Lookilera’n 4 - Nouveau Testament en Gulay 2004

Dooge ke danrán ilei riɓar dè Kuwe-ɓee’t

¹ Go nyange’t nè nga ɓaa, m’an tàbit kei karé ke danrán teen. M’oo ndu doo ke ndɔ ke tam se’m tà nga ɓar tite burunju bè. Doo nè nga tam se’m ede nè: «Al ke ram’t nè ade’m tɔji nyange ke à reei kuti go nyange nè nga gar-gar.»

² Ke loon’t nè kuwe, Ndil lá’m mêtch uwe’m ɓaa, m’an kutu-ngar karé ke d’unde kem̂ danran’t. Doo karé ndi dè kutu-ngar’t nè nga.

³ Doo ke ndi dè kutu-ngar’t nga ra’n ndoin kein-kein asenan se herge ke ɓal ke ri de nè Jaspe se Sardoine. Munde-ba ke ndul turuk-turuk tite her ke ri’n nè Emeraude bè an-in dè kutu-ngar’t nè nga ulei nan’t wàk.

⁴ Dé tunde kutu-ngarge ke rang kɔr-joo-gidé-sɔ d’an-in’n dè kutu-ngar ke karé nè nga d’ule nan’t wàk. Ngatɔgege kɔr-joo-gidé-sɔ tulei kubuge ke nda káng-káng a, tulei jɔkɔ tête rɔ ke dé ra se nar-ɔr dè de’t ndii dè kutu-ngarge’t nè nga tɔ.

⁵ Ndu doo ɓar beng-beng a, ndi têl a, ndang a tɔ, tu kutu-ngar ke karé ke madege an-in dè’n ulei nan’t nga. Lampege ji sejimute ndogói kotong non kutu-ngar’t nè nga. Lampege ke ji sejimute nga ei Ndilge ke ji sejimute le Nube.

⁶ Ba-bò kate karé ke unju njai-njai tite nyan karé ke ri’n nè Cristal bè tò non kutu-ngar’t nè nga tɔ. Nyankundege sɔ ndai dann kutu-ngar’t danné bɔp a, ndai ngangé-ngangé a tɔ. Nyankundege ke sɔ nè nga kum de bule nan ndari-ndari non de’t a, go de’t a tɔ.

⁷ Nyankunde ke desêin tanan se toboi, njèkon’t joo tanan se ngonn mang, njèkon’t mute ɓaa, kum’n tanan se kum doo, njèkon’t sɔ ɓaa, tanan se kiro ke nel bage’n bè.

⁸ Nyankundege ke sɔ nè nga awi se bage de mute-mute karé-karé malang, kum de bule ndari-ndari dè bage de’t se gir bage de’t a tɔ. Loo taa kebe le de goto sár. Ndɔɔ a, kada a, ɔsi pa ilei riɓar dè è ke ndi dè kutu-ngar’t edi nè: «Njè tò se ninn’n, njè tò se ninn’n, njè tò se ninn’n nga è Kuwe-ɓee Nube ke Njètɔgmong ke dum dè loo, è ke njè ndi tutu kété mari sár ɗarinè a, ndi à ree sei non a tɔ.»

⁹ E ke njè ndi dè kutu-ngar’t se lo’n-lo’n sár se non nga, dange ke sɔ nè ulei ndubra se riɓar dènn’t a, rai nin oiyo a tɔ.

¹⁰ Ngatɔgege ke kɔr-joo-gidé-sɔ nè nga ɔsi keje de nang non è ke ndi dè kutu-ngar’t. Ngatɔgege nè nga ulei dè de nang ɗɔyi njèndi kumgajer sár se non nga. Dé tɔr jɔkɔ tête rɔ le de d’um nang non kutu-ngar’t d’ede nè:

¹¹ «Kuwe-ɓee Nube le jé, i asekum kinge ndubra se riɓar a, se tɔgmong a tɔ. E i kuwe á i njèkunde nyange malang. E se go kem̂ndige lei i kuwe á unde’n nyange malang ade tooi tutu.»