Marc 1 - Nouveau Testament en Gulay 2004

Mber kile le Jean ke njèkule dooge manné njonm

¹ Tà ke Maje le Jésu-Krist, Ngonn le Nube nga unn gir’n titeke bè.

² Dé ndang kêm magtub’t le Esaie njèribe-dè-tà ke tà Nube’t d’ede nè: «An! m’ule njèkawkule le’m noin’t. E à gɔl rebe lei.

³ E ndu dingem karé ke njèkile mber kêm dile’t ede nè: I gɔli rebe le Kuwe-ɓee Krist, i rai kile rebe le’n adi asenan lêtêt.»

⁴ Jean ke njèkule dooge manné njonm unde loo tee kêm dile’t ile mber ede nè: – I turi hal si adi d’ule sei manné njonm. Titeke bè á Nube à inye’n go kaiyage le si.

⁵ Dooge ke ɓeekon ke Judée bere mbak se njé ke kêm ɓee-bò ke Jérusalem malang awi rann’t ɔri gir kaiyage le de ke nata adi ule’n de manné njonm dann ba ke Jourdain loo ke ɔri gir kaiyage le de ke nata.

⁶ Jean ule kubu ke ngal ke d’ojo se bin lugman rann’t, è dɔ ɓede’n se ndar; ganrin dɔg-ge se wubu tuju ke walé á ke nyankuse’n.

⁷ E ede doobulege ndàt ede nè: – E ke à ree goom’t gugu non nga tɔgmong le’n dum dè le’m; man m’ase tutu kule gabang-ge ke njann’t lé.

⁸ Ma m’ule sei manné njonm, nè è ɓaa à ɔr sei kunde sei se ninn’n se Ndil-Kêmnda.

Jean ule Jésu manné njonm a, sú nan’n a tɔ

⁹ Kêm ndɔnge’t nè nga, Jésu in Nazareth ɓeekon ke Galilée ree ade Jean ule’n manné njonm dann mann ke Jourdain.

¹⁰ Loo ke à unde loo dann mann’t le tee ɓaa, ke loon’t nè kuwe è an kum danran teen halal, Ndil ree ndi dènn’t tite der-nda bè.

¹¹ Ndu Nube ɓar danran nú ede nè: – I i Ngonn’m ke m’tári ngain, i nyan ranel le’m a tɔ.

¹² Ke loon’t nè kuwe, Ndil ɔse’n aw se’n kêm dile’t.

¹³ E ra ndɔ kɔr-sɔ kêm dile’t, Sú ree rann’t ule kêm’n. E ra ɓee se dange ke walé, nè dooge ke danrán rai se’n dè nyan ke aw ndoo’n.

Jésu ɓar mbawge sɔ

¹⁴ Loo ke d’uwe Jean d’ile’n dangai’t ɓá ɓaa, Jésu in ree ɓeekon ke Galilée, è ile mber Tà ke Maje le Nube, ede nè:

¹⁵ – Ndɔ ke Nube ɔje nga ase deĵ ɗarinè ta, Konɓee le Nube nain ngɔr. I turi hal si, undei kêm si dè Tà ke Maje’t a tɔ.

¹⁶ Loo ke Jésu à njiye tà ba ke Galilée ɓaa, è an Simon se ngokon’n André ndai à ilei bure le de dann ba’t tede ei mbawge ke njékɔse kanjege.

¹⁷ Jésu ede de ede nè: – Unni rebe goom’t, m’a m’tel sei ke njéndon dooge ɗarinè ta.

¹⁸ Ke loon’t nè kuwe, d’inye burege le de, d’unn rebe goon’t.

¹⁹ Loo ke è aw ndêin ke kété ɓaa, an Jacques ngonn le Zébédée, se ngokon’n Jean, ndii kêm ngonn bato’t à gɔli burege le de.

²⁰ Ke loon’t nè kuwe, Jésu ɓar de ɓaa, ei inyei bɔ de Zébédée kêm ngonn bato’t se njékulege le’n unni rebe go Jésu’t.

Jésu aje dingem ke ndil ke majelé tò kêmn’t

²¹ Jésu se njékuwe-girnge awi kêm ɓee ke Capernaum. Ke loon’t nè kuwe, Jésu aw kêm kei kebe nan’t se ndɔ taa kebe, è unn gir ndó dooge nyan.

²² Tà ige de sêl dè gos nyan-ndó’t le’n. E ndó de nyan se tɔgmong ke Nube ade’n m ndó de nyan tite le njékɔrgir gute-nduge karè lé.

²³ Dingem karé ke ndil ke majelé tò kêmn’t ndi kêm kei kebe nan’t nè nga tɔ. Ke loon’t nè kuwe, è tam tà se ndu’n ke bòi ede nè:

²⁴ – Ké usi ri ra jé’t wa? I Jésu ke Nazareth. Ké i ree le tuju jè kɔke ta wa? Man m’geri mbak, i i ke njè maje kɔr njêt le Nube.

²⁵ Jésu in se ndil ke majelé ndáng’n ede nè: – Ade asi, unde loo i tee kêm dingem’t nè kɔke.

²⁶ Ndil ke majelé sure dingem nè mbangang-mbangang a, ade non ɓerer-ɓerer ɓita unde loo tee kêmn’t ɓai.

²⁷ Ndil dooge malang tee an-in soin-soin ade deji nan tà edi nè: – Ké nyan nè nga è ri wa? E nyan-ndó ke gai se tɔgmong ke in ra Nube’t. Ndilge ke majelé géa Jésu on de njanm-njanm ade ulei dè de adii.

²⁸ Ke loon’t nè kuwe, kɔbe nyan ke Jésu ra nga oso se loo mbit mbit kêm ɓeekon ke Galilée bere mbak.

Jésu ɔr ratur ra dooge’t bule

²⁹ Loo ke Jésu unde loo tee nata kêm kei kebe nan’t ɓaa, ke loon’t nè kuwe è se Jacques se Jean, awi kêm kei le Simon se André.

³⁰ Wum Simon ke dinye tò nang se ratur. Ra’n taa por làm-làm. Ke loon’t nè kuwe, dé ree d’ede Jésu tà’n.

³¹ Jésu aw rann’t, uwe ji’n ute’n dɔ. Ra’n ke taa làm-làm nga in kengeng. E unn gir ra nyan kuse ade de.

³² Tà loo sɔlé, loo ke kàde ur ɓá ɓaa, d’oto njératurge malang se njé ke ndilge ke majelé rai kum de ndoo dé ree se de som-som ra Jésu’t.

³³ Dooge ke kêm ɓee-bò’t nè bere mbak kebi nan tàbit kei rebe’t.

³⁴ Jésu ɔr ratur ra njératurge’t ke raturge gai-gai rai kum de ndoo. E rɔ ndilge ke majelé kɔke bule kêm dooge’t. E inye loo ade ndilge ke majelé tami tà lé, tede ei nè nga geri Jésu mbak.

Jésu ile mber guguru’n kêm ɓeekon ke Galilée

³⁵ Tà gir loo’t, loo ke loo ar lé ɓai, Jésu in gir ɓi’t unde loo tee kêm kei aw ngang loo’t nata. E unn gir kɔje tà se Nube.

³⁶ Simon se njé ke ei se’n ndolèi go Jésu.

³⁷ Loo ke ingei nin deĵ ɓá ɓaa, edi nin edi nè: – Dooge malang sangi nin.

³⁸ Jésu ede de nè: – Ade j’awi kêm ɓeege ke rang ke tooi kɔte nan’t nè, le kade m’ile mber tà le Nube tutu tɔ. E tede è ke nè á m’unde loo m’tee’n kêm ɓee-bò’t.

³⁹ Jésu aw ile mber kêm kei kebe nange’t le de ke ɓeekon ke Galilée bere mbak. E rɔ ndilge ke majelé kɔke a tɔ.

Jésu ɔr banje ra dingem karé’t

⁴⁰ Dingem karé ree ra Jésu’t. E ɔse keje’n nang nonn’t, ndête’n ɓɔk-ɓɔk ede nè: – Kɔkrɔ karè, ke nè á i ndige se’m le kade banje ɔr ram’t ndát-ndát ɓaa, ram à tel tò karè ndát-ndát kuwe tɔ.

⁴¹ Jésu an kumndoo le dingem ke njèbanje. E ule ji’n ɔde’n ra njèbanje, ede’n ede nè: – M’ndige bè kuwe, maje kade rai tel tò karè ndát-ndát.

⁴² Ke loon’t nè kuwe, banje ɔr ra dingem’t nè nga nyonk.

⁴³ Jésu ede’n tàge ke rang ngain ɓita inye’n ade aw ɓai.

⁴⁴ Go’t gugu, è ede dingem ke banje ɔr rann’t nga ede nè: – I tam tà nè nga ade doo karé bè géa oo lé nè aw ra njèkuje nyan-mese’t, i tɔje’n rai ade an. Go’t ɓita unn nyan-noje ade se go gute-ndu ke Moise ndang. Titeke bè á i tɔje’n njékuje nyan-mesege titeke banje ɔr rai’t ɓá ta.

⁴⁵ Nè loo ke dingem nè ɔte aw ɓaa, è unn gir kɔrgir nyan ke tee nè nga ase’n loo nák-nák. Gir’n ke nè á Jésu ase kum kaw ɓee-bò’t tàkum dooge’t ndái-ndái lé. E ndi ngang loo’t nata nè dooge in-in se loo-loo reei rann’t som-som.