Bìoball air-loidhne

1 Timoti 6 - Farefare Ninkaré

La masɛ mɛ tɩ sakɛ zuudãandõma

¹ Nẽr-sɛba n de yamsɩ la, dẽnɩ tɩ ba nanna ba zuudãandõma sõŋa, tɩ nẽra da pɔ'ɔgɛ Nawẽnnɛ yʋ'ʋrɛ, la tɩ zãsŋɔ la.

² La yam-sɛba zuudãandõma n bɔ Azezi sɩra la, la ka masɛ tɩ ba ka nanna ba yetɩ bãma de la sɔbiisi. La de la ba tõn malɩn tõnna bɔ'ɔra ba gãnna bɛla, se'ere n soe la, sɛba tɩ ya tõnnɩ bɔ'ɔra la, de la nẽrba n bɔ Azezi sɩra dee tɩ Nawẽnnɛ nõŋɛ ba. La de la bõn-bãna tɩ fʋ wʋn zãsʋm ba, dee kã'an ba tɩ ba ɩta.

Põmpɔrŋɔ zãsŋɔ, la ligri nõŋlʋm

³ Nẽra sãn zãsʋm zãsŋɔ ayẽma ka dɔla tõma Zuudãana Azezi-krisi sɩra yetɔga, bɩɩ ka dɔla zãsŋɔ sɛka n pa'alɩ tɩ wʋn ãna se'em Nawẽnnɛ sore doosgo pʋam na,

⁴ a tarɩ la pa'al-m-mẽŋa zo'oge dee ka mina sɛla sɛla, la a nõŋɛ la yetɔg-yaalsɩ la nõke'ene wẽ'a. Bõn-bãma n sẽm na ɩta sũure la tadãana bõnɔ, la a ka wõm taaba, la yʋ'ʋr-sã'aŋɔ, la tẽ'esɛ be'em bɔ'ɔra nẽrba,

⁵ tɩ ba wẽ'era nõke'ene n ka ba'asrɩ la taaba, ban tarɩ yɛm be'ero dee ka tara yel-sɩra, dee tẽ'esra tɩ Nawẽnnɛ sore doosgo la de la sɛla n wʋn basɛ tɩ ba yẽ bõntarsõm na ĩyã.

⁶ La de la sɩra tɩ nẽra n dolɩ Nawẽnnɛ sore sãn tara sũ-yẽlʋm la sɛla tɩ a tarɩ la, a yẽtɩ yõorɔ zozo'e mɛ.

⁷ Tɩ ka tarɩ sɛla sɛla wa'am dũnia zuo, la tɩ mẽ kãn tã'agɛ tarɩ sɛla sɛla dũnia wã zuo fõrgɛ.

⁸ Bɛla, tɩ sãn tara dia la futo, la seke mɛ.

⁹ La sɛba n boorɩ tɩ ba yẽ bõntarsõm na kẽ'erɩ la yɛla pʋam, luta Asũtãana bẽrgɔ pʋam. Ba boorɩ la bõnɔ zozo'e n de yalnɛ la be'em, bõn-bãma n kẽ'esrɩ nẽrsaalba wõŋrɛ la sã'aŋɔ pʋam.

¹⁰ Se'ere n soe la, ligri nõŋlʋm de la tõon-be'ero wuu yẽgrɛ. Nẽrba basɛba nõŋɛ la ligri bʋrgɛ dee basɛ Nawẽnnɛ sore, nãmsɛ ba mẽŋa la toogo buuri zozo'e.

¹¹ La fõn de Nawẽnnɛ nẽra la, zãagɛ fʋ mẽŋa la bõn-bãma, dee ɛ sɛla n masɛ, la Nawẽnnɛ sakrɛ, ken bɔ ẽ sɩra, ɛ nõŋlʋm, la sũ-mã'arɛ, la sũ-bʋgsʋm.

¹² Mõrgɛ mẽ mẽerɛ sõŋa Nawẽnnɛ sore doosgo la pʋam yẽ vɔm n ka ba'asrɩ, tɩ la de la bɛla ĩyã tɩ Nawẽnnɛ looge fo, tɩ fʋ daan tɔgɛ yetɔg-sõŋɔ yetɩ fõn bɔ Azezi sɩra nẽrba zozo'e nẽŋam na.

¹³ Mam yetɩ fo Nawẽnnɛ n bɔ'ɔrɩ sɛla woo vɔm nẽŋam, la Azezi-krisi n daan tɔgɛ sɩra kaseto Apõnsɩ-pilatɩ nẽŋam na,

¹⁴ yetɩ fʋ sakɛ pa'algɔ tɩ fʋ to'oge la, gʋrɛ ba sõŋa la pʋpeelem, tɩ dõrga kana, halɩ ka paagɛ tɩ Zuudãana Azezi-krisi lemŋo.

¹⁵ Nawẽnnɛ wʋn botɩ a leme wa'am na wakat-sɛka tɩ a looge la. Sũ-yẽlga dãana Nawẽnnɛ ayɩla mã'a n de na-kãtɛ, a de la na'adõma Naba, la zuudãandõma Zuudãana.

¹⁶ Ẽŋa mã'a n vɔa wakatɛ wuu, a boe la peelem n nẽegɛ gãŋɛ pʋam tɩ nẽra ka tãna wʋn paagɛ mĩ, nẽra baa ayɩla ken ka yẽ ẽ, la nẽra nãn ka yẽtɩ ẽ. Ẽŋa n soe nã'asgɔ, la pãŋa n ka ba'asrɩ. Amina.

¹⁷ Kã'an nẽr-sɛba n tarɩ dũnia wã bõntarsõm na yetɩ, ba da zẽkra ba mẽŋa, la ba da dɩkɛ ba te'ere te'ege bõntarsõm tɩ ba ka mĩ ban wʋn ãna se'em, ba te'ege Nawẽnnɛ, tɩ ẽŋa n bɔ'ɔrɩ tɔ sɛla woo tɩ la sɛkra sõŋa sõŋa tɩ tɩ ɩta sũ-yẽlga.

¹⁸ Kã'an ba yetɩ, ba ɩta sõŋa, ba dɛna nẽrba n tõnnɩ tõon-sõma zozo'e, la ba dɛna nẽrba n bɔ'ɔrɩ, dee pʋta sɛla tɩ ba tarɩ bɔ'ɔra nẽrba la sũ-yẽlga.

¹⁹ Bɛla tɩ ba wʋn lagsɛ bõntarsõm n ãn sõŋa kãn sã'am wakatɛ n sẽm na ĩyã, tɩ ba wʋn yẽ vɔm mẽŋa mẽŋa.

²⁰ Fõn Atimõtɩ, bɩsra sɛla tɩ Nawẽnnɛ dɩkɛ gu'ule fo la, mõrgɛ zãagɛ fʋ mẽŋa la yetɔg-yooro n ka dolɩ Nawẽnnɛ sore, zãagɛ fʋ mẽŋa la nõke'ene wẽ'a tɩ nẽrba tẽ'esrɩ tɩ la de la bãŋrɛ dee tɩ la dagna bɛla la.

²¹ La nẽrba basɛba tarɩ la bõn-bãma tẽ'esɛ tɩ bãma tarɩ la bãŋrɛ, bʋrgɛ dee basɛ Nawẽnnɛ sore. Nawẽnnɛ wʋn ẽŋɛ ya a yel-sõnnɛ.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan