Nyanra Njekawkulege 23 - Nouveau Testament en Gulay 2004

¹ Paul an kum njégangtàge le Juipge sêw-sêw ɓaa, è ede nè: – Ngakonmge, man m’njiye non Nube’t se tàgir ke maje ɔr njêt sár tee ɓila.

² Nè Ananias maw njèkuje nyan-mese unn ndu’n ade njé ke ndai kɔte Paul’t ngɔr le kade undei tà’n.

³ Titeke bè á Paul ede’n ede nè: – Nube à undei tɔ, i tò asenan se ndogo bɔr ke nda kong bè! I ndi loo ke nè’t le gangtà dèm’t se go gute-ndu. Nè i al tà tà gute-ndu’t ɓaa, unn ndui ade d’unde’m.

⁴ Njé ke ndai kɔte Paul’t tami se’n edi nè: – Ké i kuwe in se dèi i taje maw njèkuje nyan-mese le Nube wa?

⁵ Paul ile de dè’t ede nè: – Ngakonmge, m’ger titeke doo nè nga è maw njèkuje nyan-mese lé. Oiyo, dé ndang kêm magtub’t ke tò se ninn’n d’ede nè: «Ngar le kosdooge lei nga, i a tam se’n tà ke majelé lé.»

Pharisienge se Saddusienge kayai nan danné loo joo tede tà le Paul

⁶ Paul ger mbak titeke njégangtàge nga, njé ke nange ei Saddusienge a, njé ke nange ei Pharisienge a tɔ. Gir’n ke nè á è tam’n tà se ndu’n ke bòi beng non de’t ede nè: – Ngakonmge, man m’ee Pharisien, ngonn koje Pharisien. Ɓila m’nda non njégangtàge’t. E tede tà ke rang lé, nè è tede kunde ke m’unde kêm tchên titeke dooge ke weii à undei loo teei dann njé ke koo’t.

⁷ Loo ke Paul tam tà nè nga bè ɓaa, tà naje in dann Pharisienge se Saddusienge ke kebi nan nè nga ade kayai nan danné loo joo.

⁸ Saddusienge ɓaa tami edi nè: dooge à undei loo teei dann njé ke koo’t ndan lé a, dooge ke danran éké ndilge géa gotoi a tɔ. Nè Pharisienge ɓaa umi kêm de dè’t mbak.

⁹ Dé kɔl nan heyei. Njékɔrgir gute-ndu ke nange ke ei dann Pharisienge ɔsi nang in-in naji tà nè nga utei mbeng-mbeng edi nè: – Doo nè nga, jè j’an majelé karé ke è ra lé. Bainléa è ndil éké è doo ke danrán karé á ede’n tà, jè ger lé.

¹⁰ Dé kɔl nan ke kété-kété d’ade oso mbo-bò. Njèkan dè njérɔge ke aru dɔg ɓel kêmn’t ede nè d’a kin gang Paul danné mbêt-mbêt. Gir’n ke nè á è unn’n ndu’n ade njérɔge le kade awi ɔri nin dann doobulege’t kɔke teli reei se’n loo ndi de’t.

¹¹ Ndɔ ke njèkutu go made Kuwe-ɓee tee dè Paul’t pan dann ndɔɔ, ede’n ede nè: – Paul oré tài njak! Kété ndɔ ke ede dooge ke kêm ɓee-bò Jérusalem nè tà le’m. Gar-gar, ede dooge ke kêm ɓee-bò ke Rome tà le’m titeke ndɔ ke ede’n dooge ke kêm ɓee-bò Jérusalem nga tɔ.

D’ɔr nan tà dè Paul’t le tɔl’n kɔke

¹² Loo ke loo ar ɓá ɓaa, Juipge kebi nan kang-kang manni ra de dàp-dàp edi nè: N’a n’usei nyan lé a, n’a n’an-in nyan lé a tɔ, sár n’a n’tɔli Paul ɓita.

¹³ Juipge ke ɔri nan tà manni ra de le tɔli Paul nga, ei dooge kɔr-sɔ se gide.

¹⁴ Dé nè nga d’ɔr nan mbuu d’aw d’inge maw njékuje nyan-mesege se ngatɔgege d’ede de d’ede nè: – Jè mann ra jé dàp-dàp le kɔde nyan tà jé’t lêm lé sár le kade jè tɔl Paul pa ɓita.

¹⁵ Maje kade sei se njégangtàge umi tà le si nan’t ɓaa, i deji njèkan dè njérɔge ke aru dɔg le kade ade dé ree se Paul non si’t. I rai gos titeke a i nderi gir tà le’n rang le ger njai. Jè ɓaa, j’ade ndi dè nja jé’t tchên le tɔl’n se rebe.

¹⁶ Kɔr ke Juipge ɔri nan tà dè Paul’t le tɔl’n nga nann’n karé oo tà’n. E aw loo ndi njérɔge’t kei go Paul’t ede’n tà’n.

¹⁷ Paul ɓar njèkan dè njérɔge ke aru karé ede’n ede nè: – Ngonn ke basa nè nga aw se tà karé le kede njèkan dè njérɔge ke aru dɔg. Aw se’n rann’t.

¹⁸ Njèkan dè njérɔge ke aru karé nè nga aw se’n ra kuwe de’t, ede’n ede nè: – Paul ke è dangai nga ɓar’m ede’m le kade m’ree se basa nè rai’t tede aw se tà karé le kedi.

¹⁹ Njèkan dè njérɔge ke aru dɔg nga uwe ji ngonn ke basa nè ɔr’n njɔl aw se’n nata, è deje’n ede nè: – Ké tà ri á ayé kede’m wa?

²⁰ Basa nè nga tam ede nè: – Juipge umi tà le de nan’t le deji nin kade barè i ree se Paul non njégangtàge’t. A rai gos titeke ayé nderi gir tà le’n rang le geri njai.

²¹ An tá nè à kin ndige se de. Dooge nè nga manni ra de le kuse nyan lé a, le kain mann lé a tɔ, sár n’a tɔli nin ɓita. Ɗarinè, dé ndi dè nja de’t tchên d’ade ngine tà ke à tee tài’t.

²² Kété ɓita kade njèkan dè njérɔge ke aru dɔg inye ngonn basa nè ade aw ɓai nga, è unn ndu’n ade’n ede nè: – I tam tà ke ede’m nè nga ade doo karé ke rang oo lé.

D’ule se Paul Césarée ra Félix’t

²³ Ke loon’t nè kuwe njèkan dè njérɔge ke aru dɔg ɓar njékan dè njérɔge ke aru karé joo ede de ede nè: – Uwei dè nja njérɔge aru joo a, njé sindege kɔr-ji sejimute a, njérɔge se ningege aru joo a tɔ. Adi ei malang ndii dè nja de’t tchên le kade awi kêm ɓee-bò ke Césarée se kàde ke jisɔ-jimi ke ndɔɔ.

²⁴ I sangi sindege joo: karé le Paul, karé le njè ngonm’n le kade awi se’n se maje’n sár ra Félix njèkonɓee’t.

²⁵ Njèkan dè njérɔge ke aru dɔg ndang magtub ade Félix ede nè:

²⁶ – Man Claude Lysias, m’ndang magtub nè m’ade Félix njèkonɓee ke maje dum, m’ra’n lapya.

²⁷ Doo nè ke man m’ule’n m’adi se’n nga, Juipge in-in se dè de uwei nin le tɔli nin. Nè loo ke m’oo tà’n kété titeke è ngonn koje ɓee ke Rome ɓaa, m’ɔi njérɔge le’m dèm’t m’tee’n pan, m’uwe’n wont m’ɔr’n ji de’t.

²⁸ M’ndige le ger gir tà ke Juipge ilei tà dènn’t. E á m’ade d’uwe’n d’aw’n se’n non njégangtàge’t le de.

²⁹ Man m’an titeke Juipge ilei tà dènn’t ɔje dè gute-ndu le de ei kuwe. Nè man ɓaa, m’an majelé karé bè ke ra ke kum tɔl’n éké kuwe’n dangai lé.

³⁰ Doo karé bè ree ede’m titeke Juipge ɔri nan tà dènn’t le tɔli nin. Gir’n ke nè á m’in’n ke loon’t nè m’ule’n se’n rai’t. Njékile tà dènn’t nga, m’ede de kade awi sêki nin noin’t nú ta.

³¹ Njérɔge ɔri Paul dann ndɔɔ awi se’n sár Antipatris se go ndukunn le njèkan dè njérɔge ke aru dɔg nga.

³² Barè lookar’n ɓaa, d’inye njé sindege á d’ade awi se’n. Nè gute kos njérɔge teli awi loo ndi de’t gugu.

³³ Loo ke njé sindege teei kêm ɓee-bò ke Césarée ɓá ɓaa, ei adi magtub njèkonɓee a, ei ulei Paul jinn’t a tɔ.

³⁴ Loo ke njèkonɓee tute magtub nè ɓá ɓaa, è deje Paul ede nè: – Ké i nga i doo ke ɓeekon ke ra wa? Paul ilé dè’t ede nè: – Man doo ke beekon ke Cilicie.

³⁵ Njèkonɓee Félix ede Paul ede nè: – Ndɔ ke njé sêkige à reei ɓita m’a tel koo tà lei ɓai. E unn ndu’n le kade dé ngonm Paul kêm kei ndi Ngar Hérode ke bò.