Philemon 1 - Nouveau Testament en Gulay 2004

Paul ɔrgir ra’n a, ra lapya a tɔ

¹ Man Paul m’tò dangai’t tede tà le Jésu-Krist. Timothée è se’m nan’t. M’ndang magtub nè m’adi i Philémon kotár le jé se made kule le jé.

² Magtub nè nga m’ndang m’ade kon nann jé Appia se ngokon jé Archippe ke njè made rɔ le jé a, se njékebe nange le Nube ke kebi nan kem̂ kei lei a tɔ.

³ Maje kade Bɔ jéi Nube se Kuwe-ɓee Jésu-Krist adi sei kem̂noje se kem̂lom.

Tár se kundekem̂ le Philémon

⁴ M’ra Nube oiyo. Philémon, kem̂’m olé dèi’t se ndɔge malang loo ke m’ndi m’a m’ɔje’n tà se Nube le’m.

⁵ Tede m’oo kɔbe tár ke i tár Kuwe-ɓee Jésu se njé ke tooi se ninn de malang. Taɓai m’oo kɔbe kem̂i ke unde dè Kuwe-ɓee Jésu’t nga a tɔ.

⁶ M’deje Nube le kade kundekem̂ ke oré se jé nan dè’t nga aw kum’n ke kété-kété ade i ger’n nyange malang ke maje ke j’asikum rai takul kum ke j’umi nan’t bɔk se Krist.

⁷ Ngokon’m, tár ke i tár njé ke tooi se ninn de nga ule dingem kem̂’t a, ade’m ranel ngain a tɔ. Tàkuli i á kem̂ njétaakem̂-Kristge oso’n nang pon.

Paul gɔl rebe tà le Onésime

⁸ Man Paul nga, m’ndi dè’m pal ke deri takul kum ke m’um nan’t bɔk se Krist le kunn ndu’m kade i ra’n nyan kuwe.

⁹ Nè m’ra ndoo rai’t tede k’ee ke i kotár le’m. Man Paul ke m’ee ngatɔg doo nga, m’tò dangai’t ɗarinè tede tà le Jésu-Krist.

¹⁰ M’ra ndoo rai’t tede tà le ngonn’m Onésime. E nga m’oje’n gir Krist’t loo ke m’ndii’n se sulge jim’t dangai’t nè.

¹¹ Onésime nga, kété ɓaa è doo ke raikarè; nè ɗarinè è tel è doo ke maje tede lei a, tede le’m a tɔ.

¹² E nga tò asenan se balkum ra’m; nè né è bè géa, m’tel m’ule se’n rai’t gugu.

¹³ M’ndige le ngonm’n meĵ-meĵ ram’t le kade taa guti ra se’m dè Tà ke Maje’t. Sul ke m’ndii’n jim’t nga è tede Tà ke Maje.

¹⁴ Nè m’ndige le kin se dè’m ra nyan nal koo tàgir lei lé. M’ra titeke bè le kade i kuwe in se kem̂i i ra maje anje kade m’unde dèi’t.

¹⁵ Bainléa è tede è ke nè á d’ɔr’n Onésime jii’t d’ade kò’n too’n mbɔr ɓita kade i tel inge’n se non ɓai.

¹⁶ Tel ke i tel inge’n nga, maje kade an’n asenan se ɓer karè lé ta, nè è soo’t dum ɓer. Maje kade ɗarinè ɓaa i an’n ke kotár le’m man kuwe mbain. I géa, maje kade an’n ke kotár lei gir danra’t a, è kotár lei ke njètaakem̂-Krist madi.

¹⁷ Ke nè á an’m ke njèmade loo kaw lei ɓaa, uwe’n ke rai’t tite è man bè.

¹⁸ Ke nè á kété Onésime ra sei majelé éké kure lei tò dènn’t géa, inye dèm’t.

¹⁹ Man Paul kuwe m’ndang magtub nè se jii’m m’unn’n ndu’m madi titeke m’a m’ugei kure ke tò dènn’t. M’a m’aw ndoo kedi titeke kure le’m tò dèi i’t kuwe tɔ lé ta.

²⁰ Nyan ke m’deji nga, maje kade ade’m tede kum ke jè sei j’um nan’t ɓɔk se Kuwe-ɓee. Ngokon’m, ade kem̂’m oso nang pon takul Krist.

²¹ Loo ke m’ndang magtub nè m’adi nga, m’nda kem̂’m káng titeke a i ra nyan ke m’deji nga kuwe. M’ger kem̂’t mbak titeke a i ra nyan ke m’deji nga kade al dè le’m ke m’ɔje nga ɓai.

²² Taɓai, maje kade uwe dè nja kei mba ade’m. M’unde kem̂’m tchên le tel kaw ra si’t se go takul kɔje ke ɔji tà se Nube nga.

Ngei lapya le Paul

²³ Epaphras, njé made dangai le’m gir Jésu-Krist’t rai lapya.

²⁴ Njé made kulege le’m, Marc, Aristarque, Démas se Luc rai nin lapya ngain.

²⁵ Maje kade kem̂noje le Kuwe-ɓee Jésu-Krist nain se si.