Lukéstar 4 - O Devlikano lil e Sumnale Lukahtar 1938 (Gurbet)

O zumavipe e Isusohko. Vov lel te sikavel e manušen thaj te del vorba ando Nazareto thaj Kapernaumo, kaj sastarel e Petrehće sasuja thaj bute nasvalen.

¹ O Isuso, pherdo e Sumnale Odjeha, irisljo katar e len Jordano, a o Sumnalo Odji igjardah le pe nesavo korkor̄imahko than.

² Inćate ačhilah saranda djive, a o beng zumavela le. Gole djivesengo niči h̄alah khanči, a kana gola djivesa nakhle, vov bokhaljah.

³ Thaj phendah lehće o beng: Te san tu čačimaha e Devlehko Čhavo, vaćar gale bar̄ehće te avel marno, čamblo.

⁴ A o Isuso mothodah lehće, dindo vorba: Ando lil ačhel gova: O manuš niči parvarela pe samo e marneha, nego svakone Devlehće alaveha.

⁵ Thaj athoska igjardah le o beng upre pe jekh uči plajin thaj sikadah lehće jekhvaratar sa e phujva pe gav sveto.

⁶ Thaj phendah lehće o beng: Ake, tuće kam dav sa o zor, sa o kadar̄ipe thaj o barikanipe lengo, kaj gova si mangje dino, pa me kahte kamam, šaj dav.

⁷ Te tu, ake, angla mande bangjoha, sa kam avel ćiro.

⁸ A o Isuso, dindo vorba, vaćardah lehće: Igjardo, h̄asajvo kathar, bengona bengjaleja! Ando lil ačhel: Bangjiv korkor̄e e jekhe jekhor̄ehće Devlehće ćirehće, lehće te bangjardivo, thaj samo leh jekhe paća, kande.

⁹ Thaj igjardah le o beng ando Jerusalimo, bešaldah le upre pe khangjiri thaj phendah lehće: Te san tu o čačo Čhavo e Devlehko, h̄uti gav thanehtar tele.

¹⁰ Kaj ando lil ačhel kaj kam vaćarel pe e angjelongje te resen tut thaj te arakhen tut te na ićhajvo.

¹¹ Thaj kam len tu pe va, te na čalaveh tu varekaj pe varesavo bar̄ će prnenca.

¹² Thaj vaćarindo phendah lehće o Isuso: Mothodino si te na zumaveh e Bare, e Devle ćire.

¹³ Palal, kana o beng ćerdah sa gav zumavipe, gjelo tar lehtar.

¹⁴ A o Isuso irisaljo ande pire odjehko zor ande Galileja, thaj ašundilah lehtar e vorba pe sa ogoja rig.

¹⁵ Thaj sikavela ande lengje khangjira thaj e manuša savor̄e ašarde le.

¹⁶ Thaj vov avilah ando Nazareto, kaj vov bajrilaha odomut thaj dijah subotone ande khangjiri thaj uštilah te del vorba andar e lila.

¹⁷ Thaj dije le o lil e prorokohko Isaijehko, a vov putarindo gov lil arakhlah o than kaj ačhel, kaj sah pišime.

¹⁸ E Devlehko Odji si upral mande, pala gova bičhaldah ma maškar e čor̄e te dav lengje vorba e Devlehće alavendar, bičhaldah ma te sastarav golen savengje odja lačhardile, thaj te mothovav e phanglengje kaj kam mukljon, a e kor̄engje kaj kam dikhen thaj te mukljarav, te putarav e phanglen.

¹⁹ Thaj te dav vorba katar o šukar, guglivarno e Devlehko brš.

²⁰ Athoska phanglah o lil, dijah le ko kandino, e slugahće, thaj bešlo tar, a savor̄e ande khangjiri dikhle ande lehte.

²¹ Thaj lijah te del vorba lengje: Adjive ćerdilah pe ande tumare kan sa gova, so ačhel ande gav lil.

²² A savor̄e čudisalje lehće šukare alavengje save ikliste andar lehko muj thaj vaćarde: Naj li gava o čhavo e Josifohko.

²³ Thaj vov mothodah lengje: Tumen kamen te phenen mae gaja paramiči: Doktoreja, sastar tut korkor̄e m’anglal. Ašundam so ćerdan ando Kapernaumo, ćer gova vi ande ćiro foro.

²⁴ Thaj pale lengje phendah: Čače me tume mothovav kaj niko ande piro them našti avel gadija godjaver thaj bižaj te šaj avel pindžardo maškar pe amala thaj h̄anamika.

²⁵ Čače mothovav tumee: Ando Izrailjo ačhile but phivlja, kana sah inća o Ilija thaj kana phanglinaljah o del trin brš thaj šov čhon, thaj kana avilah bari bokh ande sa e phuv.

²⁶ A o Ilija ni jekhate maškar lende naj sah bičhaldo, osim ande Sarepta, ande Sidonohko them, jekhe phivljate.

²⁷ Thaj but manuša seha phuknjale, gjerale ando Izrailjo, a ni jekh dženo lendar niči sastilah, samo o Neeman e Sirijako.

²⁸ Thaj savor̄e h̄oljalje ande khangjiri kana ašunde gava.

²⁹ Thaj uštile tar, thaj ispidindo tradije le avri andar o foro, igjarde le upre pe uči plajin kaj sah lengo foro te čhuden le upral h̄arate.

³⁰ A vov nakhlah maškaral, maškar lende thaj gjelo tar.

³¹ Thaj avilah ando Kapernaumo, ande Galilejako foro thaj sikavela len e subotenca.

³² A von čudisalje lehće sikavimahće, kaj lehko alav sah zuralo.

³³ Thaj ande khangjiri sah jekh manuš ande savo garudilah e bengjehko odji thaj vov dijah vorba andar sa o krlo.

³⁴ Vačarindo: Muk amen, so kameh amendar, Isuse Nazaretohćereja! Da li avilan te mudareh amen? Pindžarav tut ko san, tu san jekh sveco, Devlikano.

³⁵ A o Isuso daradah le vazdindo o naj thaj vaćardah lehće: Na de vorba thaj ikli andar lehte. A o beng eradah maškare e manuše, dijah našipe andar le thaj niči dukhadah le khanči.

³⁶ A savor̄e daralje thaj phende jekh e avrehće: Savi si goja vorba, pa šaj moćoha vaćarel e bengjengje te iklen.

³⁷ Thaj ašundilah pe pala lehte pe sa e riga ando pašipe.

³⁸ Uštindo andar e khangjiri avilah vov ande Simonohko ćher. A e Simonohće sasuja astardah e bari jag thaj voj ćinosaljah peha thaj e ćherutne molisarde le te sastarel la.

³⁹ A vov ačhindo upral late vaćardah e jagaće te mukel la thaj e jag muklah la. A voj po than uštili tar thaj lijah te ćerel bući paša lende.

⁴⁰ A kana o kham nakhlah thaj pašlilah, sa gola džene savende seha nasvale katar bute nasvalimahtar, igjarde len dži lehte, a vov čhutah po va pe svako manuš pa sastardah len.

⁴¹ Thaj vi e benga iklena andar varesave manuša akušindo thaj vaćarindo: Tu san Hristo, o Čhavo e Devlehko. A vov daravindo len vaćardah lengje te na den vorba averengje kaj džanen pala lehte kaj hi vov Hristo.

⁴² A kana djivesaljah, putaljah o djive, iklistah vov thaj gjelo tar ando korkor̄ipe, a e manuša rodije le, thaj avile dži lehte thaj ačhade le, ićarde le, mangindo te na džal tar lendar khatinde.

⁴³ A vov lengje phendah: Akana trubuj te džav ande aver thema, koring karing, te dav vorba katar o Sumnalo Lil pala e Devlehko thagaripe, kaj me sem pala golehte bičhaldo.

⁴⁴ Thaj phirindo gadija dela vorba ande khangjira e Galilejengje.