Lukéstar 2 - O Devlikano lil e Sumnale Lukahtar 1938 (Gurbet)

E Hristohko bijandipe, sunetipe thaj igjaripe ande khangjiri. O Simeuno thaj e Ana. O dešudobršengo Isuso ande khangjiri. Lehko čhavor̄ipe ando Nazareto.

¹ Ande gola djivesa avilah o alav katar o thagar Avgusto te gjinen pe e manuša, savor̄e, thaj te zapišin pe, te ramon pe ande lila.

² Gava sah o anglutno gjinipe, kana sah o Kirino ande Sirija o šorutno.

³ Thaj, dita, avile savor̄e, svako manuš ande piro foro.

⁴ Ande gova vi o Josifo lijah te džal andar o foro Nazareto ande Galileja dži ke Judeja ando foro e Davidohko, savehko anav sah Vitlejemo, kaj vov sah andar o ćher e Davidohko.

⁵ Te čhuven le ando lil pe jekh than e Marijaha, te zapišin len. Gaja bori sah manglini pala lehte thaj sah khamni.

⁶ A kana von seha inćate, avilah lako djive e bijanimahko.

⁷ Thaj voj bijandah pire jekhor̄e čhavor̄e, paćardah le ande patavor̄e thaj muklah le ando sulum, kaj naj sah aver than ando ćher e raćarimahko.

⁸ Ande gova them seha varesave insaja save arakhena e jraćaha pire bakren.

⁹ Thaj dikh, pe jekhvar, jekh angjelo e Devlehko ačhilah maškar lende, a e Devlehko sumnalipe čhutah e strafin, e jag pe lende, a von golehtar but daralje.

¹⁰ A o angjelo e Devlehko phendah lengje: Ma daran! Ake me anav te sikavav e manušengje savor̄engje jekh dragostimahko alav.

¹¹ Kaj adjive bijandilah tumengje ando foro e Davidohko o spasiteljo, o Hristo, o Baro.

¹² Tumen le kam pindžaren agadija: Tumen kam arakhen jekhe murušune čhavore, paćarde ande faše, kaj pašljol po sulum.

¹³ A dita, jekhvaratar ikliste but Devlehće džene gale angjeloha, thaj ašarde, hvalisarde e Devle, dindo vorba.

¹⁴ Nek avel ašaripe e Devlehće po učipe ando del, a pe phuv nek avel lačhipe maškar e manuša save si šukare odjehće.

¹⁵ Kana e angjelujra gjele tar lendar ando del, e čhave save arakhena e bakror̄en, dije vorba jekh e avrehće: Haj te džah tar dži ko Vitlejemo te dikhah so sah gova inća, so ćerdilah pe, sar phendah amee o Del.

¹⁶ Thaj avile sigo, arakhle e Marija thaj e Josifo thaj e čhavor̄e kaj pašljol ande jaslengo sulum, ande faše.

¹⁷ A kana von dikhle godova, phende sa so sah lengje vaćardino pala gov murušor̄o.

¹⁸ A savor̄e save ašunde gala alava, čudisalje so von phende lengje.

¹⁹ A e Marija sa gala alava garudah ande pi godji thaj ićardah len ande po odji.

²⁰ Thaj irisalje palpale e pastijra, ašarindo e Devle pala sa so ašunde thaj so dikhle, sar saha lengje mothodino.

²¹ A o oh̄toto djive kana e čhavor̄e trubusardeha te ćhinen lehći morćhor̄i, te sunetin le, thode lehće anav Isuso, sar kaj o angjelo phendaha maj sig neg so bijandilah o čhavor̄o.

²² Kana avilah o djive te džan te molin pe e Devlehće po zakoni, po krisi e Mojsijehko, igjarde le ando Jerusalimo te sikaven le angla o Del.

²³ Sar kaj si pišime, ramome, ande zakoni e Devlehko: Saijekh murušano čhavor̄o savo maj anglal putarel pe daći por̄, trubuj te posveti pe e Devlehće.

²⁴ Thaj te anen e Devlehće, sar si phendo, duje grlicen jal duje parne čirikljen, golubon.

²⁵ Thaj dikh, sah jekh manuš ando Jerusalimo, savehko anav sah Simeuno, a gova dženo sah manušvalo thaj čačimahko paša o Del. Vov ažućardah e maj lačhe djivesa e Izrailjehće thaj o Sumnalo Odji sah ande lehte.

²⁶ Thaj lehće phendah o Sumnalo Odji, kaj niči kam dikhel piro meripe dži kaj god niči dikhel e Hristo e Devlehćere.

²⁷ Thaj phendah lehće o Sumnalo Odji thaj vov avilo tar ande khangjiri. O dad thaj e dej igjarde e čhavor̄e Isuso te ćeren leha po zakoni, po krisi, so trubuj.

²⁸ Thaj vov lijah le ande pe va, ande pi angali, ašarindo, hvalindo e Devle thaj vaćarindo.

²⁹ Akana tu mukeh ćire sluga šukarimaha, sar kaj phendan.

³⁰ Kaj mrne jakha dikhen o soaso ćiro.

³¹ Savo lačhardan angla o muj e savor̄e manušengo.

³² O dićhipe te sikavel sa e manušen golen save niči džanen pala o Del, thaj te strafinisarel o baripe ćire manušengje e Izrailjehćerengje.

³³ O Josifo thaj lehći dej čudisalje golehće so dijah pe vorba pala lehte.

³⁴ Thaj o Simeuno blagoslovisardah len thaj phendah e Mari jaće, lehće daće: Ita, agava savo kathe pašljol, buten kam peravel thaj buten kam vazdel upre. Vov kam avel o znako proti savehte ka del pe vorba.

³⁵ A vi korkor̄e tuće kam phar̄adol odji e čhujraha te phučardon thaj te dićhon e mislurja e bute ilengje.

³⁶ Thaj sah nesavi doraćarni džeji, Ana, čhej e Fanujlohći, katar o ćher e Asirohko: Voj phurilah, a efta brš sah pire r̄omeha, sar avilah pala lehte sar čhej.

³⁷ Thaj sah bir̄omehći, phivli, oh̄tovardeš thaj štare bršengji. Voj niči iklela andar e khangjiri thaj ačhilah e Devleha, kandindo le e jrat thaj o djive, bokhalindo katar o posto, katar o šućaripe.

³⁸ Akana voj avilah thaj ašardah e Devle thaj dijah vorba lehtar savor̄engje golengje save ažućarde o spaso ando Jerusalimo.

³⁹ Thaj kana von sa ćerde po zakoni e e Devlehko, von irisalje palpale ande Galileja ande piro foro Nazareto.

⁴⁰ A o čhavor̄o cîra po cîra bajrola thaj zuraljah ando šoro thaj pherdinal ah e godjaha, thaj o lačhipe e Devlehko ačhilah pe lehte.

⁴¹ A lehko dad thaj lehći dej džana saijekh brš ando Jerusalimo pe Pasha, pe Patrano Djive.

⁴² Kana sah lehće dešuduj brš, von avile ando Jerusalimo sar kaj sah saik paša lende adeti.

⁴³ Kana e djivesa nakhle thaj von irisalje, ačhilah o čhavor̄o, o Isuso, ando Jerusalimo, a niči džangle pala godova ni lehko dad ni lehći dej.

⁴⁴ Von gîndisarde, ićarde kaj vov ačhilah varekaj pire amalenca, pa džando katar gova than sor̄o djive rodije le paša pe phrala thaj paša e pindžarde, e perutne.

⁴⁵ Thaj našti arakhle le thaj irisalje te roden le ando Jerusalimo.

⁴⁶ Kana nakhle trin djive, arakhle le ande khangjiri kaj bešel maškar e godjaver, sikamne manuša, sar ašunel len thaj phučel len.

⁴⁷ Thaj savor̄e gola save ašunde lehće alava, čudisalje lehće godjaće thaj lehće vorbaće.

⁴⁸ Thaj dikhindo le, von por̄ade pire jakha, a lehći dej phendah lehće: Ej, čhaveja, so ćerdan agadija amengje? Ake, me thaj ćo dad daraljam pala tute, rodindo tut.

⁴⁹ A vov phendah lengje: Sohtar rodijen ma? Zar tumen niči džanen kaj me trubuj te avav paša e bući mrne Dadehći?

⁵⁰ A von niči haćarde khanči so vov dijah len vorba.

⁵¹ Thaj vov huljistah lenca tele thaj avilah ando Nazareto thaj sah lengje kandino. A lehći dej ićardah sa gala alava ande piro dji.

⁵² A o Isuso bajrilah ande godji thaj vazdinaljah e bršenca thaj sah ando lačhipe paša o Del thaj paša e manuša.