Lukéstar 20 - O Devlikano lil e Sumnale Lukahtar 1938 (Gurbet)

O Hristo del vorba katar piro moćo. E paramiči katar edžungale drakhajra. Paramiči katar o harači. Vorba e mulengje uštimahtar. Kahko čhavo si o Hristo. Savor̄e trubuj te arakhen pe e sikavdendar.

¹ Thaj kana vov gole djivesendar an jekh djive sikavela e manuša ande khangjiri thaj mothovela lengje so si o Sumnalo Lil, avile e šorutne e lilvarnengje thaj e sikavde pire phurederenca.

² Thaj phušle le dindo vorba: Mothov amengje ko phendah tuće te gova ćereh thaj ko dijah tu gov kadar̄ipe.

³ A vov mothodah lengje: Vi me kam tumen phučav jekh alav te phenen mae.

⁴ Da li si o krstipe e Jovanohko katar o Del ili katar e manuša.

⁵ A von ačhile pa mislin pe an pehte vaćarindo: Te amen vaćaraha kaj gova si katar o Del vov kam vaćarel amee: Pala so niči paćajen le.

⁶ A te vaćaraha: Katar e manuša, sa e manuša kam mudaren amen e bar̄enca, kaj saijekh paćala kaj o Jovano sah proroko.

⁷ Thaj phende von: Amen niči džanah katar sah.

⁸ A o Isuso vaćardah lengje: Ni me niči mothovav tumee save moćoha gava ćerav.

⁹ A e manušengje lijah te mothovel gav paramiči: Jekh manuš bajravela drakh pe pi phuv thaj dijah la ke drakhajra thaj gjelo tar durehte te na sigende iri pe.

¹⁰ Kana sah e drakh resli, vov bičhaldah jekhe bućarne ke drakhajra te bičhalen lehće drakh, a gal manuša marde e bućarne thaj bičhalde le palpale lehte čuče vastenca.

¹¹ Thaj vov pale bičhaldah avere bućarne, a von astarde vi gole thaj pekle an lehte, ladžarde le thaj irisarde le bi nisohko.

¹² A vov pale bičhaldah vi e tritone kandine, a von vi goleha ćerde sar e anglutnenca, rovljarde le thaj trad je le bi khančehko.

¹³ Thaj o baro, o gazda e drakhako dijah vorba: So kam ćerav? Akana kam bičhalav me dragone, gugle čhave, niči li makar lehtar ladžana.

¹⁴ A e drakhajra kana dikhle le, haćarde an pehte vaćarindo: Gava si e barehko čhavo, aventa te mudarah le, nek gova ačhel amengje so si lehko.

¹⁵ Thaj ikalde le avri andar e reza, andar e drakhaći bašćava, thaj mudarde le. So kam akana ćerel lengje o baro e drakhako.

¹⁶ Kam avel thaj kam mudarel gole drakharen, a e drakhaći umal kam del avrende. A gola save ašunde gaja vorba vaćarde: Te na del o Del.

¹⁷ A vov dikhlah pe lende thaj vaćardah: A so gova ačhel ando lil: O bar̄ savo čhudije e bućarde, gova akana ačhilah o maj lačho bar̄ e ćherehće findohko.

¹⁸ Saijekh dženo savo perela pe gov bar̄, kam phagjol, a pe kahte vov perela, kam ićharel le.

¹⁹ Thaj dikhleha akana e šorutne e lilvarnengje thaj e sikavde te vazden e va pe le, ali daradinalje e manušendar, kaj von ašunde akana savi paramiči mothodah lengje.

²⁰ Thaj ićarde le pe jakh thaj bičhalde te zumaven le varesave dženen save ćerde pe, kaj si lehće rigatar e Devlehćeratar, niči li astarena le ande khaj alav, pa te čingarden le ko krisi.

²¹ Thaj phučle le vaćarindo: Sikavneja, amen džanah kaj tu amen čače sikaveh tha vaćareh thaj niči dikheh savo si khonik, nego čače sikaveh pe Devlehko drom.

²² Da li amen trubusarah te dah e thagarehće e lovendar so si lehko jal niči trubusarah.

²³ A vov haćardah kaj von zumaven le thaj vaćardah: A sohće tumen man zumaven.

²⁴ Sikaven mae jekh dinari. Kahko si pe lehte šoro thaj ramope? A von vačarde: E thagarehko.

²⁵ A vov phendah lengje: So god si e thagarehko, e šorutnehko, trubuj te den lehće, a so si e Devlehko, vi lehće den lehko.

²⁶ Thaj našti lehće alava ladžarde angla e manuša thaj začudisalje lehće vorbaće thaj ačhile bi alavehko.

²⁷ Akana pašile varesave džene andar e Sadukeja save ći paćan kaj e mule šaj ušten, thaj phušle le.

²⁸ Vaćarindo: Sikavneja, e Mojsijehko lil sikadah amen gova: Te khanikahće merela lehko pral, savehte si r̄omni thaj merel bi e čhavor̄engo, lehko phral trubuj te lel lehće r̄omnja thaj te bajrarel e čhavor̄en pe phralehće.

²⁹ Seha efta phral thaj o angluno lijah e r̄omnja, pa mulo tar bi i jekhe čhavor̄enko.

³⁰ Thaj vi o dujto lijah e r̄omnja, pa vi vov mulah bi e čhavor̄engo.

³¹ Thaj vi o trito lijah la, a egadija vi li efta phral lije la thaj saijekh mulah, a ni jekhehtar niči ačhile čhavor̄e.

³² A pala lende muli tar vi e r̄omni.

³³ A kana uštena e mule, savehći kam avel voj r̄omni pe okova sveto, kana voj saha li efta phralengji r̄omni.

³⁴ A o Isuso vaćardah lengje pe gova: Gale svetohće čhave len r̄omnja thaj len r̄ome maškar pehte.

³⁵ A gola save therde lačhipe paša o Del thaj save šaj kam ušten katar e mule, von či len ni o r̄om e r̄omnja, a ni e r̄omni r̄ome.

³⁶ Kaj pale našti meren, kaj si von sar e angjelujra, von si e Devlehće čhavor̄e, kaj si e čhave e uštimahtar e mulengjirendar.

³⁷ A te e mule ušten, o Mojsije sikadah paša e kaline, kaj del vorba e Devlehće Avramohćirehće, e Devlehće Isakohćirehće thaj e Devlehće Jakovohćirehće.

³⁸ A o Del inaj o Del e mulengo, nego e džuvindengo, kaj lehće si von sa džuvinde.

³⁹ A varesave e sikavdendar díndo vorba vaćarde: Sikamneja, lačhe phendan.

⁴⁰ Thaj niči tromaje le maj dur khanči te phučen, a vov mothodah lengje.

⁴¹ Sar den svato kaj si o Hristo e Davidohko čhavo.

⁴² Kana korkor̄e o Davido mothovel ando psaltiri: Phendah o Baro e Barehće mrnehće: Beš mande e čače rigatar.

⁴³ Dži kaj čhuvav e dušmanon ćiren tala će prne.

⁴⁴ Eke, o Davido del vorba lehtar sar e Barehtar, pa sar šaj avel vov lehko čhavo.

⁴⁵ A kana sa e manuša ašunde, phendah vov e amalengje pirengje.

⁴⁶ Arakhen tumen gole sikavdendar save kamen te džan ando lungo ujravipe thaj save mangen te e manuša bangjon lengje pe droma, thaj save roden e anglune thana ande khangjira thaj pe abijava.

⁴⁷ Save h̄an e ćhera e phivljengje thaj molin pe e Devlehće h̄oh̄avne, gola kam aven osudime maj but.