Lukéstar 3 - O Devlikano lil e Sumnale Lukahtar 1938 (Gurbet)

E Jovanohći vorba katar o pokajipe thaj o čačipe katar o Hristo. E Hristohko krstipe, lehće papujra, lehko dumutano puranipe.

¹ O Tiverije sah dešupandž brš thagar, caro, a o Pontije Pilato sah krisi, suco, ande Judeja, a o Irodo sah o šorutno ande Galileja, a o Filipo, lehko phral, sah o šorutno ande Itureja thaj ando them Trahon, a o Lisanija o šorutno ande Avilina.

² A e anglune e rašajengje, e glavajra e lilvarnengje seha Ana thaj Kajafa. Eke, ande gola djivesa, varesar, avilah o alav e Devlehko dži ko Jovano, čhavo e Zarijahko ande pustinja, ande jekh korkor̄imahko than.

³ Thaj vov phirela pe sa e riga trujal e len o Jordano, dindo vorba kaj trubuj e manuša te pokrstin pe thaj te pokajin pe, tha te šaj mukljon lengje doša thaj bangjipe lengo paša o Del.

⁴ Gadija sar si ramome ando lil e alavengo katar o proroko Isaije savo del vorba: O alav golehko savo del muj, savo thol muj ando korkor̄no them: Lačharen o drom e Devlehko, putaren lehće e dromor̄a, thaj ćeren len šukar, vortosaren len.

⁵ Sa e lena, sa e h̄ara te pherdon, a e plajina thaj e plajinor̄a te muklinajvon tele, a so si bango, te inzol, te ačhel čače, a e bar̄ehće droma te aven vorta, lačhe ćerde.

⁶ Thaj saijekh manuš kam dikhel o lačhipe, o spaso katar o Del.

⁷ A o Jovano pale dijah vorba e manušengje save avile dži lehte te pokrstisajvon, vaćarindo: Ej, tumen sapane čhavale! Ko vaćardah tumengje te našen e Devlehće h̄oljarimahtar savo kam avel.

⁸ Sikaven tumare odja save kajisajvon thaj na den vorba ande tumende gadija: Amen si dad o Avramo. Mothovav tumengje kaj o Del šaj džungavel e čhavor̄en andar gala bar̄a.

⁹ Vi o tover si čhuto po koreno, pe telutni rig e kaštehći. Saijekh kaš savo niči bijanel lačhe, čhudinajvol ande jag.

¹⁰ Thaj phučle le e manuša, dindo vorba: So si amen te ćerah.

¹¹ Vov pale phendah lengje gova: Savehte si duj hujravimahće gada, gova te del gole savehte naj, a gova savehte si parvaripe, te ćerel pale gadija e parvarimaha.

¹² Akana avile e carinikujra te aven krstime thaj phende lehće: Sikamneja, so kam ćerah?

¹³ A vov mothodah lengje: Na mangen maj but neg so si tume phendo.

¹⁴ A phučle leh e karnale, e vojnikujra: A so kam amen ćerah? A vov phendah lengje: Te na ćeren nikahće bilačhipe, čoranipe, te na pe nikahte phukaven thaj te aven bah̄tale tumare poćinimaha.

¹⁵ Thaj e manuša ažućarindo lije te haćaren thaj te paćan ande pe godja kaj o Jovano si o Hristo.

¹⁶ Pale o Jovano phendah dindo vorba savor̄engje: Me krstisarav tumen e pajeha, a pala mande avel jekh dženo savo si mandar maj zuralo, a savehće me inaj sem kadar̄o ni e dori, ni e h̄aravljor̄i te putarav katar lehće prnale. Vov kam krsti tumen e Sumnale Odjeha thaj e jagaha.

¹⁷ Lehte si e hanadi, e lopata, e sindra ande va, vov kam khosel piro gumno thaj kam ćidel piro gjiv, a o h̄urdo sulumor̄o thaj e bur̄a kam phabarel e jagaha.

¹⁸ Thaj but aver alava sikadah o Jovano e manušengje.

¹⁹ Thaj vov ladžardah e Irodo pala lehće phralehći r̄omni thaj pala sa o nahasilipe savo ćerdah o Irodo.

²⁰ A maj palal o Irodo čhutah thaj phanglah e Jovano ando phandipe.

²¹ Kana sa e džene trušulisalje, krstisalje, thaj kana vi o Isuso krstisaljo, vov lijah te moli pe e Devlehće, a o del putaljah upral.

²² Thaj o Sumnalo Odji huljistah tele sar e parni čirikli, thaj ašundilah jekh alav katar o del, dindo vorba: Tu san mrno guglo čhavo, tu san gasavo sar kaj me kamam.

²³ A e Isusohće sah tranda brš kana lijah te sikadol thaj vov sah, sar paćaje savor̄e, o čhavo e Josifohko, a gova sah o čhavo katar o Ilija.

²⁴ A gova katar o Matati, a gova katar o Levi, a gova katar o Melhi, a gova katar o Jana, a gova katar o Josifo.

²⁵ A gova katar o Matatija, a gova katar o Amos, a gova katar o Naumo, a gova katar o Esli, a gova katar o Nange.

²⁶ A gova katar o Maati, a gova katar o Matatija, a gova katar o Semei, a gova katar o Josifo, a gova katar o Juda.

²⁷ A gova katar o Joana, a gova katar o Risa, a gova katar o Zorovaveli, a gova katar o Salatiili, a gova katar o Niri.

²⁸ A gova katar o Melhi, a gova katar o Adi, a gova katar o Kosamo, a gova katar o Iri.

²⁹ A gova katar o Josi, a gova katar o Eliezeri, a gova katar o Jorimo, a gova katar o Matati, a gova katar o Levi.

³⁰ A gova katar o Simeuno, a gova katar o Juda, a gova katar o Josifo, a gova katar o Jonani, a gova katar o Elijakimo.

³¹ A gova katar o Meleja, a gova katar o Mainani, a gova katar o Matati, a gova katar o Natani, a gova katar o Davido.

³² A gova katar o Jese, a gova katar o Ovido, a gova katar o Voozo, a gova katar o Salmoni, a gova katar o Naasoni.

³³ A gova katar o Aminadavo, a gova katar o Aramo, a gova katar o Esromo, a gova katar o Fareso, a gova katar o Juda.

³⁴ A gova katar o Jakovo, a gova katar o Isako, a gova katar o Avramo, a gova katar o Tara, a gova katar o Nahori.

³⁵ A gova katar o Seruho, a gova katar o Ragavo, a gova katar o Faleko, a gova katar o Everi, a gova katar o Sala.

³⁶ A gova katar o Kainani, a gova katar o Arfaksado, a gova katar o Simo, a gova katar o Nojo, a gova katar o Lameho.

³⁷ A gova katar o o Metusala, a gova katar o Enoho, agov a katar o Jaredo, a gova katar o Malaleili, a gova katar o Kainani.

³⁸ A gova katar o Enoso, a gova katar o Sito, a gova katar o Adamo, savo sah o Čhavo e Devlehko.