Lukéstar 17 - O Devlikano lil e Sumnale Lukahtar 1938 (Gurbet)

Katar o dukhavipe, mukipe, paćape thaj katar e buća. O sastaripe e deše phuknjalengo. Avipe e Devlehće thagarimahko.

¹ A pe amalengje phendah: Našti avel te jekh e avre ni dukhavel, ali pharipe thaj bibah̄ golehće savehtar avel gov dukhavipe, gov jogji.

² Maj feder avela lehće te umblaven e ajsavehko bar̄ pe lehći kor̄ thaj te čhuden le ando paj, nego te vov rovljarel fijesave galendar, gav cinonendar.

³ Arakhen tumen. Te dukhavela tu ćo phral, darav le, pa te pokajisajvola, muk lehće, jertisar.

⁴ Thaj te dukhavela tu efta droma po djive thaj te avela tuće pale efta drom thaj te phenela: Me kaji ma, a tu muk lehće.

⁵ A e apostolujra phende e Barehće: Bajrav amengje amaro paćavipe.

⁶ A o Baro dijah lengje vorba: Te avela tumen gaći paćavipe gadibor si gaj kućin e gorušicaći, thaj te mothovena gale kaštehće: Kušinajvo thaj ikaldivo thaj pusadivo ande gav baro paj, gov kaš kandela tumen.

⁷ Kana tumaro bućarno, o kandino hanavel e phuv, čajravel thaj arakhel e guruven, thaj kana maj palal irisajvol andar e umal savo si gova manuš maškar tumende savo kam lehće mothovel: Avta sigo, beš thaj h̄a.

⁸ Ven tumen kam phenen lehće: Lačhar mae maj anglal o h̄ape, dunav će baja, phande tu e kuštikaha thaj kande ma dži kaj me h̄av. Athoska šaj vi tu h̄ah thaj pijeh.

⁹ Čačimaha, tumen niči kam zahvalisajvona e slugahće, e kandinehće, kana vov ćerela sa so sah lehće phendino. Niči me an gova paćav.

¹⁰ Gadija vi tumen, kana kandena sa gova so sah tume mothodino, tumen kam den vorba: Amen sam čuče bućarne, bilačhe, amen ćerdam gova so trubusardah te amen ćerah, so sah ame vaćardino.

¹¹ Thaj džando ando Jerusalimo vov nakhlah maškar e Samarija thaj e Galileja.

¹² Thaj kana dijah ande jekh gav, dikhlah deše phuknjalen, deše brundale dženen, save ačhile dural.

¹³ Von por̄ade pe muja dindo vorba: Isuse, sikamneja, kovljar ćo ilo pe amende čor̄ende!

¹⁴ A vov, dikhindo len, phendah lengje: Džan tar tha sikadon e rašajengje, e livarnengje. A von gadija džando sastile.

¹⁵ A jekh manuš lendar, haćarindo kaj sastilah, irisaljah thaj lijah te ašarel te hvalisarel e Devle andar sa o krlo.

¹⁶ Thaj pelah mujal angla lehće prne thaj zahvalisaljah lehće. A gova manuš sah Samarijako.

¹⁷ A o Isuso dindo vorba mothodah lehće: Zar niči sastile gol deš džene, savor̄e? Kaj si vadže gola aver inja džene?

¹⁸ Sar šaj avel tha te niči arakhadinjaljah vadžaj khajekh manuš maškar lende te zahvali pe e Devlehće, a avilah samo gava manuš andar aver phuv.

¹⁹ Thaj phendah lehće: Ušti thaj dža tar, ćo paćavipe sastardah tu.

²⁰ Thaj kana phučle le e rašaja, kana kam avel e Devlehko thagaripe, vov dindo vorba mothodah lengje: E Devlehko thagaripe kana avela, niči kam dikhinjavol.

²¹ Thaj niči kam mothodol: Aketalo kathe ili etalo kothe, kaj e Devlehko thagaripe hi andre ande tumende korkor̄e.

²² A pe amalengje phendah: Kam aven e djivesa kana tumen kamena te dikhen jekhe djivesehko e manušehće čhave, pa niči kam dikhena le.

²³ Thaj kam phendol tumengje: Aketalo akaring ili eketalo okoring, inća, a tumen na te džan pala lende, na te roden le.

²⁴ Thaj sar kaj prastel e munja, e strafin e gromohći po maškar e devlehko, tha sar phabol upral saor̄ende thaj upral sa so arakhadol tala o del, eke, gasavo kam avel vi e manušehko čhavo ande po djive.

²⁵ A maj anglal sa golehtar trubuj te napatisajvol, te ićhardol thaj te kaljaren le, te bangjaren thaj te došaren le e adjivesutne manuša.

²⁶ Thaj sar kaj sah ande djivesa e Nojehće, gadija kam avel vi ande djivesa e manušehće čhavehće.

²⁷ Von h̄ale thaj pile, lena r̄omen tha lije r̄omnja, ćerde abijav dži ke gov djive kana dijah o Noje ande pajali, ande ladja. Thoska avile pe jekhvar e bare bršinda thaj o paj tasadah savor̄en.

²⁸ Gadija sar kaj sah ande djivesa e Lotohće: Hana, pijena, ćinena, bićinena, bajravena e kaš thaj ćerena ćhera.

²⁹ Thaj gole djivesehko kana iklistah o Lot katar e Sodoma, muklinajljah e jag thaj muklilah o khandino ćukurto katar o del thaj mudardah sa.

³⁰ Gadija kam avel vi gole e djivesehko kana sikadola o čhavo e manušehko.

³¹ Thaj gole djivesehko gova savo arakhadivola upre po ćher, te na huljel tele, te lel pe patave thaj po buhljaripe, a ni gova savo arakhadola ande umal, te na iri pe palpale.

³² Den tumen godji thaj ripardon so sah e Lotohće r̄omnjaha.

³³ Gova savo kamela te arakhel po džuvindipe, h̄asarela le, a savo god h̄asarela le, arakhela le pale.

³⁴ Mothovav tumengje: Goja jrat duj kam džene aven pe jekh sovardo, pe jekh kreveto, pa jekh kam del pe, a o aver kam ačhel.

³⁵ Duj manušnja kam pišen, jekh kam avel lini, a e aver kam mukljol.

³⁶ Duj džene kam aven pe umal, jekh kam lel pe, a o aver kam mukel pe.

³⁷ Thaj dindo vorba phende lehće: Kaj, Bareja? A vov dija svato lengje: Kaj si e lubine, e limoraša, inćate kam ćidinajvon e mulikane čiriklja.