Bìoball air-loidhne

1 Korẽntɩ 2 - Farefare Ninkaré

Apolɩ n mõolɛ Azezi-krisi kõ-yẽlga se'em

¹ M sɔbiisi, mam n daan wa'am ya zẽ'am wa mõolɛ Nawẽnnɛ kõ-yẽlga n sʋgɛ bɔ ya la, la dagɩ la yetɔg-mi'ilum, bɩɩ nẽrsaalba yɛm tɩ mam mõolɛ bɔ ya.

² Se'ere n soe la, mam daan looge yɛm tɩ mam kãn mõolɛ sɛla sɛla yelle, sãn dagna Azezi-krisi yelle, ẽŋa n ki dɔ-puurŋa zuo la yelle.

³ Mam n daan boe ya zẽ'am na, mam daan ka tarɩ pãŋa, tɩ dabeem daan tara mam, tɩ mam gõgra.

⁴ Mam n daan mõolɛ dee zãsʋm kõ-yẽlga la, la daan dagɩ la nẽrsaalba yɛm yetɔga tɩ mam daan tɔgɛ bɔ ya tɩ ya sakɛ, mam daan tɔgɛ mɛ, tɩ Nawẽnnɛ Sɩa pa'alɛ a pãŋa,

⁵ tɩ yãma n bɔ Azezi-krisi sɩra la, la dagɩ nẽrsaalba yɛm ĩyã, la de la Nawẽnnɛ pãŋa ĩyã.

Nawẽnnɛ yɛm n ãn se'em

⁶ La baa bɛla, tõma tɔgrɩ la yɛm yetɔga bɔ'ɔra sɛba n bɩ Nawẽnnɛ sore la doosgo pʋam. La dagɩ dũnia wã yɛm, la mẽ ka de sɛba n soe dũnia wã yɛm. Bãma wʋn lebge la zãŋa.

⁷ Tõma mõolɩ la Nawẽnnɛ yɛm n daan sʋgɛ tɩ nẽrba ka mina. Nawẽnnɛ daan põn looge yel-bãma mɛ lan dẽŋɛ dũnia pĩ'iluŋo tɩ a botɩ tɩ yẽ nã'asgɔ a zẽ'am.

⁸ Sɛba n soe dũnia wã baa ayɩla ka mi yɛm ẽna wã. Ba daan sãn mi nɩ ẽ, ba kãn ka nɩ Zuudãana n tarɩ na'am pãŋa wuu la dɔ-puurŋa zuo kʋ.

⁹ La de wʋ lan gʋlsɛ Nawẽnnɛ gõŋɔ pʋam se'em yetɩ: «Bõn-sɛba tɩ Nawẽnnɛ mãasʋm tɩ a bɔ nẽr-sɛba n nõŋɛ ẽ na, gãnnɩ bõn-sɛba wuu tɩ nẽra nãn ka yẽ, bɩɩ wõm, bɩɩ tẽ'esɛ a pʋtẽ'erʋm.»

¹⁰ Nawẽnnɛ botɩ a Sɩa la puke bõn-bãma pa'alɛ la tõma. Nawẽnnɛ Sɩa la mi sɛla woo mɛ, baa la Nawẽnnɛ yel-sɛba n sʋgɛ.

¹¹ Ãne n mi nẽrsaala pʋtẽ'erɛ? La de la nẽrsaala mẽŋa sɩa mã'a. Bɛla, nẽra mẽ ka mi Nawẽnnɛ pʋtẽ'erɛ, sãn dagna Nawẽnnɛ Sɩa la mã'a.

¹² La sãn dɛna tõma, tõma ka to'oge dũnia wã sɩa, tõma to'oge la Nawẽnnɛ Sɩa n ze'ele a zẽ'am, tɩ tɩ yãŋɛ bãŋɛ bõn-sɛba wuu tɩ a bɔ tɔ.

¹³ La tõma n tɔgrɩ yel-bãna wã, la dagɩ nẽrsaalba yɛm yetɔga, tõma tɔgrɩ la yetɔg-sɛba tɩ Nawẽnnɛ Sɩa pa'alɛ tõma, tõma tɔgrɩ la yel-sɛba n ze'ele Nawẽnnɛ Sɩa zẽ'am bɔ'ɔra nẽr-sɛba n tarɩ Nawẽnnɛ Sɩa.

¹⁴ La nẽr-sɛka n ka tarɩ Nawẽnnɛ Sɩa la kãn tã'agɛ to'oge sɛla n ze'ele Nawẽnnɛ Sɩa zẽ'am, la de la yalnɛ bɔ ẽ, a kãn tã'agɛ bãŋɛ a võorɛ. Nẽr-sɛka tɩ Nawẽnnɛ Sɩa boe la ẽ lɛ mã'a n mi Nawẽnnɛ Sɩa la yelle.

¹⁵ Nẽr-sɛka tɩ Nawẽnnɛ Sɩa boe la ẽ lɛ n tã wʋn bãŋɛ sɛla woo n ãn se'em bɔkɛ. La nẽra ka tã wʋn bãŋɛ ẽŋa dãana yelle bɔkɛ.

¹⁶ La de wʋ lan gʋlsɛ Nawẽnnɛ gõŋɔ pʋam se'em yetɩ: «Ãne n mi Zuudãana pʋtẽ'erɛ? Ãne n wʋn yãŋɛ kã'an ẽ?» La sãn dɛna tõma, tõma tarɩ la Krisi pʋtẽ'erɛ.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan