Matthieu 8 - Nouveau Testament en Gulay 2004

Jésu ɔr banje ra dingem karé’t

¹ Loo ke Jésu in dè mbal’t rise nang ɓá ɓaa, kosdoo-bulege ngain ndolèi goo’n.

² Njèbanje karé bè aw ngɔr ke ra Jésu’t ɔse keje’n nang nonn’t ede’n ede nè: – Kuwe-ɓee, ke nè á i ndige se’m le kade banje ɔr ram’t ndát-ndát ɓaa, ra’m à tel tò karè.

³ Jésu ule ji’n ɔde’n ra njèbanje nè nga ede nè: – M’ndige sei bè kuwe, maje kade rai tel tò karè ndát-ndát. Ke loon’t nè kuwe ra njèbanje tel tò karè ndát-ndát.

⁴ Go’t gugu Jésu ede njèbanje nè nga ede nè: – An tá nè a kade tà nè tee tài’t ade doo ke rang oo. Nè aw ra njèkuje nyan-mese’t i tɔje’n rai ade an ɓita unn nyan-noje ade se go gute-ndu ke Moise ndang kêm magtub’t le kade dé ger’n titeke banje ɔr rai’t ndát-ndát.

Jésu aje ngonn njèndi le njèkan dè njérɔge ke aru karé

⁵ Jésu aw kêm ɓee-bò ke Capernaum. Njèkan dè njérɔge ke aru karé ree ra ndoo rann’t ede nè:

⁶ – Kuwe-ɓee, ratur ra kum ngonn njèndi le’m ke dingem ndoo ngain. Nja’n wei girn’t tonrin ade tò nang pɔbel ɓéee non.

⁷ Nè Jésu ede’n ede nè: – Oiyo, m’a m’aw le kaje’n kadi karè.

⁸ Njèkan dè njérɔge ke aru karé nè nga tel ile Jésu dè’t ede nè: – Kuwe-ɓee, i i doo ke bò. Man m’ase kade ile njai kêm kei le’m lé. Né i tam tà karé kuwe ɓaa, ratur à ɔr dè ngonn njèndi’t le’m nè nga karè.

⁹ Man kuwe géa m’ile koje dè doo-dèmge’t a, m’aw se njérɔge ke ndii gir ndukunn’t le’m. Loo ke m’ede njè ke karé m’ede nè: «Aw!» ɓaa, è aw. Loo ke m’ede njè ke karé ke rang m’ede nè: «I ree nè» ɓaa, è ɔte ree. Loo ke m’ede ɓer le’m m’ede nè: «I ra nyan ke nè» ɓaa, è ra nyan nè nga tɔ.

¹⁰ Loo ke Jésu oo tà tam doo nè nga bè ɓaa, è an’n ke dɔ ke nang. Taɓai è tur tà’n ede njé ke ndolèi goo’n ede nè: – Kerɔte kuwe, man m’ede sei ndàt, kêm ɓeekon ke Israel nga géa, m’inge njèkunde kêm dè Nube’t titeke bè ndɔ karé lé ɓai.

¹¹ Man m’ede sei ndàt, dooge ngain à in-in loo tee’t le kàde se loo kur’t le kàde le ndii nan’t se Abraham, Isaac se Jacob kêm Konɓee ke danrán’t.

¹² Nè njé ke d’uwe dè nja Konɓee ke danrán d’ɔje’n dè de kété nga, d’a d’um de dann loo ke ndul ndin-ndin’t. E loo ke a noin se mann non kum de’t a, a ton-in tà de vbat-vbat tutu a tɔ.

¹³ Go’t gugu Jésu ede njèkan dè njérɔge ke aru karé nè nga ede nè: – I tel aw ɓéee, nyan ke i unde kêmi dè’t nga, a inge nyan’n kuwe. Kêm kàdenn’t nè kuwe ratur ɔr dè ngonn njèndi’t nè nga.

Jésu ɔr raturge gai-gai ra dooge’t

¹⁴ Go’t gugu Jésu aw ɓéee le Pierre. Loo ke è aw kêm kei ɓaa, è an wum Pierre ke dinye tò nang se ratur. Ra’n taa por làm-làm.

¹⁵ Jésu lá ji’n uwe. Ke loon’t nè kuwe taa por ratur ke ade ra wum Pierre taa por làm-làm nga in dènn’t kengeng ade ɔse nang in dɔ. E unn gir ra nyankuse ade Jésu.

¹⁶ Loo ke loo sɔl ɓá ɓaa, dé ree se dooge bule ke ndilge ke majelé rai kum de ndoo ra Jésu’t. E rɔ ndilge ke majelé nè nga se tà ke karé ke tee tann’t. Njératurge malang ke dé ree se de rann’t nga, ratur ɔr dè de’t ade d’aje katch-katch.

¹⁷ Tà ke Esaie njèribe-dè-tà ke tà Nube’t tam kété mari ede nè: «E kuwe á taa yaige se raturge le jéi um dènn’t.»Tà nè nga aw loon’t deĵ.

Dooge joo ke awi ndoo kunn dè nja Jésu

¹⁸ Loo ke Jésu an doobulege an-in dè’n girm ɓaa, è unn ndu’n ade njékuwe-girnge ede nè: – Adi jè gangi ba j’awi gidé nú.

¹⁹ Njèkɔrgir gute-ndu karé bè ree ra Jésu’t ede’n ede nè: – Njèndó dooge nyan, loo malang ke a aw tutu nga, m’a m’unn gooi têr-têr.

²⁰ Jésu tel ile’n dè’t ede nè: – Njange géa bolè tò de tò tutu a, helge géa ndis tò de tò tutu a tɔ. Nè man ke m’ee Ngonn doo nga, m’inge loo kule dè’m tutu taa kebe lé.

²¹ Njèkuwe-gir Jésu karé ke rang dann madennge’t deje’n ede nè: – Kuwe-ɓee inye’m ade m’aw m’dubu bɔ’m ɓita.

²² Jésu tel ile njèkuwe-gir’n nè nga dè’t ede nè: – Unn goo’m, inye njé ke weii ade ei kuwe dubi nan.

Jésu ade nel bò ebe ra’n kule

²³ Jésu al kêm ngonn bato’t. Njékuwe-girnge ndolèi goo’n.

²⁴ An! nel bò unde loo tee se de pitring. Kɔr mann tal bungus-bungus aw kêm bato’t ade nain ndêin bè kade ndui se de mann. Nè Jésu à ɔdenan tò ɓi.

²⁵ Njékuwe-girnge agi ngɔr ke rann’t ndeli nin edi nè: – Kuwe-ɓee i din jè, j’à j’wei!

²⁶ Jésu deje de ede nè: – Ké bain á i ɓeli bè wa? Sei nga kundekêm dè Nube’t le si tin lé! E ɔse nang in ndáng nel se ba-bò. Ke loon’t nè kuwe ká loo tel pà sibik.

²⁷ Dooge nè nga ndil de tee an-in soin-soin ade deji nan edi nè: – Ké n’ee nga n’ee doo ke bain á nelge se ba géa ooi tà tàyé’t bè wa?

Jésu aje dingemge joo ke ndilge ke majelé tooi kêm de’t

²⁸ Loo ke Jésu tee gide ba’t nú, kêm ɓeekon ke Gérasa ɓaa, dingemge joo ke ndilge ke majelé tooi kêm de’t undei loo dè ɓada teei tilei kum’n. Ei rai ngang ngain ade doo karé bè géa asekum koso se rebe nè nga lé.

²⁹ Dingemge nè nga tami se ndu de ke bòi beng edi nè: – I Jésu nga ké usi ri ra jé’t wa? Ké i ree le ra kum jé ndoo ɓá ta wa?

³⁰ Kos kɔsnyonge ndai kɔte de’t heb ɗêk à usei nyan.

³¹ Ndilge ke majelé nè nga ndêti Jésu edi nè: – Ke nè á ayé rɔ jè ɓaa, inye jè ade j’aw kêm kos kɔsnyonge’t nè.

³² Jésu ede de ede nè: – Awi. Ndilge ke majelé nè nga undei loo teei awi kêm kɔsnyonge’t. An! ke loon’t nè kuwe kos kɔsnyonge nè nga in-in dɔ dè kong ba’t, ɓungei nan bere mbak jɔréi dann ba-bò’t weii kabak.

³³ Njékul kos kɔsnyonge nè teti nan an-in awi kêm ɓee-bò’t. Ei ɔri ser nyange malang ke tee dè kɔsnyonge’t se dè dingemge joo ke kété ndilge ke majelé tooi kêm de’t kêrêr-kêrêr adi dooge ke rang ooi .

³⁴ An! dooge malang ke kêm ɓee-ɓò’t nè nga reei dik-dik tilei kum Jésu. Loo ke an-in nin ɓá ɓaa, è ndêti nin le kade inye kêm ɓeekon le de aw rang.