Marc 16 - Nouveau Testament en Gulay 2004

Jésu unde loo tee dann njé ke koo’t

¹ Loo ke ndɔ taa kebe dere ɓá ɓaa, Marie ke ɓee le’n è Magdala a, Salomé se Marie kon Jacques ke ndêin ndogoi wubuge ke ete maje tede kaw’n barè ndum ninn Jésu.

² Ndɔ ke desêin ke njè kutu go ndɔ taa kebe nga, dinyege nè teei se ndɔgé ɓat loo ke kàde tee lé ɓai awi dè ɓada.

³ Ei deji nan rebe edi nè: – Ké nan à ndubri kuberi mbal ke bòi ke d’utu’n tà be ɓade nè nga kile rang kade jéi wa?

⁴ Dinyege nè reei teei dè ɓada teri loo an-in. Ei an-in titeke kuberi mbal ke bòi ke d’utu’n tà be ɓade nga, doo ndubri ile rang ɓá ta.

⁵ Taɓai loo ke d’aw kêm bolè mbal ke dé son ɓaa, d’an ngonn basa karé. E ndi nang se ke dè jikon, è ule kubu ke ngal ke nda káng-káng rann’t. Loo ke d’an’n bè ɓaa, tà ige de sêl ade ndil de tee an-in soin-soin.

⁶ Ngonn basa nè nga ede de ede nè: – Adi ndil si tee an-in soin-soin lé. Sei sangi Jésu ke Nazareth ke ndɔ ke dé tɔl’n kàde kage-ke-dese’t nga; Nube ade unde loo tee dann njé ke koo’t ɓá. E goto loo ke nè’t. An-in! è loo ke nè á ndɔ ke d’unde ninn’n tutu.

⁷ Nè awi edi Pierre se njékuwe-gir-Jésuge ke rang titeke Jésu ndi aw kum’n ke Galilée non si’t kété non. A an-in Jésu kêm ɓeekon ke Galilée titeke ndɔ ke kété ede’n sei nga.

⁸ Marie ke ɓee le’n è Magdala se Salomé a, se Marie kon Jacques ke ndêin, undei loo teei kêm be-ɓade ke dé son kàde mbal’t. Tà ige de sêl ade ndebi nginn-nginn. Ɓel unde de ndàt gang de ade tà karé bè géa tee tà de’t ade doo oo lé. [

Jésu unde loo tee pan kum Marie ke Magdala

⁹ Jésu unde loo tee dann njé ke koo’t tàgir loo’t. E ndɔ ke desêin ke njè kutu go ndɔ taa kebe. E unde loo tee pan kum Marie ke ɓee le’n è Magdala. Marie ke Magdala nga, ndɔ ke kété Jésu rɔ ndilge ke majelé ji sejimute kêmn’t kɔke.

¹⁰ Marie tel aw ra njémade-loo-kawge le Jésu ke kété ei nan’t se’n. Ei ndii dann kumndoo’t à noin. E ede de titeke Jésu nga unde loo tee dann njé ke koo’t ɓá.

¹¹ Marie ede de ede nè: – Jésu nga ndi kumgajer, m’an’n se kum’m. Nè d’unn mbi de dè tà’t le’n.

Jésu unde loo tee pan kum njékuwe-girnge joo

¹² Njékuwe-gir-Jésuge joo in-in Jérusalem kêm ndɔn’t nè à awi ke ngonn ɓee karé’t bè. Jésu unde loo tee pan kum de’t. Nè ra ra’n tite doo ke rang bè.

¹³ Njé ke joo nè nga teli awi kêm ɓee-bò ke Jérusalem. Ei edi gute njékuwegir-Jésu made dege ke rang tà nè; nè ei unni mbi de dè tà’t le njé ke joo nè kuwe ɓai.

Jésu unde loo tee pan kum njékuwe-girnge ke dɔg-gidé-karé

¹⁴ Loo ke njékuwe-gir-Jésuge ke dɔg-gidé-karé ndii à usei nyan ɓaa, Jésu tee pan kum de’t malang. Jésu in se de ede nè: – Sei njé kunn mbi dè tàge’t se njékêm nderge! Sei mbati kumi kêm si dè tà’t le njè ke an-in man kumgajer loo kunde loo tee’t le’m dann njé ke koo’t.

¹⁵ Go’t gugu Jésu ede de ede nè: – Awi se loo malang dè nang nè, ilei mber Tà ke Maje adi dookundege bere mbak.

¹⁶ Doo ke um kêm’n dè Tà ke Maje’t ade d’ule’n manné njonm ɓaa, d’a d’aje’n. Nè doo ke um kêm’n dè’t lé ɓaa, tà à uwe dè’n ndɔ gangtà’t.

¹⁷ Njé ke d’um kêm de dè Tà ke Maje’t nga, Nube à ade d’ade ra nyankɔbege ke nè: d’a rɔ ndilge ke majelé se ri’m, d’a tam tà tam dooge ke rang.

¹⁸ Ke nè á d’uwe li jênênnge se ji de, ke nè á d’an-in kugege ke asikum tɔl de géa, à rai se de nyan karé bè lé a tɔ. Ke nè á d’ile ji de dè njératurge’t ɓaa, ra de à tel mong maj-maj a tɔ.

Jésu tel aw ra Nube’t gugu

¹⁹ Loo ke Kuwe-ɓee Jésu ede de tàge nè gir gang ɓá ɓaa, Nube ade aw ndi dè jikonn’t danrán nú.

²⁰ Njékuwe-gir-Jésuge undei loo teei kêm ɓee ke Jérusalem awi ilei mber Tà ke Maje se loo malang. Kuwe-ɓee è der gir de ade dé ra nyankɔbege d’utu’n go Tà ke Maje ke d’ile mber’n. Gir’n ke nè á dooge an-in tà le’n ke ngarankum tà.]