Marc 2 - Nouveau Testament en Gulay 2004

Jésu aje dingem ke ra’n wei tonrin

¹ Ase ndɔ bule go’t gugu ɓaa, Jésu tel ree kêm ɓee-bò ke Capernaum. Dooge ooi ser’n titeke è ndi kêm kei karé bè.

² Kosdooge ngain njin nan rann’t njàng-njàng kêm kei ade loo ube de bang sár tee’n tà kei’t nata. Jésu ndi ede de Tà ke Maje.

³ Dingemge sɔ unni doo karé ke ra’n wei tonrin mari reei se’n ra Jésu’t.

⁴ Dingemge nè nga asikum kawi se njèdɔgemete nè ra Jésu’t lé, tede doobulege rusi loo táp-táp. Dé d’al dɔ d’ɔr dè kei ke sɔbe dè loo ke Jésu ndii’n tutu. Go’t gugu d’unn dingem ke ra’n wei tonrin nè nga d’ule’n yêrêr se nyan too’n bere mbak se kum bolè.

⁵ Loo ke Jésu an kundekêm le de titeke bè ɓaa, è ede doo ke ra’n wei tonrin nè nga ede nè: – Ngonn basa, kaiyage lei ɔr dèi’t ɓá ta.

⁶ Njékɔrgir gute-nduge ke nange ndii loon’t nè nga tɔ. Ei giri tà dè ɓengre de’t edi nè:

⁷ – Ké bain á doo-nyan le doo nè nga tam tà titeke bè wa? E nede Nube. Ké Nube kuwe karé bere á asekum kɔr kaiya dè dooge’t lé wa?

⁸ Ke loon’t nè kuwe Jésu ger tàgirge le de ke kêm ɓengre de’t mbak. E deje de ede nè: – Ké bain á sei giri tàge ke titeke bè dè ɓengre si’t wa?

⁹ Kede doo ke ra’n wei tonri kede nè: «Kaiyage lei ɔr dèi’t éké ɔse nang in dɔ, i ɓir nyan tooi, ɔte i njiye.» Ké è ke ra á è tà ke loo tam’n tur dum made wa?

¹⁰ Nè m’a m’tɔje sei le kade i geri titeke man Ngonn doo m’aw se tɔgmong le kɔr’n kaiya dè dooge’t dè nang nè. Jésu ede doo ke ra’n wei tonrin ede nè:

¹¹ – M’edi, ɔse nang in dɔ, i ɓir nyan tooi ɓaa ɔte aw kêm kei lei.

¹² Ke loon’t nè kuwe, dingem nè nga ɔse nang in dɔ, ɓir nyan too’n, unde loo tee tàkum dooge’t malang ade teli ndii giw. Dooge malang ulei ndubra dè Nube’t edi nè: – Jè j’an nyan ke titeke bè nja karé ndan lé ɓai.

Jésu ɓar Lévi njètaa tir

¹³ Ndɔ karé bè Jésu tel aw tà ba-bò ke Galilée gugu. Kosdooge malang reei rann’t ade ndó de nyan.

¹⁴ Loo ke Jésu à dere le kaw ɓaa, è an Lévi ngonn Alphée ndi tà kei taa tirge’t. E ede’n ede nè: – Unn rebe goom’t. Lévi ɔse nang in, unn rebe go Jésu’t.

¹⁵ Ndɔ karé bè, Jésu se njékuwe-girnge ndii à usei nyan kêm kei le Lévi. Njétaa tirge se njé ke d’an de ke njé ra majelége bule ndolèi go de awi usei se de nyan.

¹⁶ Njékɔrgir gute-nduge le Pharisienge ke nange géa ndii tutu tɔ. Loo ke an-in dooge ke d’an de ke njé ra majelége a, se njétaa tirge a tɔ, tà nyankuse’t se Jésu ɓaa, ei deji njékuwe-girnge edi nè: – Ké bain á n’gang keng ke dann dooge’t nè nga n’use se de nyan wa?

¹⁷ Loo ke Jésu oo tà ke dé tam nga bè ɓaa, è ede de ede nè: – Njé ke ra de mong maj-maj nga, awi ndoo njèkuge kaje ra de’t lé. Nè è njératurge á awi ndoo’n. M’ree dè nang nè le ɓar njé ke an-in ra de ke njé ra nyan se dè najennge lé. Nè m’ree le ɓar njé ke d’an de ke njé ra nyan majelége.

Tà deje ke ɔje dè kɔge kêm ɓo

¹⁸ Ndɔ karé bè, pajage le Jean ke njèkule dooge manné njonm se njé ke le Pharisienge ɔgi kêm de ɓo. Pharisienge ke nange reei ra Jésu’t deji nin edi nè: – Pajage le Jean se njé ke le jé ɔgi kêm de ɓo. Ké bain á i ɓaa, njé ke lei ɔgi kêm de ɓo lé wa?

¹⁹ Jésu deje de ede nè: – Dooge ke njè taa dinye kige ɓar de loo taa nan’t le’n nga, ké asikum kɔgi kêm de ɓo wa? Ḿ-m̀, è bè lé! Kêm ndɔge malang ke ei nain-in se’n ɓai nga, ei asikum kɔgi kêm de ɓo lé.

²⁰ Nè ndɔ ke d’a d’uwe njè taa dinye kige dann de’t wont kɔr’n ɓita, d’a d’ɔge kêm de ɓo kêm ndɔn’t nè ɓai. Jésu tel ede de ede nè:

²¹ – Doo à kunn tà kubu ke kige kile’n kum è ke ndise lé. Ke nè á doo karé unn tà kubu ke kige ile’n kum è ke ndise ɓaa, tà kubu ke kige à uwe è ke ndise le til’n banjáng-banjáng dum ke kété ɓai.

²² Doo à sur yibe nduu ke sɔl ke unn gir pà kêm sɔlge ke mari’t lé, tede yibe nduu ke sɔl ke unn gir pà nga, à unde sɔlge ke mari ndàt gang kade yibe ule nang gɔngong-gɔngong a, sɔlge géa ei nyange ke tuju a tɔ. Gar-gar, i suri yibe ke sɔl ke unn gir pà kêm sɔlge ke kige’t ta.

Jésu ede nè, n’ee ngar dè ndɔ taa kebe

²³ Ndɔ taa kebe karé bè, Jésu se njékuwe-girnge unni rebe ke tee kêm ndɔrge’t. Njékuwe-girnge unni gir têti dè ko tonmi usei dɔ-dɔ.

²⁴ Pharisienge deji Jésu edi nè: – Ké bain i se njékuwe-girige ali tà tà gute-ndu’t le jéi wa?

²⁵ Jésu tel deje de ede nè: – Nyan ke ndɔ ke David ra nga, ké i tutei tà’n an-in ndan lé wa? Ndɔ karé bè, ɓo ra de se dooge le’n. Nè nyan ke kade usei goto.

²⁶ David ur lêbêt aw kêm kei kubu’t le Nube koto ngurwalge use a, ade dooge le’n usei a tɔ. Ngurwalge ke tooi se ninn de nè nga ɔji dè njékuje nyan-mesege kuwe karé bere. E kêm ndɔn’t ke Abiatar ee’n maw njèkuje nyan-mese.

²⁷ Taɓai Jésu ede de ede nè: – Nube unde gir ndɔ taa kebe tede le doo. Nè doo nga, Nube unde’n tede le ndɔ taa kebe lé.

²⁸ Gir’n ke nè á man ke m’ee Ngonn doo nga, m’ee ngar dè ndɔ taa kebe.