Lukéstar 1 - O Devlikano lil e Sumnale Lukahtar 1938 (Gurbet)

A anglunipe. O angjelo sikavel o bijandipe e Jovanohko, e Krstiteljehko. O angjelo Gavrilo sikavel o bijandipe e Hristohko. E Marija paša e Jelisaveta. E Marijaći ašarimahći gjili. O bijandipe thaj o sunetipe e Jovanohko. E Zarijahko prorokovipe.

¹ But džene lije te den vorba golehtar so sah thaj so nakhlah paša amende.

² Gadija sar phende amengje gola save dikhleha gova sa thaj save seha e kandine sluge e alavehće.

³ Thaj lijem vi me te sićivav sa so ćerdah pe thaj lijem te piši, te ramosarav tuće, paćivale Teofileja, sa po rîndo sar kaj saha.

⁴ Te pindžareh o čačipe gole alavengo save sićilan.

⁵ Ande gola brša kana sah o Irodo thagar, kana sah vov o anglutno ande Judeja, sah varesavo lilvarno, nesavo rašaj katar o rîndo e Avijahko. Lehko anav sah Zarija, a lehće r̄omnjako anav Jelisaveta, savi sah jekh katar e Aronohće čheja.

⁶ A liduj džene seha paša o Del čače odjehće thaj kandena e Devlehće alava ande sa e buća thaj seha bidošengje, bibangjimahće thaj paćamne.

⁷ Thaj naj sah len čhavor̄e, kaj e Jelisaveta sah bičhavor̄engji katar piro ternipe, a von solduj džene phurile.

⁸ Thaj gadija, djive po djive ćerindo bući angla o Del, pe piro rîndo.

⁹ Iklistah vi vov te del andre ande khangjiri te kadi, te ćerel thuv.

¹⁰ A e manuša savor̄e ačhile avri molindo pe e Devlehće dži kaj vov kadisardah e thuveha.

¹¹ Thaj pe jekhvar sikadilo lehće katar o Del jekh angjelo thaj ačhilo pe čači rig katar o oltari, ačhilo čačal kaj o thuv ćerdola.

¹² A kana dikhlah le o Zarija, lijah le e dar, daraljah.

¹³ A o angjelo phendah lehće: Ma dara, Zarija, o Del ašundah ći molitva thaj ći r̄omni bijanela jekhe murušane čhave, jekhe murušor̄e, a tu thov lehće anav Jovano.

¹⁴ Thaj kam avel tuće bah̄ thaj vestipe thaj but džene kam veselisajvon lehće bijandimahće.

¹⁵ Kaj kam avel vov baro angla o Del thaj niči kam pijel ni mol ni aver jagalo pipe, thaj vadžaj ande pe dako por̄ kam pherdinajvol e Svetone Duhoha, e Sumnale Odjeha.

¹⁶ Thaj vov kam irisarel bute čhaven Izrailjehćeren pe lengje Devlehći rig.

¹⁷ Thaj vov kam angle džal angla lehte ande Ilijahko odji thaj ande lehko zuralipe. Vov ćerela gadija te pale zavolisajvon thaj te boldinajvon e dada pire ilenca ke pe čhavor̄e, a e bipaćamne te pherdinajvon pale e čače godjaverimaha thaj gadija te lačharel vov e Devlehće e manušen.

¹⁸ Thaj mothodah o Zarija e angjelohće: Pe sohte kam me gova pindžarav? Me sem phuro, a mrni r̄omni si phuri.

¹⁹ Thaj dindo svato o angjelo phendah lehće: Me sem o Gavrilo savo ačhav angla o Del, thaj bičhaldino sem te dav tuha vorba thaj te anav tuće gaj veselija.

²⁰ Thaj, ake, tu ačheha bivaćarimahko thaj našti kam deh vorba dži ke gov djive dži kaj gova sa niči ćerdol, kaj tu niči paćajan me alavengje save kam pherdinajvon ande piro djive.

²¹ A e manuša ažućarde e Zarija thaj čudisalje pala sohte vov gaći ačhilah ande khangjiri.

²² A kana iklistah avri, našti dijah lengje vorba, a von haćarde kaj vareso sikadilo lehće ande khangjiri, thaj vov lijah te ćerel e jakhenca pe lende, kaj ačhilah bi e vorbako.

²³ Thaj kana ikliste e djivesa lehće bućaće, vov gjelo tar ke piro ćher.

²⁴ A kana nakhle gala djivesa, lehći r̄omni, e Jelisaveta, ačhili khamni, thaj garuvela gova pandž čhon vaćarindo.

²⁵ Gadija ćerdah mae o Del ande gala djivesa kana dikhlah pe mande, te ikalel man andar o ladžavipe maškar e manuša.

²⁶ Thaj ando šovto čhon bičhaldah o Del e angjelo e Gavrilo ande Galilejako foro, po anav Nazareto.

²⁷ Ke jekh rakhli savi saha manglini pala jekh manuš savehko anav sah Josifo, a savo sah andar o ćher e Davidohko, a e rakhljako anav sah Marija.

²⁸ Kana dijah andre o angjelo late, mothodah laće: Raduvisajvo, tu savi san pherdi e lačhimaha! O Del si tuha, blagoslovime san tu maškar e manušnja.

²⁹ A voj, kana dikhlah le, daralji lehće alavehtar thaj niči džanglah savi gav vorba šaj avela.

³⁰ Thaj phendah laće o angjelo: Ma dara, Marija, tu arakhlan lačhipe paša o Del.

³¹ Thaj, ake, tu kam ačheh khamni thaj kam bijaneh muršune čhavor̄e, thaj thov lehće anav Isuso.

³² Vov kam avel baro thaj kam den le anav o Čhavo e Maj Barederehko, thaj kam del lehće o Del o prestolo, e bešaldi e Davidohći, lehće dadehći.

³³ Thaj vov kam avel o šorutno, o thagar, ando ćher e Jakovohko, a lehće thagarimahće agor niči kam avel.

³⁴ A e Marija mothodah e angjelohće: Sar kam gova avel, kana me niči džanav pala o r̄om.

³⁵ Thaj dindo vorba o angjelo phendah laće: O Sveto Duho, o Sumnal Odji, kam avel pe tu thaj o kadar̄ipe e Maj Barederehko kam učhalinarel tu. Pala golehte vi gova so kam bijandol, kam avel sveto, sumnalo, thaj kam den lehće anav o Čhavo e Devlehko.

³⁶ Thaj, eke, ći bibi, e Jelisaveta, vi voj ačhili khamni jekhe čhavor̄eha ande piro phuripe, a gava si o šovto čhon laće, pala sajvate dije vorba kaj si bibijanimahći manušni, kaj našti khamnjol.

³⁷ Thaj ko Del šaj avel sa so vov phenel.

³⁸ A e Marija dijah vorba: Aketalem, e Devlehći kandini. Nek avel mae pe ćo alav. Thaj o angjelo gjelo tar latar.

³⁹ A e Marija uštili gov djivesa thaj gjeli tar sigo ande upruni phuv, ande jekh them e Judejako.

⁴⁰ Thaj dijah ando ćher e Zarijahko thaj phučlah pe e Jelisavetaha.

⁴¹ Thaj kana e Jelisaveta ašundah e Marijaći vorba, ćinosaljo o čhavor̄o ande lako por̄, a e Jelisaveta pherdili e Svetone Odjeha.

⁴² Thaj andar sa o krlo zurale dijah vorba: Blagoslovime san tu maškar e r̄omnja, thaj blagoslovime si vi o čhavor̄o će por̄ehko.

⁴³ Thaj katar mae gava, pa te avel mande mrne Devlehći dej.

⁴⁴ Thaj, dikh, kana ašundem ande me kan ći gugljardi vorba, ande mo por̄ o čhavor̄o h̄uklah, ćheldah e dragostimahtar.

⁴⁵ Bah̄tali si goja savi paćaja, kaj kam ćerdol sa gova so o Del phendah laće.

⁴⁶ Thaj vaćardah e Marija: Mrno odji bajrarel, ašarel e Devle.

⁴⁷ Thaj obradujisaljo mrno dji e Devlehće, e spasohće, mrne bah̄taće.

⁴⁸ Kaj dikhlah po ciknjor̄ipe, po h̄arnjor̄ipe pire kandinjako. Kaj, dikh, sa e manuša kam phenen mae kaj putavol mi bah̄.

⁴⁹ Kaj gova savo si baro, ćerdah manca bare buća, ćerdah baripe mandar.

⁵⁰ Thaj lehko lačhipe kam avel golengje savor̄engje save daran lehtar.

⁵¹ Vov sikadah pire vasteha o zuralipe piro thaj tradijah golen savor̄en save ćerena pe barimahće, barikane ande pire ile.

⁵² Huljardah e zuralen katar e prestolujra, a vazdijah golen save ćerena pe cikne.

⁵³ E bokhalen čaljardah e lačhimaha, a e barvalen muklah čučen, nangjen.

⁵⁴ Pomožisardah pire kandine, e Izrailjo, dindo pe godji, reparindo pe, lehće lačhimahtar.

⁵⁵ Sar kaj del vorba amare dadengje, e Avramohće thaj lehće čhavor̄engje, dži ko maj paluvno djive.

⁵⁶ A e Marija bešela laha trin čhon thaj irisaljah palpale ke po ćher.

⁵⁷ A e Jelisavetaće avilah o djive te bijanel, thaj bijandah voj muruše čhavor̄e.

⁵⁸ Thaj ašunde laće ćherutne thaj laće perutne, e pašutne, kaj o Del sikadah piro baro lačhipe pe late thaj pherdile lengje odja vestimaha thaj seha bah̄tale laha.

⁵⁹ Thaj o oh̄toto djive avile te osunetin e murušor̄e, te ćhinen lehći ladžavipni morćhor̄i. Athoska lije te thoven lehće o anav lehće dadehko, e Zarijahko.

⁶⁰ Thaj dindo vorba lehći dej phendah pe gova: Na, nek avel lehko anav Jovano.

⁶¹ Thaj phende laće: Ande sa ćiro rodo naj khonik te avel gasavo lehko anav.

⁶² Thaj phučle e jakhenca lehće dade, sar vov kamela te thoven lehće anav.

⁶³ A vov manglah jekh phaljor̄i thaj ramosardah, pišisardah dindo vorba: Jovano si lehko anav. Thaj saijekh začudisalje, ćerde bare jahka.

⁶⁴ Jekhvarimahtar putaljah lehko muj thaj lehći čhib thaj dijah vorba, ašarindo e Devle.

⁶⁵ Thaj o darape dijah ande lengje perutne, savor̄e, thaj pe sa e upruni Judeja ašundilah sa gova so avilah pe.

⁶⁶ Thaj savor̄e save ašunde, lije gova ande pe ile, dindo vorba: So kam avel gav čhavor̄ehtar, thaj vi e Devlehko va sah leha.

⁶⁷ Thaj o Zarija, lehko dad, pherdilo e Sumnale Odjeha, thaj dijah vorba prorokovindo.

⁶⁸ Te avel blagoslovime o Del e Jakovohko kaj avilah thaj ikaldah pire manušen andar o džungalipe.

⁶⁹ Savo vazdijah amengje o šing e spasohko ando ćher e Davidohko, pire slugahko, kandimahćerehko.

⁷⁰ Sar kaj dijah vorba pire sumnale prorokongje moha katar o anglunipe.

⁷¹ Kaj kam ikalel amen katar amare džungale dušmaja thaj andar e va e savor̄e golengje, e jakhalengje save našti dikhen amen.

⁷² Kaj kam ćerel lačhipe amare dadengje thaj niči kam bistarel piro sumnalo alav.

⁷³ Sar h̄alah sovel, sar thodah sovli amare dadehće, e Avramohće, kaj kam del ame.

⁷⁴ Te ikalah amen andar amare dušmanongje va thaj te kandah le bi e darako.

⁷⁵ Ando sumnalipe thaj čačipe angla lehte dži kaj god sam džuvinde.

⁷⁶ A vi tu, čhavor̄eja, kam aveh pindžardo thaj ašundo sar proroko e Maj Barederehko, kaj tu kam džah angle angla o muj e Devlehko te ćereh lehće o drom.

⁷⁷ Te deh o džanglipe e spasohko lehće manušengje pala lengje grehongo mukipe.

⁷⁸ Po baro lačhipe amare Devlehko pe savo avilo amende o djivesipe, o kham e učimahtar.

⁷⁹ Te strafinisareh, te parnjareh golen save bešen ando mulikano kalipe thaj ando tunjariko, ande merimahći učhalin, thaj te phiraveh amare prne po drom e lačhimahko.

⁸⁰ A o čhavor̄o bajrola thaj zurajvola e godjaha thaj sah ando korkor̄ipe bi nikahko dži gothe, dži kaj niči sikadilo e Izrailjehće.