Aluki 11 - Farefare NinkaréAzezi pa'alɛ a karẽnbiisi ba wʋn pʋ'ʋsra se'em ( Amatie 6:9-13 ; 7:7-11 ) 1 Azezi daan boe la zẽ'a ayɩla pʋ'ʋsra Nawẽnnɛ. La ẽn pʋ'ʋsɛ kɩ'ɩlɩm na, tɩ a karẽnbia ayɩla yele ẽ yetɩ: «Zuudãana, pa'alɛ tɔ tõma n wʋn pʋ'ʋsra Nawẽnnɛ se'em, wʋ Azã n pa'alɛ a karẽnbiisi se'em na.» 2 Tɩ a yele ba yetɩ: «Ya sãn pʋ'ʋsra, ya yetɩ: ‹Tõma Sɔ, botɩ fʋ yʋ'ʋrɛ yẽta pẽka, wa'am wa di na'am nẽrba tẽŋasʋka, 3 bɔ'ɔra tɔ daarɛ woo la a dia. 4 Basɛ tɩ tõon-be'ero taalɛ, tɩ tõma mẽ basrɩ sɛba n ẽŋɛ tõma be'em taalɛ mɛ. Da basɛ tɩ yelle paagɛ tɔ tɩ tɩ lui.› » 5 Dee le yele ba yetɩ: «Tẽ'esɛ-ya bɩsɛ, yãma nẽr-sɛka sãn tara sɩrɛ, tɩ a wa'am a zẽ'am yʋ'ʋŋɔ wa sose ẽ yetɩ: ‹M sɩrɛ, bɔ ma borborɩ batã, 6 mam sɩrɛ n ze'ele sore wa'am, tɩ mam ka tara sɛla wʋn bɔ ẽ tɩ a di.› 7 Tɩ a sɩrɛ la bɔna deem dee lerge ẽ yetɩ: ‹Da dãam mam, mam yʋ m zanõrɛ mɛ, tɩ mam la m kɔma gã, mam kãn yãŋɛ isge bɔ fɔ fõn boorɩ sɛla la.› 8 Mam yetɩ ya mɛ tɩ, baa a sãn põn kãn isge bɔ ẽ sɛla ban de sɩtɔ la ĩyã, a wʋn isge bɔ ẽ ẽn boorɩ sɛla la mɛ, ẽn bʋlɛ ẽ na ĩyã. 9 Bɛla mam yetɩ ya mɛ tɩ ya sose Nawẽnnɛ, tɩ a wʋn bɔ ya, ya ɛ, tɩ ya wʋn yẽ, ya wẽ kʋlɩŋa, tɩ a wʋn yo'oge bɔ ya. 10 Se'ere n soe la, nẽr-sɛka woo n sosrɩ Nawẽnnɛ, a wʋn bɔ ẽ. La nẽr-sɛka n eerɩ, wʋn yẽ. La nẽr-sɛka n wẽ'erɩ kʋlɩŋa, ba wʋn yo'oge bɔ ẽ. 11 Ãne n boe yãma pʋam tɩ a bia wʋn sose ẽ zũfo, tɩ a dɩkɛ bõnsɛla bɔ ẽ? 12 Bɩɩ a sãn sose ẽ zelle, tɩ a dɩkɛ nãŋa bɔ ẽ? 13 Yãma n de tõon-be'ero dõma la sãn mina tɩ ya bɔ ya kɔma bõn-sõma, Nawẽnnɛ n de ya Sɔ n boe saazuum n ãn sõŋa la wʋn bɔ nẽr-sɛba n sosrɩ ẽ a Sɩa la gãnna.» Azezi pãŋa gãnnɩ Asũtãana ( Amatie 12:22-30 , Amarkɩ 3:22-27 ) 14 La Azezi daan dige la kʋlkã'arga n tarɩ bʋraa tɩ a dɛna muko, tɩ kʋlkã'arga la daan yese, dee tɩ bʋraa la n de muko la yãŋa tã'agɛ tɔgra, tɩ la di'ige nẽrba la. 15 Tɩ nẽrba la basɛba yele ẽ yetɩ: «Ẽn digri kʋlkã'arsɩ la, la de la Abelzebuli n de kʋlkã'arsɩ naba la pãŋa tɩ a tarɩ digra ba.» 16 Tɩ nẽrba basɛba bɔɔra tɩ ba makɛ ẽ bɩsɛ, yele ẽ yetɩ, a tõm tõon-yãlma n pa'alɛ tɩ a pãŋa la ze'etɩ la Nawẽnnɛ zẽ'am. 17 Tɩ Azezi bãŋɛ ban tẽ'esrɩ se'em na, yele ba yetɩ: «So'olʋm sɛka woo nẽrba n welge wẽrgɛ zɛbra la taaba, so'olʋm na wʋn sã'am mɛ. La so'olʋm ẽŋa yiɛ mẽ wʋn lui mɛ. 18 La Asũtãana sãn welge zɛbra la a mẽŋa, a so'olʋm na kãn tã'agɛ ze'ele. Yãma n yetɩ mam digri kʋlkã'arsɩ la Abelzebuli pãŋa la ĩyã tɩ mam yele bɛla. 19 Yãma n yetɩ mam digri kʋlkã'arsɩ la Abelzebuli pãŋa la, yãma nẽrba tarɩ la ãn pãŋa digri kʋlkã'arsɩ? Bɛla, ya nẽrba la mẽŋa n wʋn pa'alɛ tɩ ya ka tarɩ bʋʋrɔ. 20 La de la Nawẽnnɛ pãŋa tɩ mam tarɩ digra kʋlkã'arsɩ, bɛla pa'alɛ tɩ Nawẽnnɛ wa'am mɛ wa dita na'am ya tẽŋasʋka. 21 Pãŋa dãana sãn mãasʋm sõŋa la a bʋdaan-lɔgrɔ gu'ura a yire, sɛla kãn ẽŋɛ a bõntarsõm. 22 La nẽra n tarɩ pãŋa gãnna ẽ sãn wa'am wa zɛbɛ yãŋɛ ẽ, a wʋn fãagɛ la a zɛbrɛ lɔg-sɛba tɩ a te'ege la yiɛn, dee yãŋa vaagɛ a yire lɔgrɔ la pʋɩ. 23 Nẽr-sɛka n ka boe la mam, sisri mam mɛ, la nẽr-sɛka n ka lagɩm na mam lagsra, a wɩrgrɩ mɛ.» Kʋlkã'arga n yese dee leme makrɛ ( Amatie 12:43-45 ) 24 Azezi le yetɩ: «Kʋlkã'arga sãn yese dee basɛ nẽra, a sẽŋɛ la pɔgẽntɩɩsɩ pʋam ka ɛɛra zẽ'a tɩ a vo'ose, la a sãn ɛ zẽ'a koŋe, a yetɩ mɛ tɩ: ‹Mam wʋn lebe la m yi-sɛka tɩ m yese dee basɛ la pʋam.› 25 La a sãn lebe ka yẽ tɩ a pɩɩsɛ mɛ malgɛ ãna sõŋa, 26 a wʋn lebe mɛ ka tarɩ kʋlkã'arsɩ bayopɔɩ n de wẽensɩ gãnna ẽŋa mẽŋa wa'am, tɩ ba kẽ lagɩm bɔna mĩ. Bɛla, nẽr-ẽŋa toogo yãŋa wʋn gãnna a kʋrʋm toogo la mɛ.» Nẽr-sɛba n sakrɩ Nawẽnnɛ yetɔga tarɩ zu-yẽlga 27 Azezi n tɔgɛ bɛla kɩ'ɩlɩm na, tɩ pɔka ze'ele nẽrba la tẽŋasʋka tĩi tɔgɛ yetɩ: «Pɔg-sɛka n dɔgɛ fɔ, tɩ fʋ mõgɛ a bĩ'isum na, tarɩ zu-yẽlga.» 28 Tɩ Azezi lerge yetɩ: «Nẽr-sɛba n wõnnɩ Nawẽnnɛ yetɔga, dee sakra ɩta lan yele se'em na, n tõn tarɩ zu-yẽlga.» Nẽrba boorɩ tɩ ba yẽ la bõn-yãlma ( Amatie 12:38-42 ) 29 Nẽr-kʋʋŋɔ n lagsɛ Azezi zẽ'am zo'oge, tɩ a yele ba yetɩ: «Zamãan-ẽna wã nẽrba de la nẽr-bɛ'ɛsɩ. Ba eerɩ la bõn-yãlma n wʋn pa'alɛ Nawẽnnɛ pãŋa, la ba kãn yẽ bõn-yãlma ayẽma, sãn dagna bõn-yãlma sɛka n yʋʋn ẽŋɛ Nawẽnnɛ nõtɔ'ɔsa Azonaasɩ la. 30 Bõn-sɛka n yʋʋn ẽŋɛ Azonaasɩ la, pa'alɛ Niniivi dõma la Nawẽnnɛ pãŋa, bɛla Nẽrsaala Dayʋa la mẽ de la sɛka n pa'alɩ zamãan-ẽna dõma Nawẽnnɛ pãŋa. 31 Sarɩyadia daarɛ, na-pɔka la n yʋʋn yese wẽntulle gɔbga bɔba la wʋn isge mɛ zɛrgɛ zamãan-ẽna wã dõma ba tõon-be'ero la ĩyã. Se'ere n soe la, a yʋʋn ze'ele la zẽ'a n zãagɛ wa'am wa selse naba Asalomõ yɛm yetɔga la, la sɛka n gãnnɩ Asalomõ n boe kalam, dee tɩ yãma ka sɛlsra ẽ. 32 Sarɩyadia daarɛ, Niniivi dõma mẽ wʋn isge zɛrgɛ zamãan-ẽna wã dõma mɛ ba tõon-be'ero la ĩyã. Se'ere n soe la, Azonaasɩ n yʋʋn mõolɛ Nawẽnnɛ yetɔga bɔ ba la, ba yʋʋn teege yɛm mɛ basɛ tõon-be'ero. La sɛka n gãnnɩ Azonaasɩ n boe kalam, dee tɩ yãma ka teege yɛm.» Peelem yelle ( Amatie 5:15 ; 6:22-23 ) 33 «Nẽra kãn yõ fɩtla sʋgɛ, bɩɩ dɩkɛ pɩ'ɩgɔ vuge ẽ, a wʋn dɩkɛ ẽ zoole la sɛla zuo tɩ a nẽegɛ bɔ sɛba n kẽ'erɩ la. 34 Fʋ nini n nẽerɩ peelem bɔ'ɔra fʋ ĩyã wʋ fɩtla la, bɛla fʋ nini sãn ãna sõŋa, fʋ ĩyã wuu tarɩ peelem mɛ. La fʋ nini sãn ka ãna sõŋa, fʋ ĩyã wuu boe la lika pʋam. 35 Bɛla ĩyã, guuse tɩ bõn-sɛka n de peelem fʋ pʋam na, da dɛna lika. 36 La fʋ ĩyã wuu sãn tara peelem sõŋa, tɩ baa bɔbrɛ ayɩla ka tara lika, fʋ ĩyã wuu tarɩ peelem mɛ wʋ fɩtla n tarɩ peelem nẽera bɔ'ɔra nẽrba se'em na.» Azezi zɛrgɛ Farisi dõma la lɔɔ karẽnsãandõma ( Amatie 23:1-36 , Amarkɩ 12:38-40 ) 37 Azezi n daan tɔgɛ kɩ'ɩlɩm na, tɩ Farisi nẽra ayɩla wi ẽ tɩ a wa'am ẽŋa yire tɩ ba di. Tɩ a sẽŋɛ ka kẽ zĩ'ire bɔna mĩ tɩ a di. 38 Tɩ Farisi nẽra la yẽ tɩ Azezi ka peege nu'usi wʋ ban ɩtɩ ba sisgo se'em na, dee yetɩ a di, tɩ la di'ige ẽ. 39 Tɩ Zuudãana Azezi yele ẽ yetɩ: «Yãma Farisi dõma peerɩ ya wama la ya laasɩ pɔa mɛ, la yãma mẽŋa pʋam pɩrɛ la dẽgrɔ n de fãaga la pʋtʋʋlgɔ. 40 Ya de la geto! La dagɩ Nawẽnnɛ n ẽŋɛ poorʋm na, n ken ẽŋɛ pʋam na? 41 Dɩkɛ-ya yan tarɩ sɛla la bɔ nasdõma la ya sũure wuu, tɩ sɛla woo wʋn ãna sõŋa bɔ ya. 42 Farisi dõma, ya wʋn yẽ toogo. Se'ere n soe la, yãma bɔ'ɔrɩ Nawẽnnɛ zẽvõorɔ buuri wuu pia pʋrɛ mɛ, baa ba sãn ãna pɩka pɩka, la ya ka ɩtɩ sɛla n masɛ, la ya ka nõŋɛ Nawẽnnɛ. La de la bõn-bãna tɩ ya wʋn dẽŋɛ ɩta, dee yãŋa ɩta sɛla tɩ ya ɩtɩ la pa'asɛ. 43 Farisi dõma, ya wʋn yẽ toogo. Se'ere n soe la, yãma eerɩ la zẽ'esɩ nẽŋa tɩ ya zĩ'ire wẽndeto pʋam, dee bɔɔra tɩ ba nã'asra ya da'asɩ pʋam. 44 Ya wʋn yẽ toogo. Se'ere n soe la, ya ãn wʋ yɔɔrɔ n naagɛ la tẽŋa tɩ nẽrba nẽera ba zuto tɔlla, dee ka mina tɩ yɔɔrɔ n boe mĩ.» 45 Tɩ lɔɔ karẽnsãama ayɩla yele ẽ yetɩ: «Karẽnsãama, fʋ sãn tɔgra bɛla fʋ po pɔ'ɔra la tõma wuu.» 46 Tɩ Azezi lerge yetɩ: «Yãma lɔɔ karẽnsãandõma mẽ wʋn yẽ toogo. Se'ere n soe la, yãma n botɩ nẽrba la ɩta se'em na, ãn wʋ ze-tɩbsa tɩ ya zelgrɩ nẽrba la, la yãma mẽŋa ka boorɩ tɩ ya kalʋm ba la ya nu'ubiire. 47 Ya wʋn yẽ toogo. Se'ere n soe la, yãma mẽtɩ la yɔɔrɔ bɔ'ɔra Nawẽnnɛ nõtɔ'ɔsrɩba la. La yãma yaabdõma n yʋʋn kʋ ba. 48 La yãma n mẽtɩ sɛba tɩ ya yaabdõma kʋ la yɔɔrɔ la, la pa'alɛ tɩ ya sakɛ tɩ ban yʋʋn tõm se'em na ãn sõŋa mɛ. 49 Bɛla ĩyã tɩ Nawẽnnɛ n tarɩ yɛm na yʋʋn yetɩ: ‹Mam wʋn tõm nõtɔ'ɔsrɩba, la Tõntõnɩba bɔ ba, la ba wʋn kʋ basɛba, dee nãmsɛ basɛba.› 50 Bɛla Nawẽnnɛ wʋn sɩbgɛ zamãan-ẽna wã dõma wʋ la de la bãma n kʋ nõtɔ'ɔsrɩba la halɩ dũnia pĩ'iluŋo, wa paam lɛɛlɛ wã, 51 lan pɔsɛ la Abɛlɩ kʋa, halɩ wa paagɛ Azakari tɩ ba kʋ kãabgɔ bĩmbĩnne, la Nawẽnnɛ zẽ'e-sõŋɔ tẽŋasʋka la. Mam yetɩ ya la sɩra, tɩ tõon-be'ero bãma wuu taalɛ boe la zamãan-ẽna nẽrba zuo. 52 Yãma lɔɔ karẽnsãandõma la wʋn yẽ toogo. Se'ere n soe la, yãma n gu'uri nẽrba tɩ ba ka bãŋra Nawẽnnɛ sɩra. Yãma mẽŋa ka sakrɩ Nawẽnnɛ sɩra la, dee mẽ gu'ura nẽr-sɛba n boorɩ tɩ ba sakɛ la.» 53 La Azezi n ze'ele bilam fõrgɛ la, tɩ lɔɔ karẽnsãandõma la Farisi dõma sũure ba isge la ẽ. Tɩ ba bɔɔra tɩ ba bẽrɛ ẽ, sɔkra ẽ sokrɩsɩ zozo'e 54 bɔɔra tɩ a tɔgɛ tuuge tɩ ba yõkɛ ẽ. |
© 2008, 2010, Wycliffe Bible Translators, Inc. All rights reserved.
Wycliffe Bible Translators, Inc.