Nyanra Njekawkulege 28 - Nouveau Testament en Gulay 2004

Paul ndi dè goré loo ke ri’n nè Malte

¹ Loo ke jè tee tà yo’t ɓá ɓaa, d’ede jè titeke dè goré loo nè ke bato dubu tutu nga ri’n nè Malte.

² Njéɓeege ke dè goré loo’t nè nga rai se jé kêm-maje ke dum kum. Dé ra por d’ade on ɗik-ɗik d’ade jè malang jè ndibe tede ndi ede ade kul on ngain.

³ Paul saa ngengreng ke tutu um poro, kundu por unde li jênênn ade tee labe jinn’t tàk don’n.

⁴ Loo ke njéɓeege ke dè goré loo ke Malte an-in jênênn labe ji Paul’t ɗingew nè ɓaa, ei edi nan edi nè: – Kerɔte kuwe, doo nè nga è njè tɔl dooge. E tee tà yo’t dann ba-bò’t ngɔr nè ɓai, nè Naje le Nube ndige kade ndi kumgajer lé sár.

⁵ Nè Paul tusu li jênênn ile’n poro anje kade nyan karé géa ra’n.

⁶ Dooge ndii nginei edi nè bainléa ra’n à tii éké à koso kwei ke loon’t nè. Nè loo ke dé ngine sár d’an nyan karé ke majelé ke ra’n lé ɓaa, dé tel se ndu de d’ede nè: – Doo nè nga è ndil nyan le doo karè.

⁷ Doo karé ri’n nè Publius, è njèkonɓee ke dè goré loo’t nè nga. E aw se loo le’n kɔte loo’t nè nga ngɔr. Publius uwe jè ke rann’t ra jè mba maje ngain ase ndɔ mute.

⁸ Bɔ Publius tò dè tire ratur’t. Ra’n taa por làm-làm a, ndêng mese ngain a tɔ. Paul aw an’n, è ile ji’n dènn’t ɔje’n tà se Nube tede’n. Bɔ Publius in aje katch-katch.

⁹ Gir’n ke nè á gute njératurge ke dè goré loo’t nè nga géa reei ingei Paul adi raturge le de ɔr’n dè de’t.

¹⁰ Dooge ilei riɓar dè jé’t ngain. Loo ke j’ayé kin kaw ɓaa, ei uwei se jé noje se nyange ke nal jè.

Paul in dè goré loo ke Malte aw Rome

¹¹ Jè ndi dè goré loo’t nè ase nan mute ɓita j’in j’al kêm bato’t ke in kêm ɓee ke Alexandrie ree nda loo nda batoge dè goré loo’t nè nga tà kuli. Bato nè nga nda loon’t nè takuli bere. Dé tɔ tà kubu ke ra pir-pir ke dé ra nyan-ndaje le mage ndungege Castor se Pollux tutu.

¹² J’in loon’t nè, j’aw jè rise nang kêm ɓee karé ke ri’n nè Syracuse. Jè ndi tutu ndɔ jé mute.

¹³ J’in Syracuse j’aw se kàde kong-kong sár jè tee kêm ɓee ke Reggio. Barè lookar’n nel in se ke dè jikon dann go jé ade jè tee Pouzzoles ndɔ ke njèkon’t joo.

¹⁴ J’inge ngakon jé ke njétaakêm-Kristge kêm ɓee ke Pouzzoles. Ei ɓari jè adi jè ndi se de ase ndɔ ji sejimute. E se go rebege ke titeke bè á j’aw’n sár jè tee’n kêm ɓeekon ke Rome ɓai.

¹⁵ Loo ke ngakon jé ke njétaakêm-Kristge ke ɓee-bò ke Rome ooi ser jé ɓaa, ei reei tilei non jé sár ingei jè loo kase-ko’t ke Appius a, taɓai ei ingei jè loo ke d’unde ri’n nè «Kei kuse nyan le mbage ke mute» a tɔ. Loo ke Paul an de ɓaa, è ra Nube oiyo, taɓai korè tà njak taa ra’n pel-pel.

¹⁶ Loo ke jè tee Rome ɓá ɓaa, d’unn ndu de d’ade Paul le kade uwe kei ke le’n gai ndii’n. D’ɔr njèrɔ karé d’ade è njè ngonm’n.

Paul ile mber kêm ɓee-bò ke Rome

¹⁷ Ndɔ ke njèkon’t mute, Paul ule kule ɓar njékɔr non Juipge le kade reei ingei nin. Loo ke ei ɔsi nja nan reei ingei nin ɓá ɓaa, è ede de ede nè: – Ngakonmge, m’ra nyan karé bè m’ute’n kosdooge éké nyangirkà le kà jéige mbeng lé. Nè né è bè géa, d’uwe’m d’ile’m dangai’t Jérusalem nú sár ɗarinè d’ule’m ji dooge ke Rome nè ta.

¹⁸ Dé nè nga, loo ke dé deje’m tà ɓaa, dé ndige le kinye’m dɔ tede d’an tà karé ke ndête kade m’wei’n lé.

¹⁹ Nè è tede kute ke Juipge utei man mbeng á m’deje le ree’n non César’t. M’ra bè tede le taa’n ra’m ji de’t m è tede kile’n tà dè girkoje’t le’m lé.

²⁰ Gir’n ke nè á m’ɓar’n sei le kan’n sei a, le kede’n sei tà’n a tɔ. E tede nyan ke kosdooge ke Israel undei kêm de tchên ke dè’t á ɓila m’nda’n se sulge jim’t yew-yew.

²¹ Juipge ilei Paul dè’t edi nè: – Jè ɓaa, j’inge magtub karé ke in Judée ɔje dèi lé. Taɓai ngokon jé karé ke in nú ree ɔr ser nyanrai ke maje éké ke majelé ade j’oo lé a tɔ.

²² Nè maje ngain le kade i kuwe ɔrgir tà nè nga se tài ade j’oo. Oiyo, tà ke ɔje dè Jésu, doo nyan le doo nè nga ɓaa, jè ger titeke dooge utei nin mbeng se loo malang.

²³ Paul se Juipge ɔji ndɔ tede tel kinge’n nan. Loo ke ndɔ nè ase deĵ ɓaa, Juipge reei ngain dum ke kété ingei nin kêm kei ndinn’t kuwe. Paul ɔrgir tà se ndɔgé sár loo sɔlé a, ile mber Konɓee le Nube nga ndàt ade de a tɔ. E uwe ra’n mong le kade kum de gang dè Jésu’t se go tà ke kêm magtub gute-ndu’t le Moise sár tee’n dè magtubge’t le njéribe-dè tàge ke tà Nube’t.

²⁴ Njé ke karége umi kêm de dè tà’t le’n, nè njé ke nange mbati kundei kêm de dè tà’t le’n a tɔ.

²⁵ Dé naje nan tà ngain ade ndu de um nan’t lé. Loo ke d’ade gang nan ɓaa, Paul ede de tà karé bere ede nè: – Tà ke ndɔ ke Ndil-Kêmnda ade Esaie, njèribe-dè-tà ke tà Nube’t ede kà sige nga aw loon’t deĵ.

²⁶ Esaie tam ede nè: «Aw ra kosdooge’t nè ede de ede nè: Sei a kooi se mbi si kuwe, nè sei a i geri gir lé. Sei a kan-in se kum si kuwe, nè sei a kan-in njai lé.

²⁷ Kerɔte kuwe, ɓengre kosdooge nè nga nder ɗàk-ɗàk. Ade teli njé dum nange, Ei uti kum de, nè bainléa n’a kan-in loo se kum de; d’utu mbi de nè bainléa n’a kooi tà se mbi de; d’ade ɓengre nder nè bainléa n’a geri gir tà, le kɔsi wan teli ke ra’m man Nube’t kade m’aje’n de.

²⁸ Ooi maje, tà kaje le Nube nga ule’n ade njé ke ei Juipge lé: ei ɓaa, uri mbi de ooi. [

²⁹ Loo ke Paul tam tàge nè nga bè ɓaa, Juipge ɔri ra de awi naji nan tà dann de’t ngain.]

³⁰ Paul ndi kêm kei ke uwe ɔje dè’n kuwe sár ɓal joo deri. Dooge malang ke reei rann’t nga, è uwe de ke rann’t.

³¹ E ile mber Konɓee le Nube ade de a, è ndó de tà ke ɔji dè Kuwe-ɓee Jésu-Krist se kêmnda káng m doo karé bè géa ɔge’n dè’t lé.