Nje Ke Ephese 3 - Nouveau Testament en Gulay 2004

Paul ile mber Tà ke Maje ade dooge ke ei Juipge lé

¹ E tede è ke nè á man Paul m’ee’n dangai le Jésu-Krist tede le si sei ke sei Juipge lé nga.

² Sei ooi ser noje ke Nube uwe se’m tede tà le si nga ɓá.

³ Nube ribe dè nyan ke tò loo ɓɔyɔn’t ade m’ger titeke m’ndang’n tà’n ndêin m’ade ooi ɗarinè.

⁴ Loo ke sei a i tutei magtub nè ɓaa, sei asikum kan-in titeke m’ger nyan ke tò loo ɓɔyɔn’t ɔje dè Krist nga.

⁵ Nyan ke tò loo ɓɔyɔn’t nè nga, Nube ribe dè ade dooge ke kété mari gerii lé. Nè ɗarinè, è ribe dè se go Ndil’n ade njékawkulege se njéribe-dè-tàge ke tànn’t ke tooi se ninn de gai se go Ndil.

⁶ Se go Tà ke Maje á dooge ke ei Juipge lé oréi nan se jéi jèi Juipge dè nyange ke Nube unde konn tede le kosdooge le’n. Jèi se de jèi balkum danra ke karé bere. Jèi se de j’oréi nan dè ndikumgajer ke Nube unn’n ndu’n ade dooge ke umi se’n nan’t bɔk takul Krist.

⁷ Takul noje ke Nube uwe se’m se go tɔgmong le’n á m’tel m’ee’n ngonn njèkile mber Tà ke Maje nè nga.

⁸ Man m’ee tà mbà le njétaakem̂-Kristge malang. Nè né è bè géa, Nube uwe se’m noje ade m’ile mber nyanbaw le Krist ke doo asekum ger lé m’ade dooge ke ei Juipge lé.

⁹ Ribe dè nyan ke tò loo ɓɔyɔn’t nga, è man á Nube um kule’n jim’t tede dooge malang. Nyan ke tò loo ɓɔyɔn’t nga, kété mari Nube ke Njèkunde nyange malang ɓɔyɔ dè se dooge.

¹⁰ Nè ɗarinè, takul njékebe nange le Nube á njékɔr non dooge se njétɔgmong-ge ke kem̂ danran’t dɔ geri kumkunju le Nube ke se ri’n-ri’n nga.

¹¹ Se go nyan ke kété mari sár ɗarinè. Nyan ke Nube ɔje kété mari ke desêin nga kile ra’n ke nata ɗarinè takul Kuwe jéi Jésu-Krist.

¹² Takul kum ke j’umi nan’t bɔk se Krist a, takul kem̂ jéi ke j’undei dènn’t á jè ndii dè jéi pal le kaw’n ngɔr ke ra Nube’t se kem̂nda káng.

¹³ Gir’n ke nè á m’deje’n sei le kade adi kem̂ si tête mann ɔje dè nyantosowurge ke m’inge tede tà le si nga lé. Nyantosowurge nè nga ei riɓar le si.

Krist tár jèi ngain

¹⁴ Gir’n ke nè á m’ɔse’n keje’m nang non Bɔ jéi’t,

¹⁵ ke girkà ke rara ke danrán éké ke dè nang nè malang ingei ri de ke gete rann’t.

¹⁶ M’deje Nube se go nyanbaw le’n ke dum dè loo le kade ule dingem kem̂ si’t kei takul tɔgmong le Ndil’n.

¹⁷ M’deje Nube le kade ade Krist urkei dè ɓengre si’t takul kem̂ si ke undei dènn’t. Man m’deje Nube le kade ade ulei ngire si nang janm-janm dè tár ke Krist tár jèi’t nga.

¹⁸ Titeke bè á sei se njétaakem̂-Kristge malang a asikum geri là le tár le Krist se ngal’n ke dɔ a, se kur’n ke nang a tɔ.

¹⁹ Sei a geri titeke tár ke Krist tár jèi nga, è nyanger ke dum dè nyangerge ke rang malang dè nang nè tede kade i geri gel Nube bere mbak a tɔ.

²⁰ Se go tɔgmong le Nube ke ra kule kem̂ jéi’t nga, Nube asekum ra nyan kade al dè nyan malang ke jè deji nin éké ke jè giri kem̂ jéi’t.

²¹ Maje kade riɓar è le Nube dann njékebe nange’t le’n ke umi nan’t bɔk se Jésu-Krist dann girkoje dooge’t malang sár se non. Maje kade è titeke bè kuwe.