Nyanra Njekawkulege 7 - Nouveau Testament en Gulay 2004

Tà ke Etienne ɔr non njégangtàge’t

¹ Maw njèkuje nyan-mese deje Etienne ede nè: – Ké tàge nè malang nga, i tam kerɔte kuwe wa?

² Etienne unn tà tam ede nè: – Sei bɔmge se ngakonmge, ooi tà lem maje: kété ɓita kade kà jéi Abraham in kêm ɓeekon ke Mésopotamie aw ndi kêm ɓee ke Haran ɓai nga, Nube ke njè ndubra tee dènn’t pan

³ ede’n ede nè: «Inye ɓee koji, i se njénojege lei, i tee aw kêm ɓeekon ke m’a m’ɔji kade aw i ndi tutu.»

⁴ Gir’n ke nè á ndɔ ke Abraham inye’n ɓeekon ke Chaldée aw uwe’n nanm kêm ɓee ke Haran. Bɔ’n Térak wei kêm ɓee ke Haran nè nga ɓita Nube ade in aw kêm ɓeekon ke sei i ndii tutu ɗarinè.

⁵ Nè né è bè géa, Nube ade nyan-ndube karé Abraham kêm ɓeekon’t nè nga lé. Loo ke ndêin bè ke asenan se da-nja doo bè géa Nube ade’n lé a tɔ. Kêm ndɔn’t nè nga, Abraham inge ngonn karé lé ɓai. Nè Nube unn ndu’n le kade’n ɓeekon nè nga ke nyankinge de se ngannkànnge.

⁶ Taɓai Nube ede Abraham ede nè: «Ngannkàige d’a ra ɓer kêm ɓeekon ke rang’t. D’a ra de ɓer a, d’a ra kum de ndoo loo aru sɔ a tɔ.

⁷ Nè girkoje dooge ke ei Juipge lé ke à rai de ɓer nga, man Nube kuwe m’a m’gangtà dè de’t. M’a m’ade ngannkàige à undei loo teei kêm ɓer’t nè nga ndɔ ke rang le tel ree loo ke nè’t ɗɔi’m a tɔ.»

⁸ Kuje tà mɔte á è nyan-tɔje ke ɔje dè mann-ra ke Nube mann’n ra’n se Abraham. Gir’n ke nè á loo ke Abraham oje Isaac ra ndɔ sɔsɔ ɓaa, è uje tà mɔte’n. Loo ke Isaac oje Jacob ɓaa è uje tà mɔte’n. Jacob géa ra titeke bè se ngannenge ke dɔg-gidé-joo ke ei girkà jéige ke ri de ɓar ngain.

⁹ Kà jéige ke dɔg-gidé-joo nè nga rai kêmkein dè Joseph’t uwei nin igii ade d’aw se’n kêm ɓeekon ke Egypte. Nè Nube è der gir’n.

¹⁰ Nube ɔr Joseph dann nyantosowurge’t le’n malang. Nube ade’n kumkunju ade taa’n kum Pharaon, ngar ke ɓeekon ke Egypte. Pharaon unn Joseph nè nga unde’n ade è njèkonɓee ke Egypte se loo ke kêm kei le’n malang

¹¹ Ɓo-bò oso tip kêm ɓeekon ke Egypte bere mbak a, se kêm ɓeekon ke Canaan a tɔ. Nyantosowur taa loo pel-pel ade kà jéige ingei nyankuse lé.

¹² Loo ke Jacob oo titeke ko tò kêm ɓeekon ke Egypte ɓaa, è ule kà jéige tutu nja karé.

¹³ Loo ke è ule de ke njekon’t joo nga, Joseph ade ngakonnge geri nin a, ade ngar Pharaon géa ger’n gir kà’n njai a tɔ.

¹⁴ Go’t gugu Joseph ule ɓar bɔ’n Jacob se njénojege le’n malang adi ndɔti ɓee ingei nin. Dooge malang ke ndɔti ɓee ingei Joseph kêm ɓeekon ke Egypte nga ei kɔr-ji sejimute-gidé-mi.

¹⁵ Jacob in aw kêm ɓeekon ke Egypte ndi tutu sár wei’n. Kà jéige géa weii kêm ɓeekon Egypte nú a tɔ.

¹⁶ Nè ninn de á d’oto dé ree’n kêm ɓee-bò Sichem dé dubu de ɓade ke ndɔ ke Abraham ndogo se nar ji ngann le Hémor ke Sichem.

¹⁷ Nyan ke ndɔ ke Nube unn’n ndu’n le kade Abraham nga, ndɔ’n nain ngɔr ta. Nè kosdooge le jéi jèi Israelge oji nan ɔsi gonan-gonan ade bulei nyanmi-nyanmi kêm ɓeekon ke Egypte.

¹⁸ Sár ade ngar karé ke rang unn gir kon’n ɓee dè nang ke Egypte. Ngar ke rang nè nga ger Joseph lé.

¹⁹ Ngar nè nga sú kà jéige a, è ra kum de ndoo ngain a tɔ. E ra kà jéige ule ɓel kêm de’t ade tilei ngann dege ke kide kɔke ade weii.

²⁰ E kêm ɓaln’t nè á d’oje’n Moise. Moise nga è è ngonn ke maje ngain tàkum Nube’t. D’oto Moise kêm kei le bɔ’n nan mute.

²¹ Nè loo ke d’unn’n d’a d’unde’n walé ɓaa, ngonn le ngar Pharaon unn’n aw oto’n tite ngonn’n bè.

²² Dé ndó Moise gos nyanger malang ke ɔje dè dooge ke kêm ɓeekon ke Egypte. Moise è doo ke aw se tɔgmong ɔje dè tàge ke è tam a, ɔje dè nyange ke è ra a tɔ.

²³ Nè loo ke lo koje Moise ase kɔr-sɔ deĵ ɓaa, ngur kaw kan ngakonnge ke le’n ke ɓéee Israel ra’n pênn-pênn.

²⁴ Loo ke è aw ɓaa, è an ngokon’n karé ke doo ke Egypte nda à ra’n majelé. Moise unde doo ke Egypte nè nga tɔl dal’n ban le ngokon’n ke ra’n majelé.

²⁵ E gir kêmn’t ede nè bainléa ngakonnge à geri titeke Nube à taa de kinye de dɔ takul’n n’ee; nè ei geri ke bè lé.

²⁶ Barè lookar’n, Moise an ngakonnge ke ei Israelge kuwe joo mbak ndai à rɔi nan. E aw gɔr de ede nè: «Sei sei ngakon nange, ké bain á sei kuwe i ndai i rai nan majelé titeke bè wa?»

²⁷ Nè è ke karé ke njè ra made’n majelé nga ute Moise mbeng se tà ede nè: «Ké nan á undei ke ngar ke njè kɔr kum tà le jé wa?

²⁸ Ké i ndige tɔl’m titeke tagela i tɔl’n doo ke Egypte nga ɓai wa?»

²⁹ Loo ke Moise oo tà nè bè ɓaa, è an-in aw uwe nanm kêm ɓeekon ke Madian. E oje’n ngannge ke dingem joo kêm ɓeekon ke Madian.

³⁰ Moise uwe nanm ase ɓal kɔr-sɔ kêm ɓeekon ke Madian nè nga. Ndɔ karé bè, doo ke danrán tee dènn’t pan kêm dile’t kɔte mbal ke ri’n nè Sinai. Doo ke danran nè nga nda dann ndon por ke on bilm-bilm dè ngonn kage’t.

³¹ Loo ke Moise an nyan nè nga bè ɓaa, tà ige’n sêl. Loo ke Moise age ngɔr le ter nyan nè ɓaa, ke loon’t nè kuwe, è oo ndu Kuwe-ɓee Nube tam se’n ede nè:

³² «E man Nube le kài Abraham, Isaac, se Jacob.» Loo ke Moise oo tà nè nga bè ɓaa, ɓel ndebe nginn-nginn ade ngur tel ter loo ke tu nyan’t nè ra’n lé ta.

³³ Kuwe-ɓee ede’n ede nè: «I tɔr gabang’t njai’t, tede loo ke i nda tutu nè nga è dè nang ke tò se ninn’n.

³⁴ Ra ke dé ra kum kosdooge le’m ndoo kêm ɓeekon ke Egypte nga, m’an se kum kuwe. Ton-on ra le de nga géa, m’oo se mbi’m a tɔ. Gir’n ke nè á, m’tan’n loo m’ree’n le taa de kinye de dɔ. I ree ɗarinè ade m’ulei kêm ɓeekon ke Egypte.»

³⁵ Moise nè nga kété ngakonnge ke ei Israelge uteii mbeng se tà edi nè: «Ké nan á undei ke ngar a, ke njèkɔr kum tà le jé wa?» E è nè kuwe á Nube ule’n ke ngar a, ke njè taa de kinye dɔ takul tɔgmong le doo ke danrán ke kété tee dènn’t pan. Doo ke danrán nga ndɔ ke nda dann ndon por ke on bilm-bilm dè ngonn kage’t.

³⁶ E Moise nè nga kuwe á ndɔ ke ade kosdooge ke Israel undei loo kêm ɓeekon ke Egypte kɔke. Kété è ra nyange ke dum kum se nyankɔbege kêm ɓeekon ke Egypte. E ra nyange nè nga kêm loonge ke ndɔ ke kosdooge ke Israel à gangi ba-bò kate ke ri’n nè ba-bò ke ker. Moise nga ndɔ ke ra nyange ke dum kum kêm dile’t lo kɔr-sɔ.

³⁷ E Moise nè nga kuwe á ndɔ ke ede kosdooge ke Israel ede nè: «Ndɔ ke rang Nube à ɔr njéribe-dè-tàge ke tànn’t ke tite’m man bè kade sei. Doo nè nga a è ngokon si ke dann si sei’t kuwe.»

³⁸ Loo ke ndɔ ke kosdooge ke Israel kebi nan kêm dile’t nga, Moise nè è dann de’t. E è kuwe á ndɔ ke unn tà ke doo ke danrán ede’n dè mbal ke ri’n nè Sinai ede kà jéige. E taa tàge ke le ndii’n kumgajer ra Nube’t ree’n ade jèi.

³⁹ Moise nga, ndɔ ke kà jéige dé ndige kule dè de kade’n lé. Nè d’ute’n mbeng tede ɓengre de tò kerm ke ɓeekon ke Egypte gugu.

⁴⁰ Kà jéige nga ndɔ ke edi Aaron edi nè: «I ra nubege ke j’an se kum jé ade njiyei non jé’t kété tede Moise ke njè kade j’unde loo kêm ɓeekon ke Egypte jè tee nga, ɗarinè nyan ri á tee dènn’t géa jè ger lé.»

⁴¹ Kêm ndɔnge’t nè nga, kà jéige leein nar nyange rai ngonn mang karé ɓaa, ei reei se nyankuje-mese gugii ke mage le de. Ra de nel de ngain dè nyan ke dé kuwe dé ra se ji de nè nga.

⁴² Gir’n ke nè á Nube tur’n gide’n ade de, inye’n de ade dé ra ɓer le gugu kàde se nan a, se kɔnyonge a tɔ titeke dé ndang’n kêm magtub’t le njéribe-dè-tàge ke tà Nube’t d’ede nè: «Sei ngannkà Israel, nyankulge malang ke ndɔ ke i tujei kɔbe de kêm dile’t ase ɓal kɔr-sɔ nè nga ké i tujei kɔbe de adi man ke nyankuje-mese wa?

⁴³ Ḿ-m̀, sei otoi kei kubu le mage Molok a, se ndil nyan kum gute tà Répan, mage kɔnyon le si. Sei i rai ndil nyange nè nga i ɗɔyi de tite Nube le si bè. Gir’n ke nè á m’a m’ade d’a d’uwe sei ɓer kaw se si gide ɓee-bò ke Babylone nú.»

⁴⁴ Kà jéige nga, ndɔ ke awi se kei kubu le Nube dann de’t kêm dile’t. Kei kubu le Nube nè nga dé ra se go ndukunn ke ndɔ ke Nube unn ade Moise a, se go nyan-ndaje ke è tɔje’n ade an nga a tɔ.

⁴⁵ Go’t gugu, loo ke kà jéige ingei kei kubu le Nube nè nga ɓaa, ei tɔri ji de’t awi kêm ɓeekon ke ndɔ ke Nube ade dé taa se rɔ ji dooge ke ei Juipge lé. E kêm lo ke Josué ee’n njèkɔr non de. Kei kubu le Nube nè nga, tò dann de’t sár tee kêm ndɔn’t le ngar David.

⁴⁶ Nube ra kêmkanm se David. Gir’n ke nè á è deje’n le kade ra’n kei ndi Nube le Jacob.

⁴⁷ Nè né è bè géa, è Salomon á ndɔ ke ra kei ade Nube.

⁴⁸ Nè Nube ke njè ndi sêm danrán’t nga ndi kêm kei ge ke ji dooge á ra lé, titeke ndɔ ke Nube ade njèribe-dè-tàge ke tànn’t tam’n ede nè:

⁴⁹ «Danran è kutu-ngar le’m man Nube a, Nang nè è loo sure-nja-kum le’m a tɔ. Ké kei ke tanan bain á sei a i rai kadi man wa? Ké loo ke ra á à è loo taa kebe le’m wa?

⁵⁰ Ké è ji’m man kuwe á unde nyange nè malang lé wa?»

⁵¹ Etienne tam tà se njégangtàge ede nè: – Sei njé dum nange se njékêmnderge se njé mbi koo tà lége. Sei teli sei njé kile rɔ kade Ndil-Kêmnda tite kà sige kuwe ɓai-ɓai.

⁵² Ké njèribe-dè-tà ke ra dann madennge’t á kà sige nali rai kum’n ndoo wa? Ei tɔli njé ke kété ilei mber ree le njè ra nyan se dè naje’n ke karé luk-luk. E nga ɗarinè sei teli sei njé kunn dènnge se njé tɔlnge.

⁵³ Sei ingei gute-ndu Nube se rebe ke ra dooge ke danrán, nè sei an-in dè gute-ndu nè nga sêw-sêw lé.

Dé tɔl Etienne se kuberi herge

⁵⁴ Loo ke njégangtàge ooi tàge nè nga ɓaa, wong ra de ngain ade ton-in tà de vbat-vbat dè Etienne’t.

⁵⁵ Nè Etienne nga Ndil-Kêmnda taa kêm’n pel-pel. E an loo ke danran sêw-sêw ɓaa, an ndubra le Nube. Taɓai è an Jésu nda se nja’n dɔ dè jikon Nube’t.

⁵⁶ Etienne tam ede nè: – An-in! man m’an kum danran teen ra’n. M’an Ngonn doo nda se nja’n dɔ dè jikon Nube’t.

⁵⁷ Dooge rai nyan wuu-uu se ndu de ke bòi, uti mbi de dè tà’t le’n. Dé malang d’in d’ur nan dènn’t sut d’uwe’n.

⁵⁸ Dé d’ɔr’n ndalang-ndalang d’aw se’n gide ɓee-bò’t nata, dé tile’n se kuberi her mbás-mbás. Njé ke ndai loon’t an-in se kum de nga, ei tɔri kubuge le de umi nang nja basa karé bè ke ri’n nè Saul.

⁵⁹ Loo ke d’ade tile Etienne se kuberi her le tɔl’n ɓaa, è non ɓar Kuwe-ɓee ede nè: – Kɔkrɔ karè, Kuwe-ɓee Jésu, i taa ndil’m ke rai’t.

⁶⁰ E ɔse keje’n nang tam tà se ndu’n ke bòi ede nè: – Kuwe-ɓee, inye go ra majelé le de nè nga kɔke. Loo ke Etienne tam tà nè nga titeke bè ɓaa, tà’n tête nyonk.