Bìoball air-loidhne

2 Timoti 1 - Farefare Ninkaré

¹ Mam Apolɩ n de Azezi-krisi Tõntõnna wʋ Nawẽnnɛ n boorɩ se'em, tɩ m mõolɛ vɔm sɛka tɩ Nawẽnnɛ bĩŋe nõorɛ tɩ a bɔ tɔ Azezi-krisi ĩyã la yelle.

² Mam gʋlsrɩ bɔ'ɔra la Atimõtɩ n lebge mam bi-nõŋrɛ la. Tɩ Sɔ Nawẽnnɛ, la tɩ Zuudãana Azezi-krisi wʋn ẽŋɛ fɔ yel-sõnnɛ, dee zoe fʋ ninbãalga, dee bɔ fɔ sũ-mã'asʋm.

Apolɩ pʋ'ʋsrɩ Nawẽnnɛ a yel-sõnnɛ, dee bɔ Atimõtɩ bʋraanɛ

³ Mam pʋ'ʋsrɩ Nawẽnnɛ a yel-sõnnɛ, mam tõnnɩ bɔ'ɔra ẽ mina m sũure pʋam tɩ la ãn sõŋa, wʋ mam yaabdõma n yʋʋn tõnnɩ bɔ'ɔra ẽ se'em na. Mam tẽrɩ fʋ yelle m pʋ'ʋsgɔ pʋam yʋ'ʋŋɔ la wʋntɛɛŋa ka basra.

⁴ Mam tẽrɩ fõn daan kellɩ la mɛ, tɩ mam bɔɔra tɩ m le yẽ fɔ, tɩ m wʋn tara sũ-yẽlga zozo'e.

⁵ Mam tẽrɩ fõn bɔ Azezi sɩra la fʋ sũure wuu, wʋ fʋ ma-keko Aloyiizi, la fʋ ma A'enisi n daan dẽŋɛ bɔ Azezi sɩra se'em na. Mam mi tɩ fʋ ken bɔ sɩra la bɛla.

⁶ La de la bɛla tɩ mam tẽera fɔ tɩ fʋ dɩkɛ bɔ'a la tɩ mam daan dɩkɛ m nu'usi paglɛ fʋ zuo tɩ Nawẽnnɛ bɔ fɔ la, malɩn tõm gãŋɛ bɛla.

⁷ Se'ere n soe la, Nawẽnnɛ n bɔ tɔ a Sɩa la ka botɩ tɩ tara dabeem, a botɩ tɩ tara la pãŋa, la nõŋlʋm, la yõk-m-mẽŋa.

⁸ Bɛla, da zoe yãnnɛ ka tɔgɛ tɩ Zuudãana Azezi yelle. La fʋ ken da zoe yãnnɛ mam n boe yʋ'a deem Azezi-krisi kõ-yẽlga ĩyã la, lagɩm na mam sakɛ nãmsgɔ kõ-yẽlga la ĩyã, tɩ Nawẽnnɛ wʋn bɔ fʋ pãŋa.

⁹ Ẽŋa n fãagɛ tɔ, wi to tɩ tɩ dɛna a nẽrba, la dagɩ tɩn tõm tõon-sõma ĩyã, la de la a mẽŋa n boorɩ se'em, la a yel-sõnnɛ tɩ a ẽŋɛ bɔ tɔ Azezi-krisi ĩyã, halɩ lan dẽŋɛ dũnia pĩ'iluŋo.

¹⁰ Yel-sõnnɛ ẽŋa yãŋa puke la Azezi-krisi wa'aŋɔ la ĩyã. Ẽŋa n fãagɛ tɔ, sã'am kũm pãŋa dee botɩ tɩ yẽ vɔm n ka ba'asrɩ a kõ-yẽlga la ĩyã.

¹¹ Nawẽnnɛ n looge mam tɩ m dɛna Krisi Tõntõnna mõola a kõ-yẽlga, dee zãsna nẽrba.

¹² La de la kõ-yẽlga la ĩyã tɩ mam yẽta nãmsgɔ, la mam ka zotɩ yãnnɛ, se'ere n soe la, mam mi sɛka tɩ mam bɔ sɩra la mɛ, la mam mi m sũure pʋam tɩ a tarɩ pãŋa mɛ wʋn gu'ura sɛla tɩ a dɩkɛ ẽŋɛ mam nu'usum na sõŋa, halɩ ka paagɛ Nawẽnnɛ sarɩyadia daarɛ.

¹³ Basɛ tɩ zãsŋɔ sɛka tɩ mam pa'alɛ fʋ la bɔna fʋ sũure pʋam tɩ fʋ bɩsra dɔla, ken bɔ Azezi-krisi sɩra tara nõŋlʋm a doosgo pʋam.

¹⁴ Tara zãsŋɔ sõma sɛba tɩ Nawẽnnɛ dɩkɛ ẽŋɛ fʋ nu'usum na la Nawẽnnɛ Sɩa n boe la tɩ lɛ la pãŋa.

¹⁵ Fõn põn mina tɩ Nawẽnnɛ nẽr-sɛba n boe Azi so'olʋm la wuu basɛ mam mɛ, Afizɛlɩ la Ahɛrmozɛnɩ boe la nẽr-bãma pʋam.

¹⁶ Tɩ Zuudãana wʋn zoe A'onezifɔɔrɩ la a yir-dõma ninbãalga, se'ere n soe la, a ẽn bɔ'ɔra mam bʋraanɛ mɛ, dee ka zoe yãnnɛ la ban ba mam la bãnsɩ la.

¹⁷ La ẽn wa'am Rom na, a mõ'ogɛ la nifo ɛ mam, halɩ wa yẽ mam.

¹⁸ Sarɩyadia daarɛ, tɩ Zuudãana wʋn zoe a ninbãalga. La fõn ken mina sõŋa sõŋrɛ sɛka wuu tɩ a sõŋɛ mam Efɛɛzɩ.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan