Matthieu 25 - Nouveau Testament en Gulay 2004

Sertà le ngamandege ke dɔg

¹ Konɓee ke danrán nga tò asenan se sertà le ngamandege ke dɔg ke anji geri dingem ɓai. Ei otoi lampege le de ji de’t teei awi tilei non njè taa dinye kige.

² Njé ke mige dann de’t ei njé kêm tɔ kuju tà lége a, njé ke mige ei ke gangi tchatge a tɔ.

³ Njé ke mige ke njé kêm tɔ kuju tà lége nga, ei otoi lampege le de anje koto wubu’n ji de’t.

⁴ Nè njé ke gangi tchat nga otoi lampege le de ji de’t se wubu’n nan’t mbak.

⁵ Loo ke njè taa dinye kige nga ree kalang lé ɓai ɓaa, kum de ojo nan’t ngandang-ngandang se ɓi ade go’t ɓaa, dé tò ɓi sibik a tɔ.

⁶ Dann loo bɔp ɓaa, doo karé tam tà beng ede nè: «An-in! njè taa dinye kige nga, i teei i tilei non’n.»

⁷ Ngamandege ke dɔg nè nga ɔsi nang wum in-in gir ɓi’t, gɔli lampege le de.

⁸ Njé ke kêm de tɔ kuju tà lége nga deji njé ke gangi tchat edi nè: «Adi jè wubu lampe nga ndêin se si, tede lampege le jé à wei.»

⁹ Ngamandege ke gangi tchat nga teli ilei de dè’t edi nè: «Naje, naje, wubu le jé nga ase kade jè kayai nan lé. Sei kuwe ɔti awi ɓee le njé kigennge i ndogoi le si.»

¹⁰ Nè loo ke d’a d’aw ke loo ndogonn’t ɓai ɓaa, njè taa dinye kige nga tee pan. Ngamandege ke uwei dè nja ra de nga uri lêbêt awi se njè taa dinye kige nè nga kei nan’t. Ke loon’t nè kuwe d’utu tàbit kei.

¹¹ Mbɔr go’t gugu ɓaa, ngamandege ke mi nga teli reei edi nè: «Kuwe-ɓee, Kuwe-ɓee, ɔr tàbit kei ade jè sei.»

¹² Nè Kuwe-ɓee tel ede de ede nè: «Kerɔte kuwe, man m’ede sei ndàt, man m’ger sei lé.»

¹³ Jésu tel ede de ɓai ede nè: – I ndii dè nja si’t tchên tede sei geri ndɔ’n éké kàde’n lé.

Sertà le ngonn ngar ke um nar ji ngann njéndige’t le’n

¹⁴ Konɓee ke danrán nga, è tite dingem karé bè ke ndi aw mba kêm ɓeekon ke rang’t. E ɓar ngann njéndige le’n ke kinge’n um nar le’n ji de’t. E ade de nar ade ase dè tɔg de, tɔg de.

¹⁵ E ke karé, è ade’n nar kule ke ndɔ aru mi. Ngonn njèndi ke njèkon’t joo nga, è ade’n nar kule ke ndɔ aru joo. E ade ngonn njèndi le’n ke njèkon’t mute nar kule ke ndɔ aru karé. Kuwe ngann njéndige nè nga ade nar ase dè tɔg de, tɔg de ɓaa, è ɔte ɗák aw.

¹⁶ Ngonn njèndi ke inge nar kule ke ndɔ aru mi nga, ɔte ke loon’t nè aw ndogo’n nyan tur gir ɓaa, è inge made aru mi dè’t.

¹⁷ Ngonn njèndi ke njèkon’t joo nga géa, aw ndogo nyan tur gir tɔ. E inge made aru joo dè’t.

¹⁸ Ngonn njèndi ke njèkon’t mute ke inge nar kule ke ndɔ aru karé nga, ɔte aw dubu nar le kuwe’n nè nga nang bàj.

¹⁹ Loo ke kur’n heb ɗak ɓaa, kuwe ngann njéndige nè tel ree le mbɔje kɔr nar le’n ke è um ji de’t nga le kan.

²⁰ E ke d’ade’n nar kule ke ndɔ aru mi nga, inge made dè’t aru mi. E ree ra kuwen’t ede’n ede nè: «kuwe’m, ndɔ ke ade’m nar kule ke ndɔ aru mi. An! ɗarinè, m’inge made aru mi dè’t.»

²¹ Kuwe’n tel ile’n dè’t ede nè: «Maje ngain, i i ngonn njèndi ke maje, m’ase kum kêm’m dèi’t kuwe. Nyan ke ndêin bè ke ndɔ ke m’adi nga, i tɔse kumi dè’t ade tee kɔde. M’a m’ɔri kundei ke njèkan dè nyange le’m ke rang ɓai. I ree, i ra ranel se’m man kuwei.»

²² Ngonn njèndi ke d’ade’n nar kule ke ndɔ aru joo nga géa ree ra kuwen’t tɔ ede nè: «Kuwe’m, ndɔ ke i ade’m nar kule ke ndɔ aru joo. An! m’inge made aru joo de’t ɓai.»

²³ Kuwe’n tel ede’n ede nè: «Maje ngain, i i ngonn njèndi ke maje, m’asekum kêm’m dèi’t kuwe. Nyan ke ndêin ke ndɔ ke m’adi nga, i tɔse kumi dè’t ade tee kɔde. Man m’ɔri kundei ke njèkan dè nyange le’m ke rang ɓai. I ree i ra ranel se’m man kuwei.»

²⁴ Ngonn njèndi ke d’ade’n nar kule ke ndɔ aru karé nga géa ree ke le’n tɔ. E ede kuwe’n ede nè: «Kuwe’m m’ger kété mari titeke i doo ke tur ngain, tede loo ke i dubu ko tutu lé géa aw i sa ko tutu a, kêm gar ke i naje nyan tutu lé géa aw ɔi nyan tutu a tɔ.

²⁵ Gir’n ke nè á, m’ɓeli ngain ade m’aw se nar lei ke ndɔ ke ade’m nga, m’dubu nanga m’ɓɔyɔ. An! nyan lei á tò nè, i taa.»

²⁶ Kuwe’n tel ile’n dè’t ede nè: «I i ngonn njèndi ke njèkêmyêr se njèdabe. Ke nè á i ger kété mari tite m’aw m’sa ko loo ke m’dubu nyan tutu lé a, kêm gar ke m’naje nyan tutu lé géa m’aw m’ɔi nyan tutu a tɔ ɓaa,

²⁷ né ndɔ ke a inye nar le’m ji njé ngonm narge kei ngonmn’t kade ndɔ tel’m ɓaa, m’inge mann’n dè’t.

²⁸ I taai nar kule ke ndɔ aru karé nga jiyé’t kɔke adi madé ke aw se nar kule ke ndɔ aru mi nga dè made’t.

²⁹ Oiyo, nanan ke aw se nyan jinn’t ɓaa, d’a d’ade’n made ngain dè’t kade taa ra’n pel-pel. Nè nanan ke aw se nyan jinn’t lé ɓaa, nyan ke ndêin bè ke tò jinn’t nè nga d’a d’uwe wont taa jinn’t kɔke.

³⁰ Ngonn njèndi ke njè kɔge nyan tee kɔde nga, ilei nin dann loo ke ndul’t nata. E loo ke ndɔn’t dooge à non-in se mann non kum de’t tutu a, à toin tà de vbat-vbat tutu a tɔ.

Krist, Ngonn doo tel à ree le gangtà ke ngeinn’t

³¹ Loo ke man ke m’ee Ngonn doo m’a m’tel ree se dooge ke danrán malang dann ndubra’t le’m, kêm ndɔn’t nè nga m’a m’al ɗáng ndi dè kutu-ngar’t le’m.

³² Kêm ndɔn’t nè d’a d’ɔse nja kosdooge ke dè nang nè malang nan’t nonm’t. M’a m’ɔr kum dooge ke nange dann made dege’t titeke njèkul nyan ɔr’n kum batege se bal-binyege bè.

³³ M’a m’ade batege à ndai dè jikonm’t a, bal-binyege à ndai dè jigelm’t a tɔ.

³⁴ Ngar à ede njé ke ndai dè jikonn’t kede nè: «Sei njénonkarge ke ingei ndutɔr le Bɔ’m nga, i reei on-in ɓee ke d’uwe dè nja d’ɔje’n dè si kété mari loo kunde gir nang’t.

³⁵ Kerɔte kuwe, ndɔ ke ɓo ra’m ɓaa, sei adi man nyan m’use. Ndɔ ke kunde mann tɔl’m ɓaa, sei adi man mann m’an-in. Ndɔ ke m’ee doo ke dɔ ɓaa, sei uwei man ke ra si’t.

³⁶ Ndɔ ke m’njiye ra’m karè ndát-ndát ɓaa, sei adi man kubu m’tule ram’t. Ndɔ ke ra’m tur’m ɓaa, sei ilei kum si dèm’t. Ndɔ ke m’tò dangai’t ɓaa, sei reei an-in man.»

³⁷ Njé ra nyan se dè najennge à deji Jésu kedi nè: «Kuwe-ɓee, ké ndɔ ke ra á j’an-in loo ɓo ke rai’t á j’adi nyan use wa? Ké ndɔ ke ra á j’an-in loo kunde mann ke rai’t á j’adi mann j’adi an-in wa?

³⁸ Ke ndɔ ke ra j’an-in ke doo ke dɔ á j’uwei ke ra jé’t wa? Ké ndɔ ke ra á i njiye rai karé ndát-ndát á j’adi kubu i tule rai’t wa?

³⁹ Ké ndɔ ke ra á i tò ratur éké i tò dangai’t á j’aw j’an-in wa?»

⁴⁰ Ngar à tel kile de dè’t kede nè: «Kerɔte kuwe, man m’ede sei ndàt, nyan malang ke dɔ-dɔ sei i rai se ngonn karé ke ndêin bè dann ngakonmge ke ndii nè’t nga ɓaa, è man kuwe á i rai se’m non.»

⁴¹ Ngar à kede njè ke ndai dè jigeln’t k’ede nè: «Sei njénonkilge, ɔti tam’t ke rang awi dann por ke à wei ndan lé ke d’uwe dè nja d’ɔje’n dè sú se ngann njékulege le’n.

⁴² Oiyo, ndɔ ke ɓo ra’m ɓaa, sei adi man nyan m’use lé. Ndɔ ke kunde mann ra’m ɓaa, sei adi man mann m’an-in lé.

⁴³ Ndɔ ke m’ee doo ke dɔ ɓaa, sei uwei man ke ra si’t lé. Ndɔ ke m’aw ra’m karé ndát-ndát ɓaa, sei adi man kubu m’tule ram’t lé. Ndɔ ke ra’m tur’m a, m’tò dangai’t a tɔ ɓaa, sei i reei an-in man lé.»

⁴⁴ Njé ke ndai dè jigeln’t nga géa à teli deji ngar kedi nè: «Kuwe-ɓee, ké ndɔ ke ra á j’an-in loo ɓo se kunde mann ke rai’t éké j’an-in ke doo ke dɔ éké aw rai karè ndát-ndát éké ratur rai éké i tò dangai’t á jè mbate ra sei wa?»

⁴⁵ Ngar à tel kile de dè’t kede nè: «Kerɔte kuwe, man m’ede sei ndàt, nyan malang ke sei mbati rai se ngonn ke ndêin bè karé dann madennge’t nè nga ɓaa, è man kuwe á i rai se’m non tɔ.»

⁴⁶ Njé ke ndai dè jigel à ɔti kawi loo ke kure nyan ra de à ɔde kum de tutu sár se non. Nè njé ra nyan se dè najennge à ɔti kawi loo ndikumgajer sár se non.