Bìoball air-loidhne

Aluki 14 - Farefare Ninkaré

Azezi botɩ bʋraaga yẽ ĩmã'asʋm vo'osgo daarɛ

¹ Vo'osgo daarɛ ayɩla tɩ Azezi daan sẽŋɛ Farisi dõma naba ayɩla yire tɩ ba di. Tɩ nẽrba la n boe mĩ na bɩsra ẽn wʋn ẽŋɛ se'em.

² La bʋraaga ayɩla n boe mĩ tɩ ĩ-fʋʋsŋɔ bã'aga tara ẽ, tɩ a zɛ Azezi nẽŋam.

³ Tɩ Azezi soke lɔɔ karẽnsãandõma, la Farisi dõma la yetɩ: «Sore boe tɩ nẽra botɩ nẽrba yẽ ĩmã'asʋm vo'osgo daarɛ bɩɩ, sore ka boe?»

⁴ Tɩ ba sĩna. Tɩ Azezi botɩ bʋraaga la yẽ ĩmã'asʋm, basɛ ẽ tɩ a kule.

⁵ Dee soke ba yetɩ: «Ãne n boe yãma pʋam tɩ a dayʋa, bɩɩ a lɔlga wʋn lui lʋa pʋam vo'osgo daarɛ tɩ a kãn zoe tɔtɔ sẽŋɛ ka yaagɛ ẽ?»

⁶ Tɩ ba makɛ tɩ ba lerge ẽ koŋe.

Dɛna-ya sik-m-mẽŋa dõma

⁷ Tɩ Azezi yẽ nẽr-sɛba tɩ ba wi tɩ ba wa'am wa di la n loosrɩ zẽ'e-sõma zĩ'ita, tɩ a makɛ makrɛ yele ba yetɩ:

⁸ «Nẽra sãn ẽŋɛ pɔgdire kibsa wi fo, da kãn sẽŋɛ ka zĩ'ire zẽ'e-sõŋɔ, tã tɩ a mẽ wi la nẽra n gãnnɩ fõn.

⁹ Tɩ sɛka n wi ya wuu la, da wa'am wa yele fʋ yetɩ: ‹Isge, dee tɩ ẽna zĩ'ire.› Tɩ fʋ yãŋa isge sẽŋɛ ka zĩ'ire poorʋm poorʋm la yãnnɛ.

¹⁰ Nẽra sãn wi fo, sẽŋɛ ka zĩ'ire poorʋm, tɩ sɛka n wi fʋ la sãn wa'am yẽ fɔ, a wʋn yetɩ: ‹M sɩrɛ, wa'am wa zĩ'ire nẽŋam.› Bɛla tɩ fʋ wʋn yẽ nã'asgɔ nẽr-sɛba tɩ fʋ zĩ la ba la zẽ'am.

¹¹ Nẽr-sɛka woo n zẽkrɩ a mẽŋa, Nawẽnnɛ wʋn sike ẽ, la nẽr-sɛka n sikri a mẽŋa, Nawẽnnɛ wʋn zẽkɛ ẽ.»

¹² La Azezi yele sɛka n wi ẽ na yetɩ: «Fʋ sãn yetɩ fʋ ẽŋɛ dia wʋntɛɛŋa, bɩɩ yʋ'ʋŋɔ wi nẽrba tɩ ba wa'am wa di, da wi'ira fʋ sɩrdõma, bɩɩ fʋ sɔbiisi, bɩɩ fʋ nẽrba, bɩɩ fʋ sawiiba n de bõntatba, se'ere n soe la, ba mẽ wʋn wa ẽŋɛ bɛla daar-sɛka mɛ wi fo lebse bɛla sãnnɛ.

¹³ Fʋ sãn yetɩ fʋ ẽŋɛ dia wi nẽrba tɩ ba wa'am di, wi nasdõma, la kɔɔrnɔ, la wɔbsɩ, la fɔɔsɩ.

¹⁴ Fʋ sãn ẽŋɛ bɛla, fʋ wʋn tara zu-yẽlga, se'ere n soe la, ba kãn yãŋɛ ẽŋɛ lebse fo. Bɛla, wakat-sɛka tɩ Nawẽnnɛ wʋn botɩ nẽr-sɛba n ẽŋɛ sɛla n masɛ a yɛm na vo'oge la, fʋ wʋn yẽ yɔɔrɔ.»

Kibs-kãtɛ makrɛ
( Amatie 22:1-10 )

¹⁵ La nẽrba la n lagsɛ zẽa dia zẽ'a la Azezi la, ba wõm ẽn yele se'em na mɛ, tɩ nẽra ayɩla yele ẽ yetɩ: «Nẽr-sɛka woo n wʋn po di dia Nawẽnnɛ so'olʋm pʋam na tarɩ zu-yẽlga.»

¹⁶ Tɩ Azezi makɛ makrɛ bɔ ẽ yetɩ: «Bʋraa ayɩla n daan boe, ẽŋɛ dia zozo'e, wi nẽrba zozo'e tɩ ba wa'am wa di.

¹⁷ Tɩ dia la wakatɛ paagɛ, tɩ a tõm a tõntõnna yetɩ, a sẽŋɛ ka yele nẽrba la tɩ ẽŋa yetɩ: ‹Wa'am-ya tɩ mam mãasʋm ba'asɛ mɛ gu'ura ya.›

¹⁸ Tɩ ba nẽra woo yɛta lan pakɛ ẽŋa se'em, tɩ ẽŋa sɔsra sugri. Pɔspɔsɩ dãana la yele ẽ yetɩ: ‹Mam da la va'am, tɩ m sẽŋɛ ka bɩsɛ lan ãn se'em, bɛla tɩ mam sɔsra ẽ sugri.›

¹⁹ Tɩ ayɩla yetɩ: ‹Mam da la nii-kɔɔrsɩ pia bɔɔra tɩ m makɛ ba bayi bayi kɔ bɩsɛ, bɛla tɩ mam sɔsra ẽ sugri.›

²⁰ Tɩ ayẽma mẽ yetɩ: ‹Mam di la pɔg-sãana, bɛla tɩ mam kãn yãŋɛ wa'am.›

²¹ Tɩ tõntõnna la lebe ka tɔgɛ bɛla bɔ a zuudãana la. Tɩ a zuudãana la sũure yĩige, tɩ a yele a tõntõnna la yetɩ: ‹Yese tɔtɔ sẽŋɛ tẽŋa la sorɔɔrɔ zuto ka tarɩ nasdõma, la kɔɔrnɔ, la fɔɔsɩ, la wɔbsɩ wa'am tɩ ba di.›

²² Tɩ tõntõnna la sẽŋɛ ka ẽŋɛ a zuudãana la n yele se'em na, dee yele ẽ yetɩ: ‹M zuudãana, fõn yetɩ mam ẽŋɛ se'em na, mam ẽŋɛ mɛ, la zẽ'a ken dee mɛ.›

²³ Tɩ zuudãana la le yele a tõntõnna la yetɩ: ‹Yese tẽŋa la pʋam sẽŋɛ sorɔ-pɩgsɩ la wuu zuo, ka mõrgɛ tarɩ nẽrba la wa'am tɩ ba kẽ tɩ mam yire pɩrɛ.›

²⁴ La mam yetɩ yãma mɛ tɩ nẽr-sɛba tɩ mam dẽŋɛ yele ba tɩ ba wa'am, tɩ ba zagsɛ la, ba nẽra nẽra kãn le malɩn di mam dia la.»

Azezi karẽnbia n masɛ tɩ a ẽŋɛ se'em
( Amatie 10:37-38 ; 5:13 , Amarkɩ 9:50 )

²⁵ Azezi daan sẽnnɩ mɛ, tɩ nẽr-kʋʋŋɔ dɔla ẽ, tɩ a gelge yele ba yetɩ:

²⁶ «Nẽra sãn yetɩ a doose mam dee ka nõŋɛ mam gãnna a sɔ, la a ma, la a pɔga, la a kɔma, la a sɔbiisi, la a tãpa, bɩɩ a sãn ka nõŋɛ mam gãnna a mẽŋa vɔm, a kãn tã'agɛ dɛna mam karẽnbia.

²⁷ La sɛka woo n ka sakɛ nãmsgɔ wʋ nẽra n zɛɛrɩ a kũm dɔ-puurŋa dɔla mam, a kãn tã'agɛ dɛna mam karẽnbia.

²⁸ Ya mi tɩ nẽra sãn bɔna ya pʋam bɔɔra tɩ a mẽ de-tʋgma, a wʋn dẽŋɛ zĩ'ire mɛ geele bɩsɛ, ẽn tarɩ se'em na wʋn seke tɩ a yãŋɛ mẽ ba'asɛ, bɩɩ la kãn seke?

²⁹ La sãn dagna bɛla, a sãn ẽebɛ ẽbrɛ dee ka yãŋɛ mẽ ba'asɛ, sɛba wuu n yẽ bɛla la wʋn la ẽ mɛ

³⁰ yetɩ: ‹Nẽr-ẽna ẽebɛ la deego, dee ka yãŋɛ mẽ ba'asɛ.›

³¹ Bɩɩ naba sãn wɛ'ɛsa tɩ a zɛbɛ la a na-tadãana, dẽnɩ tɩ a dẽŋɛ tẽ'esɛ bɩsɛ, ẽŋa n tarɩ nẽrba tʋspia la, a wʋn tã'agɛ zɛbɛ la na-sɛka n tarɩ nẽrba tʋspisyi, bɩɩ a kãn tã'agɛ?

³² La a sãn bãŋɛ tɩ a kãn tã'agɛ, naba ayẽma la n ken zãagɛ la, a wʋn dẽŋɛ tõm na a tõntõnɩba tɩ ba sẽŋɛ naba la zẽ'am ka soke ẽ bɩsɛ, bãma wʋn ẽŋɛ la wãne tɩ zɛbrɛ la ba'asɛ.

³³ Bɛla mẽ, yãma nẽr-sɛka woo n ka basrɩ bõn-sɛba wuu tɩ a tarɩ la, ka tã wʋn dɛna mam karẽnbia.

³⁴ Yaarʋm ãn sõŋa mɛ, la a sãn sabgɛ, ba wʋn ẽŋɛ la wãne botɩ a le ãna yẽlʋm?

³⁵ A ka le tara yõorɔ la tẽŋa, la a ka tã wʋn dɛna bugulgo mẽ, ba lobrɩ ẽ basra mɛ. Sɛka n wõm yetɔga wã, a selse sõŋa sõŋa.»

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan