Bìoball air-loidhne

1 Pita 4 - Farefare Ninkaré

Basɛ-ya vɔm kɛka, dee vɔa wʋ Nawẽnnɛ n boorɩ se'em

¹ Bɛla, Krisi n nãmsɛ a ĩyã pʋam na, ya mẽ keŋe ya mẽŋa tara pʋtẽ'erɛ ẽŋa mẽŋa. Nẽr-sɛka woo n nãmsɛ a ĩyã pʋam basɛ tõon-be'ero mɛ.

² Tɩ ẽn ken vɔa dũnia zuo wakat-sɛka la, a kãn le vɔa wʋ nẽrsaala yɛmleego n boorɩ se'em, a wʋn vɔa wʋ Nawẽnnɛ n boorɩ se'em.

³ Kʋrʋm, yãma n daan lagɩm na sɛba n ka dolɩ Nawẽnnɛ ɩta bãma n boorɩ se'em na, da le ɩta-ya bɛla. Yãma daan lagɩm na ba mɛ, ba yalsɩ, la ba be'em yɛmleego, la ba dã-yũure, la ba pʋyã'an-yooro, la ba dã-buka, la ba baga kãabgɔ n de be'em na pʋam.

⁴ La lɛɛlɛ wã, yãma n ka le lagɩm na ba lɛ tõnna tõon-dẽgrɔ bãma la, ba ka bãŋɛ a võorɛ, tɩ ba tʋʋra ya.

⁵ La ba wʋn wa tɔgɛ bãma n ẽŋɛ se'em bɔ Nawẽnnɛ n mãasʋm gu'ura tɩ a di sɛba n vɔa, la sɛba n ki sarɩya la.

⁶ Bɛla ĩyã tɩ ba daan mõolɛ kõ-yẽlga la mẽ bɔ sɛba n ki la, tɩ ban ki wʋ Nawẽnnɛ n di nẽrsaalba wuu sarɩya tɩ ba kiira la, ba tã'agɛ yẽ vɔm tɩ Nawẽnnɛ Sɩa bɔ'ɔrɩ.

⁷ Sɛla woo ba'asgɔ lɛm mɛ. Bɛla ĩyã, tara-ya ya mẽŋa sõŋa, dee mõrgɛ la Nawẽnnɛ pʋ'ʋsgɔ.

⁸ Sɛla n gãnnɩ wuu de la ya nõŋɛ taaba zozo'e, se'ere n soe la, nõŋlʋm n botɩ tɩ basra taaba tõon-be'ero zozo'e taalɛ.

⁹ Ɩta-ya taaba sãanɔ, da yõnna.

¹⁰ Yãma nẽra woo to'oge la Nawẽnnɛ yel-sõnnɛ bɔ'a, dɩkɛ-ya ba sõŋɛ nẽrba basɛba. Bɛla tɩ ya wʋn dɛna nẽrba n bɩsrɩ Nawẽnnɛ bɔ'a to'oto'ore la yelle sõŋa.

¹¹ Nẽr-sɛka n tɔgrɩ, a tɔgɛ wʋ Nawẽnnɛ n yele se'em, nẽr-sɛka n tõnnɩ sõŋrɛ tõoma, a sõŋɛ wʋ Nawẽnnɛ n bɔ ẽ pãŋa se'em. Tɩ tõon-bãma wuu wʋn nã'asɛ Nawẽnnɛ yʋ'ʋrɛ Azezi-krisi ĩyã. Ẽŋa n soe nã'asgɔ, la pãŋa wakatɛ n ka ba'asrɩ. Amina.

Sɛka n nãmsrɩ Krisi doosgo ĩyã tarɩ zu-yẽlga

¹² M sɩr-nõŋrɩsɩ, da basɛ-ya tɩ nãmsgɔ kãtɛ sɛka n paarɩ ya la ãna wʋ yel-di'iŋa bɔ ya.

¹³ Tõn tara-ya sũ-yẽlga, tɩ yãma po nãmsra la Krisi nãmsgɔ, tɩ ya wʋn tã'agɛ ẽŋɛ sũ-yẽlga sɩrʋm wakatɛ sɛka tɩ a na'am pãŋa wʋn puke la.

¹⁴ Ba sãn tʋʋra ya yãma n de Krisi nẽrba la ĩyã, ya tarɩ zu-yẽlga, se'ere n soe la, Nawẽnnɛ Sɩa la n tarɩ nã'asgɔ zozo'e la boe la ya lɛ mɛ.

¹⁵ La da basɛ-ya tɩ ya nẽr-sɛka nãmsra ẽŋa n de nẽr-kʋʋra, bɩɩ nayiga, bɩɩ tõon-be'ero dãana, bɩɩ nẽra n kẽ'erɩ nẽrba yɛla n ka pakɛ ẽ pʋam.

¹⁶ La nẽra sãn nãmsra ẽŋa n de Krisi nẽra ĩyã, a da zɔta yãnnɛ. A nã'asra Nawẽnnɛ, ban wi'iri ẽ Krisi nẽra la ĩyã.

¹⁷ Wakatɛ paagɛ mɛ tɩ Nawẽnnɛ wʋn di sarɩya, la a wʋn pɔsɛ la a mẽŋa nẽrba. La sãn dɛna tɩ a wʋn dẽŋɛ di la tõma sarɩya pɔspɔsɩ, sɛba n ka sakɛ Nawẽnnɛ kõ-yẽlga la ba'asgɔ wʋn ãna la wãne?

¹⁸ La gʋlsɛ Nawẽnnɛ gõŋɔ pʋam yetɩ: «La sãn dɛna toogo bɔ tõon-sõma dãana dee tɩ a yẽ fãarɛ, tõon-be'ero dãana n ka dolɩ Nawẽnnɛ sore yelle wʋn ãna la wãne?»

¹⁹ Bɛla, nẽr-sɛba n nãmsrɩ wʋ Nawẽnnɛ n boorɩ se'em na, ba ɩta sɛla n ãn sõŋa, dee dɩkɛ ba mẽŋa ẽŋɛ Nawẽnnɛ n nãam ba dee dɛna sɩra dãana la nu'usum.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan