Nje Ke Ephese 5 - Nouveau Testament en Gulay 2004

I njiyei tite ngann lookarge bè

¹ Sei sei ngannge le Nube. Nube tár sei ngain. Bè ɓaa, i ndaji nyanra’n.

² I njiyei se tár nan titeke Krist tár’n jèi á inye’n ra’n ade Nube tede le jéi è kuwe ke nyan kade noje se nyankuje-mese ke taa kum Nube.

³ Maje kade ri tò se nan ke kaiya’t se ra mine se nede nyan ke rara géa ɓar dann si’t lé. Nyange nè nga tuwe sei njétaakem̂-Kristge ɗêw lé karè.

⁴ Maje kade adi tà rasɔl se tà mbe a, se tà kule mbe dè nan’t a tɔ, teei tà si’t lé. Nyange nè nga tuwe sei ɗêw lé. Nè è soo’t kade tà ra Nube oiyo tá tee tà si’t.

⁵ Ooi maje: doo karé bè dann njé tò se nan ke kaiya’t éké doo ke ra’n mine éké njè nede nyan a ingei nyan-ndube kem̂ Konɓee’t le Krist lé a, kem̂ Konɓee’t le Nube ndan lé a tɔ. Nede nyan nga è mage polé.

⁶ Adi doo karé géa sú sei se tàge ke raikarè lé. Wong le Nube oso dè dooge ke mbati kilei koje dènn’t.

⁷ Umi nan’t se dooge dè nyange ke titeke bè nga lé.

⁸ Tede kété sei ngannge le loondul, nè ɗarinè ɓaa sei ngannge le lookar takul kum ke umi nan’t bɔk se Kuwe-ɓee nga. Bè ɓaa, i njiyei tite ngannge le lookar bè.

⁹ Nyanrage le lookar nga á tooi nè: kem̂-maje ke se ri’n ri’n a, nyanra ke se dè naje’n a, se ngarankum tà a tɔ.

¹⁰ I teri nyan ke à taa kum Kuwe-ɓee nga maje an-in.

¹¹ Umi nan’t bɔk se ngannge le loondul dè nyanra de’t lé. Nè è soo’t kade in-in se de dè’t tede kule ra de nga è kule ke maje’n goto.

¹² Nyange ke dooge rai se go ngein nga tò rasɔl m maje kum tam tà’n lé.

¹³ Nè loo ke d’ɔrgir nyange ke rai nga ɓaa, tooi nata ndái-ndái dann lookar’t.

¹⁴ Nyan malang ke loo unju dè’t nga tel è lookar tɔ. Gir’n ke nè á dé tam’n d’ede nè: «I ke i tò ɓi nga, i teen kumi, unde loo i tee dann njé ke koo’t ɓaa, Krist à ndoin non-in’t.»

¹⁵ An-in! go pa njiye si sêw-sêw. I njiyei tite njékumkunjuge m i njiyei asenan se njé kem̂ tɔ kuje tà lége bè lé.

¹⁶ I pabrai loo ke Nube inye ade sei nga par-par tede ndɔge ke jè ndii tutu ɗarinè nga, ei ndɔge ke majelé.

¹⁷ I ndii sann karè lé, nè i sangi rebe le ger nyan ke Kuwe-ɓee ndige le kade i rai nga tá.

¹⁸ Adi yibe ule mbe dè si’t lé. Tede yibe aw se doo ke loo nyanra ke pás-pàs’t kade tuju. Nè adi Ndil tá taa kem̂ si pel-pel.

¹⁹ Ɔsi page ilei riɓar dè Kuwe-ɓee’t se ngarankem̂ si bere mbak. Ɔsi page ke Ndil á ule tà si’t nga i piti Kuwe-ɓee tede kem̂-maje le’n.

²⁰ Nube Bɔ jéi nga, i rai nin oiyo se ndɔge malang tede nyange malang se ri Kuwe-ɓee le jéi Jésu-Krist.

Dinyege se ngaw dege

²¹ Ulei dè si adi nan tede ɓel ke i ɓeli Ndil Krist nga.

²² Dinyege, ulei dè si adi ngaw sige titeke ulei dè si adi Krist nga bè tɔ,

²³ tede ngaw dinye è doo dè neen’n titeke Krist ee’n doo dè njékebe nange le Nube. E Krist nga, è njèkaje njékebenange le Nube ke ei danra’n è kuwe.

²⁴ Nè titeke njékebe nange le Nube ulei dè de adi Krist nga, maje kade sei dinyege géa ulei dè si adi ngaw sige gar-gar titeke bè tɔ ɔje dè nyange malang.

²⁵ Ngaw dinyege, i tári neen sige titeke Krist tár’n njékebe nange le Nube á inye ra’n è kuwe ade tede le de nga.

²⁶ Krist ndogo mann njékebe nange le Nube tchák-tchák. E ɔr se-kaiyage le de se go ngarankum tà le’n, unde de se ninn’n ade ei le Nube kuwe ɗarinè.

²⁷ E ra titeke bè le kade njékebe nange le Nube ndai tàkumn’t dann ndubra’t se ra’n ke ndolé kein-kein anje kɔr-ɓal éké anje kum kule a tɔ. Krist ndige le kade njékebe nange le Nube tooi se ninn de gai, le kade tà karé uwe dè de lé a tɔ.

²⁸ Sei ngaw dinyege i tári neen sige titeke i tári danra si sei kuwe bè tɔ. Doo ke tár neen’n ɓaa, tár danra’n è kuwe.

²⁹ Ḿ-m̀, doo karé bè ɔr ra’n è kuwe njêt ndan lé. Nè nanan géa ul ra’n maje a, tɔse kum’n dè rann’t maje titeke Krist ra’n se njékebe nange le’n bè.

³⁰ Jèi jèi balkum ra Kristge.

³¹ Titeke dé ndang’n kem̂ Magtub’t d’ede nè: «Gir’n ke nè á dingem à inye bɔ’n se kon’n le kum nan’t bɔk se neen’n, ei joo mbak à teli k’ei danra ke karé bere luk-luk.»

³² Nyan ke tò loo ɓɔyɔn’t nga, è nyan ke bò. Nè man m’tam tà nè nga m’ɔje’n dè Krist se njékebe nange le Nube.

³³ Gar-gar nanan géa dann si’t à tár neen’n titeke tár’n ra’n bè. Gar-gar, maje kade dinye ɓel ndil ngaw’n.