Nyanra Njekawkulege 22 - Nouveau Testament en Gulay 2004

¹ – Ngakonmge se bɔmge, uri mbi si ooi tà le’m ke m’a m’tam dè ram’t ɗarinè nga.

² Nè loo ke d’oo titeke è ede de tà se tà hébreu ɓaa, ká loo tel pa sibik dum ke kété. Paul ede de ede nè:

³ – Man m’ee Juip. D’oje’m kêm ɓee-bò ke Tarse, ɓeekon ke Cilicie, nè koto á d’oto’m kêm ɓee-bò ke Jérusalem nè. M’ndó nyan ra Gamaliel’t ade m’ger’n loo kan dè gute-ndu le kà jéige sêw-sêw. Ra’m olé pêl-pêl dè nyan’t le Nube tite si sei malang ɗarinè tɔ.

⁴ Dooge ke unni rebe le Kuwe-ɓee Jésu nga, m’ra kum de ndoo sár ase yo de. M’ade dé tuwe dingemge a, dinyege a, dé tɔ de se sul d’um de dangai’t.

⁵ Maw njèkuje nyan-mese se ngatɔgege malang d’an nyange ke ndɔ ke m’ra kété nga se kum de. Ei asikum kedi sei tà’n. E dé kuwe á ndɔ ke m’taa magtub ji de’t m’aw’n ra ngakon jéige ke kêm ɓee-bò ke Damas. M’aw le tuwe njétaakêm-Kristge ke ndii nú le tɔ de se sul ree se de Jérusalem kade kure nyan ra de ɔde kum de.

Paul ɔrgir kundekêm le’n

⁶ M’aw sár m’unde dè ɓee-bò ke Damas ngɔr. Kàde nda dann ɓee. Nyan ndogó in danran ndogó gan dè’m wàk.

⁷ Ke loon’t nè kuwe, m’gudu nang bɔlɔk, m’oo ndu Jésu ɓar’m ede nè: «Saul, Saul, ké bain á ɔr’m kororoi bè wa?» M’tel m’deje’n m’ede nè:

⁸ «Ngar ké i nan wa?» E tel ede’m ede nè: «Man m’ee Jésu ke Nazareth ke ɔr’n kororoi nga.»

⁹ Njé ke ei se’m nan’t an-in nyan ke ndogó nè nga njai-njai, nè ei geri ndu njè tam se’m tà nga lé.

¹⁰ M’tel m’deje m’ede nè: «Kuwe-ɓee, ke ri á i ndige kade m’ra gar-gar wa?» Kuwe-ɓee tel ede’m ede nè: «Ɔse nang in aw Damas ɓaa, d’a d’edi nyange malang ke Nube unn’n ndu’n le kade i ra nga ɓai.»

¹¹ Kum’m libe ade m’an loo lé tede nyan ke ndogó ngain nè nga. Njé ke ei se’m nan’t á uwei ji’m ndɔri man awi se’m Damas.

¹² Dingem karé bè ndi Damas ri’n nè Ananias. E doo ke ile koje dè gute-ndu’t le Moise. Juipge malang ke ndii kêm ɓee-bò ke Damas tami tà le’n maje.

¹³ E ree ram’t ede’m ede nè: «Ngokon’m Saul, maje kade kumi tel an loo.» Ke loon’t nè kuwe, kum’m tel an loo ade m’an’n njai-njai.

¹⁴ Ananias ede’m ede nè: «Nube le kà jéige ɔri kété mari bere le kade i ger nyan ke kêm’n ndige. E ɔri le kade an njèra nyan se dè naje’n karé bere se kumi a, le kade oo tà tànn’t a tɔ.

¹⁵ Gar-gar a i njèkɔrgo tà le’n. Nyan ke an se kumi a, oo tà’n se mbi a tɔ nga, ɔrgir ade dooge malang.

¹⁶ Ɗarinè ké a i ngine ri ɓai wa? Ɔse nang in dɔ ade d’ulei manné njonm se ri’n ɓaa a inge kêm tin mbit dè kaiyage’t lei.»

Paul ɔr gir nyan ke Kuwe-ɓee ule’n ra dooge ke ei Juipge lé

¹⁷ Go’t gugu m’tel m’ree Jérusalem. Ndɔ karé bè, m’ndi kêm kei le Nube m’a m’ɔje se’n tà ɓaa, nyanpinde tee dèm’t. M’an Kuwe-ɓee tee ke kum’t pan ede’m ede nè:

¹⁸ «I tee kalang kêm ɓee-bò ke Jérusalem kɔke. Dookêmɓeege à taai tà le’m ke a ede de nga lé.»

¹⁹ M’tel m’ede’n m’ede nè: «Kuwe-ɓee, dooge geri mbak titeke è man kuwe á m’aw se kêm kei kebe nan, kêm kei kebe nan, m’tuwe njé ke undei kêm de dèi’t. M’unde de se ndêin maru a, m’um de dangai’t a tɔ.

²⁰ Njèkɔrgo tà lei Etienne ke ndɔ ke dé tɔl’n d’ade mese’n ule nang nga, man géa m’ee tutu tɔ. M’ndige se njé tɔlnge dè tɔl ke dé tɔln’t. E man kuwe á ndɔ ke m’ee njè ngonm kubuge le njé tɔl Etienne.»

²¹ Kuwe-ɓee tel ede’m ede nè: «Aw, tede è man kuwe á m’a m’ulei heb ke ra dooge ke ei Juipge lé.»

Paul se njèkan dè njèrɔge ke aru dɔg

²² Juipge uri mbi de ooi tà le Paul sár tee dè tà’t nè ɓaa, ei unni gir tami tà beng-beng edi nè: – Doo ke titeke bè nga, ndête kade ndi kumgajer dè nang nè lé. Adi kum’n udu kɔke.

²³ D’ur kɔl a, dé tɔr kubuge le de dé tile piring-piring kɔke a, d’ɔi nang dé sanrin ke dɔ-dɔ d’ade kodé age sululu a tɔ.

²⁴ Titeke bè á, njèkan dè njérɔge ke aru dɔg unn ndu’n ade njérɔge le’n ede nè: – Awi seyé loo ndi njérɔge’t. I deji n’ee tà se ndêin maru tede kade tà tee tàyé’t. M’ndige le ger gir nyan ke dooge uri kɔl ɔji dèyé nè nga.

²⁵ Nè loo ke dé tɔ Paul d’ile’n nang le kunde’n ɓaa, è deje njèkan dè njérɔge ke aru karé ke nda à ra kule kêm ndɔn’t nè ede nè: – Doo ke è ngonn ɓee ke Rome ke dé gangtà dènn’t lé ɓai nga, ké d’unn ndu de kade undei nin se ndêin maru wa?

²⁶ Loo ke njèkan dè njérɔge ke aru karé oo tà nè bè ɓaa, è tel aw ra njèkan dè njérɔge ke aru dɔg ede’n ede nè: – Ké a i ra ri se rai ta wa? Doo nè nga è ngonn ɓee ke Rome.

²⁷ Njèkan dè njérɔge ke aru dɔg ree ra Paul’t deje’n ede nè: – Ede’m ndàt, ké i ngonn koje bè ke Rome kerɔte wa? Paul ilé dè’t ede nè: – Oiyo, man m’ee ngonn koje ɓee ke Rome kerɔte kuwe.

²⁸ Njèkan dè njérɔge ke aru dɔg nga tel ile Paul dè’t ede nè: – Ngonn koje ɓee ke Rome nga, man m’ndogo se nar ngain. Paul ilé dè’t ede nè: – Man m’ee ngonn ɓee ke Rome ke kon’m ɓéee.

²⁹ Ke loon’t nè kuwe njé ke d’ayé kunde Paul se ndêin tá le deje’n tà nga, d’in kengeng dènn’t kɔke. Nè loo ke njèkan dè njérɔge ke aru dɔg oo titeke Paul è ngonn ɓee ke Rome ke kon’m ɓéee ɓaa, ɓel unde’n ndàt gang’n tede è ade dé tɔ’n se sul njanm-njanm.

D’aw se Paul loo gangtà’t ke bò

³⁰ Njèkan dè njérɔge ke aru dɔg ndige le ger nyan ke gete ke Juipge ilei tà dè Paul’t. Gir’n ke nè á barè lookar’n ɓaa, è ade dé tutu sul ke rann’t ke dé tɔɔ’n kɔke. Taɓai è unn ndu’n ade maw njékuje nyan-mesege se njégangtàge le Juipge malang kebi nan. Go’t gugu, è ade dé ree se Paul d’unde’n nang non de’t.