Bìoball air-loidhne

2 Timoti 2 - Farefare Ninkaré

Azezi-krisi tõntõn-sõŋɔ n ɩtɩ se'em

¹ M bia, keŋe fʋ mẽŋa yel-sõnnɛ sɛka tɩ Azezi-krisi ẽŋɛ bɔ tɔ la pʋam.

² Mam n zãsʋm fʋ bõn-sɛba nẽrba zozo'e nẽŋam na, dɩkɛ ba zãsʋm nẽrba n de sɩra dõma n mẽ tã wʋn dɩkɛ ba zãsʋm nẽrba basɛba.

³ Fõn de Azezi-krisi tõntõn-sõŋɔ la, fʋ mẽ sakɛ nãmsgɔ wʋ sʋda-sõŋɔ n sakrɩ nãmsgɔ se'em na.

⁴ Sʋdaaga sãn bɔɔra tɩ a tõm tɩ a kɛ'ɛma sũure ẽŋɛ yẽlʋm, a ka kẽ'esrɩ a mẽŋa yel-sɛba n dagɩ sʋdaasɩ yɛla pʋam.

⁵ La de'eŋo mẽ pʋam, nẽra ka tã wʋn zoe di to'oge bɔ'a tɩ a sãn ka doose zʋa la sɔa wuu.

⁶ La de la kaara sɛka n tõm nãmsɛ n wʋn dẽŋɛ to'oge a bõnkɔɔla la yõorɔ.

⁷ Wõm mam n yele se'em na võorɛ, tɩ Zuudãana wʋn basɛ tɩ fʋ bãŋɛ sɛla woo võorɛ.

⁸ Tẽra Azezi-krisi n de naba Adavidi yɩɩŋa la yelle, a ki dee vo'oge, wʋ kõ-yẽlga la tɩ mam mõolɩ la n yetɩ se'em na.

⁹ La de la kõ-yẽlga ẽŋa ĩyã tɩ mam nãmsra, halɩ tɩ ba ba mam na bãnsɩ, wʋ mam de la tõon-be'ero dãana la. La ba ka ba Nawẽnnɛ yetɔga la.

¹⁰ Bɛla ĩyã tɩ mam mõrgɛ wĩbra sɛla woo pʋam Nawẽnnɛ nẽrba la tɩ a looge la ĩyã, tɩ ba mẽ yẽ fãarɛ Azezi-krisi ĩyã, dee po yẽ nã'asgɔ n ka ba'asrɩ.

¹¹ Yetɔg-ẽna wã de la sɩra: Tɩ sãn ki la ẽ, tɩ wʋn lagɩm na ẽ vɔa.

¹² La tɩ sãn mõrgɛ ze'ele kãŋkãŋɛ, tɩ wʋn lagɩm na ẽ di na'am. Tɩ sãn zagsɛ yetɩ tõma ka mi ẽ, a mẽ wʋn zagsɛ yetɩ ẽŋa ka mi to.

¹³ Tɩ sãn ka bɔna tɩ sɩra pʋam, ẽŋa ken dɛna la sɩra dãana, se'ere n soe la, a ka malɩn viira a yetɔga.

Tõnna tɩ la paagɛ Nawẽnnɛ yɛm

¹⁴ Tẽegɛ nẽrba la bõn-bãma, dee kã'an ba Nawẽnnɛ nẽŋam tɩ ba da wẽ'era nõkɛ'ɛma yetɔg-biɛ yɛla, tɩ ba ka tarɩ yõorɔ baa fẽfẽe, dee sã'ana sɛba n selsrɩ la.

¹⁵ Nargɛ pãŋa dɛna nẽra n paagɛ Nawẽnnɛ yɛm, la fʋ dɛna tõntõnna n ka zotɩ yãnnɛ la a tõoma, dee mõola sɩra kõ-yẽlga la lan masɛ se'em.

¹⁶ Zãagɛ fʋ mẽŋa la yetɔg-yooro n ka sõŋrɩ Nawẽnnɛ doosgo pʋam, nẽr-sɛba n tɔgrɩ yetɔg-bãma la zãarɩ mɛ la Nawẽnnɛ wɛ'ɛsa be'em pʋam.

¹⁷ Ba yetɔga la ãn wʋ nõr-kɛka n diti ĩyã yãara se'em na. Ahimẽnɩ la Afilɛtɩ boe la nẽr-bãma pʋam.

¹⁸ Bãma bʋrgɛ mɛ basɛ sɩra sore la, yetɩ kũm vo'ore la põn tole mɛ, ba ẽŋɛ bɛla basɛ tɩ nẽr-sɛba n bɔ sɩra la basɛba n lɛbra poorʋm.

¹⁹ La baa bɛla, Nawẽnnɛ n looge sɛba la ken zɛ la kãŋkãŋɛ wʋ ẽbrɛ n tarɩ pãŋa la. Yetɔg-bãna n de dãalgɔ n pa'alɛ bɛla: «Zuudãana la mi sɛba n de a nẽrba mɛ», la «sɛba wuu n yetɩ bãma de la Nawẽnnɛ nẽrba la, dẽnɩ tɩ ba basɛ tõon-be'ero».

²⁰ Yi-kãtɛ pʋam, dagɩ sãlma bɩɩ zũuro laasɩ mã'a n boe mĩ, dɔɔrɔ la yɔgrɔ laasɩ mẽ boe mĩ mɛ, tɩ ba dɩkɛ sãlma la zũuro laasɩ la tɩ ba dɛna tʋʋlʋm lɔgrɔ, dee dɩkɛ basɛba la tɩ ba dɛna daarɛ woo tõoma lɔgrɔ.

²¹ Bɛla mẽ, nẽra sãn zãagɛ a mẽŋa la tõon-be'ero sɛba tɩ mam pa'alɛ wã, a wʋn ãna wʋ tʋʋlʋm lɔkɔ n welge to'ore tara yõorɔ bɔ Zuudãana, dee tãna wʋn tõm tõon-sõma buuri wuu.

²² Zãagɛ fʋ mẽŋa la yel-yooro sɛba tɩ kɔmbɩ'ɩsɩ boorɩ tɩ ba ɩta n de be'em na, dee ɛ sɛla n masɛ, ken bɔ Nawẽnnɛ sɩra, ɛ nõŋlʋm, la sũ-mã'asʋm, dee lagɩm na nẽr-sɛba n pʋ'ʋsrɩ tɩ Zuudãana la pʋpeelem na.

²³ Zãagɛ fʋ mẽŋa la nõke'en-yaalsɩ n ka tarɩ võorɛ la. Fõn mi tɩ ba tarɩ la zɛbrɛ sẽnna.

²⁴ La Zuudãana tõntõnna ka masɛ tɩ a zɛbra. La masɛ mɛ tɩ a dɛna nẽra n nõŋɛ nẽrba, tãna wʋn zãsʋm nẽrba la sũ-mã'asʋm.

²⁵ La masɛ tɩ a pa'ala nẽr-sɛba n ka sakrɩ la, la sũ-bʋgsʋm, tɩ Nawẽnnɛ tã wʋn basɛ tɩ ba teege yɛm mɛ bãŋɛ sɩra,

²⁶ le yẽ yɛm sõŋɔ yese Asũtãana bẽrgɔ la pʋam, tɩ a daan tarɩ ba tɩ ba ɩta ẽŋa n boorɩ se'em na.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan