Lukéstar 21 - O Devlikano lil e Sumnale Lukahtar 1938 (Gurbet)

E phivljaći parava. E vorba e Isusohći e Jerusalimohće peravimahtar, thaj lehći vorba golehtar so kam avel leha.

¹ Kana vazdijah upre pe jakha, dikhlah e barvalen kaj čhuven piro dipe ande Devlehći kasa, e lovengji.

² A dikhlah vi jekha čor̄a phivlja savi thodah gothe duj parave.

³ Thaj phendah vov: Ake, mothovav tume, gaj čor̄i phivli čhutah maj but gale savor̄endar.

⁴ Kaj saijekh galendar thodah ande Devlehko lačhipe golehtar pirehtar, so sah le maj but, a voj katar po čor̄ipe dijah sa piro so saha la.

⁵ Thaj kana khajekh vaćarela pala e khangjiri kaj si lačhardi e šukare bar̄enca thaj kaj si šukar ćerdini, phendah vov.

⁶ Kam aven e djivesa gola ande save so god dikhen niči kam ačhel ni bar̄ po bar̄ te na rumisajvol, te na phagjol.

⁷ Thaj dindo vorba pale phučle le: Sikamneja, a kana gova kam avel thaj savo znako si kana gova kam avel.

⁸ A vov lengje dijah vorba: Arakhen tumen te na h̄oh̄aven tumen, te na ćheladon. But džene kam aven ande mrno alav thaj kam den vorba: Me sem gova, thaj gola djivesa pašile. Na džan pala lende.

⁹ A kana ašunena kaj avilah o maripe thaj e čingar, tumen na daran, kaj gova sa trubuj maj anglal te avel, a gova naj vadžaj o paluvnipe, o agor.

¹⁰ Thaj akana mothodah lengje: Ande gola djivesa kam ušten e manuša jekh pe avrehte, o thagaripe po thagaripe.

¹¹ A e phuv kam izdral thaj kam ćinoj pe, kam avel bokh thaj meripe thaj darape thaj bare znakujra upre po del.

¹² A m’anglal sa golehtar kam thoven pire va pe tumende thaj kam traden tumen thaj kam čhuven tumen ande khangjira thaj ando phandipe, kam igjaren tumen angla e thagara thaj angla e šorutne zbog mrne anavehtar.

¹³ A gova kam avel pala o svedočanstvo tumee.

¹⁴ Ićaren ande tumare ile, te na maj sig lačhardon, turvinjisajvon, sar kam den tumen vorba.

¹⁵ Kaj me kam dav tume mrno muj thaj o džanglipe, pe savo našti nisavo tumaro dušmano kam khanči del vorba, niti kam fijeso šaj ćerel tumee.

¹⁶ A kam phukaven pe tumende thaj kam traden tumen vi tumare dada, deja, phrala thaj e amala, a khajekh džene tumendar kam aven vi mudardine.

¹⁷ Thaj sa e manuša našti kam dikhen tumen pala mrno anav.

¹⁸ Thaj ni jekh balor̄o katar tumaro šoro niči kam h̄asardol.

¹⁹ Ćeren lačhipe pala tumare odja tumare dukhaha.

²⁰ Athoska dikhena e Jerusalimo ćićidino trujal e vojskaha, e karnalenca. Pe golehte šaj džanen kaj pašile gola djivesa, kana ni jekh dženo niči kam ačhel an lehte.

²¹ Pala golehte gola save avena ande Judeja, te našen, te vîr̄inpe ande plajina, a gola save arakhadona andre ando them, nek inklen, nek laden andar lehte avri, a godola save si avri te na den andre.

²² Kaj gala djivesa si e djivesa e Devlehće h̄olinatar the sa gova kam ćerdol pe, so si ramome ande lila.

²³ Thaj kam avel baro pharipe e khamnjengje thaj golengje save den čuči e cikne čhavor̄engje. Kam a vel darano bibah̄talipe pe gaj phuv thaj bari h̄oli pe gala manuša.

²⁴ Kam peren e oštrone čhujrendar thaj kam ingjardon ando phandipe an aver them pe sa e riga. O Jerusalimo kam uštaven gola save niči džanen pala o Del, dži kaj niči ačhadona thaj nakhena lengje djivesa.

²⁵ Thaj kam aven znakujra po kham thaj po čhonut thaj ande čehraja, a maškar e manuša pe phuv kam avel pharipe katar e bibah̄ thaj katar o čalavipe e bare pajehće valondar, izdramatar.

²⁶ E manuša kam meren e daratar, ažućarindo gova so kam avel pe phuv, kaj sa e Devlehko zuralipe kam vazdinajvol e thanehtar, katar po than andejekh.

²⁷ Thaj pala golehte kam dikhen e čhave e manušehćire kaj džal po del e Devlehće kadar̄imaha thaj barimaha.

²⁸ A kana gava lela te avel, vazden tumare šore thaj dikhen kaj, eke, pašol tumaro ikalipe andar e džung.

²⁹ Thaj palal mothodah vov lengje gaja paramiči: Dikhen pe smokva thaj pe sa e kaš.

³⁰ Thaj kana dikhena kaj sikadon e patra, korkor̄e kam džanen kaj o milaj si paše.

³¹ Gadija tumen kana dikhena kaj gova ćerdol pe, trubuj te haćaren kaj si paše o Devlikano thagaripe.

³² Čačimaha me phenav tumee, kaj gala manuša save akana bajron niči kam nakhen dž kaj sa gova niči kam ćerdol.

³³ O del thaj e phuv kam nakhen, a mrne alava niči kam nakhen.

³⁴ Thaj arakhen tumen te na tumare ile phajron e bute h̄amahtar, h̄abenatendar, katar o matipe thaj katar e buća pe gaja phuv, te na avel tume gav djive, kana tumen lehće niči nadisajvon.

³⁵ Kaj gova kam avel sar e sastra, sar o laco, pe sa gola save hi džuvinde pe gaj phuv.

³⁶ Pala gova dikhen thaj molisajvon e Devlehće, djive po djive, sar kam našen sa golehtar, so god kam avel pe gaj phuv te šaj ačhen angla o čhavo e manušehko.

³⁷ Sor̄o djive sikavela vov ande khangjiri, a e jraćaha iklela te raćarel pe plajin sajvako anav si e Maslinaći.

³⁸ Thaj sa e manuša avena lehte teharinaha ande khangjiri te ašunen lehći vorba.