1 Timoti 5 - Farefare Ninkaré

Fõn wʋn kã'an Nawẽnnɛ nẽrba se'em

¹ Bʋra-yã'aŋa sãn ẽŋɛ sɛla, da tãsɛ ẽ, kã'an ẽ wʋ fʋ sɔ la. Kã'an kɔmbɩ'ɩsɩ wʋ fʋ sɔbiisi la,

² la fʋ kã'an pɔg-yã'asɩ wʋ fʋ madõma la, dee kã'an pug-sarsɩ wʋ fʋ tãpa la, la pʋpeelem.

Pɔkõpa yelle

³ Nanna pɔkõpa sɛba n boe ba yɩla mã'a la, dee sõŋra ba.

⁴ Pɔkõorɛ sãn tara kɔma bɩɩ yɩɩsɩ, bãma n masɛ tɩ ba bɩsra ba mẽŋa yir-dõma yelle, ba bɩsra ba dɔgrɩba la yelle wʋ ba dɔgrɩba la n daan bɩsrɩ ba yelle se'em na, bɛla n ãn Nawẽnnɛ sũure yẽlʋm.

⁵ Pɔkõ-sɛka n boe ayɩla mã'a ka tara nẽra nẽra la, a te'ege la Nawẽnnɛ pʋ'ʋsra sɔsra wʋntɛɛŋa la yʋ'ʋŋɔ.

⁶ La pɔkõorɛ sɛka n eerɩ tõnna a yɛm n boorɩ se'em, ẽŋa põn ki mɛ baa la ẽn ken vɔa la.

⁷ Kã'an ba bɛla, tɩ nẽra da zɛrgɛ ba.

⁸ Nẽra sãn ka bɩsra a yir-dõma yelle, lan gãnnɩ a dee-dõma yelle, ẽŋa dãana zagsɛ sɛla tɩ tɩ bɔ sɩra la mɛ, la a de la tõon-be'ero dãana gãnna sɛka n ka dolɩ Nawẽnnɛ na.

⁹ Pɔkõ-sɛka tɩ ba tã wʋn gʋlsɛ a yʋ'ʋrɛ pa'asɛ pɔkõpa gõŋɔ pʋam de la pɔkõ-sɛka n paagɛ yʋʋma pisyoobɩ, dee ele sɩra ayɩla mã'a.

¹⁰ La dẽnɩ tɩ nẽrba mina tɩ a de la tõon-sõma dãana, la a uge kɔma sõŋa, la a de la nẽra n ẽŋɛ nẽrba sãanɔ, la a peege Nawẽnnɛ nẽrba nãma, la a sõŋɛ nẽr-sɛba n nãmsɛ, dee dɛna nẽra n tõm tõon-sõma buuri wuu.

¹¹ La sãn dɛna pɔkõ-sɛba n ka kʋrgɛ la, da gʋlsɛ ba yʋ'ʋra pɔkõpa la pʋam, se'ere n soe la, ba yɛm sãn wa bɔna bʋraasɩ pʋam, ba wʋn basɛ Krisi tõoma mɛ, dee bɔɔra tɩ ba ele.

¹² La bɛla wʋn dɛna la tuure bɔ ba, ban sã'am ba nõorɛ la tɩ ba dẽŋɛ bĩŋe la ĩyã.

¹³ Sɛla n pa'asɛ, ba sãn gʋlsɛ ba, ba wʋn lebge la zẽyãgsɩ ɛɛra kaara yiɛ, la, la dagɩ bɛla mã'a, ba wʋn lebge la yetɔg-tɔgsrɩba kẽ'era nẽrba yɛla pʋam, dee tɔgra yetɔg-sɛba n ka narɩ ba tɔgɛ.

¹⁴ Bɛla, mam boorɩ tɩ pɔkõ-sɛba n ka kʋrgɛ la le ele dɔgɛ kɔma, bɩsra ba yir-dõma yelle, da basɛ tɩ bɛ'ɛba yẽ folle tɔgɛ tɩ be'em.

¹⁵ Se'ere n soe la, pɔkõpa basɛba põn wẽrgɛ mɛ basɛ Nawẽnnɛ sore dee dɔla Asũtãana.

¹⁶ Nẽra n bɔ Azezi sɩra sãn tara pɔkõpa a yire, a bɩsra ba yelle, a da dɩkɛ ba yelle basɛ Nawẽnnɛ nẽrba zuo, tɩ Nawẽnnɛ nẽrba la tã'agɛ sõŋɛ pɔkõ-sɛba n ka tarɩ nẽra nẽra la.

Nawẽnnɛ nẽrba kẽma yelle

¹⁷ Wẽndeego nẽrba kẽma sãn bɩsrɩ nẽrba la yelle sõŋa, lan gãnnɩ wuu, sɛba n mõrgrɩ mõola dee zãsna Nawẽnnɛ yetɔga la, ba wʋn yẽ la nã'asgɔ bʋyi.

¹⁸ La gʋlsɛ Nawẽnnɛ gõŋɔ pʋam yetɩ: «Da ẽŋɛ lɔlga n tõnnɩ si pʋam nõorɛ yʋka», dee ken yetɩ: «La masɛ tɩ tõntõnna to'oge a yɔɔrɔ.»

¹⁹ Nẽra sãn dõrɛ kẽma yetɩ a tõm na tõon-be'ero, da selse ẽ, sãn dagna nẽrba bayi bɩɩ batã n de kaset-dõma.

²⁰ La kẽma sãn tõm tõon-be'ero, fʋ kã'an ẽ Wẽndeego la pʋam nẽrba wuu nẽŋam, tɩ nẽrba basɛba la zoe dabeem.

²¹ Mam yetɩ fʋ la Nawẽnnɛ, la Azezi-krisi, la malɛkadõma nẽŋam yetɩ, fʋ doose pa'algɔ bãna wã la sɩra, da bɔkra nẽrba.

²² Da kãblɛ dɩkɛ fʋ nu'usi paglɛ nẽra zuo tɩ a tõm Nawẽnnɛ tõoma, da naagɛ la nẽra a tõon-be'ero pʋam, dɛna pʋpeelem dãana.

²³ Da le yũura ko'om mã'a, yũura vẽ fẽe fʋ pʋʋr-dõoma, la fʋ ĩyã n ka tarɩ pãŋa la ĩyã.

²⁴ Nẽrba basɛba tõon-be'ero puke mɛ lan dẽŋɛ ba wʋn di ba sarɩya. La nẽrba basɛba tõon-be'ero nãn ka puke, dee wʋn wa puke mɛ.

²⁵ Bɛla mẽ, tõon-sõma basɛba puke mɛ, la sɛba n sʋgɛ la ka tã wʋn sʋgɛ ka puke.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan