Nyanra Njekawkulege 8 - Nouveau Testament en Gulay 2004

Saul ra kum njétaakêm-Kristge ke Jérusalem ndoo

¹ Nè Saul ndige se de dè tɔl ke dé tɔl Etienne. Kêm ndɔn’t nè kuwe, d’unn gir kɔr njékebe nange le Nube ke kêm ɓee-bò ke Jérusalem kororoi. Njétaakêm-Kristge malang yali nan karé-karé se kêm ngann ɓeege ke ɓeekonge ke Judée se Samarie a tɔ. Nè njékawkulege kuwe á nain-in kêm ɓee-bò ke Jérusalem.

² Dooge ke njékile koje dè Nube’t ke nange unni ninn Etienne dubi. Ndoo Etienne ra de ade d’unde kàde de dài-dài dé non’n jik-jik.

³ Nè Saul ra kum njékebe nange le Nube ndoo, yal de karé-karé. E toso kêm keige malang tɔr njétaakêm-Kristge ke dingemge se njé ke dinyege nata ndát-ndát ɓuku de dangai’t.

Philippe ile mber Tà ke Maje kêm ɓeekon ke Samarie

⁴ Njétaakêm-Kristge ke dé yal de karé-karé nga awi se loo-loo ilei mber Tà ke Maje.

⁵ Nè Philippe aw kêm ɓee-bò karé ke Samarie ile mber tà le Krist tutu ade dooge.

⁶ Kosdooge an-in nyankɔbege ke Philippe ra nga ɓaa, ei malang uri mbi de ngaw njêt ooi tàge le’n.

⁷ Ndilge ke majelé undei loo teei kêm dooge’t bule se non tà de’t kaláng-kaláng. Dooge ngain ke kêl ra de wei tonrin a, se njédɔgemetege nga, Philippe ade ratur ɔr dè de’t ndát-ndá a tɔ.

⁸ Gir’n ke nè á dooge malang ke kêm ɓee-bò’t nè nga rai ranel ngain.

⁹ Dingem karé ke njè mbeli ri’n nè Simon, ndɔ ke ndi kêm ɓee-bò’t nè nga. E ra nyan mbelige ade ndil kosdooge ke Samarie tee an-in soin-soin. Simon nga an ra’n ke doo ke bò ngain.

¹⁰ Dooge malang uri mbi ngaw njêt le kooi tà le’n. Unn gir dè ngannge sár tee’n dè njé ke tɔgege’t nga, ei tami edi nè: – Doo nè nga aw se tɔgmong le Nube ke dé ɓar’n tɔgmong ke bò.

¹¹ Dooge uri mbi de ngaw njêt ke ra Simon’t tede nyan mbelige ke è ra mari bere nga ade ndil de tee an-in.

¹² Nè ɗarinè loo ke Philippe ile mber Tà ke Maje ke ɔje dè ɓeekon le Nube se ri Jésu-Krist ade de ɓaa, dingemge se dinyege ke umi kêm de dè tà’t le’n nga, adi d’ule de manné njonm.

¹³ Simon nga géa unde kêm’n dè tà’t le Philippe tɔ. Loo ke d’ule’n manné njonm ɓá ɓaa, è liger go Philippe’t lagr-lagr. Ndil’n tee an-in soin-soin dè nyan-tɔjege se nyankɔbege ke bòii ke Philippe ra ade an se kum’n.

¹⁴ Dooge ke kêm ɓeekon ke Samarie taai tà le Nube ke Philippe ile mber’n ade de nga. Loo ke njékawkulege ke ndii kêm ɓee-bò ke Jérusalem ooi tà’n ɓaa, ei ɔri Pierre se Jean ulei de ra de’t.

¹⁵ Loo ke Pierre se Jean reei teei kêm ɓeekon ke Samarie ɓaa, ei ɔji tà se Nube tede kade dooge ke undei kêm de dè Jésu’t ingei Ndil-Kêmnda.

¹⁶ Tede dooge malang ke d’ule manné njonm se ri Kuwe-ɓee Jésu nga, doo karé bè géa inge Ndi-Kêmnda lé ɓai.

¹⁷ Gir’n ke nè á Pierre se Jean undei ji de dè dooge’t ade ingei Ndil-Kêmnda.

¹⁸ Dooge ingei Ndil-Kêmnda takul kunde ke njékawkulege undei ji de dè dooge’t. Loo ke Simon an titeke bè ɓaa, è din nar ree’n ade Pierre se Jean ede nè:

¹⁹ – Adi man géa tɔgmong nè nga tɔ, le kade nanan ke m’a m’unde ji’m dènn’t ɓaa à inge Ndil-Kêmnda.

²⁰ Nè Pierre ede Simon nè nga ede nè: – Maje kade nar lei udu sei nan’t bere mbak, tede i gir kêmi’t le kinge nyan-noje le Nube nga se nar.

²¹ Nyan-noje le Nube nè nga, kuberi’n éké gaje’n ke ndêin bè ke ɔje dèi goto dann tà’t nè, tede ɓengrei nda se Nube lé.

²² I tur hali dè kêmyêr’t lei. I deje Kuwe-ɓee bainléa à ade kêm’n à tin mbit dè tàgir’t lei.

²³ I nga man titeke wurkate taa rai pel-pel a, nyanra ke pás-pàs tɔi njanm-njanm a tɔ.

²⁴ Simon tel ede Pierre se Jean ede nè: – Sei kuwe i deji Kuwe-ɓee tede tà le’m, le kade nyan ke sei tami tà’n nga tee dèm’t lé.

²⁵ Loo ke Pierre se Jean ɔri go tà le Kuwe-ɓee a, ilei mber tà le’n ɓá ɓaa, ei teli awi kêm ɓee-bò ke Jérusalem. Pierre se Jean ilei mber Tà ke Maje se kêm ngann ɓeege gai-gai ke kêm ɓeekon ke Samarie.

Philippe inge doo ke Ethiopie

²⁶ Doo ke danrán le Kuwe-ɓee ede Philippe ede nè: – Ɔse nang in dɔ aw kêl se ke dè jikon se rebe ke in Jérusalem aw Gaza. Rebe nè nga è rebe ke dooge ɔsi lé.

²⁷ Philippe in ke loon’t kuwe aw. Dingem karé ke ɓeekon ke Ethiopie unde loo tee pan. Dingem nè nga è njèkuju. E doo ke bò ke njèkan dè nyanbawge le Kandas dinye le ngar ke ɓeekon ke Ethiopie. Doo nè nga ree mba kêm ɓee-bò ke Jérusalem le ɗɔi Nube.

²⁸ E ndi kêm wotro rɔ’t le’n ke dé ra se nar à tel ke ɓéee. E ndi à tute magtub le Esaie, njéribe-dè-tàge ke tà Nube’t.

²⁹ Ndil-Kêmnda ede Philippe ede nè: – Aw ngɔr ke kàde wotro rɔ ke ra se nar nè nga.

³⁰ Philippe an-in ngɔde aw. E oo ndu doo ke Ethiopie ke ndi à tute magtub le Esaie njéribe-dè-tàge ke tà Nube’t se ndu’n ke bòi-bòi. E deje’n ede nè: – Ké i ger gir tà ke i ndi a i tute nga kuwe wa?

³¹ Njèkuju ile Philippe dè’t ede nè: – Ke nè á doo karé ɔr non’m dè’t lé ɓaa, m’a m’ger gir’n se dè ra’m bain wa? Njèkuju deje Philippe ade al ndi se’n kêm wotro rɔ ke ra se nar nè nga.

³² Tà ke kêm magtub ke tò se ninn’n ke è ndi à tute nga á tò nè: «Dé ndɔr’n asenan se kon bate ke d’aw se’n ke loo tɔl dange’t bè. E tò asenan se ngonn bate ke tà’n tò se loo ndêm’n non njèkuje welenn’t anje teen tà’n nyên.

³³ D’ɔr tà ke d’ayé gang dènn’t kɔke takul kule ke è ule dè’n. Ké nan à ɓar ri ngannkànnge ɓai wa? Kerɔte kuwe, dé tɔl’n kɔke d’ade kum’n udu dè nang nè.»

³⁴ Njèkuju unn tà deje Philippe ede nè: – Kɔkrɔ karè ede’m, ké njèribe-dè-tà ke tà Nube’t tam tà nè ɔje’n dè nan wa? Ké è tam tà nè nga ɔje’n dè’n è kuwe éké ɔje’n dè doo karé ke rang ɓai wa?

³⁵ Philippe ile mber Tà ke Maje le Jésu ade doo ke Ethiopie se go tà ke doo nè tute kêm magtub’t le Esaie nè nga kuwe.

³⁶ Dé joo mbak d’uwe rebe le de ɗêk-ɗêk d’a d’aw. Nè mbɔr ɓaa, dé ree dé tee tà mann karé’t pan. Ke loon’t nè kuwe, doo ke Ethiopie nga tam se Philippe ede nè: – An! mann á tò nè. Ké ri á à ɔgi kule’m manné njonm wa? [

³⁷ Philippe tel ede njèkuju nè nga ede nè: – Ke nè á i um kêmi dè tà’t nè bɔk-bɔk kerɔte ɓaa, nyan ke à ɔgi loo’n goto. Njèkuju tel ile Philippe dè’t ede nè: – Oiyo, m’um kêm’m dè Jésu-Krist’t titeke è nga è Ngonn Nube kerɔte.]

³⁸ Njèkuju unn ndu’n ade d’uwe wotro rɔ le’n nga nang. Ei se Philippe risi nang joo mbak awi dann mann’t. Philippe ule njèkuju manné njonm.

³⁹ Loo ke undei loo manné teei nata bè ɓaa, Ndil Kuwe-ɓee unn Philippe seen aw se’n ade njèkuju an’n gugu ndan lé ta. Nè njèkuju unn rebe le’n se ranel aw.

⁴⁰ Nè Philippe ɓaa an ra’n kêm ɓee ke Azot nú. E ile mber Tà ke Maje dɔ-dɔ se kêm ɓee-bòge malang ke è dere tutu sár tee’n ɓee-bò ke Césarée.