Matthieu 16 - Nouveau Testament en Gulay 2004

Pharisienge se Saddusienge deji Jésu kade ra nyankɔbe ade an-in

¹ Pharisienge se Saddusienge reei ra Jésu’t nain kêm’n. Ei deji nin le kade ra nyankɔbe ke gai ke in danrán ade n’an-in tá n’a n’geri titeke è Nube kuwe á ule’n.

² Nè è ile de dè’t ede nè: – Loo ke loo sɔl ɓá ɓaa, sei tami edi nè: «Barè loo à in ɗáng-ɗáng tede kàde danran ker siw.»

³ Loo ke loo ar yerer ɓaa, sei tami edi nè: «Ɓila ndi à ede, tede kàde danran tile guri-guri.» Sei geri loo kɔr kum nyange ke kàde danran’t, nè ké sei asi kɔri kum nyange ke ɗarinè nga lé wa?

⁴ Sei dooge ke njé kêm majelége se njétur gide si kade Nube ke ɗarinè i ndii dè nang nè nga, i sangi le kan-in nyankɔbe. Nè nyankɔbe karé ke rang géa a an-in lé. Jonas njèribe-dè-tà ke tà Nube’t ke è nyankɔbe ke ndɔ ke an-in kété ɓá non kuwe ase. Loo ke Jésu tam tà nè nga bè ɓaa, è inye de ɔte aw.

Jésu ndeje njékuwe-girnge le kade ei njékede gosge tite Pharisienge lé

⁵ Loo ke njékuwe-gir-Jésuge ali ba awi gide ke nú’t ɓá ɓaa, kêm de wei nal dè kɔi mapa ji de’t.

⁶ Jésu ede de ede nè: – Kêm si dè ra si’t, undei kumkunju dè ra si’t le kade sei njékede gosge tite Pharisienge se Saddusienge bè lé.

⁷ Njékuwe-gir- Jésuge murin tà kêm de’t edi nè: – N’tam bè tede mapa ke j’inyei nang anje kɔi ji jéi’t.

⁸ Nè Jésu ger mbak, è deje de ede nè: – Sei nga kundekêm le si tin lé. Ké bain á i murin tà kêm si’t edi nè è tede mapa á sei ɔyi ji si’t lé á m’tam’n se si wa?

⁹ Ké kum si gang dè’t lé ɓai wa? Mapa ke mi ke ndɔ ke i noboi dooge aru dɔg loo mi nga, ké kêm si olé dè’t lé wa? Ké ndɔ ke i tanni gute nyon-nyon mapa ke nain janga kandang wa?

¹⁰ Ké kum si gang dè’t lé ɓai wa? Mapa ji sejimute ke ndɔ ke i noboi dooge aru dɔg loo sɔ nga, ké kêm si olé de’t lé ɓai wa? Ké ndɔ ke i tanni gute nyon-nyon’n ke nain janga kandang wa?

¹¹ Ma m’ede sei m’ede nè: Undei kumkunju dè ra si’t le kade sei njékede gosge tite Pharisienge se Saddusienge lé á m’tam bè m m’tam se si tede mapa ke sei ɔyi ji si’t lé nga lé. Ké bain á kum si gang dè tà’t nè nga lé sár wa?

¹² Ke loon’t nè ɓita kum de gang dè’t ade dé ger titeke tà ke Jésu tam nga ɔje dè pululu karè lé nè è tà ke ɔje dè kede gos titeke Pharisienge se Saddusienge rai.

Pierre tam ndàt ede nè Jésu è Ngonn Nube

¹³ Loo ke Jésu ree tee ɓee-bò’t le Philippe ke ri’n nè Césarée ɓaa, è deje njékuwe-girnge ede nè: – Man ke m’ee Ngonn doo nga ké dooge tami edi nè man nan wa?

¹⁴ Dé d’ile’n dè’t d’ede nè: – Njé ke nange tami edi nè: i i Jean ke njèkule dooge manné njonm, njé ke nange tami edi nè: i i Elie, njé ke nange ke rang edi nè: i i Jérémie éké njèribe-dè-tà ke tà Nube’t karé.

¹⁵ Jésu tel deje kuwe ɓai ede nè: – A ɓaa sei, ké i tami edi nè man m’ee nan wa?

¹⁶ Simon Pierre in ile jésu dè’t ede nè: – I i Krist, Ngonn le Nube ke njèndi kumgajer.

¹⁷ Jésu ede Pierre ede nè: – Simon, ngonn Jonas, rai neli tede è doo ndul á ade kumi gang dè tà’t nè nga lé. Nè è Bɔ’m ke danrán kuwe ade kumi gang dè tà’t nè nga.

¹⁸ Nè man m’edi titeke i i Pierre, dè kuberi her ke m’an m’unde njékebe nange le’m dè’t. Tɔgmong le yo ase ra se de nyan karé lé.

¹⁹ M’a m’adi tɔgmong kɔr tà rebe Konɓee ke danrán. Nyan ke i ɔge ra dè nang nè nga ɓaa, d’a d’ɔge ra danrán tɔ. Nyan ke i inye loo ade dé ra dè nang nè nga, d’a d’inye loo kade dé ra danrán tɔ.

²⁰ Jésu on njékuwe-girnge njanm-njanm le kade edi doo karé tite ke n’ee Krist nga lé.

Jésu tel ede de tà kwei se kunde loo tee le’n dann njé ke koo’t

²¹ Unn gir kêm ndɔn’t nè nga, Jésu-Krist ede njékuwe-girnge ede nè: – Gar-gar m’a m’aw ke kêm ɓee-bò ke Jérusalem. Ngatɔgege se maw njékuje nyan-mesege a, se njéndang magtubge a tɔ, à rai se’m nyantosowur. D’ade tɔl’m nè ndɔ ke njékon’t mute ɓaa, m’a m’unde loo tee dann njé ke koo’t.

²² Pierre ɔr Jésu njɔl se kar’n aw se’n in se’n dè tà’t nè ede nè: – Kuwe-ɓee, maje kade Nube ngonmi ade nyan nè nga tee dèi’t lé.

²³ Nè Jésu tel mer Pierre ede’n ede nè: – Njèban, ɔte tam’t kɔke. I tel i jig ke le tuge’m kile’m dann kaiya’t, tede tàgir lei in ra Nube’t lé, nè in ra dooge’t.

²⁴ Taɓai Jésu ede njékuwe-girnge ede nè: – Ke nè á doo karé ndige kunn rebe goom’t ɓaa, maje kade inye go tàgir ke ɔje dè ra’n kɔke a, maje kade uwe dè nja ra’n se ndɔge malang le kwei titeke man m’ra’n bè ɓita unn dè nja’m têr-têr ɓai.

²⁵ Nanan ke ndige kaje ra’n ɓaa à ile ra’n kɔke salang. Nè nanan ke ile ra’n kɔke salang tede’m man ɓaa à ndi kumgajer kuwe.

²⁶ Ke nè á doo karé inge nyan malang ke dè nang nè, nè ile ngarankum ra’n kɔke salang ɓaa, ké ri á è soon’t wa?

²⁷ Ndɔ karé ke man ke m’ee Ngonn doo nga, m’a tel ree se dooge le’m ke danran dann ndubra’t le Bɔ’m ɓaa, kêm ndɔn’t nè nga m’a m’uge nanan géa se goo nyan ra’n ra’n.

²⁸ Kerɔte kuwe, man m’ede sei ndàt, njé ke nange dann dooge ke ndii nè nga à an-in Konɓee le’m man Ngonn doo se kum de pa ɓita à weii ɓai.