Bìoball air-loidhne

Aluki 4 - Farefare Ninkaré

Asũtãana makɛ Azezi
( Amatie 4:1-11 , Amarkɩ 1:12-13 )

¹ Azezi daan ze'ele la Zʋrdẽ kʋlaam lebe, tɩ Nawẽnnɛ Sɩa la kɔ'ɔn bɔna la ẽ. La Nawẽnnɛ Sɩa la tarɩ ẽ sẽŋɛ la weem.

² Bilam tɩ Asũtãana makɛ ẽ dabsa pinaasɩ. La dabsa pinaasɩ la pʋam a ka di sɛla sɛla, tɩ a kɔm dõnna.

³ Bɛla tɩ Asũtãana yele ẽ yetɩ: «Fʋ sãn sɩrɩ dɛna la Nawẽnnɛ Dayʋa, fʋ yele kugre wã tɩ a lebge dia.»

⁴ Tɩ Azezi lerge ẽ yetɩ: «La gʋlsɛ Nawẽnnɛ gõŋɔ pʋam yetɩ: ‹Nẽrsaala kãn vɔa dia mã'a ĩyã.› »

⁵ Tɩ Asũtãana tarɩ ẽ sẽŋɛ ka zom tãŋa zuo, pa'alɛ ẽ dũnia so'olʋm wuu nif-kabsɩgɔ pʋam.

⁶ Dee yele ẽ yetɩ: «Bãna wuu de la mam n soe, bɛla mam tã wʋn bɔ nẽr-sɛka woo tɩ mam boorɩ mɛ. Mam wʋn bɔ fɔ dũnia wã na'am la wuu, la so'olʋm bãma wuu pẽka.

⁷ Fʋ sãn ka dũma tẽŋa nã'asɛ mam, ba wuu wʋn dɛna la fõn dẽnnɛ.»

⁸ Tɩ Azezi lerge ẽ yetɩ: «La gʋlsɛ Nawẽnnɛ yetɔga pʋam yetɩ: ‹Nã'asra Zuudãana Nawẽnnɛ, dee sakra ẽŋa ayɩla mã'a.› »

⁹ Tɩ Asũtãana le tarɩ ẽ sẽŋɛ Zerizalɛm ka zom Wẽnde-kãtɛ la zuo yele ẽ yetɩ: «Fʋ sãn sɩrɩ dɛna la Nawẽnnɛ Dayʋa, fʋ ze'ele kalam ẽkɛ bisge tẽŋa,

¹⁰ tɩ la gʋlsɛ yetɩ: ‹Nawẽnnɛ wʋn tõm a malɛkadõma tɩ ba gu fo.

¹¹ La ba wʋn kɔkɛ fɔ la ba nu'usi tɩ fʋ kãn wẽ fʋ nã'arɛ la kugre.› »

¹² Tɩ Azezi lerge yetɩ: «Nawẽnnɛ gõŋɔ yele tɩ: ‹Da makɛ fʋ Zuudãana Nawẽnnɛ bɩsɛ.› »

¹³ La Asũtãana n daan makɛ Azezi bɛla wuu zɩgɛ koŋe la, a basɛ ẽ dee gu'ura la a sãn le yẽ folle.

Azezi n pĩ'ilum a tõoma Galile tẽŋa
( Amatie 4:12-17 , Amarkɩ 1:14-15 )

¹⁴ La Azezi daan lebe Galile la Nawẽnnɛ Sɩa la pãŋa, tɩ a yʋ'ʋrɛ kɔ'ɔn saagɛ zẽ'a wuu.

¹⁵ La a ẽn zãsna la nẽrba Nawẽnnɛ yetɔga Zifdõma wẽndeto pʋam, tɩ ba wuu pẽgra ẽ.

Nazarɛtɩ nẽrba ka bɔ Azezi sɩra
( Amatie 13:53-58 , Amarkɩ 6:1-6 )

¹⁶ La Azezi daan sẽŋɛ la Nazarɛtɩ, ban daan uge ẽ tẽn-sɛka la. Tɩ Zifdõma vo'osgo daarɛ tɩ a kẽ ba wẽndeem wʋ ẽŋa ẽn kẽ'era se'em na, yãŋa isge ze'ele tɩ a karẽŋɛ.

¹⁷ Tɩ ba dɩkɛ gõn-sɛka tɩ Nawẽnnɛ nõtɔ'ɔsa A'ezayi yʋʋn gʋlsɛ la bɔ ẽ. Tɩ a lakɛ gõŋɔ la yẽ zẽ'e-sɛka tɩ a boorɩ la, yãŋa karẽŋɛ wʋ zẽ'a la n yele se'em na:

¹⁸ «Zuudãana Nawẽnnɛ Sɩa n boe la mam, ẽŋa n looge mam bɔ mam pãŋa, tɩ m bʋglɛ sũ-sã'aŋɔ dõma sũure, tɩ m mõolɛ kõ-yẽlga la bɔ nasdõma, dee tõm mam tɩ m tɔgɛ bɔ yamsɩ tɩ ba wʋn yẽ yolsgo, dee tɔgɛ bɔ fɔɔsɩ tɩ ba nini wʋn pike, dee yese sɛba n boe nãmsgɔ pʋam la basɛ,

¹⁹ dee mõolɛ tɩ wakatɛ paagɛ ya, tɩ Zuudãana wʋn ẽŋɛ nẽrba yel-sõnnɛ.»

²⁰ La ẽn karẽŋɛ ba'asɛ la, a lebe laglɛ gõŋɔ la mɛ bɔ sɛka n gu'uri gõnnɔ la, dee zĩ'ire. Tɩ nẽr-sɛba wuu n boe wẽndeem na bɩsra ẽ zĩi.

²¹ Tɩ a yele ba yetɩ: «Zĩna, lɛɛlɛ wã, sɛla tɩ ba gʋlsɛ Nawẽnnɛ gõŋɔ pʋam tɩ yãma wõm wã, la ẽŋɛ wʋ lan yele se'em na.»

²² Tɩ ba tɔgɛ pẽgɛ ẽ, la a yetɔg-sõma la tɩ a tɔgɛ la di'ige ba mɛ. Dee tɩ ba sɔkra yetɩ, la ka de Azozɛfʋ dayʋa la n wãna?

²³ Tɩ Azezi yele ba yetɩ: «Mam põn mina tɩ ya wʋn makɛ makrɛ ẽna bɔ mam yetɩ: ‹Tɩɩm dãana, tɩbɛ fʋ mẽŋa.› La ya wʋn ken yele mam yetɩ: ‹Bõn-sɛba tɩ fʋ daan ẽŋɛ Kapɛrnaʋm tẽŋam tɩ tõma wõm na, ẽŋɛ bɛla nõo fʋ mẽŋa tẽŋam kalam mẽ.› »

²⁴ Tɩ Azezi le yele ba yetɩ: «Mam yetɩ ya la sɩra, tɩ ba ka nannɩ Nawẽnnɛ nõtɔ'ɔsa baa ayɩla a mẽŋa tẽŋam.

²⁵ La de la sɩra tɩ mam yetɩ ya tɩ: Pɔkõpa zozo'e yʋʋn boe Ɩsrayɛlɩ tẽŋam A'eli wakatʋm na mɛ, la saaga ka ni yʋʋma atã la wõr-sɩyoobɩ, tɩ kɔm yʋʋn ba bɔna tẽŋa la wuu pʋam.

²⁶ La Nawẽnnɛ ka tõm A'eli yetɩ a sẽŋɛ pɔkõ-bãma zẽ'am. A tõm ẽ na pɔkõorɛ n boe Sarɛpɩta n boe Sidõ so'olʋm pʋam na zẽ'am.

²⁷ La kõnkɔma zozo'e yʋʋn boe Ɩsrayɛlɩ tẽŋam A'elize wakatʋm na mɛ, la baa ayɩla ka yẽ ĩmã'asʋm, la Anãamã sɛka n yese Siiri so'olʋm na mã'a n yẽ ĩmã'asʋm.»

²⁸ La ban wõm bɛla la, sɛba n boe wẽndeego la pʋam wuu sũure daan yĩige mɛ.

²⁹ Tɩ ba isge ve'ege Azezi tẽŋa la pʋam yese. Tẽŋa la boe la tãŋa zuo. Tɩ ba tarɩ ẽ sẽŋɛ zẽ'e-sɛka n zãagɛ la tẽŋa la, ba daan boorɩ tɩ ba zã'agɛ ẽ basɛ mɛ tɩ a lui ki.

³⁰ La Azezi kẽ la nẽr-kʋʋŋɔ la tẽŋasʋka fõrgɛ.

Bʋraaga tɩ kʋlkã'arga tarɩ ẽ
( Amarkɩ 1:21-28 )

³¹ Bɛla poorʋm, Azezi sẽŋɛ la Galile tẽŋa ayẽma yʋ'ʋrɛ n de Kapɛrnaʋm, tɩ Zifdõma vo'osgo daarɛ daan paagɛ, tɩ a sẽŋɛ ba wẽndeem ka zãsna nẽrba Nawẽnnɛ yetɔga.

³² Tɩ a zãsŋɔ la daan di'ige ba, a yetɔga la n tarɩ pãŋa la ĩyã.

³³ Tɩ bʋraa daan bɔna wẽndeem na tɩ kʋlkã'arga tara ẽ, tɩ a tĩi kaasɛ yetɩ:

³⁴ «A'a! Azezi n de Nazarɛtɩ nẽra, fõn bẽm yelle n boe la tõma? Fõn wa'am tɩ fʋ sã'am na tõma? Mam mi fõn de sɛka, fõn de la pʋpeelem dãana n ze'ele Nawẽnnɛ zẽ'am.»

³⁵ Tɩ Azezi tãsɛ kʋlkã'arga la yetɩ: «Go'oge, yese dee basɛ bʋraa la!» Tɩ kʋlkã'arga la lʋbɛ ẽ nẽrba la wuu nẽŋam, dee yese, la a ka pɔglʋm ẽ.

³⁶ Tɩ ba wuu palẽŋa ẽkɛ tɩ ba yele taaba yetɩ: «Yetɔga ẽna de la bẽm? A tarɩ la pãŋa la ke'eŋo, dee tãsra kʋlkã'arsɩ, tɩ ba yɛsra.»

³⁷ Tɩ Azezi yʋ'ʋrɛ saagɛ zẽ'e-bãma wuu.

Azezi botɩ nẽrba zozo'e yẽ ĩmã'asʋm
( Amatie 8:14-17 , Amarkɩ 1:29-34 )

³⁸ Tɩ Azezi isge ba wẽndeego la pʋam yese ka kẽ Asimõ yire. Tɩ Asimõ dɛɛm-pɔka bẽ'era, tɩ a ĩyã ba tʋlgɛ. Tɩ ba tɔgɛ a yelle bɔ Azezi,

³⁹ tɩ a sẽŋɛ ka suure a zuo, dee tãsɛ bã'a la yetɩ a basɛ ẽ. La ẽn yele la, bã'a la basɛ ẽ mɛ, tɩ a isge tɔtɔ ẽŋɛ ba sãanɔ.

⁴⁰ Tɩ wẽnnɛ daan bɔna mĩ kẽ'era, tɩ ba tarɩ bã'adõma tɩ bã'asɩ buuri to'oto'ore tarɩ ba, sẽŋɛ Azezi zẽ'am. Tɩ Azezi dɩkɛ a nu'usi paglɛ ba nẽra woo zuo, tɩ ba wuu yẽ ĩmã'asʋm.

⁴¹ La kʋlkã'arsɩ daan yesrɩ mɛ dee basra nẽrba zozo'e, dee kaasra yetɩ: «Fõn de la Nawẽnnɛ Dayʋa.» Tɩ Azezi tãsɛ ba, ka basɛ tɩ ba tɔgɛ sɛla sɛla, se'ere n soe la, ba daan bãŋɛ tɩ a de la Krisi n de Fãagra la.

Azezi mõolɩ Nawẽnnɛ kõ-yẽlga Zifdõma wẽndeto pʋam
( Amarkɩ 1:35-39 )

⁴² Tɩ beere wiige, tɩ Azezi yese tẽŋa la pʋam sẽŋɛ zẽ'e-sɛka tɩ nẽra ka boe mĩ. Tɩ nẽrba zozo'e ɛɛra ẽ. La ba daan yẽ ẽ mɛ, bɔɔra tɩ ba gu ẽ tɩ a da le yese ba zẽ'am.

⁴³ La Azezi yele ba yetɩ: «Dẽnɩ tɩ mam mõolɛ kõ-yẽlga pa'alɛ Nawẽnnɛ so'olʋm n ãn se'em tẽnsɩ basɛba mẽ pʋam, la de la bɛla ĩyã tɩ Nawẽnnɛ tõm mam.»

⁴⁴ La a ẽn mõola kõ-yẽlga la Zifdõma wẽndeto pʋam mɛ.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan