1 Korẽntɩ 12 - Farefare Ninkaré

Nawẽnnɛ Sɩa bɔ'a yelle

¹ Lɛɛlɛ wã, mam yetɩ m tɔgɛ ya la Nawẽnnɛ Sɩa bɔ'a yelle. M sɔbiisi, mam boorɩ tɩ ya bãŋɛ la bõn-ẽŋa yelle sõŋa.

² Ya mi tɩ yan daan nãn ka bɔ Azezi sɩra la, ya daan taagɛ la baga n de mugro la poore dɔla, ka tãna wʋn basɛ.

³ Bɛla tɩ mam bɔɔra tɩ ya bãŋɛ tɩ Nawẽnnɛ Sɩa la sãn bɔna la nẽra, a ka tã wʋn tɔgɛ Azezi yelle be'em. La nẽra mẽ ka tã wʋn yetɩ, Azezi de la Zuudãana, tɩ la sãn dagna Nawẽnnɛ Sɩa n botɩ a yele.

⁴ Nawẽnnɛ Sɩa bɔ'a la de la to'oto'ore, la, la de la Sɩa ayɩla mẽŋa n bɔ'ɔrɩ.

⁵ Tõoma la de la to'oto'ore, la, la de la Zuudãana ayɩla tɩ tɩ tõnnɩ bɔ'ɔra.

⁶ Tõoma la n tõnnɩ se'em na de la to'oto'ore, la, la de la Nawẽnnɛ ayɩla n tõnnɩ ba wuu nẽrba wuu pʋam.

⁷ Nawẽnnɛ Sɩa la bɔ'ɔrɩ nẽra woo la bɔ'a nẽrba la wuu sõŋrɛ ĩyã.

⁸ Sɩa la bɔ'ɔrɩ nẽra ayɩla la bɔ'a tɩ a tɔgra yɛm yetɔga, la Sɩa ẽŋa ayɩla n bɔ'ɔrɩ nẽra ayẽma bɔ'a tɩ a tɔgra bãŋrɛ yetɔga.

⁹ La Sɩa ẽŋa mẽŋa n bɔ'ɔrɩ nẽra ayɩla bɔ'a tɩ a bɔ'ɔra Nawẽnnɛ sɩra zozo'e, dee bɔ'ɔra ayẽma pãŋa tɩ a botɩ bã'adõma yẽta ĩmã'asʋm.

¹⁰ Sɩa la n bɔ'ɔrɩ nẽra ayɩla pãŋa tɩ a tãna tõnna tõon-yãlma, dee bɔ'ɔra ayẽma bɔ'a tɩ a tɔ'ɔsra Nawẽnnɛ yetɔga tɔgra bɔ'ɔra nẽrba, ẽŋa n bɔ'ɔrɩ nẽra ayɩla yɛm tɩ a tãna wʋn bãŋɛ sɛla n ze'ele Nawẽnnɛ Sɩa zẽ'a, la sɛla n ka ze'ele Nawẽnnɛ Sɩa zẽ'a bɔkɛ. Sɩa ẽŋa n bɔ'ɔrɩ nẽra ayɩla bɔ'a tɩ a tãna tɔgra yetɔg-zãŋsɩ, dee bɔ'ɔra ayẽma bɔ'a tɩ a tãna pa'ala yetɔg-zãŋsɩ la võorɛ.

¹¹ La de la Sɩa ẽŋa ayɩla n ɩtɩ bɛla wuu. Sɩa la bɔ'ɔrɩ nẽra woo la bɔ'a to'oto'ore wʋ ẽŋa n boorɩ se'em.

Azezi-krisi nẽrba ãn wʋ nẽra ayɩla ĩyã la

¹² Azezi-krisi nẽrba ãn wʋ ĩyã ayɩla n tarɩ zẽ'esɩ to'oto'ore. La baa la zẽ'esɩ la n de to'oto'ore la, ba wuu de la ĩyã ayɩla.

¹³ Tõma Zifdõma, la sɛba n dagɩ Zifdõma, la sɛba n de yamsɩ, la sɛba n dagɩ yamsɩ, tõma wuu n daan mise ko'om pʋam na, Nawẽnnɛ Sɩa botɩ tɩ lebge la ĩyã ayɩla. Nawẽnnɛ tõm na Sɩa ayɩla bɔ tɩ wuu.

¹⁴ Nẽra ĩyã ka tarɩ zẽ'a ayɩla mã'a. A tarɩ la zẽ'esɩ to'oto'ore.

¹⁵ Nã'arɛ sãn yetɩ, ẽŋa n dagɩ nu'ugo la, ẽŋa ka po dɛna ĩyã la zẽ'a ayɩla, bɛla kãn tã'agɛ basɛ tɩ a kãn dɛna ĩyã la zẽ'a ayɩla.

¹⁶ La tʋbrɛ mẽ sãn yetɩ, ẽŋa n ka de nifo la, ẽŋa ka po dɛna ĩyã la zẽ'a ayɩla, bɛla kãn tã'agɛ basɛ tɩ a kãn dɛna ĩyã la zẽ'a ayɩla.

¹⁷ Tɩ ĩyã la wuu sãn de nɩ nifo, a yetɩ a ẽŋɛ la wãne wõm yetɔga? La a wuu sãn de nɩ tʋbrɛ, a yetɩ a ẽŋɛ la wãne wõm yũuŋo?

¹⁸ Bɛla tɩ Nawẽnnɛ ẽŋɛ ĩyã zẽ'a woo wʋ ẽn boorɩ se'em, lagɩm ba taaba.

¹⁹ Ba wuu sãn de nɩ la zẽ'a ayɩla mã'a, ĩyã kãn boe nɩ.

²⁰ Bɛla tɩ zẽ'esɩ to'oto'ore bɔna, la ba de la ĩyã ayɩla.

²¹ Bɛla nifo ka tã wʋn yele nu'ugo yetɩ, ẽŋa ka boorɩ a sõŋrɛ. La zuugo mẽ ka tã wʋn yele nãma yetɩ, ẽŋa ka boorɩ ba sõŋrɛ.

²² Lan pa'asɛ, ĩyã la zẽ'e-sɛba n ãn wʋ ba ka tarɩ pãŋa la, tarɩ yõorɔ mɛ.

²³ Zẽ'e-sɛba tɩ tõma bɩsɛ tɩ ba ka tarɩ yõorɔ zo'oge la, tɩ bɩsrɩ la bãma yelle sõŋa sõŋa. La zẽ'e-sɛba tɩ tɩ tẽ'esɛ tɩ ba ka masɛ tɩ nẽrba yẽ ba la, bãma tɩ tɩ malgrɩ sõŋa gãnna.

²⁴ La ka de tɩ dɩkɛ sɛla pĩ zẽ'e-sõma la. Nawẽnnɛ mẽŋa n ẽŋɛ tɩ ĩyã la, basɛ tɩ tɩ bɩsra zẽ'e-sɛba tɩ tɩ tẽ'esɛ tɩ ba ka tarɩ yõorɔ zo'oge la yelle sõŋa sõŋa,

²⁵ tɩ welgre da bɔna ĩyã la pʋam. La tɩ ĩyã la zẽ'esɩ to'oto'ore la wʋn sõŋra taaba.

²⁶ Bɛla, zẽ'a ayɩla sãn nãmsra, zẽ'esɩ la wuu mẽ nãmsrɩ mɛ. Zẽ'a ayɩla sãn yẽ nã'asgɔ, zẽ'esɩ la wuu tarɩ la sũ-yẽlga.

²⁷ Ya wuu de la Krisi ĩyã la. La nẽra woo de la ĩyã la zẽ'a ayɩla.

²⁸ Bɛla tɩ Nawẽnnɛ ẽŋɛ nẽra woo a zẽ'am a nẽr-kʋʋŋɔ la pʋam. Pɔspɔsɩ de la sɛba tɩ Azezi mẽŋa daan looge tõm ba la. Bʋyi dãana de la Nawẽnnɛ nõtɔ'ɔsrɩba. Bʋtã de la karẽnsãandõma, la sɛba n tõnnɩ tõon-yãlma, la sɛba tɩ a bɔ ba pãŋa tɩ ba botɩ bã'adõma yẽta ĩmã'asʋm, la sɛba tɩ a looge tɩ ba sõŋra nẽrba, la sɛba n wʋn bɔna nẽrba nẽŋa, la sɛba n tɔgrɩ yetɔg-zãŋsɩ.

²⁹ La dagɩ tɩ wuu n de sɛba tɩ Azezi mẽŋa daan looge tõm na, dagɩ tɩ wuu n de nõtɔ'ɔsrɩba, dagɩ tɩ wuu n de karẽnsãandõma. La dagɩ tɩ wuu n tarɩ pãŋa tõnna tõon-yãlma,

³⁰ la dagɩ tɩ wuu n botɩ bã'adõma yẽta ĩmã'asʋm, dagɩ tɩ wuu n tɔgrɩ yetɔg-zãŋsɩ, dagɩ tɩ wuu n tã wʋn pa'alɛ yetɔg-zãŋsɩ la võorɛ.

³¹ Ɛɛra-ya bɔ'a sɛba n gãnnɩ wuu. La mam wʋn pa'alɛ ya so-sɛka n gãnnɩ ba wuu.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan