Matthieu 15 - Nouveau Testament en Gulay 2004

Pharisienge deji Jésu tà ɔje dè nyangirkà

¹ Pharisienge se njéndang magtubge in-in Jérusalem reei ra Jésu’t deji nin edi nè:

² – Ké bain á njékuwe-girige ali tà tà nyangirkà’t le kà jéige wa? Ké bain á ei togoi ji de lé kuwe usei nyan wa?

³ Nè Jésu deje de ede nè: – A sei, ké bain á ali tà tà ndukunn’t le Nube tede nyangirkà le si tá wa?

⁴ Oiyo Nube tam ede nè: «Ile koje dè bɔi’t se koin» éké «Nanan ke tam tà ke majelé se bɔ’n éké kon’n ɓaa, d’a d’ade kum’n à udu gar-gar.»

⁵ Nè sei ɓaa, i tami edi nè: «Nanan ke ede bɔ’n éké kon’n ede nè: nyan ke m’ayé ra’n sei nga, m’unn m’unde se ninn’n m’ade Nube ɓá ta.» Doo ke ra titeke bè nga ɓaa, ile koje dè bɔ’n se kon’n lé.

⁶ Titeke bè á sei adi nyangirkà le si tá pujur dè tà le Nube.

⁷ Sei njékede gosge! Tà ke Esaie tam kété mari ɔje’n dè si ede nè:

⁸ «Kosdooge nè nga ɗɔyi man se tà de karè, nè ɓengre de heb se’m.

⁹ Dé ɗɔi’m ke nonon bè karè, tede nyan ke dé ndó nan nga, è ndukunnge ke in ra dooge ke dè nang nè karè.»

Nyange ke ade doo mine’n

¹⁰ Go’t gugu Jésu ɓar doobulege ade reei rann’t. E ede de ede nè: – Uri mbi si ooi tà nè maje le kade i geri gir’n.

¹¹ Nyan ke in nata aw kêm doo’t á tel’n ke doo ke mine lé, nè nyan ke in kêm doo’t tee tànn’t á ke nyan ke ade doo tel mine’n.

¹² Njékuwe-gir-Jésuge reei rann’t edi nin edi nè: – Tà ke i tam á Pharisienge ooi nga tuge de jig’t, nè ké i ger bè lé wa?

¹³ Jésu ile de dè’t ede nè: – Kage ke rara ke Bɔ’m ke danrán man’n lé ɓaa, d’ade d’ɔr’n se ngire’n bere ɓarak kile’n kɔke.

¹⁴ Inyei de! tede dé njékumtɔge ke njékɔr non njékumtɔ made dege. Ke nè á njèkumtɔ ɔr non njèkumtɔ made’n ɓaa, ei joo mbak à osoi kêm bolè’t.

¹⁵ Pierre deje Jésu ede nè: – Ɔrgir gostà nè nga ade jè sei.

¹⁶ Jésu deje Pierre ede nè: – Sei géa, ké ɗarinè i geri gir gostà nè nga lé ɓai tɔ wa?

¹⁷ Nyan malang ke in nata aw kêm tà doo’t nga, tuge gang aw jebelenn’t ade aw ede’n yide. Ké sei geri bè lé wa?

¹⁸ Nyan ke tee tà doo’t nga in dè ɓengrenn’t. E nè á è nyan ke tel doo ke nyan ke mine.

¹⁹ Tàgirge ke majelé, tɔl doo, sang dinye le doo, tò se nan ke kaiya’t, mêndé nyan, tête tà kunde tà doo’t, taje ndu a tɔ nga, in-in dè ɓengre doo’t.

²⁰ Nyange nè á tel doo ke nyan ke mine, nè kuse nyan anje togo ji à ade doo à mine lé.

Kundekêm le dinye ke è doo ke dɔ

²¹ Jésu in loon’t nè aw kêm ɓee-bòge ke Tyr se Sidon.

²² An! dinye karé ke kêm ɓee ke Canan unde loo tee tam tà se ndu’n ke bòi beng ede Jésu ede nè: – Kuwe-ɓee, Ngonn David, an kumtondoo le’m kɔkrɔ karè. Ndil ke majelé ra kum ngonn’m ke dinye ndoo ngain.

²³ Nè Jésu ile’n dè’t lé. Njékuwe-girnge reei edi nin edi nè: – I rɔyé ade n’aw tede n’non go jéi’t ɗêl-ɗêl ngain.

²⁴ Jésu tel ile de dè’t ede nè: – Man nga Nube ule’m ɔje dè batege ke kêm ɓeekon ke Israel ke ndemi kuwe karé bere.

²⁵ Nè dinye nè nga ree ɔse keje’n non Jésu’t ede’n ede nè: – Kuwe-ɓee, kɔkrɔ karè i ra se’m kuwe.

²⁶ Jésu tel ile dinye nè nga dè’t ede nè: – Kunn mapa le ngann dooge kile kade ngann bisege nga majelé.

²⁷ Dinye nè nga ile jésu dè’t ede nè: – Oiyo Kuwe-ɓee, è kum kuwe. Nè ngann bisege nga, nyon-nyon mapa ke toso nang gir table’t le kuwe dege á usei.

²⁸ E á Jésu tel ede dinye nè ede nè: – Hai! dinye, kundekêm lei tò ɓel ngain. M’a m’ra nyan ke i deje nga le kadi. Kêm kàdenn’t nè kuwe ra ngonn le dinye nè tel tò karè ndát-ndát.

Jésu aje njératurge gai-gai

²⁹ Jésu in kêm ɓee-bòge ke Tyr se Sidon aw kum’n ke ngang ba’t ke ɓeekon ke Galilée. E al aw ndi dè mbal’t.

³⁰ Kosdoo-bulege ngain reei rann’t dik-dik. Ei reei se njé njiye metege se njédɔgemetege se njékumtɔge a, se njé ke tami tà lé a tɔ. Kosdoo-bulege nè nga reei se njératurge ke rang bule undei de nang nja Jésu’t ɗêng-ɗêng. E ɔr ratur ra de’t.

³¹ Ndil kosdoo-bulege tee an-in soin-soin. Njé ke tami tà lé unni gir tami tà. Njédɔgemetege teli njiyei ɗáj-ɗáj. Njémetege njiyei awi a, teli a, njékumtɔge géa an-in loo njai-njai a tɔ. Doobulege ɔsi pa ulei ndubra dè Nube’t le Israel.

Jésu ade dooge aru dɔg loo sɔ mapa usei

³² Jésu ɓar njékuwe-girnge rann’t ede de ede nè: – Man m’an kumndoo le doobulege nè nga. An-in! ei ndii se’m ase ndɔ mute nè ingei nyan usei lé. Man m’ndige le kinye de kade awi kêm de ɓo lé nè bainléa kumkil à ra de rebe.

³³ Njékuwe-gir-Jésuge deji nin edi nè: – Ké j’à j’ingei mapa ra kêm dile loo’t nè le kade ase dooge ke bulei tchaprai nè nga wa?

³⁴ Jésu ede de ede nè: – Ké awi se mapa kandang ji si’t wa? Dé d’ede’n d’ede nè: – J’aw se wal mapa ji sejimute se ngann kanjege ndêin a tɔ.

³⁵ Jésu unn ndu’n ade doobulege teli ndii nang.

³⁶ E unn mapa ke ji sejimute se kanjege nè nga, ra Nube oiyo ɓita uwe tête danné ade njékuwe-girnge. Njékuwe-girnge in-in ke kété adi doobulege.

³⁷ Dé malang d’use mapa dé ndann gɔj-gɔj. Dé tann gute nyon-nyon mur ke nain nang janga ji sejimute.

³⁸ Dooge malang ke usei mapa nga asi dingemge aru dɔg loo sɔ nal mbɔje dinyege se ngannge.

³⁹ Loo ke Jésu inye doobulege ade awi ɓá ɓaa, è al kêm bato’t aw kêm ɓeekon ke Magadan.