Marc 11 - Nouveau Testament en Gulay 2004

Jésu aw kêm ɓee-bò ke Jérusalem

¹ Jésu se njékuwe-girnge undei dè ɓee ke Bethpagé se Béthanie ngɔr. Bethpagé se Béthanie nga, ei kɔki ɓeege le ɓee-bò ke Jérusalem. Loo ke ei awi teei kàde mbal ke kage olivierge ndai tutu ɓaa, Jésu ɔr njékuwe-girnge joo ule de nonn’t kété.

² E ede de ede nè: – Awi kêm kɔki ɓee ke tò non si’t non. Loo ke awi i teei kêm ɓee’t nè ɓaa, ke loon’t nè kuwe a ingei ngonn koro ke dingem ke dé dɔ’n nang. E ngonn koro ke ndɔ karé doo in dènn’t lé ɓai. I tutii, i reei se’n adi man.

³ Ke nè á doo karé deje sei ede nè: «Ké bain á sei tutii wa?» ɓaa, edi nin edi nè: «E Kuwe-ɓee lei Jésu á aw ndoo kin dènn’t.» Ke loon’t nè kuwe à inye sei kade i reei se ngonn koro nga.

⁴ Loo ke njékuwegir-Jésuge ke joo nè ɔti awi ɓaa, ingei ngonn koro nè nga tɔ. Dé dɔ’n nang ka-rebe’t ngɔr se tàbit kei ke nata ɓaa, dé tutu’n.

⁵ Dooge ke nange ke ndai loon’t deji de edi nè: – Ké i tuti ngonn koro nè nga le rai ri wa?

⁶ Njékuwe-gire-Jésuge edi dooge nè nga titeke Jésu ede’n de. D’inye loo d’ade njékuwe-gir-Jésuge tuti koro nè nga ɔti awi.

⁷ Njékuwe-gir-Jésuge reei se ngonn koro nè nga rann’t. Ei labi kubuge le de ke bòi yul-yul dè ngonn koro’t adi Jésu al ndi dè’t mbeng.

⁸ Dooge ngain labi kubuge le de ke de bòi yul nanga. Njé ke nange têti balkum kagege labi nang ka-rebe’t kété non Jésu’t ɗɔyi nin.

⁹ Dooge ke nonn’t kété se njé ke goon’t gugu rai nyan jik-jik edi nè: – Ngar ke Kuwe-ɓee Nube ule’n nga, maje kade ndutɔr le Nube nain se’n ade dè’n mong káng-káng.

¹⁰ Maje kade ndutɔr nain se konɓee ke ndi à ree. Konɓee nè nga à tò tite le kà jéi David ke kété. Ulei ndubra dè Nube ke njè ndi kêm danran’t dɔ.

¹¹ Jésu ree tee kêm ɓee-bò ke Jérusalem. E aw kêm kei le Nube gon loo ɗêrêr-ɗêrêr. E tel se njékuwe-girnge ke dɔg-gidé-joo reei kêm ngonn ɓee ke Béthanie tede ndɔ il ɓá ta.

Jésu mann kage koté ke ann lé

¹² Ndɔ ke njékon’t joo, loo ke Jésu se njékuwe-girnge à in-in Béthanie le kawi ɓaa, ɓo ra Jésu.

¹³ Loo ke è unn kum’n ɓaa, è an dè kage koté ite lurr. E tɔ aw giré kade bainléa n’inge kann’n dè’t n’use. Nè loo ke è ree ngɔr ɓaa, è an mbi’n karè tede nan kann le kage koté nain ɓai.

¹⁴ Jésu tam se kage ede nè: – Doo karé bè géa à kuse kanni gugu ndan lé. Njékuwe-gir-Jésuge ooi tà ke è tam nè nga se mbi de.

Jésu rɔ njéra gatege kêm kei’t le Nube

¹⁵ Jésu se njékuwe-girnge teei kêm ɓee-bò ke Jérusalem. Jésu aw kêm kei’t le Nube. E unn gir rɔ njékige nyange se njéndogo nyange nata. E koto tablege le njémbel narge se nyan-ndige le njékige derge tile piring-piring kɔke.

¹⁶ Jésu inye doo karé bè géa ade unn nyan tuge’n kêm kei le Nube gang lé.

¹⁷ E deje de ede nè: – Kei le’m nga, ké njéribe-dè-tàge ke tà Nube’t ndangi kêm magtub’t edi nè: «A è kei kɔje tà se Nube le kosdooge malang» lé wa? Ké bain á sei i telii ke mbonreen loo ɓɔyɔ ra le gon-ɓogege wa?

¹⁸ Maw njékuje nyan-mesege se njékɔrgir gute-nduge ooi sertà nè. Ei sangi ké se rebe ke ra n’a tɔli Jésu wa? Nè dé ɓel’n tede doobulege malang nga, ndil de tee an-in soin-soin dè nyan ke è ndó de se ndɔge-ndɔge.

¹⁹ Loo ke ndɔ il ɓá ɓaa, Jésu se njékuwe-girnge undei loo kêm ɓee-bò’t nè teei awi.

Jésu tel tam tà ɔje’n dè kage koté ke è mann’n

²⁰ Barè se ndɔgé ɓat, loo ke Jésu se njékuwe-girnge teli teei loo ke kage koté nda tutu nga ɓaa, ei an-in nin tutu wùm sár tee’n girn’t nang.

²¹ Kêm Pierre olé dè tà ke tagela Jésu tam se kage koté ɓaa, è ede Jésu ede nè: – Kuwe jé, an! kage koté ke tagela ɔr se’n nga wei njanm.

²² Jésu ede njékuwe-girnge ede nè: – Undei kêm si dè Nube’t.

²³ Kerɔte kuwe, man m’ede sei ndàt, ke nè á doo karé ede mbal nè ede nè: «Ɔr rai loo ke nè’t kɔke aw oso ba ɓaa, d’ade ra nyan nè kade’n kuwe. Nè è tà le kade um kêm’n dè’t bɔk-bɔk m naje se ra’n dè’t lé.

²⁴ Gir’n ke nè á man m’ede sei: nyan malang ke sei deji Nube loo ke ɔjii se’n tà nga, ke nè á umi kêm si dè’t titeke a ingei nga nyan nè nga kerɔte kuwe ɓaa, d’a d’ade sei nyan nè kuwe.

²⁵ Dɔ-dɔ loo ke in-in i ndai dɔ le kɔji tà se Nube nga, ke nè á kêm si on sei dè doo karé’t ɓaa, inyei go nyanrage le’n ke se go rebe’n lé. Titeke bè á Bɔ si ke ndi danrán géa à inye go nyanrage le si ke se go rebe’n lé le si nga tɔ.

²⁶ Nè ke nè á inyei go nyanrage ke se go rebe’n lé le dooge ke rang lé ɓaa, Bɔ si ke ndi danrán géa à inye go nyanrage le si ke se go rebe’n lé nga ndan lé tɔ.

Dooge naji se ra de dè tɔgmong’t le Jésu

²⁷ Jésu se njékuwe-girnge teli reei kêm ɓee-bò ke Jérusalem gugu. Jésu njiye kêm kei le Nube. Ke loon’t nè kuwe, maw njékuje nyan-mesege se njékɔrgir gute-nduge se ngatɔgege reei rann’t deji nin edi nè:

²⁸ – Ké nan adi tɔgmong á i ra’n nyange nè nga wa? Ké nan á inye loo adi kade i ra’n nyange ke titeke bè wa?

²⁹ Jésu ede de ede nè: – M’a deje sei tà karé luk-luk le koo. Ke nè á ilei man dè’t ɓaa, m’a m’ede sei ri njèkinye loo kade m’ra’n nyange nè nga tɔ.

³⁰ Kule dooge manné njonm ke ndɔ ke Jean ile m’ber’n kété ɓita ule dooge manné njonm a tɔ nga, ké gir’n in danrán ra Nube’t éké in ra dooge’t wa? Ilei man dè’t.

³¹ Dé murin tà dann de’t d’ede nè: – Ké j’à kilei n’ee dè tà’t kedi nè ri wa? Ke nè á j’à j’ilei n’ee dè’t kedi nè: Gir’n in danrán ra Nube’t ɓaa, n’a n’deje jèi kede nè: A ɓaa ké bain á umi kêm si dè tà’t le Jean lé wa?

³² Ke nè á j’à j’ilei n’ee dè’t kedi nè: Gir’n in ra dooge’t ɓaa, kosdoo-bulege à in-in se jéi se tà ke le de tɔ. Dé ɓel kosdoo-bulege tede dooge malang an-in Jean ke ngarankum njèribe-dè-tà ke tà Nube’t.

³³ Gir’n ke nè á dé tel d’ile’n Jésu dè’t d’ede nè: – Jè, jè ger lé. Jésu tel ede de ede nè: – Ke nè á è bè ɓaa, m’a m’ede sei ri njékinye loo kade m’ra’n nyange nè nga ndan lé tɔ.