŋa se'em.

⁴⁸ Tɩ Azezi yele pɔka la yetɩ: «M bia, fõn bɔ mam sɩra la ĩyã n botɩ fʋ yẽ ĩmã'asʋm. Sẽŋɛ la sũ-mã'asʋm.»

⁴⁹ La Azezi n nãn boe mĩ tɔgra la, tɩ nẽra ze'ele Zifdõma wẽndeego nẽŋadãana la yire wa'am wa yele ẽ yetɩ: «Fʋ pɔyʋa la ki mɛ, da le nãmsɛ karẽnsãama la.»

⁵⁰ La Azezi n wõm bɛla la, tɩ a yele Azayirusi yetɩ: «Da zoe dabeem, wen bɔ mam sɩra, tɩ fʋ pɔyʋa la wʋn yẽ ĩmã'asʋm.»

⁵¹ Tɩ Azezi sẽŋɛ ka paagɛ a yire, la a ka botɩ nẽra nẽra doose ẽ kẽ, sãn dagna Apɩyɛɛrɩ, la Azakɩ, la Azã, la bia la sɔ, la a ma mã'a.

⁵² La nẽrba la wuu daan kellɩ mɛ fabla bia la ĩyã. Tɩ Azezi yele ba yetɩ: «Da kaasra-ya, bia la ka ki, a gĩsri mɛ.»

⁵³ Tɩ ba la'ara Azezi, ban mi tɩ bia la ki mɛ na ĩyã.

⁵⁴ Tɩ Azezi gʋrɛ bia la nu'ugo, tĩi tɔgɛ ẽ yetɩ: «Bia, isge.»

⁵⁵ Tɩ bia la vɔm leme, tɩ a isge bilam mẽŋa. Tɩ Azezi yele ba yetɩ: «Bɔ-ya bia la dia tɩ a di.»

⁵⁶ Tɩ la daan di'ige bia la sɔ, la a ma. Tɩ Azezi kã'an ba yetɩ, ba da yele nẽra nẽra sɛla n ẽŋɛ la.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan