Lukéstar 11 - O Devlikano lil e Sumnale Lukahtar 1938 (Gurbet)

O Isuso sikavel pe amalen e molitvate, tradel e bengje, phučarel o džungalipe e bimohće sikavdengo thaj e lilvarnengo.

¹ Thaj kana vov pe jekh than molisaljah e Devlehće thaj ačhadilah, jekh lehko amal phendah lehće: Bareja, sikav amen te molisajvah e Devlehće, sar vi o Jovano kaj sikadah pire amalen.

² A vov lengje phendah: Kana molin tumen e Devlehće, vaćaren gadija: Dadeja amareja, savo san ando del, te avel sumnal ćo anav, te avel ćo thagaripe, te avel ćo alav sar kaj po del, gadija vi pe phuv.

³ De amengje amaro marno e svakone djivesehko.

⁴ Thaj muk amengje amare doša, sar kaj vi amen mukah amare došamnengje, thaj na igjar amen ando zumavipe, nego arakh amen katar sa o džungalipe.

⁵ Thaj phendah lengje: Te phenah, kaj si khanikahte tumendar khajekh amal, thaj te vov džal tar ande opaš e jrat ke gova amal thaj te mothovel lehće: Amaleja, anta mae trin kotora marne udžile.

⁶ Ake, avilah mae jekh amal katar o drom bokhalo, a naj ma so te dav le te h̄al.

⁷ A gova andral del vorba: Na ačhav ma, na ićar ma, e udara si phangle, a e čhavor̄e mrne si manca ando sovardo thaj pala gova našti uštav te dav tu marno.

⁸ A akana mothovav tumee: Šaj avel thaj vov niči uštela pala po amal, ali pale pe lehko bimohko mangipe vov kam vazdinajvol thaj kam del le gaći marno le trubuj.

⁹ A me tumee turvinjisarav: Mangen thaj kam del pe tumee, roden pa arakhena. Čalaven pe udara, pa kam putajvol tumee.

¹⁰ Savo god mangel, kam therel, a ko rodel, gova arakhel, a ko čalavel pe udara, putaren pe lehće.

¹¹ T’avel khonik dad maškar tumende, a lehko čhavo te mangela lehtar jekh marnor̄o, zar kam lehko dad del le o bar̄ po than e marnehko. Ili te mangela vov jekhe mačhe, da li dela le o dad e sape po than e mačhehko.

¹² A te mangela vov arno, da li dela lehće škorpijen po than e arnehko.

¹³ Pa kana tumen, bilačhe manušale, džanen te den šukar dipe, šukaror̄e darujra pire čhavor̄engje, onda o Del, o Devlikano dad, kam del, čače, vadžaj maj but Sumnale Duho golengje save mangen le lehtar.

¹⁴ Jekhvar tradijah e bengje andar jekh manuš savo našti dela vorba. A kana o beng iklistah andar lehte, o manuš lijah te del svato, te vaćarel, a e manuša ačhile thaj capenisalje dikhindo.

¹⁵ A varesave manuša maškar lende dije vorba: Vov tradel e bengjen, kaj dijah le o zuralipe, o moćo, o Veelzevul, e bengjengo šoruno.

¹⁶ A e aver džene zumavindo le mangle lehtar o znako e Devlehko.

¹⁷ A vov dikhlah so von ićaren ande pe godja thaj phendah lengje: Jekh phuv, jekh thagaripe kana uladol donde, pe duj riga, h̄asardivola, thaj vi khajekh ćher kana ulavel pe korkor̄e pehtar, našti ačhel, h̄asardol, haradol.

¹⁸ Gadija vi e bengjengo šorutno kana uladinajvol korkor̄e pehtar, lehko thagaripe, rajipe, našti ačhela, a tumen mothoven kaj me tradav e bengjen e Veelzevulohće zuralimaha.

¹⁹ A te me tradav e bengjen e Veelzevulohće moćoha, kadar̄imaha, a savehće zuralimaha traden len tumare čhave? Pala gova von kam tumengje sudin.

²⁰ A kana tumen dikhen kaj me tradav e bengjen e najeha e Devlehćireha, onda džangljol pe kaj avilah e Devlehko thagaripe.

²¹ Kana jekh zuralo manuš e jagaljenca thaj e čhujrenca arakhel piro barvalipe, gova mangjin kam ačhel šukarimaha pe po than.

²² A kana avel jekh maj zuralo lehtar, vov peravel le, del mrtik lehtar e jagalja thaj e čhujra, save le arakhena, thaj ulavela sa gova so sah le.

²³ Gova savo naj manca, si protiv mande, a ko manca niči ćidel, gova čhudel, čhorel.

²⁴ A kana o melalo odji iklel andar o manuš thaj phiradol pe šućimahće thana thaj rodel te ačhavel pe, pa kana našti arakhel lačho than, mothovel: Maj feder avela te iri ma ke mo ćher katar iklistem.

²⁵ Thaj kana reslah, arakhlah o ćher khoslo, šilado thaj buhljardo.

²⁶ Pe gova vov avilo tar thaj lijah pehte efta avere duhon, save seha maj džungale lehtar, thaj dije saor̄e andre thaj ačhile. Akana gole manušehće si maj bilačhe nego anglal sar kaj sah lehće.

²⁷ A kana vov gadija dijah vorba, varesavi džeji maškar e manuša vazdijah piro krlo thaj phendah lehće: Bah̄talo si gov ilo savo bijandah tu, a bah̄tale gola čuča save tu pilan.

²⁸ A vov phendah: Bah̄tale vi gola save kanden o alav e Devlehko thaj save ićaren le.

²⁹ A e manuša lije te ćidinajvon trujal lehte, a vov dijah vorba lengje: E akanutne manuša si džungale, harade, von mangen jekh znako, ali gova niči sikadola lengje, osim o znako e prorokohko Jonahko.

³⁰ Thaj sar o Jona sah o znako e Ninivaćengje, gadija kam avel o znako e manušehko čhavo e adjivesne manušengje.

³¹ E južno thagarni, šorutni, kam iklel angla o krisi e akanutne manušenca, thaj gola kam aven osudime, kaj voj avili tar katar e maj paluvni rig e phujvaći te ašunel o godjaveripe e Solomunohko, a dita, ake, kathe si jekh dženo savo si maj bareder vi katar o Solomuno.

³² E Ninivaće manuša kam iklen angla o krisi, o sudo, e aknutne manušimaha, thaj kam osudin le, kaj pokajisalje ašunindo e vorba e Jonahći. A dikh, ake, kathe si jekh dženo savo si maj zuralo maj kader̄o e Jonahtar.

³³ Niko niči kam čhuvel e phabarde memelja po garudo than, niti kam thovel len tala khajekh vaso, nego kam čhuvel len pe lengo than, katar kam phabon tha strafinisavon te dikhen gola save den andre.

³⁴ E memeli si sar e manušehći jakh. Te si ći jakh sasti, tu sa kam parnjoh, a te si ći jakh nasvali thaj te dikhel kor̄ovane, tuće kam ćerdol pe sa ćiro sar tunjariko.

³⁵ Irakh tu, te o dikhipe savo si an tute, na avel kalipe.

³⁶ Thaj te si ćo telo parno bi jekhe kale thanehko, tu kam parnjoh sa, sar e memeli savi čhudel o dićhipe, o parnipe pe tute.

³⁷ A kana vov gadija dijah vorba, varesavo rašaj, lilvarno, manglah lehtar te h̄al leha, a vov dijah andre, bešlah thaj lijah te h̄al.

³⁸ A kana dikhlah le o rašaj, kaj vov niči h̄aladah pe angla o h̄ape, začudisaljah, por̄ada pe jakha an le.

³⁹ A o Baro phendah lehće: Ake tumen, rašale, khosen avrijal e tah̄taj thaj o čaro, a andral si tumende but garudinipe, čordanipe thaj bengjalipe.

⁴⁰ Dilale, pa gova savo ćerdah khanči andral, zar niči ćerdah i aviral.

⁴¹ Den e čor̄or̄en so si tumen andre, pa sa kam avel tume šukaripe thaj bi e melako.

⁴² A bibah̄talipe kam avel tumengje rašale, lilvarnale, kaj tumen den o dešto kotor katar e metvica, katar e ruta thaj katar sa e čajra, a niči dikhen po čačipe thaj guglivarnipe e Devlehko. Trubusardaha vi gava te ćeren, a vi aver te na muken.

⁴³ Bibah̄ thaj pharipe kam avel tumee, rašale, lilvarnale, kaj roden e maj šukar bešalde ande khangjira thaj mangen te e manuša savor̄e bangjon angla tumende pe droma.

⁴⁴ Bibah̄ tumengje kam avel, sikavdale thaj rašale, h̄oh̄amnale, kaj tumen sen sar e garudine limojra, pe savende e manuša phiren, a niči džanen pala lende.

⁴⁵ A varesavo zakoniko, čačimahko sikavdo, dijah vorba lehće: Sikamneja, kana tu gadija vaćareh, tu deh an ladžavipe vi amen, tu kaljareh amen.

⁴⁶ A vov lijah o alav: Bibah̄talipe kam avel vi tumengje, zakonikale, čačimahće sikavdale, kaj tumen thoven pe manuša but phare dreza pala igjaripe, a niči kamen ni jekhe vungjaha te loćharen lengo pharipe.

⁴⁷ Bibah̄ thaj phare kam avel tumengje, kaj tumen ćeren e limojra e prorokongje save si mudardine tumare dadendar.

⁴⁸ Prema golehte, tumen ićaren kaj e buća save ćerde tumare dada, si lačhe thaj čačarde, kaj von mudarde e prorokon, a tumen lengje limojra ćeren.

⁴⁹ Pala gova e Devlehko baro budžanglipe sikadah: Kam bičhalav lengje e prorokon thaj e apostolon, pa kam mudaren lendar jekhe dženen, a e averen kam traden kothar.

⁵⁰ Kam manglinajvol katar o akanutno manušipe o rat katar saijekh proroko, savo si mudardo, sar gav sveto ćerdinaljo.

⁵¹ Katar o rat e Aveljehko dži ko rat e Zarijahko, savo mudardilo maškar o oltari thaj e khangjiri. Čače, phenav tumee, kam mangel pe gova katar e adjivesutne manuša.

⁵² Bibah̄ tumengje, zakonikale, kaj lijen e ćisa, o ključo katar o džanglipe pa korkor̄e niči dijen andre, a golen save kamleha te den andre, niči muklen.

⁵³ A kana vov gaja dijah vorba, lije e sikavde thaj e lilvarne te malaven pe lehte e vorbaha thaj zumade le te bangjaren le e bute phučimaha.

⁵⁴ Thaj dikhle te astaren andar lehko muj khaj alav te ćeren le bangje, te den le ladžavimahte.