Matthieu 6 - Nouveau Testament en Gulay 2004

Tà ke ɔje dè kunn nyan kade njéndooge

¹ An-in! tá nè a k’in-in kundei nyan ra ke se dè naje’n le si tàkum dooge’t tede kade an-in sei. Ke nè á sei i rai titeke bè ɓaa, a ingei nyan-kuge dè ji si ra Bɔ si ke ndi danran nga lé.

² Loo ke i unn nyan le kuwe’n noje ɓaa, ade d’ile ndil dèi’t titeke njékede gosge rai kêm kei kebe nange’t se ka-rebege tede kade dooge ilei riɓar dè de’t bè lé. Kerɔte kuwe, man m’ede sei ndàt, dé nè nga d’inge nyan-kuge dè ji de ɗarinè ɓá ta.

³ Nè i ɓaa, loo ke a unn nyan le kuwe’n noje nga, ade ji geli ger nyan ke ji koin ra lé,

⁴ tede kade nyan ke i unn uwe’n noje nga è se go ngein. Titeke bè á Bɔi ke njè kan nyan ke tò loo ngeinn’t nga à tel le kuge dè jii ɓai.

Nyan ndoo ke ɔje dè kɔje tà se Nube

⁵ Loo ke a ɔji tà se Nube ɓaa, i rai titeke njékede gosge rai nga lé. Dé nga, dé ndige kɔje tà se Nube kade kum dooge an de njung kêm kei kebe nange’t a , se ngang rebege’t a tɔ. Kerɔte kuwe, man m’ede sei ndàt, dé nè nga d’inge nyan-kuge dè ji de ɗarinè ɓá ta.

Jésu ndó njékuwe-girnge rebe kɔje tà se Nube

⁶ Nè i , loo ke a ɔje tà se Nube ɓaa, aw kêm kei lei utu tàbit kei lei dèi’t ɓita ɔje tà se Bɔi ke ndi loo ngeinn’t. Titeke bè á Bɔi ke njè kan nyan ke tò loo ngeinn’t nga, à tel kuge dè jii ɓai.

⁷ Loo ke a ɔji tà se Nube ɓaa, i tami tàge dè nan’t-dè nan’t titeke dooge ke geri Nube lé rai nga lé. Ei giri titeke tàge ke n’ei n’tami ke dè nan’t-dè nan’t á Nube à ade’n de nyan ke n’deji nin nga.

⁸ I teli i taai nan se de lé tede loo ke tà nain kêm si’t ɓai kuwe géa, Bɔ si ger nyan ke sei awi ndoo’n kété ɓita i deji nin nyan nè ɓai.

⁹ Loo ke a ɔji tà se Nube ɓaa, i tami titeke bè edi nè: «Bɔ jé i ke njè ndi danrán, maje kade dooge malang geri titeke rii è ri ke tò se ninn’n gai.

¹⁰ Maje kade on ɓee dè dooge a, maje kade dé ra gute ndui d’ade ɔr njêt titeke dé ra’n danrán a tɔ.

¹¹ Maje kade ɓila ade jè nyankuse ke j’aw ndoo’n se ndɔ jé-ndɔ jé.

¹² Maje kade ade kêmi tin mbit dè kure majelége’t le jé titeke jè géa j’ade kêm jé tin mbit dè kure majelé ke made jége rai se jé.

¹³ Maje kade inye loo ade nyan sú nan jè lé, nè ɔr jè dann nyan ke majelé’t kɔke.

¹⁴ Ke nè á adi kêm si tin mbit dè dooge’t ke njé ra se si majelé ɓaa, Bɔ si ke ndi danrán géa à ade kêm’n à tin mbit dè si’t tɔ.

¹⁵ Ke nè á adi kêm si tin mbit dè dooge’t ke njé ra se si majelé lé ɓaa, Bɔ si ke ndi danran géa à ade kêm’n à tin mbit dè si’t ndan lé tɔ.

Jésu ndó njékuwe-girnge rebe kɔge kêm ɓo

¹⁶ Loo ke ɔgi kêm si ɓo ɓaa, i siwi kum si siw-siw titeke njékede gosge rai nga lé. Ei rai titeke bè le kade dooge an-in titeke ɔgi kêm de ɓo. Kerɔte kuwe, man m’ede sei ndàt, dé nè nga d’inge nyankuge dè ji de ɗarinè ɓá ta.

¹⁷ Nè i , loo ke i ɔge kêmi ɓo ɓaa, ube dèi se wubu ɓár-ɓár a, i togo kumi ndát-ndát a tɔ.

¹⁸ Titeke bè á dooge à an-in nin titeke i ɔge kêmi ɓo lé. Nè Bɔi ke ndi loo ngeinn’t à an nyan ke i ra ɓaa à tel kuge dè jii ɓai.

Jésu ndó dooge tà ke ɔje dè nyanbawge ke danrán

¹⁹ Uwei dè nja nyanbawge ke dè nang nè nga undei konn tede le si lé, tede dè nang nè nga è loo ke gide se kar tuji nyange tutu a, njéɓog-ge mbuti kum loo ɓogi a tɔ.

²⁰ Nè uwei dè nja nyanbawge le si undei konn danrán ra Nube’t, tede danrán nga è loo ke gide se kar tuji nyan tutu lé a, njéɓog-ge à mbuti kum loo le ɓogi lé a tɔ.

²¹ Oiyo loo ke um nyanbaw lei tutu nga, ɓengrei à è dè’t kuwe tchên.

Kum jéi tò asenan se lampe le danra jéi bè

²² Kum jéi tò asenan se lampe le danra jéi bè. Ke nè á kum jéi an loo njai ɓaa, danra jéi bere mbak è ke unju njai a tɔ.

²³ Nè loo ke kum jéi an loo majelé ɓaa, danra jéi bere mbak ndi dann tilkus’t a tɔ. Ke nè á lookar ke kêm jéi’t kei tel è loo ndul ɓaa, danra jéi bere mbak ndi dann loo ke ndul ndin-ndin’t.

Doo asekum ra kule ɓer le Nube se ra kule ɓer le nar kade nan’t joo lé

²⁴ Doo karé asekum ra kule kade kuwenge joo kêm kurloo ke karé’t lé. E à ɔr è ke karé njêt, nè è à unde è karé ke rang dann kumn’t. Taɓai è à ile koje dè è ke karé’t, nè à an è karé ke nyan lé. Sei asikum ra ɓer le Nube se ra ɓer le nar kade nan’t joo mbak lé.

Adi kêm si tò kekek dè ra si’t lé

²⁵ Gir’n ke nè á man m’ede’n sei: adi kêm si tò kekek ɔje nyankuse ke a usei éké mann kain si éké kubu kule ra si’t lé. Ké ndikumgajer le doo nga è soo’t dum nyankuse lé wa? Ké danra doo dum dè kubu kule ra’t lé wa?

²⁶ Unni kum si an-in helge ke walé. Dé dubu ko éké dé sa ko d’ɔse nja nan’t d’um kêm damge’t lé a tɔ. Nè Bɔ si ke ndi danrán kuwe ul de. Sei nga ké gate si dum le helge nja bule ngain lé wa?

²⁷ Ké nan dann si’t asekum kile ɓal ndikumgajer le’n dè made’t se go kêm tò kekek le’n nga wa?

²⁸ Ké bain á adi kêm si tò kekek dè kubu kule ra si’t tá wa? Undei kum si maje an-in loo tɔge le ndujege ke kêm ndɔr’t. Ei rai kule ɔri yàl-yàl lé a, ojoi kubu lé a tɔ.

²⁹ Kubu ngarge le Salomon maji ngain kuwe. Nè man m’ede sei, è ke karé bè ke maje tite putu-ndujege nè géa goto.

³⁰ Sei ke kundekêm le si tin lé, mu ke walé ke barè d’ade ró’n se por gé ɓai á Nube ade in mande ɓila nè nga, ké Nube asekum kade sei kubu ulei ra si’t lé wa?

³¹ Adi kêm si tò kekek se ndɔge malang kade i tami edi nè: «Ké ri á barè j’à j’use? Ké ri á barè j’à kan-in? Ké ri á barè j’à kule ra jé’t wa?» lé.

³² Nyange nè malang nga, è dooge ke geri Nube lé á ei njé sang de se ndɔge-ndɔge. Tede Bɔ si ke danrán ger nyange malang ke sei awi ndoo de.

³³ Nè i sangi Konɓee le Nube a, se nyan ke se dè naje’n ɓita Nube à ade sei gute nyange malang ke awi ndoo de.

³⁴ Adi kêm si tò kekek dè ndɔ ke barè’t lé, tede ndɔ ke barè à ree se kêm tò kekek ke ɔje dè’n è kuwe ɓai. Ndɔ karé aw se nyankêmkon le’n ke ase’n nák-nák.