1 Pita 3 - Farefare Ninkaré

Pɔgsɩ, la ba sɩrba yelle

¹ Bɛla mẽ, pɔgsɩ, sakra-ya ya sɩrba, tɩ baa sɛba n ka bɔ Nawẽnnɛ yetɔga sɩra la sãn yẽ ya yel-ɩrɛ, ba wʋn sakɛ tɩ la ka doose la yetɔga,

² ban yẽtɩ ya yel-ɩrɛ n ãn sõŋa dɛna nã'asgɔ la.

³ Da basɛ-ya tɩ ya nẽnnõm dɛna yẽŋa sõŋa, n de zuto pã'aŋɔ, la sãlma lɔgrɔ, la fu-sõma yɛa.

⁴ Basɛ-ya tɩ ya sõŋa la dɛna sũure pʋam sõŋa n de sũ-bʋgsʋm la sũ-mã'asʋm. Sõŋa ẽna n ka sã'anɩ dee tara yõorɔ zozo'e Nawẽnnɛ nifum.

⁵ Kʋrʋm kʋrʋm, pɔg-sɛba n yʋʋn de Nawẽnnɛ nẽrba tara pʋtẽ'erɛ gu'ura sɛla Nawẽnnɛ zẽ'am na, sõŋa mẽ yʋʋn ãn na bɛla, sakra ba sɩrba.

⁶ Asaara yʋʋn ãn na bɛla sakra a sɩra Abraham nõorɛ, wi'ira ẽ tɩ a zuudãana. Ya sãn tõnna tõon-sõma, dee ka basɛ tɩ ba kẽ'esɛ ya dabeem, ya de la a pɔyɔɔsɩ.

⁷ Bɛla mẽ, yãma sɛba n de sɩrba la, bɔna-ya la ya pɔgba la lɛ, la wõm taaba, la ya bãŋɛ tɩ ba ka tarɩ pãŋa wʋ yãma la, la ya nanna ba, tɩ bãma la yãma n wʋn lagɩm to'oge Nawẽnnɛ yel-sõnnɛ n de vɔm. Ɩta-ya bɛla tɩ sɛla da gu ya pʋ'ʋsgɔ.

Ɩta-ya sõŋa baa ya sãn nãmsra

⁸ Ba'asgɔ pʋam, mam yetɩ ya wuu tɩ ya tara pʋtẽ'erɛ ayɩla, la taaba zĩile, la sɔbiisi nõŋrɛ, la ninbãal-zʋa, la sik-m-mẽŋa.

⁹ Nẽra sãn ẽŋɛ ya be'em, ya da lebse ẽ be'em. Nẽra sãn tʋ ya, ya da tʋ lebse, tõn kã-ya kã'a-sõma bɔ ẽ. Se'ere n soe la, Nawẽnnɛ n wi ya la, la de la kã'a-sõma tɩ a bĩŋe nõorɛ tɩ a bɔ ya.

¹⁰ La gʋlsɛ Nawẽnnɛ gõŋɔ pʋam yetɩ: «Nẽr-sɛka n boorɩ tɩ a vɔm ãna yẽlʋm, dee tɩ a yẽ sũ-yẽlga, dẽnɩ tɩ a yõkɛ a nõorɛ la yetɔg-be'ero, dee basɛ põmpɔrŋɔ.

¹¹ A zãagɛ a mẽŋa la tõon-be'ero, dee ɩta sɛla n ãn sõŋa, la a mõrgɛ ɛ tɩ sũ-mã'asʋm bɔna nẽrba tẽŋasʋka da basɛ.

¹² Se'ere n soe la, Zuudãana bɩsrɩ la sɛba n de sɩra dõma, dee sɛlsra ba pʋ'ʋsgɔ, la a wẽrgrɩ a nẽŋa mɛ, dee basra nẽr-sɛba n de tõon-be'ero dõma.»

¹³ Yãma sãn mõrgɛ tõnna tõon-sõma, ãne n wʋn ẽŋɛ ya be'em?

¹⁴ La baa nẽrba sãn nãmsra ya yan ɩtɩ sɛla n masɛ ĩyã, ya wʋn yẽ yel-sõnnɛ. Bɛla, da zɔta-ya ba dabeem, la ya da basɛ tɩ la dãana ya.

¹⁵ Nã'asra-ya Krisi ya sũure pʋam, basɛ-ya tɩ a dɛna ya Zuudãana. Mãasʋm-ya wakatɛ wuu lɛrgra nẽr-sɛka woo n sokrɩ ya, bɔɔra tɩ a bãŋɛ yãma n tarɩ pʋtẽ'erɛ gu'ura sɛla la yelle n ãn se'em na.

¹⁶ La ya ɩta bɛla la sũ-bʋgsʋm, la wɔɔrɛ. Ɩta-ya sɛla tɩ ya mi ya sũure pʋam tɩ la ãn sõŋa, tɩ yãnnɛ yõkɛ sɛba n tɔgrɩ ya be'em, yãma n tõnnɩ sõŋa Krisi ĩyã la.

¹⁷ Se'ere n soe la, ya sãn ɩta sɛla n ãn sõŋa nãmsra tɩ la sãn dɛna la Nawẽnnɛ n boorɩ bɛla, bɛla n ãn sõŋa gãnna yãma n wʋn ẽŋɛ be'em nãmsra.

¹⁸ Krisi nãmsɛ mɛ ki bʋyɩla tɩ a yese tõon-be'ero, ẽŋa n de sɛka n masɛ la, ki la sɛba n ka masɛ ĩyã, tɩ a tarɩ ya sẽŋɛ Nawẽnnɛ zẽ'am. Ba kʋ ẽ mɛ, tɩ Nawẽnnɛ Sɩa basɛ tɩ a vo'oge

¹⁹ sẽŋɛ ka mõolɛ kõ-yẽlga bɔ sɩɩsɩ sɛba tɩ ba yʋ la.

²⁰ Sɩɩsɩ bãma de la nẽr-sɛba n yʋʋn ka sakɛ Nawẽnnɛ nõorɛ Anoe wakatɛ la. Nawẽnnɛ yʋʋn mã'agɛ la a sũure gu'ura, wakat-sɛka tɩ Anoe yʋʋn mãalɩ õorŋɔ la, õorŋɔ ẽŋa pʋam tɩ nẽrba fẽe, banii mã'a kẽ mĩ põsɛ ko'om na pʋam yẽ fãarɛ.

²¹ Bɛla de la makrɛ pa'ala ko'om misga n fãarɩ ya lɛɛlɛ wã. Ko'om misga dagɩ ĩyã dẽgrɔ yɛsga yelle, la de la sɛla n pa'alɩ tɩ nẽra looge yɛm tɩ a doose Nawẽnnɛ la pʋpeelem. Ko'om misga fãarɩ ya mɛ Azezi-krisi n ki dee vo'oge la ĩyã.

²² Ẽŋa n zẽkɛ sẽŋɛ Nawẽnnɛ yire ka zĩ'ire Nawẽnnɛ zʋʋgɔ bɔba, tɩ malɛkadõma, la kɛ'ɛndõma, la pãnsɩ dõma wuu sakra ẽ.