Lukéstar 24 - O Devlikano lil e Sumnale Lukahtar 1938 (Gurbet)

E Isusohko uštipe katar e mule. O Isuso sikadol pe amalengje save džan ando Emauso thaj palal sikadol e apostolongje. O iklipe e Hristohko ando del.

¹ O djive pala o kurko avile oteharinate pe limojra thaj ande peha e sungale draba save seha lačharde, a lenca avile vi varesave aver manušnja.

² Thaj dikhle kaj si o bar̄ huljardo katar o limori, miškome.

³ A von dije andre thaj niči arakhle e mule Bare, e Isuso.

⁴ Kana von ačhadile jekhvaratar angla pehte dikhle do manušen ando parno ujravipe.

⁵ E džeja daralje maj but thaj erade pire šoren e phujvate, a gola duj manuša phende lengje: Sohtar roden tumen e džuvinde maškar e mule, maškar e limoraša.

⁶ Vov naj kathe, vov uštilah. Den tumen godji so vov phendah tumee kana sah ande goja phuv Galileja.

⁷ Thaj kana dijah tumengje vorba kaj e manušehho čhavo trubuj te tradel pe ande va e džungalengje te inzaren le po trušul thaj o trito djive te uštel pale.

⁸ Gadija von dije pe godji pe lehće alava.

⁹ Akana von irisalje katar o limori thaj phende sa gova e dešujekhe amalengje thaj e savor̄e averengje.

¹⁰ Gova seha e Magdalina Marija, e Jovana thaj e Jakovohći Marija thaj e aver manušnja save mothode gova e apostolongje.

¹¹ A gola alava ćerdinalje lengje sar h̄oh̄amne thaj von niči paćaje len.

¹² A o Petre uštilah the prastijah ko limori thaj dijah andre. Kana vov dikhlah o hujravipe thaj e gada kaj pašljon pe phuv gjelo tar kothar thaj čudisaljah sar šaj gova ćerdilah pe.

¹³ Gova djive duj džene gjele tar lendar ando gav Emauso savo sah dur katar Jerusalimo šovardeš drom po šel thaj eftavardeš metejra.

¹⁴ A von dije vorba maškar pehte katar sa gova so nakhlo.

¹⁵ Thaj kana von džando gadija dije vorba thaj phučle jekh e avre, pašilah lende o Isuso the lijah te džal lenca.

¹⁶ A lengje jakha seha sar phangle tha našti pindžarde le.

¹⁷ Thaj vo mothodah lengje: Saji si goja vorba kaj ićaren tumen maškar tumende džando e dromeha thaj sohtar sen phare odjehće thaj sohće dićhon bibah̄tale, dukhade.

¹⁸ A jekh dženo maškar lende savehko anav sah Kleopa phendah lehće: Da li san tu jekh golendar e manušendar andar Jerusalimo a niči ašundan so sah gale djivesengo.

¹⁹ A vov phučlah len: So saha gova? A von phende lehće pala o Isuso Nazaretohko savo sah proroko, zuralo vi ande bući vi ande alava, angla o Del thaj angla e manuša.

²⁰ Amare phuredera, e šorutne e lilvarnengjerengje thaj e anglune tradije le ande va e dušmanongje the bičhalde le ando meripe te inzaren le po trušul.

²¹ Amen paćajam thaj inćardam ande godji kaj vov si gova kaj anela e bah̄ e Izrailjehće phujvaće, a dikhta, adjive si o trito djive sar gova ćerdilah pe gadija.

²² Thaj darade amen nesave amare džeja save seha teharin ko limori.

²³ Kana niči arakhle e mule Isuso, irisalje thaj mothode kaj sikadile lengje e angjelujra, dindo vorba kaj o Isuso si džuvdo.

²⁴ Thaj jekh džene gjele amendar po limori thaj sa gadija arakhle sar e manušnja mothode, ali leh niči dikhle.

²⁵ A vov phendah lengje: O, tumen dile manušale, tumaro ilo si poloko thaj našti gadija sigo te paćal so von phende tumengje.

²⁶ Zar niči trubujah te ićharel pe o Hristo ande gasave dukha, pa te šaj ašarel le, hvali le o manušipe.

²⁷ Thaj vov lijah te mothovel lengje sa gova so saha ramome, pišime pala lehte ande lila, katar o Mojsije thaj katar sa e prorokujra.

²⁸ Thaj pašile ko gav ande savo gjele, a vov ćerdinaljah sar te kamela te džal maj dur.

²⁹ A von ačhade le thaj či mukle le dindo vorba: Ači amenca, pašol e jrat, o kham huljistah tele pe rig. Thaj vov dijah andre te lenca raćarel.

³⁰ A kana bešlah lenca te h̄al, lijah o marno, blagoslovisardah le, phaglah le thaj dijah le lende.

³¹ Akana putardile lengje jakha thaj pindžarde le, a vov jekhvarimahtar h̄asardilo tar lendar, h̄asaljah lengje angla e jakha.

³² Thaj von dije vorba jekh e avrehće: Zar či phabilah amaro ilo ande amende kana vo dijah vorba amenca e dromeha thaj kana dijah svato amengje andar o lil.

³³ Palal sigo uštile, athoska irisalje palpale ando Jerusalimo thaj arakhle gole dešujekhe dženen thaj e averen save seha lenca.

³⁴ A gala mothode: Čačipe si gova kaj o Baro uštilah thaj sikadilah e Simonohće.

³⁵ Thaj von lengje phende so sah po drom thaj sar pindžarde le kana phaglah o marno.

³⁶ A kana von dije vorba avilah o Isuso thaj ačhilah maškar lende thaj mothodah: Nek avel lačhipe tumenca.

³⁷ A von daralje golehtar thaj paćaje kaj dikhen jekhe čoh̄ane.

³⁸ A vov phendah lengje: Sohtar gadija daraljen? Sohtar inćaren gasavi godji ande tumaro šoro.

³⁹ Dikhen me va prne, me sem gova. šoreha, korkor̄e, astaren ma thaj dikhen, a o čoh̄ano naj le ni kokala ni mas, sar, ake, dikhen kaj mande si.

⁴⁰ Kana gava mothodah sikadah lengje pire va thaj pire prne.

⁴¹ Akana ačhile lengje jakha thaj našti gova paćaje e dragostimahtar. A vov phendah lengje: Da li si tumen vareso te h̄al pe.

⁴² Thaj von thode angla lehte jekhe peće mačhe thaj avgjin te h̄al.

⁴³ A vov gova lijah thaj h̄alah angla lengje jakha.

⁴⁴ Dindo vorba lengje: Gava si gola alava kaj phendem tumengje kana sema tumenca, so trubuj te ćerdol pe, so si ramome pala mande ando zakoni e Mojsijehko, ande prorokujra thaj ande psalmujra.

⁴⁵ Akana vov putardah lengje e godji te šaj haćaren thaj džanen e lila.

⁴⁶ Thaj mothodah lengje: Gadija si ramome, pišime, kaj o Hristo kam haćarel o dukhavipe thaj kam ićhardol thaj kam uštel e tritone djivesehko katar e mule.

⁴⁷ Thaj kam del pe vorba te e manuša pokajisajvon ando anav e Hristohko the te šaj muken pe sa e doša thaj o bangjipe ande sa e thema katar o Jerusalimo thaj gadija sa maj dur.

⁴⁸ A tumen ašunden, dikhlen thaj haćarden gava.

⁴⁹ Thaj dikhenta, ake, me kam bičhalav tumengje o alav mrne Dadehko, a tumen te ačhen ando foro dži kaj niči huljel upral pe tumende e Devlehko zuralipe.

⁵⁰ Thaj vov igjardah len dži ke Vitanija, thaj vazdindo pe va, blagoslovisardah len.

⁵¹ Thaj kana gova ćerdah gjelo tar lendar thaj iklistah upre ando del.

⁵² A von bangjile angla lehte the irisalje palpale ando Jerusalimo bare dragostimaha.

⁵³ Thaj von seha andar djive ando djive ande khangjiri thaj ašarde thaj blagoslovisarde e Devle. Čačipe. AGOR