Bìoball air-loidhne

1 Timoti 3 - Farefare Ninkaré

Sɛba n boe Nawẽnnɛ nẽrba nẽŋa n wʋn ãna se'em

¹ Yetɔg-ẽna tɩ mam yetɩ m tɔgɛ wã de la sɩra, nẽra sãn bɔɔra tɩ a dɛna Nawẽnnɛ nẽrba nẽŋadãana, la de la tõon-sõŋɔ tɩ a boorɩ tɩ a tõm.

² La dẽnɩ tɩ nẽŋadãana dɛna nẽra n ka tarɩ dõrga, la a dɛna pɔg-yẽŋa dãana, la a dɛna nẽra n tarɩ a mẽŋa sõŋa, dee tara pʋtẽ'e-sõŋɔ, a dɛna nẽra tɩ ba nannɩ, la a dɛna nẽra n ɩtɩ nẽrba sãanɔ, dee tãna wʋn zãsʋm nẽrba.

³ A da dɛna nẽra n dɩkɛ a mẽŋa bɔ dãam, a da dɛna zɛbzɛbra, a dɛna sũ-bʋgsʋm dãana, da nõŋɛ girgiri, la a da nõŋɛ bõnɔ.

⁴ A dɛna nẽra n bɩsrɩ a yir-dõma yelle sõŋa, tɩ a kɔma sakra a yetɔga, nã'asra ẽ sɛla woo pʋam.

⁵ Nẽra sãn ka tãna bɩsra a mẽŋa yir-dõma yelle, a wʋn ẽŋɛ la wãne bɩsɛ Nawẽnnɛ nẽrba yelle?

⁶ A da dɛna nẽr-paalga Azezi sore la pʋam, tɩ a da zẽkɛ a mẽŋa tɩ ba wa di a sarɩya wʋ Asũtãana la.

⁷ La dẽnɩ tɩ nẽr-sɛba n ka dolɩ Nawẽnnɛ mẽ tɔgra a yelle yetɩ a de la nẽr-sõŋɔ. Tɩ ba da wa pɔ'ɔgɛ ẽ, tɩ yãnnɛ yõkɛ ẽ tɩ a lui Asũtãana bẽrgɔ pʋam.

⁸ Yel-bɩsrɩba mẽ masɛ mɛ tɩ ba dɛna nẽrba tɩ ba nannɩ, ba da dɛna nẽrba n tarɩ nõgõla, ba da yũura dãam bugra, ba da dɛna nẽrba n ɩtɩ sɛla n ka masɛ yẽta bõntarsõm.

⁹ Ba dɛna nẽrba n tarɩ Nawẽnnɛ sɩra n daan sʋgɛ, tɩ a puke pa'alɛ tɩ la, ɩta sɛla woo tɩ ba mi ba sũure pʋam tɩ la masɛ mɛ.

¹⁰ Dẽnɩ tɩ ba dẽŋɛ makɛ ba bɩsɛ, ba sãn ka tara dõrga, tɩ ba yãŋa tõm yel-bɩsrɩba tõoma la.

¹¹ La ba pɔgba mẽ masɛ tɩ ba dɛna la nẽrba tɩ ba nannɩ, ba da dɛna nẽrba n tɔgrɩ nẽrba be'em, ba tara ba mẽŋa sõŋa, dee dɛna sɩra dõma sɛla woo pʋam.

¹² Dẽnɩ tɩ yel-bɩsra dɛna pɔg-yẽŋa dãana, dee tãna bɩsra a kɔma, la a yir-dõma yelle sõŋa.

¹³ Yel-bɩsrɩba sɛba n tõnnɩ ba tõoma sõŋa yẽtɩ nã'asgɔ mɛ, la ba wʋn yẽ bʋraanɛ zozo'e Azezi-krisi doosgo pʋam.

Bõn-kãtɛ sɛka tɩ Nawẽnnɛ pa'alɛ tõma

¹⁴ Mam tarɩ pʋtẽ'erɛ tɩ la kãn yuuge dee tɩ mam wa'am fʋ zẽ'am, la mam gʋlsɛ wãna bɔ'ɔra fɔ,

¹⁵ tɩ mam sãn yuuge, fʋ tã'agɛ bãŋɛ nẽra n wʋn ãna se'em Nawẽnnɛ nẽrba tẽŋasʋka, nẽr-sɛba n de vɔm dãana Nawẽnnɛ mẽŋa nẽrba n tarɩ Nawẽnnɛ sɩra wʋ zẽerɛ n sõŋrɩ deego se'em na.

¹⁶ Tɩ wuu mi tɩ Nawẽnnɛ sɩra n daan sʋgɛ tɩ a dɩkɛ pa'alɛ tɔ a doosgo pʋam na, de la bõn-kãtɛ. Bõn-kãtɛ ẽŋa de la: Krisi n daan lebge nẽrsaala. Tɩ Nawẽnnɛ Sɩa pa'alɛ tɩ a de la sɩra dãana. Tɩ malɛkadõma bɩsɛ ẽ. Tɩ ba mõolɛ a yelle buuri wuu tẽŋasʋka. Tɩ nẽrba bɔ ẽ sɩra. Tɩ Nawẽnnɛ zẽkɛ ẽ la na'am pãŋa sẽŋɛ a yire.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan