Bìoball air-loidhne

« Roimhe

Air adhart »

Aluki 7 - Farefare Ninkaré

Azezi botɩ Rom sʋda-kɛ'ɛma tõntõnna yẽ ĩmã'asʋm
( Amatie 8:5-13 )

¹ Azezi tɔgɛ bɛla wuu bɔ nẽrba la ba'asɛ, dee sẽŋɛ la Kapɛrnaʋm.

² Tɩ Rom sʋda-kɛ'ɛma bɔna mĩ tara a tõntõnna tɩ a nõŋɛ. Tɩ tõntõnna la bẽ'era dee la a ki.

³ Tɩ sʋda-kɛ'ɛma la wõm Azezi yelle, tõm Zifdõma kẽma basɛba a zẽ'am tɩ ba sose ẽ yetɩ, a wa'am wa botɩ a tõntõnna la yẽ ĩmã'asʋm.

⁴ Tɩ ba sẽŋɛ Azezi zẽ'am ka tĩi belem ẽ yetɩ: «Bʋraa la de la nẽr-sõŋɔ.

⁵ A nõŋɛ tõma buuri mɛ, la ẽŋa n mẽ wẽndeego bɔ tõma. Bɛla ĩyã, mõrgɛ sõŋɛ ẽ.»

⁶ Tɩ Azezi dɔla ba wɛ'ɛsa ka lɛm yire la, tɩ sʋda-kɛ'ɛma la le tõm a sɩrdõma tɩ ba yele ẽ yetɩ: «Zuudãana, da nãmsɛ fʋ mẽŋa. Mam ka narɩ tɩ fʋ wa'am mam yire,

⁷ bɛla ĩyã tɩ mam tẽ'esɛ yetɩ mam mẽŋa ka narɩ tɩ m wa'am fõn zẽ'am. Wen tɔgɛ yetɔga mã'a, tɩ m tõntõnna la wʋn yẽ ĩmã'asʋm.

⁸ Se'ere n soe la, nẽrba n soe mam, la mam mẽ soe la sʋdaasɩ basɛba. Mam sãn yele sʋda-sɛka yetɩ: ‹Sẽŋɛ›, a we'esɩ mɛ. La mam sãn yele ayẽma yetɩ: ‹Wa'am›, a sẽm mɛ. Mam sãn yele m tõntõnna yetɩ: ‹Ẽŋɛ wãna›, a ɩtɩ mɛ.»

⁹ Azezi n wõm bɛla la, la daan di'ige ẽ mɛ, tɩ a wẽrgɛ yele nẽr-sɛba n dolɩ ẽ na yetɩ: «Mam yetɩ yãma mɛ tɩ mam nãn ka yẽ nẽra n bɔ mam sɩra wʋ bʋra-ẽna wã, baa Ɩsrayɛlɩ buuri la pʋam mam ka yẽ.»

¹⁰ Tɩ sʋda-kɛ'ɛma la n tõm sɛba la lebe a yire ka yẽ tɩ tõntõnna la tarɩ ĩmã'asʋm.

Azezi botɩ pɔkõorɛ bia vo'oge

¹¹ Bɛla poorʋm, Azezi we'esɩ la tẽŋa ayɩla yʋ'ʋrɛ n de Nayin, tɩ a karẽnbiisi, la nẽrba zozo'e dɔla ẽ.

¹² La Azezi paagɛ tẽŋa la nõorʋm, tʋ'ʋsɛ la nẽrba n zɛɛrɩ budibla n ki wɛ'ɛsa tɩ ba ka laagɛ. Budibla la ma de la pɔkõorɛ. La a bia de la ẽŋa mã'a. Tɩ tẽŋa la nẽrba zozo'e daan kɔlgɛ ẽ dɔla wɛ'ɛsa.

¹³ La Zuudãana Azezi n yẽ pɔkõorɛ la, tɩ a ninbãalga yõkɛ ẽ, tɩ a yele ẽ yetɩ: «Da kɛlla.»

¹⁴ A yele bɛla dee sẽŋɛ paagɛ kalʋm na sãŋandɛ la, tɩ nẽr-sɛba n zɛɛrɩ kũm na ze'ele, tɩ a yele kũm na yetɩ: «Budib-polle, mam yetɩ fʋ tɩ fʋ isge.»

¹⁵ Tɩ sɛka n ki la vo'oge isge zĩ'ire, yãŋa tɔgra. Tɩ Azezi yele a ma la yetɩ: «Fʋ bia n bɛla.»

¹⁶ Tɩ dabeem kẽ ba wuu, tɩ ba pẽgra Nawẽnnɛ yetɩ: «Nawẽnnɛ nõtɔ'ɔs-kãtɛ n wa'am tõma zẽ'am.» Dee le yetɩ: «Nawẽnnɛ n wa'am tɩ a sõŋɛ a nẽrba.»

¹⁷ Tɩ yetɔga la saagɛ Zude so'olʋm, la tẽn-sɛba n lɛm na wuu, tɩ ba wõm Azezi n ẽŋɛ se'em.

Azã n mise nẽrba ko'om pʋam tõm a karẽnbiisi Azezi zẽ'am
( Amatie 11:2-19 )

¹⁸ Tɩ Azã karẽnbiisi tɔgɛ bõn-bãma wuu pa'alɛ ẽ. Tɩ Azã wi a karẽnbiisi bayi

¹⁹ tõm ba Zuudãana Azezi zẽ'am, tɩ ba ka soke ẽ yetɩ: «Fõn de la sɛka tɩ Nawẽnnɛ yetɩ a wʋn wa'am na bɩɩ, tɩ gu'ura nẽra ayẽma?»

²⁰ Tɩ karẽnbiisi la sẽŋɛ ka paagɛ Azezi zẽ'am yele ẽ yetɩ: «Azã sɛka n mise nẽrba ko'om pʋam na n tõm tõma yetɩ, tɩ soke fʋ bɩsɛ, fõn de sɛka tɩ Nawẽnnɛ yʋʋn yetɩ a wʋn wa'am na bɩɩ, tɩ gu'ura nẽra ayẽma?»

²¹ Wakat-ẽŋa Azezi daan botɩ bã'adõma zozo'e tɩ bã'asɩ to'oto'ore tarɩ ba, la sɛba tɩ kʋlkã'arsɩ dolɩ ba n yẽ ĩmã'asʋm, dee botɩ fɔɔsɩ zozo'e nini yẽta.

²² Tɩ Azezi lerge sɛba tɩ Azã tõm na yetɩ: «Sẽŋɛ-ya ka yele Azã yãma n yẽ bõn-sɛba, dee wõm se'em na wuu: Fɔɔsɩ nini yẽtɩ mɛ, tɩ kɔɔrnɔ sẽnna, tɩ kõnkɔma yẽ ĩmã'asʋm le ãna sõŋa, tɩ wansɩ wõnna, tɩ kũm vɔ'ɔra, tɩ nasdõma wõnna Nawẽnnɛ kõ-yẽlga.

²³ La nẽr-sɛka n ka lebrɩ poorʋm mam ĩyã tarɩ zu-yẽlga.»

²⁴ Sɛba tɩ Azã tõm na lebe kule mɛ. Tɩ Azezi yãŋa tɔgɛ nẽrba la Azã yelle yetɩ: «Yãma daan sẽŋɛ mõom tɩ ya ka bɩsɛ la bẽm? Yãma sẽŋɛ ka bɩsɛ la mõogɔ tɩ kʋsebgo mĩini bɩɩ? Ayɛɩ.

²⁵ La bẽm tɩ yãma sẽŋɛ ka bɩsɛ? Yãma sẽŋɛ ka bɩsɛ la nẽra n yɛ fu-sõma bɩɩ? Ayɛɩ. Nẽr-sɛba n yɛɛrɩ fu-sõma dee tarɩ bõn-sõma la, kẽ'erɩ la na'adõma yiɛ pʋam.

²⁶ La yãma sẽŋɛ ka bɩsɛ la bẽm? Ya sẽŋɛ ka bɩsɛ la Nawẽnnɛ nõtɔ'ɔsa bɩɩ? Ẽe. La mam yetɩ ya tɩ a de la nẽra n gãnnɩ Nawẽnnɛ nõtɔ'ɔsa.

²⁷ La de la ẽŋa yelle tɩ la gʋlsɛ Nawẽnnɛ gõŋɔ pʋam tɩ Nawẽnnɛ yetɩ: ‹Mam tõntõnna n wãna tɩ mam tõm tɩ a dẽŋɛ fʋ nẽŋa malgɛ sore bɔ fɔ.›

²⁸ Mam yetɩ ya tɩ nẽrsaalba tɩ ba dɔgɛ la wuu pʋam, nẽra ka boe n gãnnɩ Azã, la nẽr-sɛka n de pɩka Nawẽnnɛ so'olʋm na pʋam gãnnɩ Azã mɛ.

²⁹ La nẽrba la wuu, baa la lampo-tɔ'ɔsrɩba la n wõm Azã yetɔga la, ba basɛ tɩ Azã mise ba ko'om pʋam mɛ. Bɛla pa'alɩ mɛ tɩ ba sakɛ mɛ tɩ Nawẽnnɛ n tarɩ sɩra.

³⁰ La Farisi dõma, la Nawẽnnɛ lɔɔ karẽnsãandõma n zagsɛ tɩ Azã ka mise ba ko'om pʋam na, ba zagsɛ la bõn-sɛba tɩ Nawẽnnɛ yetɩ a ẽŋɛ bɔ ba la.»

³¹ Tɩ Azezi le yetɩ: «Bẽm tɩ mam wʋn dɩkɛ makɛ la zamãan-ẽna wã nẽrba n ɩtɩ se'em na. Ba ɩrgɔ wõn na bẽm?

³² Ba ãn wʋ kɔma n zĩ da'am wi'ira taaba yetɩ: ‹Tõma peebe wɩɩsɩ mɛ, tɩ yãma zagsɛ ka wa. Tɩ tõma yõom kʋʋrɛ yõoma, tɩ yãma ka kɛlla.›

³³ Se'ere n soe la, Azã n misri nẽrba ko'om pʋam na wa'am mɛ wa lʋta nõorɛ, dee ka yũura dãam, tɩ ba yetɩ kʋlkã'arga n dolɩ ẽ.

³⁴ Tɩ Nẽrsaala Dayʋa la wa'am wa dita dee yũura, tɩ ba yetɩ, a de la dita, la dã-yũura, la lampo-tɔ'ɔsrɩba la tõon-be'ero dõma sɩrɛ.

³⁵ Nẽr-sɛba n sakrɩ Nawẽnnɛ yɛm n boorɩ se'em na n mi tɩ a tarɩ yɛm.»

Azezi boe Asimõ yire

³⁶ Farisi nẽra ayɩla yʋ'ʋrɛ n de Asimõ n daan wi Azezi tɩ a wa'am ẽŋa yire tɩ ba di. Tɩ Azezi sẽŋɛ yire la ka zĩ'ire bɔna mĩ tɩ a di.

³⁷ La pɔka n boe tẽŋa la pʋam tõnna yalsɩ tõoma. La pɔka la n wõm tɩ Azezi boe Farisi nẽra la yire dita la, tɩ a tarɩ albatrɩ dugla n pɩrɛ la tɩdarɛ kaam yũuŋo n ãn sõŋa wa'am Azezi zẽ'am.

³⁸ Yãŋa ze'ele lɛm Azezi nãma bɔba kɛlla. Tɩ a nintãm yɛsra tɔgra Azezi nãma zuo. Tɩ pɔka la suure duuse Azezi nãma la, la a zomto, dee kɔkɛ a nãma la, sõogɛ ba la tɩdarɛ kaam na.

³⁹ Tɩ Farisi nẽra la n wi Azezi la yẽ bɛla, tẽ'esɛ yetɩ: «Bʋra-ẽna sãn dɛna Nawẽnnɛ nõtɔ'ɔsa, a wʋn bãŋɛ nɩ pɔg-ẽna n kalʋm ẽ wã n de nẽr-sɛka, a wʋn bãŋɛ nɩ tɩ a tõnnɩ la yalsɩ tõoma.»

⁴⁰ Tɩ Azezi yele ẽ yetɩ: «Asimõ, mam tarɩ la sɛla tɩ m yele fo.» Tɩ Asimõ lerge ẽ yetɩ: «Karẽnsãama, yele!»

⁴¹ Tɩ Azezi yele ẽ yetɩ: «Nẽra n daan boe tɩ nẽrba bayi tara a sãnnɛ. Nẽra ayɩla sãnnɛ de la lig-kõba kɔbsnuu. Tɩ ayẽma la mẽ sãnnɛ dɛna lig-kõba pinuu.

⁴² Tɩ ba daan ka tãna wʋn yɔ ẽ a ligri la. Tɩ a basɛ ligri la bɔ ba. Bãma bayi la, ãne n wʋn nõŋɛ ligri la dãana gãnna?»

⁴³ Tɩ Asimõ lerge ẽ yetɩ: «Mam tẽ'esɛ tɩ sɛka sãnnɛ n zo'oge la.» Tɩ Azezi yele ẽ yetɩ: «Fõn lerge se'em na de la sɩra.»

⁴⁴ Dee gelge bɩsɛ pɔka la, yele Asimõ yetɩ: «Fõn yẽ pɔka wã? Mam n kẽ fõn yire la, fõn ka bɔ mam ko'om tɩ mam peege m nãma. La pɔka la peege mam nãma mɛ la a nintãm, dee duuse ba la a zomto.

⁴⁵ Fõn ka kɔkɛ mam tɩ la pa'alɛ tɩ fʋ to'oge mam sõŋa. La mam n kẽ'em na, pɔka la kɔkɛ mam nãma mɛ ka basɛ.

⁴⁶ La fõn ka nã'asɛ mam ẽŋɛ kaam mam zuugo, la a sõogɛ mam nãma mɛ la tɩdarɛ kaam.

⁴⁷ Bɛla ĩyã tɩ mam yele fʋ yetɩ, Nawẽnnɛ basɛ a tõon-be'ero n zo'oge la taalɛ mɛ. Bɛla n soe tɩ a nõŋrɛ la zo'oge. La nẽr-sɛka tɩ Nawẽnnɛ basɛ a tõon-be'ero taalɛ fẽfẽe la, a nõŋrɛ mẽ de la fẽe.»

⁴⁸ Azezi yele bɛla, dee yele pɔka la yetɩ: «Fʋ tõon-be'ero taalɛ ka le bɔna fʋ zuo.»

⁴⁹ Tɩ sɛba n daan diti la ẽ na tɔgra la taaba sɔkra yetɩ: «A tẽ'esɛ tɩ ẽŋa de la ãne basɛ nẽrba tõon-be'ero taalɛ?»

⁵⁰ Tɩ Azezi yele pɔka la yetɩ: «Fõn bɔ mam sɩra la ĩyã n fãagɛ fɔ basɛ. Sẽŋɛ la sũ-mã'asʋm.»

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan