Lukéstar 8 - O Devlikano lil e Sumnale Lukahtar 1938 (Gurbet)

E manušnja save džana pala o Isuso. Paramiči e sijačehtar, e gavehće bućarnehtar. Ko si e Hristohko rodo. Ačhavipe e bahvaljako po baro paj. O sastaripe e manušehko e bengjalimahtar. O džungavipe e Jairohće čhejako thaj o čudo e nasvale džejaha.

¹ Maj palal vov phirela pe thema, pe forujra thaj pe gava, pe sa e thana, dindo vorba e Devlehće thagarimahtar, a leha džana e dešuduj amala.

² Thaj varesave džeja saven vov sastardah katar e džungale duhujra, katar e čoh̄ane, thaj katar o nasvalipe: e Marija, sajvako anav sah Magdalina, andar savi ikliste efta bengjale.

³ Thaj e Jovana, e r̄omni e Huzaći, e Irodohće šorutnehći, thaj e Susana, thaj e aver but manušnja save lehće ćerena bući thaj kandena le pehtar thaj pire barvalimaha.

⁴ A kana ćidinalje but manuša, save lehte avile andar sa e thema, vov lengje phendah gaja paramiči:

⁵ Varesavo gavehko manuš iklisto tar jekhvar pe pi umal te čhudel ande phuv kuća, sumbujra, te siji len te bajrol o gjiv. Čhudindo gadija jekh kućin pelah uzo drom thaj uštadinalji, a e Devlehće čiriklja h̄ale la.

⁶ A jekh aver kućin pelah po bar̄, pa kana bajrilah, šućilo tar, kaj naj sah la ćingjipe.

⁷ Pale jekh kućin pelah ande karne, pa kana o karno bajrilah, tasili e kućin.

⁸ A jekh kućin pelaha pe lačhi phuv thaj kana bajrilah, bijandah šel droma maj but nego anglal so sah la.

⁹ A lehće amala phučle le: Pe so sikavel amen gadav paramiči?

¹⁰ A vov phendah: O Del muklah tumen te haćaren so garudol ande Devlehko thagaripe, ande lehko rajipe, a e averengje del vorba e paramičenca, pa, putarindo e jakha te na dikhen, a ašunindo te na haćaren.

¹¹ A gaja paramiči sikavel ame agava: E kućin si e Devlehko alav.

¹² Gola kućina save si paša o drom, gova si gola manuša save ašunen, a pala golehte, maj palal avel o beng thaj lel o alav e Devlehko andar lengo odji, kaj vov kamel te na von paćan te na aven spasime e Devlehtar.

¹³ Gola kućina po bar̄, gova si gola save len e alava dragostijaha, šukarimaha, ali naj len kočaja, pa akana cîr̄a paćan, athoska kana avel o beng te zumavel len, von muken e Devle.

¹⁴ A godja kućin savi pelah ande karne, gova si gola kaj ašunen thaj džan tar, a maj palal h̄asardon, tasadon katar e buća, katar o lačhipe thaj barvalipe, pa niči resen khanči, niči bijandol niso.

¹⁵ A goja kućin savi pelah pe lačhi phuv, gova si gola manuša kaj ašunen o alav thaj ićaren le ande po lačho thaj paćamno odji thaj cîr̄a po cîr̄a plodujra bijanen. Kana vaćardah gova, dijah vorba: Kahte si kan, nek ašunel gova.

¹⁶ Kana vareko phabarel e memeli, vov niči učharel la khajekhe vasoha thaj niči kam thovel la tala o buhljardo. Vov kam čhuvel la inćate pe memeljako than te dikhen o ždrako, o strafin, gola save den andre.

¹⁷ Kaj naj niso garudino savo niči sikadola jekhvar, savo niči haćardola, savo niči iklela po dićhipe e djivesehko.

¹⁸ Dikhen akana sar kam ašunen: Gova manuš savo si le vareso, golehće kam del pe, a gova savo naj le, lehtar lela pe vi gova so vov ićarel kaj si le.

¹⁹ Avile lehte lehći dej thaj e phrala lehće pa našti nisar dije vorba leha kaj seha kothe but džene.

²⁰ Thaj e manuša phende lehće: Ći dej thaj će phrala ačhen avri, kamen te dićhen tu.

²¹ A vov dindo vorba phendah lengje: Mrni dej thaj mrne phrala si gola save ašunen o alav e Devlehko thaj ićaren le.

²² Jekhe djivesehko dijah vov pe amalenca ande jekh pajali, ande ladja, thaj phendah lengje: Haj te nakhah pe okoja rig preko paj. Thaj lije te nakhadon.

²³ Kana von gjele, vov suto tar, a varekatar vazdinaljah jekh bari balval po paj, pa pherdinaljah e pajali e pajeha, a baro darape astardah e dženen.

²⁴ Thaj pašile lehte thaj džungade le, dindo vorba: Sikavneja, sikavneja, kam merah. Vov uštilah, vaćardah vareso e balvaljaće thaj e pajehće, thaj von ačhile jekhvaratar te na miškosajvon.

²⁵ A lengje phendah: Kaj si tumaro paćape? A von daralje thaj začudisalje, dije vorba jekh e avrehće: Savo si gava kaj del vorba e balvaljenca thaj e pajeha, a von thoven le kan?

²⁶ Thaj von avile ando them e Gadarinengo, savo si paše ke Galileja.

²⁷ Kana vov iklistah pe phuv, dijah pe lehte jekh manuš ande savehte seha e bengjale but brša. Naj seha le gada pe lehte thaj niči bešela ando ćher, nego ačhela ande limojra.

²⁸ Kana vov dikhlah e Isuso, vov dijah muj thaj pelah angla lehte pe čanga thaj phendah: So si tuće dži mande? Čhaveja e Devlehćireja, e Maj Barederehćireja! Me moli tu, na nasvaljar ma, na ićhar ma!

²⁹ Kaj o Isuso phendah e odjehće e bengjalehćerehće te iklel andar gova manuš. Odomut astarela le budroma, pa phandena le ande sastra te arakhen le, a vov akušindo len phagardah e sastra thaj o beng tradijah le ande korkor̄utno them.

³⁰ A o Isuso phučlah le dindo vorba: Sar si ćo anav? A vov phendah: Vojska, askejra, kaj ande lehte dije but benga.

³¹ Thaj molisarde le te na bičhalel len te džan tele ande h̄îv h̄arate.

³² Inćate upre ande plajin, ando voš čajrona but bale. Von mangle lehtar te mukel len te den andre ande bale. Thaj vov muklah len.

³³ Akana ikliste e benga andar o manuš thaj dije ande bale. A e bale katar go učo plajinako than lije te prasten thaj sigarindo dije ando paj thaj tasile tar.

³⁴ A kana gova dikhle gola kaj čajrarena e balen, dije našipe thaj morhode ando foro thaj ande gava sa gova so dikhle.

³⁵ Thaj ikliste e manuša te dikhen so sah, thaj avile ko Isuso thaj arakhle gole manuše, andar savo e benga ikliste. Vov bešela hujrado, ande pi godji, paša e prne e Isusohće, thaj von daralje golehtar.

³⁶ A gola save dikhle, mothode lehće sar sastilah o bengjalo dženo.

³⁷ Thaj sa e manuša andar e Gadarinengo them mangle te džal tar vov lendar, kaj von savor̄e daralje lehtar. A vov dijah ande pajali, ande ladja, thaj irisaljah palpale.

³⁸ A o manuš andar savehte ikliste e bengjale, manglah lehtar te mukel le te avel uzo lehte. Ali o Isuso bičhaldah le pehtar dindo vorba:

³⁹ Irisajvo ke ćo ćher thaj sikav savor̄engje so ćerdah tuće o Del. Gov manuš gjelo tar thaj dijah vorba ando sa o foro save bare buća ćerdah lehće o Isuso.

⁴⁰ A kana irisaljah o Isuso, dijah pe sa e manuša save le ažućarena.

⁴¹ Thaj, ake dikh, avilah varesavo manuš, po anav Jairo, savo sah šorutno ande khangjiri, pa pelo tar angla e Isusohće prne thaj akhardah le, te del ande lehko ćher.

⁴² Lehte sah jekh jekhor̄i čhejor̄i dešudo bršengji, pa nasvaljaha po meripe. A e manuša gadija džando ćićidije pe thaj ispidije pe trujal o Isuso.

⁴³ Okoring sah vi jekh nasvalimahći džuvli, sajvatar radela dešuduj brš, thavdelah o rat. Voj dela sa piro barvalipe ke doktojra, a ni jekh našti sastardah la.

⁴⁴ A e džeji ačhilah pala o Isuso thaj palal astardah e rig katar lehko hujravipe, a o rat ačhilah jekhvaratar te na pićal.

⁴⁵ Thaj o Isuso phendah: Ko si gova savo astardilah pala mande? A savor̄e phende kaj niči astardinalje. Akana phendah o Petre thaj gola save seha leha: Sikam neja, e’ manuša ačhen oko tute utral thaj ispidinja von, a tu, ake, pheneh: Ko astardol gova pala mande?

⁴⁶ A o Isuso phendah: Vareko čače mora te astardilah pala mande, kaj me haćardem kana iklistah andar mande o zuralipe.

⁴⁷ A kana dikhlah e manušni kaj našti nisar garudilah, lijah voj te izdral tha pelah lehće dži ke čanga, vaćarindo angla sa e manuša, pala sohte astardilah pala lehte thaj sar pe jekhvar sastilah golehtar.

⁴⁸ A vov phendah laće: Ma dara, čhejene, ćiro pać pe ćerdah tuće pa sastilan, dža tar šukarimaha!

⁴⁹ Kana vov gadija dijah vorba, avilah varesavo dženo katar o ćher e khangjiraće šorun hko thaj phendah: Etali, muli tar ći čhej, na ačhav maj but e sikamne!

⁵⁰ Thaj kana gova ašundah o Isuso, phendah lehće vaćarindo: Ma dara, trubuj te paćah, pa kam voj sastol, kam džuvindol pale.

⁵¹ A kana avilah ando ćher, niči muklah nikah te del and e, samo e Petre, e Jakovo thaj e Jovano thaj e da e čhejaćira.

⁵² Thaj savor̄e ruje pala late, a vov dijah vorba: Na rovljardon, voj niči mulah, voj sovel.

⁵³ Thaj asaje lehće, ćerena phejras lehtar, kaj džanglekaj e rakhli sah muli.

⁵⁴ A palal vov tradijah len savor̄en avri thaj astardah e čheja pala o va, dindo vorba: Čhejo, ušti!

⁵⁵ Akana lako odji, lako džipe, pale irisaljah ande late thaj voj uštilah sigo, a o Isuso vaćardah te den la h̄ape.

⁵⁶ A lako dad thaj laći dej začudisalje, a vov phendah lengje te na nikahće mothoven gova so sah.