2 Tesaloniki 1 - Farefare Ninkaré

¹ Mam Apolɩ, la Asilvẽ, la Atimõtɩ n gʋlsɛ gõŋɔ wã bɔ'ɔra yãma sɛba n de tɩ Sɔ Nawẽnnɛ, la Zuudãana Azezi-krisi nẽrba n boe Tesaloniki.

² Tɩ Sɔ Nawẽnnɛ, la tɩ Zuudãana Azezi-krisi wʋn ẽŋɛ ya yel-sõnnɛ, dee bɔ ya sũ-mã'asʋm.

Tesaloniki dõma ze la kãŋkãŋɛ nãmsgɔ pʋam

³ M sɔbiisi, tõma masɛ mɛ tɩ tɩ pʋ'ʋsra Nawẽnnɛ daarɛ woo a yel-sõnnɛ yãma ĩyã. La ãn sõŋa mɛ tɩ tõma ɩta bɛla, se'ere n soe la, yãma n bɔ Azezi sɩra la sẽnnɩ nẽŋa mɛ zozo'e, tɩ yãma nẽra woo nõŋlʋm taaba ĩyã pa'asra.

⁴ Bɛla tɩ tõma tɔgra yãma yelle Nawẽnnɛ nẽrba lagsgɔ zẽ'a woo la sũ-yẽlga. Se'ere n soe la, yãma mõrgɛ mɛ zɛ kãŋkãŋɛ Azezi doosgo la pʋam ka basra, baa nẽrba n nãmsrɩ ya, la toogo n paarɩ ya la.

⁵ Bɛla pa'alɛ tɩ Nawẽnnɛ diti sarɩya la sɩra. Se'ere n soe la, yãma n nãmsrɩ Nawẽnnɛ so'olʋm yelle se'em wã, Nawẽnnɛ wʋn yetɩ ya masɛ tɩ ya kẽ a so'olʋm na pʋam.

⁶ Nawẽnnɛ wʋn ẽŋɛ sɛla n masɛ, a wʋn botɩ sɛba n nãmsrɩ yãma la yẽ nãmsgɔ,

⁷ dee basɛ tɩ yãma sɛba n nãmsrɩ la, lagɩm na tõma vo'ose wakat-sɛka tɩ Zuudãana Azezi wʋn ze'ele Nawẽnnɛ yire wa'am, la a malɛkadõma n tarɩ pãn-kãtɛ,

⁸ la bug-zɩlɩsɩ wa sɩbgɛ sɛba n zagsɛ Nawẽnnɛ dee ka sakɛ tɩ Zuudãana Azezi kõ-yẽlga la.

⁹ Ba wʋn yẽ la sɩbgrɛ n de sã'aŋɔ n ka ba'asrɩ. La ba wʋn zãagɛ mɛ la Zuudãana kãn yẽ a na'am pãn-kãtɛ la,

¹⁰ wakat-sɛka tɩ a wʋn wa'am na. Daar-ẽŋa, a wʋn wa'am mɛ wa to'oge pẽka la nã'asgɔ a mẽŋa nẽrba n bɔ ẽ sɩra la zẽ'am, la yãma po bɔna ba pʋam mɛ, yãma n sakɛ a kõ-yẽlga la tɩ tõma tɔgɛ bɔ ya la ĩyã.

¹¹ Bɛla ĩyã tɩ tõma pʋ'ʋsra Nawẽnnɛ wakatɛ wuu ya ĩyã, tɩ a basɛ tɩ ya ãna sõŋa masɛ wʋ ẽŋa n wi ya tɩ ya ãna se'em na. La a wʋn bɔ ya pãŋa tɩ ya ɩta bõn-sõma sɛba wuu tɩ ya boorɩ tɩ ya ẽŋɛ, dee basɛ tɩ yãma n bɔ sɩra tõnna tõon-sɛba la tõm ba'asɛ.

¹² Bɛla tɩ tɩ Zuudãana Azezi yʋ'ʋrɛ wʋn yẽ nã'asgɔ ya zẽ'am, tɩ yãma mẽ yẽ nã'asgɔ a zẽ'am. Bɛla wuu de la Nawẽnnɛ, la tɩ Zuudãana Azezi-krisi yel-sõnnɛ.