Lukéstar 5 - O Devlikano lil e Sumnale Lukahtar 1938 (Gurbet)

O Petre astarel mačhen. O sastaripe e phuknjalehko thaj e linehko. O h̄ape paša o Levi. O Isuso del vorba katar o šućaripe.

¹ Jekhvar avile e manuša lehte te ašunen o alav e Devlehko, a vov ačhela uzo paj e Genisaretohko.

² Thaj dikhlah duj ladje, duj pajehće kaštune, kaj ačhen pe jekh rig, a e mačhale, e ribajra, iklisteha andar lende te e mreže thoven.

³ Thaj vov dijah ande jekh pajehći kaštuni, e Simonohći, thaj manglah lehtar te dujron tar cîra katar e phuv, maj dur inćate. Vov bešlah ande gaja pajali thaj lijah e manušen te sikavel.

⁴ Kana ačhilah te del vorba, phendah e Simonohće: Ha džan inćate kaj si maj baro paj, maj handuk, čhuden e mreže thaj astaren e mačhen.

⁵ A o Simono lehće phendah dindo vorba: Sikamneja, sor̄o e jrat ćerdan bući thaj niči astardan niso, a te tu kameha, ake, amen šaj mukah ando paj e mreža, e astardi.

⁶ Von gadija ćerde thaj astarde bute mačhen thaj e mreže putalje e pharimahtar, phar̄adinalje.

⁷ Thaj von ande pire amalen perutnen save seha pe aver pajali te aven te astaren lenca. Thaj gola amala avile tha gaći pherde e mačhenca e solduj pajale, kaj e pajale, e ladje, lije te phar̄on katar o pharipe.

⁸ A kana dikhlah gova o Simono Petre, vov pelah pe čanga angla o Isuso, dindo vorba: Dža tar mandar, kaj me sem manuš došamno, bezeh̄alo.

⁹ Kaj dijah ande lehte e dar thaj ande lehće amala save seha leha. Von daralje katar e but mačhe saven istarde von.

¹⁰ Gadija dijah o darape vi ando Jakovo vi ando Jovano, ande čhave e Zevedejehće, save seha e Simonohće amala. Thaj phendah o Isuso e Simonohće: Ma dara, katar akana kam astareh e manušen.

¹¹ Thaj kana crdije e solduj pajale e ladje, pe phuv, mukle von sa thaj gjele tar pala lehte.

¹² Kana o Isuso avilah ande jekh than, dikhlah jekhe manuše sa ande phuknja, ande brunde. A gov phuknjalo kana dikhlah e Isuso, pelah po muj thaj lijah te mangel dindo vorba: Te tu kameha, tu šaj man sastareh.

¹³ Thaj inzarindo o va astardinaljah pala le thaj phendah: Kamam te aveh sasto gole phuknjendar. Thaj akanor̄a pele lehtar e phubale funočoja.

¹⁴ Thaj vov vaćardah lehće te na nikahće mothovel gova. Ha dža tu thaj sikadinajvo e lilvarnehće, e rašajehće, thaj sikav so šaj deh ćire odjehtar pala ćo sastaripe, gadija sar o Mojsije phendah.

¹⁵ Vov ašundinaljah vadžaj maj dureder thaj but manuša avile te thoven le kan te ašunen le, te sastarel len katar lengo nasvalipe.

¹⁶ A vov crdinaljah palpale ando korkor̄ipe, korkor̄isaljo, thaj molisaljah e Devlehće.

¹⁷ Gadija jekhe djivesehko bešlah vov thaj e manušen sikavela, a kothe bešena vi e rašaja thaj e zakonikujra, save avile andar sa e gava e Galilejengje thaj e Judejengje thaj andar o Jerusalimo. A e Devlehko moćo sastardah len.

¹⁸ A, eke, e manuša igjarde jekhe muruše pe phal savo sah lino e nasvalimahtar thaj mangle te anen le andre thaj te thoven le angla lehte.

¹⁹ Thaj kana našti arakhle than, kaj inća seha but manuša, a von ikliste po ćher thaj krozo e ćherehći berand mukle le tele po maškar angla o Isuso.

²⁰ Thaj kana o Isuso dikhlah kaj von paćan ande le, vov phendah e nasvalehće: Manušeja, ćire doša muklinjavon.

²¹ A e sikavde thaj e rašaja, e livarne lije te den vorba: Savo si gava savo akušel e Devle. Ko šaj mukel e došalimata sar o jekh Del.

²² A kana haćardah o Isuso so von garuven ande pire godja, phendah lengje: So tumen gîndisaren, so ićaren ande tumare odja.

²³ So si maj loćhe te phendol: Muklinajvol ćo došalipe, jali kana mothodol: Ušti thaj phir.

²⁴ Akana trubuj te džanen kaj man, e manušehće čhave, si moćo pe phuv te mukav e doša e manušengjire. Pala gova phendah e nasvalehće: Ušti, le tuha e phal thaj ćo buhljaripe thaj dža tar ke ćo ćher.

²⁵ Thaj akana, andejekh, uštilah, angla lende lijah gova pe sohte pašljola thaj gjelo tar prastamaha ke po ćher, ašarindo e Devle.

²⁶ Thaj savor̄e capenisalje thaj ašarde e Devle, thaj pherdinajlje e daraha, dindo vorba: Adjive dikhlam bare buća.

²⁷ Pala golehte iklistah vov thaj dikhlah jekhe cariniko, savo akhardola Levi, a savo bešela pe malta, thaj phendah lehće: Avta pala mande.

²⁸ Thaj vov muklah sa gova, uštilo tar thaj gjelo tar pala lehte.

²⁹ Thaj o Levi ćerdah lehće paša po ćher paćiv, a kothe seha but carinikujra tha e aver džene kaj bešena leha paša o h̄ape.

³⁰ A e sikavde thaj e rašaja, e lilvarne, dije vorba lehće amalengje: Sohće h̄an the pijen tumen e carinikonca thaj e došamnenca.

³¹ A o Isuso dindo vorba phendah lengje: E saste manušengje niči trubuj o sastaripe, gova trubuj e nasvalengje.

³² Me niči avilem te ćidav e paćamne manušen, me avilem te arakhav golen save si došale.

³³ A von lehće phende: Pala sohte e Jovanohće amala šućaren, postin, but droma, ni h̄an ni khapen, ni pijen, thaj molin pe e Devlehće, a gadija ćeren vi e amala e lilvarnengje, a ćire amala h̄an thaj pijen.

³⁴ A vov lengje phendah: Da li šaj tumen vaćaren e manušengje po abijav te na h̄an, te šućaren, kana lenca si gothe o džamutro.

³⁵ Thaj kam aven e djivesa kana lena lendar e džamutre, pa von kam šućaren, postin pala golehte ande gola djivesa.

³⁶ A vov lengje phendah gaja paramiči: Niko niči kamel te suvel jekh kotor katar e phure gada po nevo hujravipe. Gadija phar̄adona vi e neve gada, kaj po nevo našti suvdol gova so si purano.

³⁷ Thaj niko niči kamel te čhuvel e nevi mol ande phurikane vasujra. Te gova gadija ćerela, phar̄ona e staklune vasujra katar o nevo pipe. E mol čhordola, a e vasujra phagjona.

³⁸ O nevo pipe trubuj te čhutol ande neve khore thaj gadija kam saste ačhen solduj.

³⁹ Svako manuš savo pilah e phuri mol, niči kam mangel o nevo pipe, kaj mothovel: E phuri mol si maj lačhi e nevjatar.